Людмила Иванова архивӗнчи сӑнӳкерчӗк

Испанире пурӑнакан кил хуҫи хӗрарӑмӗ апат-ҫимӗҫ хатӗрлеме тӑрсан чӑваш тӗрриллӗ саппун ҫакать. Ӑна чӑваш хӗрӗ Людмила Иванова парнеленӗ.

Людмила Иванова чылай ҫул ӗнтӗ мӑшӑрӗпе Бельгири Брюссель хулинче пурӑнать. Ентешӗмӗрӗн упӑшки — Испани ҫынни. Ҫавна май вӗсем упӑшкин тӑван тӑрӑхӗнче час-часах пулаҫҫӗ.

«Упӑшка Испани ҫынни пулнӑран эпир мӗнпур уява Мадридра пухӑнатпӑр. Уявсене эпир ҫемьепе тата туссемпе палӑртатпӑр. Ака уйӑхӗнче тӑван тӑрӑхра пулнӑ чухне эпӗ чӑваш тӗрриллӗ саппун туянтӑм, ӑна Мадридри хамӑр кӳршӗ хӗрарӑмне парнелерӗм», — каласа кӑтартрӗ ҫак йӗркесен авторне Людмила.

Людмила, сӑмах май каласан, аякра пулсан та Тӑван ҫӗршыва, ҫуралнӑ кӗтесне, тӑван халӑхӗн йӑли-йӗркине сума суса тата пысӑка хурса хакласа пурӑнать.