Паян 13 сехет ҫурӑра Ҫӗрпӳ хули ҫывӑхӗнче, М-7 федераци ҫулӗ ҫинче авари пулнӑ.
Малтанлӑха ҪҪХПИ пӗлтернӗ тӑрӑх, «Рено Дастер» хирӗҫ ҫул ҫине тухса кайнӑ та фурӑпа ҫапӑннӑ. Ҫӑмӑл машинӑри водитель тата пассажир аманнӑ. Вӗсене пульницӑна илсе кайнӑ.
Авари вырӑнӗнчен иртсе каякансем пӗлтернӗ тӑрӑх, ҫакна пула Ҫӗрпӳ хулинчен пуҫласа Сӑнав поселокӗ таран пӑкӑ пухӑннӑ.
Чӑваш чӗлхи кунне халалласа Чӑваш патшалӑх пукане театрӗнче Чӑваш чӗлхи эрни иртӗ. Вӑл ака уйӑхӗн 24-30-мӗшӗсенче пулӗ.
Эрне ака уйӑхӗн 24-мӗшӗнче «Машукпа Мишук» спектакль кӑтартӗҫ. Ӑна В. Швембергер ӗҫӗпе лартнӑ.
Спектакле театр ака уйӑхӗн 24 тата 25-мӗшӗсенче 12 сехетре, 27-мӗшӗнче 15 сехетре кӑтартӗҫ.
Ака уйӑхӗн 30-мӗшӗнче «Санӑн йыхравна эпӗ илтрӗм» моноспектакль пулӗ. Унӑн авторӗ – Ольга Туркай.
Ӗнер каҫхине, ака уйӑхӗн 17-мӗшӗнче, Ҫӗнӗ Шупашкарта темӗнле ҫынсем троллейбуса пенӗ. Ҫав вӑхӑтра транспортра ҫын нумай пулнӑ.
Троллейбус ҫав самантра Винокуров урамӗнчен Строительсен урамне пӑрӑнма тӑнӑ. Палламан ҫынсем пенӗ хыҫҫӑн транспортӑн кантӑкӗ ҫӗмӗрӗлнӗ. Юрать-ха, ҫынсем аманман.
Хальлӗхе ку пӑтӑрмах пирки урӑх нимӗн те пӗлтермен.
Канашра арҫын 5-мӗш хутран персе аннӑ. Кун пирки «Про Город» хаҫата халӑх корреспонденчӗ пӗлтернӗ.
Ку 14 сехетре Машиностроительсен урамӗнчи 37-мӗш ҫуртра пулнӑ. Ҫурт умне васкавлӑ медпулӑшу, пушарнӑйсем, полицейскисем ҫитнӗ.
Ҫакна курнӑ ҫынсем каланӑ тӑрӑх, арҫын балкон ҫинче телефонпа калаҫса тӑнӑ. Ӑнсӑртран вӑл пуҫхӗрлӗ персе аннӑ. Юрать-ха, аялта улмуҫҫи пур. Арҫын ҫавӑн ҫине персе анса чӗрӗ юлнӑ. Пуҫне амантнӑскере тухтӑрсем илсе кайнӑ.
Кӗҫӗр Каҫал тӑрӑхӗнче ҫул ҫинче инкек пулса иртнӗ. Ҫул-йӗр хӑрушсӑрлӑхӗн инспекторӗсем малтанласа палӑртнӑ тӑрӑх, ҫула тухнӑ пӗр машина водителӗ ҫывӑрса кайнӑ та хирӗҫ килмелли ҫул ҫине тухса кайса тепӗр машинӑпа ҫапӑннӑ.
«Audi» автомобиль рульне 22 ҫулти каччӑ тытса пынӑ. 1 сехет те 44 минутра вӑл А-151 ҫул ҫинче хирӗҫ килмелли ҫул ҫине тухса кайса «ВАЗ-2114» автомобильпе пырса ҫапӑннӑ. Хамӑр ҫӗршывра туса кӑларнӑ автомобилӗн 30 ҫулти водителӗ вилнӗ тата 33-ри пассажир йывӑр аманнӑ.
Ака уйӑхӗн 13-мӗшӗнче 23 сехет ҫурӑра Элӗк муниципаллӑ округӗнче «Никольски - Етӗрне - Нурӑс» ҫул ҫинче мотоцикл аварие лекнӗ.
19 ҫулти каччӑ «Ирбис» мотоциклпа пынӑ чухне руле итлеттереймен - кювета чӑмнӑ та ҫаврӑнса ӳкнӗ. Унӑн права та пулман. Вӑл пӗччен пулман. Икӗ пассажир, 2009 тата 2010 ҫулсенче ҫуралнӑ хӗрсем, аманнӑ. Вӗсене пульницӑна илсе кайнӑ. Пӗрне киле янӑ. Водителе те пульницӑна вырттарнӑ.
Шупашкарта ака уйӑхӗн 12-мӗшӗнче кӑнтӑрла 9 ҫулти арҫын ачана вӗлернӗ. РФ Следстви комитечӗн Чӑваш Енри следстви органӗсем кун тӗлӗшпе пуҫиле ӗҫ пуҫарнӑ.
Следстви ачана кукамӑшӗ пӑвса вӗлернӗ тесе шутлать. Верси ҫакнашкалтарах: кукамӑшӗпе мӑнукӗ хваттерте пулнӑ (унта ача, унӑн амӑшӗ тата кукамӑшӗ пурӑннӑ). 61 ҫулти кукамӑшӗ тахӑш самантра мӑнукне пӑвса вӗлернӗ. Кун хыҫҫӑн вӑл килтен тухса кайнӑ. Ӑна полицейскисем дачӑра тытса чарнӑ. Амӑшӗ ӗҫрен таврӑнсан ача виллине тупнӑ.
Мӑнукне мӗншӗн вӗлернӗ? Следстви ҫакна уҫӑмлатать. Малтанлӑха пӗлтернӗ тӑрӑх, хӗрарӑма ача хӑйне мӗнле тытни килӗшмен.
Следстви суда хӗрарӑма следстви вӑхӑтӗнче хупма ыйтса тавӑҫ тӑратнӑ.
Шупашкарти пӗр хӗрарӑм ҫак кунсенче икӗ хутчен Тав хутне тата парнелӗх сехете тивӗҫнӗ. Маларах Елена Патласовӑна Чӑваш Ен Элтеперӗн Олег Николаевӑн Тав хутне панӑ тата регионти суйлав комиссийӗ ячӗпе алла ҫыхмалли сехет парнеленӗ.
Елена Патласова пуш уйӑхӗнче иртнӗ Президент суйлавӗн вӑхӑтӗнче суйлав комиссийӗн пайташӗ пулнӑ. Вӑл хулари 53-мӗш шкулта участокра пулнӑ. Пуш уйӑхӗн 15-мӗшӗнче участокра пырса кӗнӗ пӗр хӗрарӑм бюллетень ямалли ещӗке чӗртсе яма тӑнӑ. Анчах ҫавна Елена Патласова вӑхӑтра асӑрханӑ.
Паян хӗрарӑма Чӑваш Енӗн Шалти ӗҫсен министерствин Тав хучӗпе чысланӑ.
Паян Шупашкарта пӗр арҫын хӗрарӑма ҫӳҫрен тытса сӗтӗрнӗ. Пӑтӑрмах Бзаа проездӗнче пулса иртнӗ.
«Land Cruiser М407МК 21рус» машина водителӗ ҫамрӑк хӗрарӑма машинӑран тӗксе кӑларса янӑ, унтан ӑна ҫапнӑ, кайран ҫӳҫӗнчен тытса ҫӗр тӑрӑх сӗтӗрнӗ, унтан вӑйпа машинӑна кӗртсе лартнӑ.
Cheb.ru пӗлтернӗ тӑрӑх, право хуралӗн тытӑмӗнче ӗҫлекенсем малтан машинӑна тупнӑ. «Лэнд Крузер» авомобиль коопераци институчӗ ҫывӑхӗнчи ҫӗр айӗнчи паркингра ларнӑ. Кӗҫех арҫынна та тытса чарнӑ. Вӑл ҫав вӑхӑтра урама ачапа уҫӑлма тухнӑ.
«Ҫыхӑнура» форума малтанласа пӗлтернӗ тӑрӑх, шар курнӑ хӗрарӑм — арҫыннӑн гражданла арӑмӗ. Арҫын унччен Чӑваш Енӗн Патшалӑх Канашӗн депутачӗн пулӑшуҫи пулнӑ.
Ака уйӑхӗн 8-мӗшӗнче Улатӑр муниципаллӑ округӗнчи Стемас ялӗнче 64 ҫулти арҫын сарӑмсӑр вилнӗ. 19 сехет те 25 минутра унӑн килӗнче пушар пуҫланнӑ.
Ҫулӑм пӳрт тӑррине, шалти отделкӑна сиенлетнӗ. Пушар 45 тӑваткал метр лаптӑк ҫинче алхаснӑ.
Шел те, инекре кил хуҫи, 64 ҫулти арҫын, вилнӗ. Халӗ ҫулӑм мӗнрен тухнине тӗпчеҫҫӗ.
+12.3 °C