Улатӑрта пурӑнакан 31 ҫулти хӗрарӑм палламан ҫынсемпе телефонпа калаҫса 1,5 миллион тенкӗ ҫухатнӑ.
Вӑл палламан ҫынсемпе икӗ эрне калаҫнӑ. Лешсем ӑна 1 миллион та 413 пин те 400 тенкине темӗнле инвестицисене хывма ӳкӗте кӗртнӗ. 1 миллиона яхӑн тенкине вӑл кредит илнӗ, ыттине пӗлӗшӗсенчен кивҫен ыйтнӑ. Палламан ҫынсем татах та татах укҫа ыйтнӑ, тупӑша вара пама васкаман. Ҫавӑн чухне тин хӗрарӑм ултавҫӑсен аллине лекнине ӑнланнӑ. Вӑл нарӑс уйӑхӗн 17-мӗшӗнче полицие пырса заявлени ҫырнӑ.
Шупашкарта пурӑнакан арҫын ӗҫсӗрлӗх пособине суйса илсе тӑнӑ.
Хулари Мускав районӗн прокуратури тӗрӗслев ирттернӗ те, 2021 ҫулхи авӑн уйӑхӗнче Ӗҫпе тивӗҫтерекен центрта регистрациленнӗ арҫын ӗҫе вырнаҫсан та пособи илсе тӑнине палӑртнӑ. Ҫавӑн пек майпа вӑл 2021 ҫулхи чӳк уйӑхӗнчен пуҫласа 2022 ҫулхи пуш уйӑхӗччен укҫа илсе пурӑннӑ.
Халӗ арҫын тӗлӗшпе РФ Пуҫиле кодексӗн 159.2 статйин 1-мӗш пайӗпе пуҫиле ӗҫ пуҫарнӑ.
Шупашкар муниципаллӑ округӗнче вырнаҫнӑ коммерци организацийӗн гендиректорӗ тӗлӗшпе пуҫиле ӗҫ пуҫарнӑ.
РФ Следстви комитечӗн Чӑваш Енри управленийӗнче пӗлтернӗ тӑрӑх, пуҫлӑха РФ Пуҫиле кодексӗн 145.1-мӗш статйин 2-мӗш пайӗпе килӗшӳллӗн явап тытарасшӑн.
Тӗпчевҫӗсем шухӑшланӑ тӑрӑх, организаци счёчӗ ҫинче укҫа пур пулин те 2022 ҫулхи авӑн уйӑхӗнчен пуҫласа 2024 ҫулхи нарӑс уйӑхӗччен пӗр ӗҫчен умӗнче ӗҫ укҫипе 250 пин тенкӗ парӑм пухса янӑ.
Патӑрьелте пурӑнакан 45-ри хӗрарӑм 5 ҫулти ывӑлӗшӗн алимент тӳлемен. Куншӑн вӑл тӳрленмелли ӗҫре те тӑрӑшнӑ. Анчах пурпӗрех парӑма татма васкаман. Тӳрленмелли ӗҫне вӑл сӑлтавсӑр тухман.
Кун хыҫҫӑн ӑна колони-поселение 23 кунлӑха янӑ. Унта ларнӑ хыҫҫӑн та хӗрарӑм алимент тӳлемен. Кун хыҫҫӑн ун тӗлӗшпе пуҫиле ӗҫ пуҫарнӑ. Вара тинех хӗрарӑм ачи умӗнчи парӑма – 130 яхӑн тенке – тӳлесе татнӑ.
Шупашкарта юбилейлӑ банкнотӑсене пама пуҫланӑ. Аса илтерер: вӗсене Шупашкар 555 ҫул туларнине халалласа кӑлараҫҫӗ. Унта хулари паллӑ вырӑнсене сӑнлаҫҫӗ.
Ҫак юбилейлӑ укҫана тӗп хулари Андреевсем тивӗҫнӗ. Вӗсем Калинин район администрацийӗн ЗАГС пайӗнче хӑйсен пӗремӗш ачине регистрациленӗ, ӑна Мия ят панӑ.
Мӑшӑр ачи Шупашкар хулин юбилейлӑ ҫулӗнче ҫуралнӑшӑн савӑннӑ.
Сӗнтӗрвӑрри муниципаллӑ округӗнче нарколаборатори йӗркеленӗ 32 ҫулти арҫынна суд тунӑ. Ӑна ҫирӗп режимлӑ колоние 7 ҫул ҫурӑлӑха ӑсатма йышӑннӑ, укҫине патшалӑх валли туртса илнӗ.
Вӑл, Мускав арҫынни, пӗлтӗр харпӑр ҫуртра лаборатори йӗркеленӗ. Йӗрке хуралҫисем пӳрте ухтарсан хими оборудованине, наркотик туса кӑлармалли прекурсорсене туртса илнӗ. Ҫавӑн пекех 8 килограмм ытла наркотик тупнӑ. Ку кӑна мар, арҫын наркотик сутса тупӑш тунӑ 1 миллион тенкӗ те йӗрке хуралҫисен куҫӗ тӗлне пулнӑ.
Шупашкар хулинче 9 ҫулти ача хӑйӗн ашшӗ ячӗпе микрозайм илнӗ, ӑна вӑл ултавҫӑсене куҫарса панӑ.
Виҫҫӗмӗш класра вӗренекен арҫын ача онлайн-вӑйӑ валли виртуаллӑ валюта туянас тенӗ. Интернет-платформӑсенчен пӗринче вӑл видео пӑхнӑ, ун айӗнче ҫамрӑк вӑйӑҫа илӗртмелле каҫӑ пулнӑ. Ҫавӑнта кӗрсе кайса ача мессенджерсенчен пӗринчи чата лекнӗ.
Унта ӑна вӑйӑ валюти туянма сӗннӗ. Каланине итлесе ача хӑйӗн ашшӗ ячӗпе кивҫен укҫа илсе 54 пин тенке ют счет ҫине куҫарса панӑ.
Кӑҫал федераци проекчӗпе килӗшӳллӗн Сӗнтӗрвӑрри тата Канаш хулисене хӑтлӑх кӗртӗҫ. Ку тӗллевпе 229,8 миллион тенкӗ уйӑрӗҫ.
Канаш хулине 135,5 миллион тенкӗ лекӗ. Ку укҫапа чукун ҫул вокзалӗ тата автовокзал хушшинчи территорие хӑтлӑлатӗҫ. Сӗнтӗрвӑрринче вара Патшалӑх тӑвне тата ун патне илсе ҫитерекен ҫула илем кӳрӗҫ. Кун валли 94,3 миллион тенкӗ уйӑрӗҫ.
Ҫӗнӗ Шупашкарта пурӑнакан 86 ҫулти кинемей пакунлисенчен пулӑшу ыйтнӑ. Вӑл вӗсене каласа кӑтартнӑ тӑрӑх, ун патне палламан ҫын шӑнкӑравланӑ, хӑйӗнпе право хуралӗн тытӑмӗнче ӗҫлекен тесе паллаштарнӑ. Хайхискер кинемее алӑри укҫана банка илсе кайса тӗрӗслемелле тесе ӗнентернӗ.
Укҫа патне пӗр ҫамрӑк пынӑ. Ватӑ ҫын ӑна 340 пин тенке тыттарса янӑ. Укҫана каччӑн ултавҫӑсене куҫарса памалла пулнӑ. Анчах ҫапла тума май килмен. Кун хыҫҫӑн вӑл куратора шӑнкӑравласа пӗлтернӗ. Хайхискер каччӑ патне пултаруллӑ ӗҫчене ярса пама шантарнӑ. Каччӑ патне иккӗн пынӑ та укҫана илсе кайнӑ.
Ҫакӑн хыҫҫӑн каччӑ каллех куратор патне шӑнкӑравланӑ. Лешӗ ӑна полицие пӗлтерме сӗннӗ.
Халӗ 18 ҫулти каччӑ тӗлӗшпе пуҫиле ӗҫ пуҫарнӑ. Пакунлисем кинемее шар кӑтартнӑ ытти ҫынна та шыраҫҫӗ.
Шупашкарти 32-ри хӗрарӑм Леонардо Ди Каприопа курнӑҫма ӗмӗтленнӗ. Тӗнче тетелӗнче унпа ҫыхӑнас тесе комментарисем хӑварнӑ, ҫырусем янӑ. Кӗҫех ун патне электронлӑ ҫыру килнӗ, Ди Каприоран-мӗн. Актер ӑна юратнине пӗлтернӗ. Вӗсем 5 уйӑх хутшӑннӑ.
Кайран ӑна суперфанатсен йышне кӗме сӗннӗ, ҫапла актерпа видео урлӑ калаҫма пулать иккен. Анчах ку укҫалла-мӗн. Хӗрарӑм 80 пин тенкӗ кредит илсе куҫарса панӑ.
Анчах вӑл ултавҫӑсемпе калаҫнине чухламан.
Хайхи «актер» видео урлӑ чӑнах та шӑнкӑравланӑ. Анчах - пӗр ҫеккунтлӑха кӑна. Хӗрарӑм ӑна курса та юлайман.
Кайран вӗсем малалла ҫырӑннӑ. «Леонардо ди Каприо» Шупашкара килме шантарса ҫул укҫишӗн тӳлеме ыйтнӑ. Ӑна каялла тавӑрса парать имӗш. Ҫавӑн чухне тин 32-ри хӗрарӑм вӑл Голливуд ҫӑлтӑрӗпе мар, ултавҫӑпа калаҫнине ӑнланнӑ.
+12.3 °C