Авӑн уйӑхӗн 11-мӗшӗнче Шпуашкар хулинчи пӗр хӗрарӑм япаласене балконтан пеме тапранса кайнӑ. Пӑтӑрмах ирхи 4 сехет тӗлӗнче пулса иртнӗ.
Хӗрарӑм япаласем пенине ҫӑлавҫӑсене пӗлтерекен пулнӑ. Вӗсем хулари Энгель урамӗнче пурӑнакан хӗрарӑм патне пырса ҫитнӗ. Вӗсем «Умелец» хатӗрпе алӑка уҫса кӗнӗ.
Хӗрарӑм патне ҫӑлавҫӑсем васкавлӑ пулӑшу тухтӑрӗсене чӗнсе илнӗ. Балконтан япаласем перекен хӗрарӑм, ҫынсем шухӑшланӑ тӑрӑх, сывах мар.
Шупашкарти йӗрке хуралҫисем Мари Элти арҫынсем тӗлӗшпе пуҫарнӑ пуҫиле ӗҫе суда ярса панӑ.
Кӳршӗллӗ регионти 24, 30 тата 35 ҫулсенчи арҫынсене ҫынсене вӑрланӑшӑн, ҫаратнӑшӑн, пусахласа укҫа тапӑннӑшӑн, паспорт вӑрланӑшӑн, наркотик упранӑшӑн явап тыттарӗҫ.
Тӗпчевҫӗсем палӑртнӑ тӑрӑх, 2020 ҫулхи ҫурла тата авӑн уйӑхӗсенче Чӑваш Енри хӗрсемпе укҫалла ар ҫыхӑнӑвне кӗнӗ, унтан вӗсен хӑйсем патне лартса тухса кайнӑ. Хӑйсемпе йӗрке хуралҫисем тесе паллаштарнӑ, мӗнпе аппаланса пурӑннине пӗлтерес килмесен укҫа пама ыйтнӑ. Ӳтне укҫалла сутакансенчен пӗри 45 пин тенкӗ тыттарнӑ, тепри — 70 пин. Хӗрсен сумкинчи хаклӑ япаласене те ҫаратнӑ. Пӗринне 48 пин ытла тенкӗлӗх шар кӑтартнӑ, теприне — 11 пин ытлалӑх. Пӗри паспортсӑр тӑрса юлнӑ.
Мари Элти арҫынсене Шупашкарти тепӗр хӗртен 300 пин тапӑннӑ чухне банк уйрӑмӗсенчен пӗри патӗнче тытса чарнӑ. 24-ри каччӑ ҫумӗнче марихуана пулнӑ.
Авӑн уйӑхӗн 12-мӗшӗнче Шупашкарти кӳлмекре урамра баскетболла вылямалли центра савӑнӑҫлӑ лару-тӑрура уҫнӑ. Ӑна пӗр банк пулӑшнипе хута янӑ.
ЧР Элтеперӗ Олег Николаев ҫак центр тӗнче шайӗнчипе килӗшсе тӑнине палӑртнӑ, ҫавна май унта кирек мӗнле ҫанталӑкра та ӑмӑртусем ирттерме пулать. Унашкал вырӑн Чӑваш Енре тек ҫук.
Кунашкал центрта кирек кам та Олимп вӑййисен спорт тӗсӗпе ӑсталӑхне туптама пултарать. Кунта классика баскетболӗпе те ӑмӑрту ирттерме май пур.
«ЭКРА» ӑслӑлӑхпа производство предприятийӗ «Реальные пацаны» евӗрлӗ фильм ӳкернӗ. Предприятин Инстаграмри страницинче фильмӑн премьерине авӑн уйӑхӗн 10-мӗшӗнче вырнаҫтарнӑ, унччен вара видеоанонспа паллаштарнӑччӗ.
Мини-сериала «ЭКРА» компанин 30 ҫулхине халалланӑ. Фильмри тӗп сӑнара «Реальные пацаны» сериалта ӳкерӗннӗ Николай Наумов калӑпланӑ. Вӑл Николай Токова сӑнарлать. Канашри Николай Токов предприятие аслӑ шкул пӗтерсенех, 8 ҫул каялла, вырнаҫнӑ. Николай маркетинг пайӗнче ӗҫлет.
Сериалта ӳкерӗннисенчен 90 проценчӗ — компани ӗҫченӗсем. 7 сери вӑхӑтӗнче Мускаври event-агентствӑпа «ЭКРА» предприятин ӗҫченӗсем компанин юбилейне хатӗрлесе ирттерессине хӑйсем ҫине илессипе тупӑшаҫҫӗ.
Ӑшӑ хӑҫан парӗҫ. Шупашкар ҫыннисен хваттерте тата нумай вӑхӑт шӑнмалла-и? Хула ҫыннисемшӗн ку ыйтусем халӗ чи пӑшӑрхантараканнисем.
Шупашкар хула администрацийӗн хваттерсене хӑҫан ӑшӑ парассине пӗлтернӗ. Авӑн уйӑхӗн 15-мӗшӗнче ӑшӑ пама пуҫлӗҫ. Ытарикун каҫхине социаллӑ объектсене тата пурӑнмалли ҫуртсене ӑшӑ ҫитме тытӑнӗ.
«Ку йышӑнӑва хула службисемпе пӗрле эрне тӑршшӗпе мӗнле ҫанталӑк тӑрассине шута илсе турӑмӑр. Сывлӑш температури вӑтамран 8 градусран ӑшӑрах пулмӗ», - тенӗ хула администрацийӗн пуҫлӑхӗ Алексей Ладыков.
Чӑваш Енӗн юстици министрӗнче тӑватӑ ҫул тӑрӑшнӑ Наталья Тимофеева Совет Союзӗн Геройӗ А.В. Кочетов ячӗллӗ Федерацин Атӑлҫи округӗнчи Чӑваш кадет корпусне ертсе пыма тытӑннӑ. Унччен вӑл ҫулталӑк ытларах Шупашкар районӗн администрацийӗн пуҫлӑхӗн ҫумӗнче ӗҫленӗ.
Наталья Тимофеева Чӑваш Республикин тава тивӗҫлӗ юрисчӗ шутланать, ӑна «Чӑваш Республики умӗнче тава тивӗҫлӗ ӗҫсемшӗн» медаль орденӗпе чысланӑ.
Наталья Юрьевна 1979 ҫулхи раштав уйӑхӗн 7-мӗшӗнче Приморье тӑрӑхӗнче ҫуралнӑ. И.Н. Ульянов ячӗллӗ Чӑваш патшалӑх университетӗнче «юриспруденци», «хими» специльноҫсене алла илнӗ. «Чӑвашторгтехника» организацире юрисконсульт, пай пуҫлӑхӗ пулнӑ, кайран ЧР Культура министерствинче консультант-юристра, тӗп специалистра, пай пуҫлӑхӗнче тӑрӑшнӑ. 2011-2015 ҫулсенче Чӑваш Енӗн Пурлӑх хутшӑнӑвӗсен министерствинче тимленӗ, унта министр ҫумӗ таран вырӑн йышӑннӑ. 2015 ҫулхи юпа уйӑхӗнче Чӑваш Енӗн Пурлӑх тата ҫӗр хутшӑнӑвӗсен комитетне ертсе пыма тытӑннӑ, комитетран министерство туса хунӑ хыҫҫӑн министр пуканне йышӑннӑ. Кайран ӑна министр тивӗҫӗнчен хӑтарнӑ.
Шупашкарти Андриян Николаев ячӗллӗ паркри «Ковчег» зоокӗтесре пурӑнакан макака юбилейне паллӑ тунӑ. Маруся ятлӑскер 30 ҫул тултарнӑ.
Макакӑсем 15-20 ҫул кӑна пурӑнаҫҫӗ Анчах ҫак упӑтесене лайӑх пӑхсан вӗсен пурнӑҫӗ вӑрӑмланать, 30-35 ҫул таранах ҫитееҫҫӗ.
Зоокӗтес ӗҫченӗсем палӑртнӑ тӑрӑх, Маруся питӗ ӑслӑ упӑте. Ӑна ҫаралнӑ кунӗнче савӑнтарас тесе уяв сӗтелӗ хатӗрленӗ: грейпфрут, арпус тата хӑяр ҫитернӗ.
Шупашкарта «Сывлӑх хумӗ» теплоход чарӑнӗ. Унпа тухтӑрсен бригади килет. Вӗсемпе пӗрле хальхи йышши хатӗр-хӗтӗр те пур.
Паллӑ медицина учрежденийӗсен тухтӑрӗсем Чӑваш Енри ача-пӑча сывлӑхне тӗрӗслӗҫ. Вӗсем патне йывӑр диагнозлӑ пациентсем лекӗҫ. Анчах списокпа килӗшӳллӗн ҫеҫ йышӑнӗҫ. Вӗсем патне ҫырӑнас тесен малтан вырӑнти педиатр е профильлӗ специалист патне каймалла.
Теплоход Шупашкарта авӑн уйӑхӗн 12-мӗшӗнче 13 сехетре чарӑнӗ. Тухтӑрсем кунта 19 сехетчен пулӗҫ.
Паян, аван уйӑхӗн 10-мӗшӗнче, ирхине Шупашкарта авари пулнӑ. Чутах шкул ачин пурнӑҫӗ татӑлман. Юрать-ха, инкек лайӑхпа вӗҫленнӗ.
Паян ирхине Октябрь 50 ҫул тултарнине халалланӑ урамра автокран ҫул урлӑ каҫакан шкул ачи ҫине кӗрсе кайнӑ. Ача «Мега Гелекси» патӗнче утнӑ.
Ҫакна курнӑ ҫынсем каланӑ тӑрӑх, арҫын ача 7 ҫулти пек курӑнать. Вӑл велосипедпа пулнӑ. Вырӑна ҪҪХПИ, ҫул-йӗр патруль службин ӗҫченӗсем ҫитнӗ. Васкавлӑ медпулӑшу ачана пульницӑна илсе кайнӑ.
Ҫӗнӗ Шупашкарта икӗ ҫӳп-ҫап контейнерӗ, ача-пӑча каруҫҫелӗ ҫухалнӑ. Ӑҫта кайса кӗнӗ вӗсем? Хулара пурӑнакан ҫын вӑрласа тимӗр-тӑмӑра кайса панӑ иккен.
Ҫурт-йӗр юлташлӑхӗ 1-мӗш май урамӗнчи 27-мӗш ҫурт картишӗнче ҫӳп-ҫап контейнерӗсем, каруҫҫельсем ҫухални пирки полицие пӗлтернӗ. Вӗсем ҫак япаласене кам тиесе тухса кайнине те каланӑ, машина номерне пӗлтернӗ. Ҫав арҫын 55 пин тенкӗлӗх пурлӑх вӑрласа кайнӑ.
Арҫынна тытса чарнӑ. Вӑл Ҫӗнӗ Шупашкарта пурӑнаканскер, 56 ҫулта, унччен судпа темиҫе хутчен айӑпланнӑскер. Ун тӗлӗшпе пуҫиле ӗҫ пуҫарнӑ.
+11.1 °C