Ултавҫӑсем пирки темӗн чухлӗ асӑрхаттарсан та вӗсен капкӑнне ҫакланакансем тупӑнсах тӑраҫҫӗ. Чӳк уйӑхӗн 1-мӗшӗнче 74 ҫулти кинемей пакунлисенчен пулӑшу ыйтнӑ.
Ватӑ ҫын патне пӗри банк ӗҫченӗ тесе шӑнкӑравланӑ, эсир карттӑпа ҫыхӑнтарнӑ телефон номерне ылмаштарма заявка паман-и тесе кӑсӑкланнӑ. Кинемей ҫук тесе хуравласан, телефонпа шӑнкӑравлаканни ватӑ ҫыннӑн укҫи хӑрушлӑхра, ӑна шанчӑклӑ счёт ҫине куҫарса хумалла тесе ӗнентернӗ.
Пенсионер ҫапла майпа 1 миллион тенкӗ ытла укҫине такамсене куҫарса панӑ хыҫҫӑн шӑнкӑравлаканни: «Сирӗнпе ӗҫ вӗҫленчӗ. Сирӗн укҫӑр ют ҫӗршыва куҫса кайрӗ», — тесе сӗмсӗррӗн пӗлтернӗ.
Сӑмах май каласан, кинемей кӑҫалхи ҫӗртме уйӑхӗнче пӗрре улталаннӑ. Ун чухне вӑл 10 пине яхӑн тенке такамсене куҫарса панӑ.
Муркаш муниципаллӑ округӗнчи Москакасси ялӗнче пурӑнакан Неонила Белова юпа уйӑхӗн 28-мӗшӗнче 107 ҫул тултарнӑ.
Хӗр пӗрчи нумай ачаллӑ ҫемьере ҫуралнӑ. Ашшӗ ун чухлӗ шӑпӑрлана тӑрантарса ҫитереймест тесе шӑтӑк чавнӑ та тин ҫуралнӑ Неонилӑна унта чикме тӑнӑ. Анчах хӗрачана амӑшӗ ҫӑлнӑ. Ҫавӑн чухне вӑл Неонилӑна вӑрӑм ӗмӗр суннӑ. Унӑн сӑмахӗсем пил пекех пулнӑ - кинемей ав 107-мӗш ҫуралнӑ кунне паллӑ тунӑ.
Шупашкара савута ӗҫлеме кайсан Неонила пулас мӑшӑрӗпе паллашнӑ. Вӑрҫӑ пуҫлансан арҫынна фронта илнӗ. Арӑмӗ ачипе тӑрса юлнӑ.
Неонила Белова ку таранччен амӑшне, икӗ хӗрӗпе пӗр ывӑлне пытарнӑ. Ҫапах малалла пурӑнма вӑй тупать вӑл, мӑнукӗсемпе, кӗҫӗн мӑнукӗсемпе, вӗсен ачисемпе савӑнать. Ун патне кашни кун кинӗ килсе ҫӳрет. Кинемей ӑна хӗрӗ пекех йышӑнать.
Вӑрнар муниципаллӑ округӗнчи Пӑва ялӗнче пурӑнакан Евлампия Филиппова юпа уйӑхӗн 20-мӗшӗнче 100 ҫулхи юбилейне паллӑ тунӑ. Вӑрҫӑ вӑхӑтӗнче хӗре фронта кайма повестка панӑ, анчах шӑпа ӑна унта лекме пӳрмен - Евлампия тылра ырми-канми ӗҫленӗ, пурнӑҫне колхоз ӗҫне халалланӑ.
Вӑрҫӑ хыҫҫӑн вӑл колхозниксем валли апат пӗҫернӗ. Унӑн ҫурчӗ ҫинче «Кунта колхоз передовикӗ пурӑнать» табличка чылай ҫул ҫакӑнса тӑнӑ. Халӗ Евлампия Филиппова 6 мӑнукӗпе савӑнса пурӑнать, вӗсем ӑна пӑхаҫҫӗ.
Хӗрлӗ Чутай районӗнчи Акчикассинче пурӑнакан Перасковья Васюкова юпа уйӑхӗн 10-мӗшӗнче 102 ҫул тултарнӑ.
Унӑн пурнӑҫӗ те тантӑшӗсенни пекех пулнӑ. Вӑрҫӑ ҫулӗсем тата ун хыҫҫӑнхи йывӑр самана. Апла пулин те хӗрарӑм пуҫ усман.
Ҫуралнӑ кунӗнче ун патӗнче Хӗрлӗ Чутайӗнчи халӑхӑн социаллӑ ыйтӑвӗсене тивӗҫтерекен центр ӗҫченӗсем тата вырӑнти тӳре-шара пулнӑ, кинемее ҫуралнӑ кунпа саламланӑ.
Ӗнер, юпа уйӑхӗн 10-мӗшӗнче, Чӑваш Енри виҫӗ кинемей 100 ҫул тултарнӑ.
Вӗсенчен иккӗшӗ, Анна Иванова тата Мария Кручинина, Шупашкарта пурӑнаҫҫӗ, Шемсия Сафина — Патӑрьел муниципаллӑ округӗнчен.
Вӑрҫӑ ҫулӗсенче Мария Христофоровна тата Шемсия Алиулловна фронтра ӗҫленӗ, аслӑ Ҫӗнтерӗве ҫывхартма пулӑшнӑ. Анна Титовна II Прибалтика фронтӗнче ҫарта пулнӑ.
Анна Иванова вӑрҫӑ ҫулӗсенче телейлӗ те вӑрӑм ӗмӗр пирки ӗмӗтленнӗ. Халӗ вара вӑл ҫынсене кӳрентерес марччӗ тесе пурӑнать.
Кинемейсене Телеграмри хӑйӗн каналӗнче республика Элтеперӗ Олег Николаев саламланӑ.
Шупашкарта пурӑнакан Анна Иванова паян, юпа уйӑхӗн 10-мӗшӗнче, 100 ҫул тултарать.
Вӑл Канаш районӗнчи Вӑрман Енӗш ялӗнче ҫуралнӑ. Ҫичӗ класс вӗренсе пӗтерсен фермӑна ӗҫе вырнаҫнӑ. Анчах вӑрҫӑ пуҫлансан ӑна связистсен курсне вӗренме янӑ, кайран салтака илсе кайнӑ.
Вӑрҫӑран аманса таврӑнса ҫыхӑну уйрӑмӗн пуҫлӑхӗнче мӗн тивӗҫлӗ канӑва кайичченех ӗҫленӗ. Мӑшӑрӗпе вӑл 1950 ҫулта ҫемье ҫавӑрнӑ. Виҫӗ ывӑлпа икӗ хӗр ура ҫине тӑратнӑ. Паян вӗсенчен пӗр хӗрӗпе пӗр ывӑлӗ ҫук ӗнтӗ — леш тӗнчене уйрӑлса кайнӑ.
Кинемей Шупашкарти хваттерӗнче пӗчченех пурӑнать. Лавккана та тухса кӗрет, килне те хӑех тирпейлесе тӑрать. Питӗр хулинчи хӗрӗ хӑйӗн патне илсе каясшӑн та, кинемей тӑван тӑрӑхран тухса кайма килӗшмест. Кинемей калпак тата шарф ҫыхса вӑхӑта ирттерет, кӳршӗ-аршӑпа хутӑшать.
«Ҫынпа ҫураҫуллӑ пурӑнмалла», — тет тӑнлавне пас тытнӑ Анна Титовна.
Ҫӗнӗ Шупашкарта пурӑнакан кинемей хӑйӗн банк карттипе такам тавар туяннине сиснӗ. Хӗрарӑм ҫухалса кайман — ҫийӗнчех йӗрке хуралҫисенчен пулӑшу ыйтнӑ.
Пӑтӑрмах пирки кинемей пакунлисене юпа уйӑхӗн 2-мӗшӗнче каҫхине хыпарланӑ.
Хулари патрульпе пост службин ӗҫченӗсем Артем Петров, Иван Кочетов тата Ксения Васильева стажёр такамсем тавара хӑш лавккара туяннине палӑртнӑ хыҫҫӑн ют ҫын карттипе усӑ куракан патне ҫул тытнӑ.
37 ҫулти хӗрарӑм лавккасенче ҫыннӑн банк карттипе 3 пин тенкӗ ытлалӑх тавар туяннӑ иккен.
Хӗрарӑм тӗлӗшпе РФ Пуҫиле кодексӗн 158-мӗш статйин 3-мӗш пайӗпе килӗшӳллӗн ӗҫ пуҫарнӑ.
Ыран, юпа уйӑхӗн 6-мӗшӗнче, Ҫӗрпӳре «кӗмӗл» волонтёрсен форумӗ иртӗ. «Кӗмӗл Чун» ят панӑ мероприятие Чӑваш Енре кӑҫалхипе иккӗмӗш хут йӗркелеҫҫӗ. Республикӑри хастар ватӑсем пӗлтӗр Шупашкарта пухӑннӑччӗ, кӑҫал Ҫӗрпӳре пуҫтарӑнӗҫ.
Ӳркенмен ватӑсем ыттисене темле те пулӑшма май тупаҫҫӗ: нумай ачаллӑ ҫемьесене тата ачисене пӗччен ӳстерекен хӗрарӑмсене ача пӑхса пулӑшаҫҫӗ, салтаксем валли тӗрлӗ япала ӑсталаҫҫӗ. Тӑвайӗнчи ватӑсем, сӑмахран, кӑҫал тӗрлӗ сиплӗ курӑк пухса типӗтнӗ те ӑна салтаксем патне ӑсатнӑ.
Ыранхи форумра тӗнче тетелӗнче ултавҫӑсенчен сыхланасси, ватӑсене хӑйсен ӗҫне пуҫарма пулӑшасси тата гериатри науки ҫинчен сӑмах хускатӗҫ.
Шупашкар районӗнчи Ҫӗньял ялӗнче пурӑнакан Зинаида Гранцкая Ватӑсен кунӗнче, юпан 1-мӗшӗнче, 100 ҫул тултарнӑ. Ҫулне кура мар вӑр-вар вӑл - хӑнасене юрласа-ташласа кӗтсе илнӗ.
Хӑй ҫак районтах Чулкаҫ ялӗнче ҫуралса ӳснӗ, ӗмӗр тӑршшӗпе педагогикӑра ӗҫленӗ - малтан кӗҫӗн классене вӗрентнӗ, унтан - нимӗҫ чӗлхине.
Халӗ пӗр ӗмӗре парӑнтарнӑ кинемей ачисемпе, мӑнукӗсемпе, вӗсен ачисемпе савӑнса пурӑнать.
Ӗнер, юпа уйӑхӗн 1-мӗшӗнче, Чӑваш Енӗн Наци вулавӑшӗнче ватӑ ҫынсем Финанс чемпионатне пухӑннӑ. Ун пек ӑмӑртӑва кӑҫал иккӗмӗш хут йӗркеленӗ. Финанс пӗлӗвне пӗлнине тест ыйтӑвӗсене хуравласа кӑтартса пама тивнӗ.
Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центра ҫӳрекенсенчен унта тӑватӑ ватӑ хутшӑннӑ. Ҫавсенчен пӗри, Надежда Быченкова, финанс ӑмӑртӑвӗнче пӗлтӗр те пулнӑ. Тава тивӗҫлӗ канури хӗрарӑм кӑҫал пӗрремӗш вырӑна тухнӑ. Юпа уйӑхӗн 16-мӗшӗнче вӑл Финанс чемпионачӗн федераци тапхӑрне хутшӑнӗ.
-9.7 °C