Чӳкӗн 20-мӗшӗнче ирхине Сӗнтӗвӑрри муниципаллӑ округӗнчи Ҫатракассинчи лавккана ҫаратни пирки полицие пӗлтернӗ. Ҫак ӗҫе кам тунине тӳрех палӑртнӑ: 20 ҫулти каччӑ. Вӑл ҫур ҫул каялла кӑна тӗрмерен тухнӑ.
Вӑл ирӗке тухнӑранпа вӑхӑт нумай та иртмен - ҫак тапхӑрта каччӑ нумай хутчен йӗркене пӑснӑ. Ҫав шутра - ҫаратнӑ та. Лавккаран вӑл кассӑри укҫана, тавар илнӗ. Нухрата хайӗн ҫумӗнче тупнӑ, тавара - мунчара.
Хальлӗхе каччӑна тухса ҫӳреме чарнӑ. Кӗҫех суда ӑна арестлеме ирӗк парасси пирки ыйту тӑратӗҫ.
Шупашкарти Гузовский урамӗнчи лавкка сутуҫине, 52-ри хӗрарӑма, 18 ҫул тултарман ҫамрӑка сӑра сутнӑшӑн судра явап тыттарӗҫ.
Ача ҫав лавккара сӑра туяннӑ та тӳрех полицие кайнӑ, унта хӑйне алкоголь сутни пирки каласа кӑтартнӑ. Палӑртмалла: ҫак хӗрарӑма кӑҫал ҫу уйӑхӗнче 16-ри хӗре эрех сутнӑшӑн административлӑ майпа явап тыттарнӑ.
Суд пуличчен хӗрарӑмӑн тухса ҫӳреме юрамасть.
Шупашкар хула администрацийӗн специалисчӗсем кашни эрнерех 11 лавккари 31 тавар хакне тӗрӗслесе тӑраҫҫӗ. Юпан 11-17-мӗшӗсенче хаксем мӗнле улшӑннӑ-ха?
Шурӑ ҫӑнӑх хакӗ улшӑнман. Ытларах макарон, сысна ашӗ, ӗне какайӗ хакланнӑ. Чӗрӗлле тӗтӗмленӗ кӑлпасси, вир пӑтти, таса шыв (5 литр) хакӗ кӑштах ӳснӗ.
Чей хакӗ 62 тенкӗ хӑпарнӑ. Ҫавӑн пекех шӑнтнӑ пулӑ (14,5 тенкӗ), услам ҫу (38,5 тенкӗ), панулми (2,3 тенкӗ) хакланнӑ.
Тӳре-шара «Пехет» агромаркет кӑҫалах уҫӑлассине пӗлтернӗччӗ. Унта фермерсем хӑйсен продукцине сутма пултарӗҫ. Агромаркет Шупашкарти «Каскад» суту-илӳ центрӗнче вырнаҫӗ.
Лавккан дизайнӗпе концептне ҫулла хатӗрленӗ. Унта общество апатланӑвӗн 4 вырӑнӗ, 8 павильон, фермерсем валли 76 вырӑн пулмалла. Агромаркета тӳрех 1050 ҫын кӗрейӗ. Унта канмалли кунсенче апат хатӗрлессипе ӑсталӑх класӗсем иртмелле.
Анчах агромаркет кӑҫал уҫӑлмӗ. Тӳре-шара пӗлтернӗ тӑрӑх, ӑна 2024 ҫулта 2-мӗш кварталта уҫма палӑртнӑ.
Шупашкарта чӑваш агромаркечӗ пуласси, ун валли сасӑлав ирттерсе ят суйлани пирки пӗлтернӗччӗ. Аса илтерер: агромаркет "Пехет" ятлӑ пулӗ.
Ӑҫта вырнаҫӗ-ха "Пехет"? ЧР ял хуҫалӑх министрӗ Сергей Артамонов унӑн эскизӗпе Телеграм-каналӗнче паллаштарнӑ. Агромаркет "Каскад" суту-илӳ центрӗнче вырнаҫӗ. Ӑна кӑҫал уҫма палӑртнӑ. Унта сутӑнакан пӗтӗм тавар экологи тӗлӗшӗнчен таса тата хамӑр патра туса кӑларни пулӗ.
Чӑваш агромаркечӗ валли ят суйланине Чӑваш халӑх сайчӗ пӗлтернӗччӗ-ха. Аса илтерер: сасӑлав «Народный контроль» (чӑв. Халӑх тӗрӗслевӗ) порталта тата ЧР Ял хуҫалӑх министерствин халӑх тетелӗсенче иртнӗ.
Чӑваш агромаркечӗ валли ҫапла ятсем сӗннӗ: «Агро и точка», «Натур-маттур», «Пехет», «Все свое», «Наше».
Сасӑлава хутшӑннисенчен ытларахӑшне «Пехет» тени килӗшнӗ. Агромаркет валли мобильлӗ приложени те хатӗр, кирлӗ тавара
ҫынсем килте ларса та туянайӗҫ.
Чӑваш агромаркечӗ валли ят суйлаҫҫӗ. «Агро и точка», «Натур-маттур», «Пехет», «Все свое», «Наше» - ҫак ятсенчен хӑшӗ пуласси сасӑлав пӗтӗмлетӗвӗнчен килӗ. Вӑл вара «Халӑх тӗрӗслевӗ» порталта тата ЧР Ял хуҫалӑх министерствин халӑх тетелӗсенче утӑ уйӑхӗн 10-мӗшӗччен 9 сехетчен пырӗ.
Палӑртмалла: агромаркетра хамӑр патри ял хуҫалӑх продукцине сутӗҫ. Вӑл ҫулталӑк вӗҫлениччен уҫӑлмалла. Ҫак проекта пурнӑҫлама 41 миллион тенкӗ уйӑрӗҫ.
Ҫынсем агромаркет валли пӗтӗмпе 70 ят сӗннӗ. Комисси вӗсенчен 5-шне суйласа сасӑлава тӑратнӑ.
Чӑваш Енре пӗр ачана йытӑ ҫыртнӑ. Халӗ ҫавӑншӑн ачан ашшӗ-амӑшӗ йытӑ хуҫинчен укҫа шыраса илесшӗн.
Пӑтӑрмах кӑҫалхи ҫу уйӑхнче Етӗрне районӗнчи Стрелецки ялӗнче пулса иртнӗ. Пӗрисен ачи вырӑнти лавкка умӗнче пулнӑ. Ҫавӑнта ӑна йытӑ тапӑннӑ, ҫыртса илнӗ.
Йытта хуҫисем урама уҫӑлма никамсӑр кӑларса янӑ иккен.
Ача шар курнишӗн йытӑ хуҫисенчен 50 пин тенкӗ укҫа шыраса илесшӗн. Чӑваш Енӗн прокуратуринче пӗлтернӗ тӑрӑх, ку ӗҫе ҫывӑх вӑхӑтра судра пӑхса тухӗҫ.
Ҫулталӑк вӗҫлениччен республикӑра агромаркет уҫма палӑртнӑ. Кун пирки ЧР Элтеперӗ Олег Николаев пӗлтернӗ.
Унта фермерсен продукцине сутӗҫ. Кунашкал лавкка пирӗн патра хальччен пулман. Раҫҫейре те ҫук.
Агромаркетра фермерсем валли вырӑнсем пулӗҫ. Ҫитес вӑхӑтра лавккан дизайн тата суту-илӳ технологийӗн концепцине хатӗрлӗҫ.
Агромаркета хута яма республика хыснинчен 41 миллион тенкӗ уйӑрнӑ.
Чӑваш Енӗн Ял хуҫалӑх министерствинче агромаркет тӑвас ыйтӑва сӳтсе явнӑ. Ун пекки Раҫҫейре хальлӗхе ҫук-ха.
Видеоконференцҫыхӑну мелӗпе йӗркеленӗ канашлӑва республикӑн вице-премьерӗ — ял хуҫалӑх министрӗ Сергей Артамонов ертсе пынӑ.
Хӑйсен сӗнӗвӗсемпе «Земский групп», «Архитектурное бюро А4», «Market concept», «Северконцепт» тулли мар яваплӑ обществӑсем тата ыттисем паллаштарнӑ.
Агромаркета кӑҫал уҫасшӑн. Унта вырӑнти производительсем туса илекен ял хуҫалӑх продукцине сутма палӑртаҫҫӗ.
+10.3 °C