И.Я. Яковлев ячӗллӗ педагогика университетӗнче филологи пӗлӗвӗ илекен студентсем патӗнче ҫак кунсенче ку чухнехи пултаруллӑ чӑваш поэчӗ Василий Кервен тӗлпулура пулчӗ. Паллӑ сӑмах ӑсти поэзи ӗретӗнчи сонет жанрӗпе паллаштаракан, Н.Н. Осипов доцент ирттернӗ, уҫӑ занятине хутшӑнчӗ.
Чӑваш сонет ӑстисен йышӗ пысӑк мар. Теветкел, Кервен, Айдаш тата пӗр икӗ хушамат асӑнма пулать. Сонет поэзи ӗречӗн кӑткӑс жанрӗсенчен пӗри. Ӑна шухӑшӑн ҫирӗп йӗркине пӑхӑнса хайламалла, 14 йӗркерен тӑракан лирикӑллӑ хайлавра ҫирӗплетни, иккӗленни, пӗтӗмлетни пулмалла. Ҫавӑнпа пӗрлех ҫаврасенчи рифмӑсен те, малтанхи тӑватшар йӗркерен тӑракан икӗ строфинче рифмӑсем ҫавра (абба) е хӗреслӗ (абаб), юлашки виҫшер йӗркерен тӑракан икӗ строфан хӑйсен рифмине пӑхӑнмалла. Ҫак меле ал ҫеммине ҫавӑрнӑ Чӑваш халӑх поэчӗ – Теветкел чӑвашла сонетсем ҫырас енӗпе чи пултаруллисенчен пӗри. Вӑл акӑлчан поэчӗн Шекспирӑн пур сонетне те чӑвашла куҫарнӑ. Кервенӗн те сонет хайлас енӗпе ӑсталӑх пысӑк. Вӑл чылай хайлав ҫырнӑ ҫак жанрпа. Вӑл сонет канонне тӗп-тӗрӗс тытса пыраканӗсенчен пӗри. Унӑн сонет кӑшӑлӗсем те пӗрре анчах мар.
Шупашкарти 38-мӗш шкулта вӗренекен ачасем паллӑ юрӑҫпа Элвин Грейпа тӗл пулнӑ.
Элвин Грей пӗлӳ ҫуртӗнче иртнӗ «Чӑнкӑ тӗлпулу» мероприятие хутшӑннӑ.
Унӑн чӑн ячӗпе хушамачӗ – Радик Юльякшин. Вӑл тутарла, вырӑсла, пушкӑртла юрлать.
Паллӑ юрӑҫ ачасене музыка карьерине мӗнле пуҫланине, хӑй мӗнле йывӑрлӑхсемпе тӗл пулнине каласа кӑтартнӑ.
Сӑмах май, вӑл ҫак кунсенче Шупашкарта концерт лартнӑ. 38-мӗш шкул ачисене те билетсем парнеленӗ.
Чӳк уйӑхӗн 12-мӗшӗнче Чӑваш патшалӑх гуманитари ӑслӑлӑхӗсен институтӗнче чӑваш литературин паллӑ романисчӗпе Николай Максимов ҫыравҫӑпа тӗл пулу иртнӗ. Кун пирки институт халӑх тетелӗнчи страницинче пӗлтернӗ.
Калаҫӑва институт директорӗ Юрий Исаев, литература пӗлӗвӗн пай ӗҫтешӗсем, «Тӑван Атӑл» журналӑн редакторӗ тата паллӑ чӑваш прозаикӗ Людмила Сачкова хутшӑннӑ.
Унта Н. Максимовӑн 2024 ҫулта Саранск хулин кӗнеке издательствинче пичетленсе тухнӑ «Спасение Европы» тата унӑн маларах пичетленнӗ «Шур акӑш ҫулӗ», «Майра патша парни» историлле романӗсем тавра йӗркеленнӗ. Автор ҫак хайлавсене ҫырнӑ май мӗнле материалсемпе паллашни, хӑйӗн пултарулӑх вӑрттӑнлӑхӗсем пирки каласа панӑ. Писатель ҫавӑн пекех хӑйӗн нумаях пулмасть вырӑсла пичетленсе тухнӑ «Дар императрицы» кӗнекипе тата малалла ҫырма шутласа хунӑ романсен кӗске сюжечӗсемпе паллаштарнӑ.
Чӑваш академи драма театрӗнче Театра юратакансен клубӗн черетлӗ тӗлпулӑвӗ иртнӗ. Ларӑва ертсе пыракан Марина Карягина халӑх тетелӗн хӑйӗн страницинче пӗлтернӗ тӑрӑх, хальхи улахра ятлӑ-сумлӑ драматургсемпе, искусствоведсемпе, артистсемпе, тӗпчевҫӗсемпе пӗрле ҫамрӑксем йышлӑ пулнӑ. «Вӗсем пурте сцена ӳнерне питӗ юратаҫҫӗ иккен. Ан тив, пӗр-икӗ театровед, пӗр-икӗ вӑйлӑ драматург е режиссёр кӑна тухтӑр вӗсенчен – аптрамӑттӑмӑрччӗ!» – пӗтӗмлетнӗ паллӑ драматург, сценарист, тележурналист Марина Карягина.
Улах хӑни Борис Манджиев калмӑк режиссёрӗ пулнӑ. 1992-мӗш ҫулта ҫамрӑк режиссёр Шупашкарта иртнӗ Раҫҫей шайӗнчи фестивальте хӑйӗн спектаклӗсене кӑтартнӑ, 3-мӗш вырӑн йышӑнма пултарнӑ. Театрӑн хальхи пуҫлӑхӗ Елена Николаева ӑна спектакль лартма йыхравласан вӑл хаваслансах килӗшнӗ. Сӑмах май каласан, чӳк уйӑхӗн 11-мӗшӗнче уҫӑлнӑ «Чӗкеҫ» фестивале Б.Манджиев Чингиз Айтматовӑн «Материнское поле» хайлавӗ тӑрӑх чӑвашла лартнӑ «Хуркайӑк ҫулӗ» премьерӑпа уҫнӑ. «Ку унӑн Шупашкар сцени ҫине тухнӑ 7-мӗш спектаклӗ!» – хыпарланӑ Марина Карягина.
Галина Матвеева ҫыравҫӑ Чӑваш кӗнеке издательствинче Шупашкарти 9-мӗш вӑтам шкулти 2 «А» класра вӗренекенсемпе тӗл пулнӑ. Унта авторӑн «Тилӗпе Улатакка. Лиса и Дятел» сӑвӑлла юмахне сӳтсе явнӑ.
Галина Матвеева 1957 ҫулхи нарӑс уйӑхӗн 19-мӗшӗнче Вӑрнар районӗнчи Аҫӑм Ҫырми ялӗнче ҫуралнӑ. Журналист ӗҫӗнче чылай ҫул тӑрӑшнӑ, тӗрлӗ премие тивӗҫнӗ, ҫав шутра Ҫемен Элкер премине, Иван Ивник премине.
Галина Алексеевна А.М. Горький ячӗллӗ Уралти патшалӑх университетӗнче вӗреннӗ. 1980-1999 ҫулсенче хальхи «Хыпар» (ун чухне — «Коммунизм ялавӗ») хаҫатра корреспондентра, аслӑ корреспондентра, пай заведующийӗнче тӑрӑшнӑ. 1999-2003 ҫулсенче «Хресчен сасси» хаҫатӑн тӗп редакторӗн ҫумӗ пулнӑ. 2003-2006 ҫулсенче «Советская Чувашия» хаҫатра аслӑ корреспондентра, тишкерӳҫӗре тӑрӑшнӑ. 2006 ҫултанпа Чӑваш кӗнеке издательствинче вӑй хурать.
Юпа уйӑхӗн 15-мӗшӗнче Чӑваш Енӗн Наци вулавӗшӗнче Станислав Юхтар художникпа тӗлпулу иртӗ.
Вӑл — Чӑваш Республикин халӑх художникӗ, Нестӗр Янкас премийӗн лауреачӗ, Ҫеҫпӗл Мишши премийӗн лауреачӗ. Тӗлпулӑва художникӑн 65 ҫулхине халалланӑ.
Станислав Михайлов (Юхтар) 1960 ҫулхи чӳк уйӑхӗн 3-мӗшӗнче Ҫӗрпӳ районӗнчи Вӑрӑмҫут ялӗнче ҫуралнӑ. Чӑваш патшалӑх педагогика институтӗнчен вӗренсе тухнӑ хыҫҫӑн 40 ҫула яхӑн рисовани, ӗҫ, черчени учителӗнче тӗрлӗ ҫӗрте ӗҫленӗ, темиҫе шкулта директор пулса тимленӗ.
Станислав Николаевич — этнофутурист. Вӑл истори, культура темине, чӑваш мифологине юратать. Кӗнеке графикипе геральдика хайлавӗсен авторӗ.
Чӑваш Енӗн Наци вулавӑшӗнче «Хавхалану» клуб ҫуллахи кану хыҫҫӑн каллех поэзие юратакансене пуҫтарнӑ. Кун пирки Чӑваш Енӗн патшалӑх телерадиокомпанийӗ пӗлтернӗ.
Унта иртсе кайнӑ уйӑхра ҫуралнӑ сӑвӑҫсене чыслаҫҫӗ. Хальхинче вара пурнӑҫран уйрӑлса кайнисене те асӑннӑ, вӗсен сӑввисене вуланӑ.
Авӑн уйӑхӗнче Валем Ахун, Трубина Мархви, Александр Артемьев, Мӗтри Кипек, Стихван Шавли, Фёдор Павлов тата ытти сӑмах ӑсти ҫуралнӑ. Ҫав шутра Петӗр Яккусен те.
«Хавхалану» клубӑн черетлӗ ларӑвне юпа уйӑхӗн виҫҫӗмӗш кӗҫнерникунӗнче ирттерме палӑртаҫҫӗ.
Мускаври Пӗчӗк театр артисчӗ тата актёр Владимир Тяптушкин К.В. Иванов ячӗллӗ Чӑваш патшалӑх академи драма театрӗнче хӑнара пулнӑ. Вӑл унта виҫҫӗмӗш хут килнӗ. Артистсем ӑна ҫӑкӑр-тӑварпа кӗтсе илнӗ.
«Ҫӗнӗ тата лайӑх спектакльсем лартма, «Ылтӑн маска» ҫӗнсе илме сунатӑп», — тенӗ Владимир Тяптушкин чӑваш артисчӗсене.
Палӑртмалла: вӑл Елчӗк районӗнчи Аслӑ Таяпа ялӗнче ҫуралнӑ. Ӑна «Склифософский» сериалта ӳкерӗннипе те пӗлеҫҫӗ.
Чӑваш Ен наци музейӗнче Совет Союзӗн Геройӗн Александр Боголюбов генерал-полковникӑн мӑнукӗ Александр Боголюбов пулнӑ.
Музейра пӗлтернӗ тӑрӑх, Чӑваш Ене вӑл арӑмӗпе, хӑйӗн аслашшӗн муралне уҫнӑ ҫӗре килнӗ. Геройӑн сӑнӳкерчӗкне Шупашкарти Трактор тӑвакансен проспектӗнчи 17-мӗш ҫуртӑн 25-мӗш корпусӗ ҫине ӳкерсе хунӑ.
Чӑваш наци музейӗнче Александр Боголюбовпа ҫыхӑннӑ пуян материалсем упранаҫҫӗ иккен. Мухтавлӑ ентешӗмӗр ҫуралнӑранпа кӑҫал 125 ҫул ҫитнӗ.
Александр Боголюбов генерал-полковникпа мӑшӑрӗ Ирина Николаевна пӗр ывӑл ҫуратса ӳстернӗ. Вӑл Сергей ятлӑ. Сергей Александрович профессор 88-та пулин те ӗҫлет. Унӑн вара виҫӗ ывӑл. Асли, аслашшӗ ячӗлли, Александр Сергеевич — биолог, эколог, географ, биологи наукисен кандидачӗ. Унӑн арӑмӗ те Чӑваш Енрен.
Ҫыравҫӑпа артист паллӑ композитор патӗнче хӑнара пулнӑ.
Геннадий Кириллов артист халӑх тетелӗнчи хӑйӗн страницинче пӗлтернӗ тӑрӑх, вӑл хӑй тата А. Талвир ячӗлле литература премийӗн лауреачӗ Нина Изедеркина Юрий Кудаков патӗнче пулнӑ.
Юрий Дмитриевич — Раҫҫӗй тата Чӑваш Республикин культурӑн тава тивӗҫлӗ ӗҫченӗ, Ҫӗмӗрле районӗн хисеплӗ ҫынни, паллӑ композитор .
+3.3 °C