Чӑваш Енӗн Министрсен Кабинечӗн Председателӗн ҫумне — экономика аталанӑвӗн, промышленноҫӑн тата суту-илӗвӗн министрне Владимир Аврелькина ӗҫрен кӑларнӑ. Ӑна пӗр вӑхӑт ӗҫрен сирнӗччӗ, анчах тилхепӗне туртса илменччӗ. Паян Михаил Игнатьев Аврелькина ӗҫрен кӑларма йышӑннӑ.
Аса илтерер, пысӑк пуканлӑ тӳре-шара тӗлӗшпе хӑй вӑхӑтӗнче пуҫиле ӗҫ пуҫарнӑччӗ. Аврелькина изолятора малтанласа икӗ уйӑхлӑха хупса хунӑччӗ, кайран ҫав вӑхӑта тата тепӗр тӑватӑ уйӑхлӑха тӑснӑччӗ. Ҫав мерӑна ҫемӗҫтерме ыйтса министрӑн ваккачӗ Чӑваш Енӗн Аслӑ судне тавӑҫпа тухнӑччӗ. Анчах унти тӳресем Шупашкарти Ленин районӗн сучӗн йышӑнӑвне улӑштарма килӗшменччӗ. Республика Правительствинче пысӑк вырӑн йышӑннӑ ҫыннӑн арестне тӑсмалли ходатайствӑна суд нарӑс уйӑхӗн 8-мӗшӗнче пӑхса тухнӑччӗ. Владимир Аврелькин арестне 4 уйӑхлӑха, ҫӗртмен 12-мӗшӗччен, тӑсма йышӑннӑччӗ.
Шупашкарта политикӑн машинине кислотапа сапнӑ. Ку пӗрремӗш хут пулман-мӗн. Оппоизицинерӑн ГАЗельне такамсем унччен те кислотапа сапнӑ иккен.
Ку ҫу уйӑхӗн 20-мӗшӗнче ҫӗрле пулнӑ. Ун чухне политикӑн машини стоянкӑра тӑнӑ. Ҫакна та каламалла: оппозиционерӑн машини ҫинче хальхи влаҫа хирӗҫ пулнине кӑтартакан плакатсем ҫыпӑҫтарнӑ.
«Кислота пирки калас тӑк, ку пӗрремӗш пулӑм мар. Пӗрремӗшӗ пушӑн 1-мӗшӗнче хула администрацийӗ умӗнче пулчӗ. Ун чухне тепӗр икӗ уйӑхран кӑна маскӑллӑ палламан ҫын тӗлӗшпе пуҫиле ӗҫ пуҫарчӗҫ», - каласа панӑ Шупашкар ҫынни.
Пӗрремӗш хутӗнче политик 98 пин тенкӗлӗх шар курнӑ, хальхинче вара – 10 пин тенкӗлӗх. Ҫитменнине, хальхинче такамсем икӗ кустӑрмана ҫӗҫӗпе каснӑ.
Ҫӗрпӳ районӗнчи Ҫӗнӗ Катек ялӗнчи Вӑрман урамӗнчи 35-мӗш ҫурт умӗнче ҫӑл пур. Анчах унтан шыв ӗҫме юрамасть, мӗншӗн тесен вӑл гигиена нормативӗпе, микробиологи кӑтартӑвӗпе килӗшсе тӑмасть. Ҫӑлта колиформлӑ бактерисем тупнӑ.
Вырӑнти ҫынсене таса шывпа тивӗҫтересси – Сӑнав ял тӑрӑхӗн администрацийӗн тивӗҫӗ, анчах тӳре-шара нимӗн те туман. Пуҫлӑх хӑйӗн айӑпне йышӑннӑ, ҫӑла вӑхӑтлӑха хупма ыйтнӑ. Халӗ администраци ҫӑла дезинфекцилеме килӗшӳ алӑ пуснӑ.
Ялти ҫынсен унтан 30 талӑк шыв ӗҫме юрамасть. Суд приставӗсем ҫал патне тӑтӑшах килеҫҫӗ, ял ҫыннисем суд йышӑнӑвне пӑхӑннипе пӑхӑнманнине тӗрӗслеҫҫӗ.
ЧР сывлӑх сыхлавӗн министрӗ Владимир Викторов пӗлтернӗ тӑрӑх, Чӑваш Енре санитари авиацийӗн вертолечӗсем вӗҫме пуҫлӗҫ. Ку 2020 ҫулӑн иккӗмӗш ҫур ҫулӗнче пурнӑҫланмалла.
Санитари авиацийӗн вертолечӗсем Чӑваш Енри кӗрсе ҫӳреме йывӑр ялсене ҫитӗҫ, тухтӑрсем пациента пулӑшу парӗҫ. Сӑмах май, кунашкалли республикӑра унччен те пулнӑ: СССР вӑхӑтӗнче ҫак тӗллевпе пысӑках мар Ан-2 самолетсемпе усӑ курнӑ. Вӗсем ытларах чухне «Шупашкар – Улатӑр» маршрутпа вӗҫнӗ. Халӗ вара Чӑваш Енре санитари авиацийӗ ҫук.
Владимир Викторов министр пӗлтернӗ тӑрӑх, халӗ вертолетсем туянас, вӗсем валли анса лармалли 6 лапам тӑвас енӗпе калаҫусем иртеҫҫӗ.
ЧР космонавтика ветеранӗсен пӗрлӗхӗ «Вырӑс драма театрӗ» чарӑнӑва «Ю.А.Гагарин ячӗллӗ урам» ят пама сӗнни пирки ӗнер кӑна пӗлтернӗччӗ. Шупашкарти тепӗр чарӑну ятне те улӑштарма сӗнӳпе тухнӑ.
«Волга Айс» акционерсен обществи «Сӗт-ҫу бази» чарӑнӑва «Волга Айс» ят партарасшӑн. Кун пирки предприяти Шупашкар хула администрацине пӗлтернӗ.
Ҫавна май администраци «Уҫӑ хула» порталта сасӑлав ирттерме шутланӑ. Сасӑлава ҫу уйӑхӗн 31-мӗшӗччен пырать. Эсир те унта хутшӑнма пултаратӑр. «Сӗт-ҫу бази» чарӑнӑва «Волга Айс» ят парассине эсир ырлатӑр-и? Ҫак ыйтӑва хуравламалла. Сасӑлав вӗҫленсен пӗтӗмлетӗве хулари объектсене ят парассипе ӗҫлекен комиссие пӑхса тухма парӗҫ.
Шупашкар хула администрацийӗн пуҫлӑхӗн икӗ ҫумӗпе ӗнерхи планеркӑра Алексей Ладыков сити-менеджер паллаштарнине Чӑваш халӑх сайчӗ пӗлтернӗччӗ. Ӗнерех муниципалитетӑн икӗ учрежденийӗн (Туянассине йӗркелекен центрӑн тата Ҫӗр управленийӗн) ертӳҫисемпе те паллаштарнӑ.
«На связи» (чӑв. Ҫыхӑнура) порталта пӗлтернӗ тӑрӑх, Туянассине йӗркелекен центрӑн пуҫлӑхӗ пулма Сергей Егорова шаннӑ. Вӑл хула администрацийӗнче 2017 ҫултанпа ӗҫлет. «Ҫӗр управленийӗ» муниципалитет учрежденине Мари Элти Козьмодемьянск мэрийӗнче ӗҫленӗ 40 ҫулти Александр Башков ертсе пыма тытӑннӑ.
Козьмодемьянск администрацийӗнче вӑл 2002 ҫултанпа тӑрӑшнӑ. 2017 ҫулхи утӑ уйӑхӗнче ӑна хула администрацийӗн пуҫлӑхне, аппарат ертӳҫине лартнӑ. Ҫав ҫулхи чӳк уйӑхӗнче Александр Башков машина рулӗ умӗнче ӳсӗрле ҫакланнӑ. Уншӑн ӑна 30 пин тенкӗлӗх штраф хурса панӑ, ҫулталӑк ҫурӑлӑха водитель правине туртса илнӗ.
Паян, ҫу уйӑхӗн 14-мӗшӗнче, Ҫӗрпӳ районӗсем тинех ҫӗнӗ хуҫана тупнӑ.
Асӑннӑ район администрацине ертсе пынӑ Андрей Павлова пуҫиле статьяпа айӑпласа колони-поселение ӑсатнӑ хыҫҫӑн ку вырӑн пушӑ тӑчӗ. Паян вара тинех пуҫлӑх пулма тивӗҫ ҫынна тупнӑ. Чӑваш халӑх сайчӗ ҫӗнӗ хуҫа кам пулассине унчченех тӗшмӗртӗнччӗ-ха. Аса илтерер, ака уйӑхӗн 8-мӗшӗнче республикӑри комисси пайташӗсем кандидатурӑсене тишкернӗччӗ. Вӗсен йышӗнче Чӑваш Ен Элтеперӗн Администрацийӗн Шалти политика управленийӗн вырӑнти хӑй тытӑмлӑх органӗсемпе ӗҫлекен пайӗн пуҫлӑхӗ, 1981 ҫулхи Игорь Николаев пулнӑччӗ.
Паян Ҫӗрпӳ районӗнче иртнӗ Депутатсен пухӑвӗн черетсӗр ларӑвӗнче шӑпах Игорь Николаева пуҫлӑха ҫирӗплетнӗ те.
Шупашкар хула администрацийӗн пуҫлӑхӗн Алексей Ладыковӑн икӗ ҫумӗн пуканӗсем пӗлтӗртенпех пушӑччӗ. Тинех конкурссем вӗҫленнӗ — яваплӑ должноҫсене йышӑнакансем тупӑннӑ. Кун пирки «Мой город Чебоксары» портал хыпарлать.
Хайхи ҫӑлкуҫ пӗлтернӗ тӑрӑх, ҫӗнӗ тӳре-шарапа Алексей Олегович паян, ҫу уйӑхӗн 13-мӗшӗнче, кулленхи канашлура паллаштарнӑ.
Ҫапла майпа Иван Кучерявый хула администраци пуҫлӑхӗн архитектурӑпа хула строительствин енӗпе ӗҫлекен ҫумӗ пулса тӑнӑ. Вӑл пӗлтӗрхи утӑ уйӑхӗнче ЖКХпа хула хӑтлӑхӗн управленийӗн ертӳҫин ҫумӗ пулса вӑй хума тытӑннӑ. «Связь Банк» банк филиалӗн операци офисӗн директорӗнче тимленӗ Владимир Яковлева хула администраци пуҫлӑхӗн экономика аталанӑвӗпе финанс енӗпе ӗҫлекен ҫумӗ пулма ҫирӗплетнӗ.
Паян, ҫу уйӑхӗн 13-мӗшӗнче, Чӑваш Енӗн юстиципе харпӑрлӑх хутшӑнӑвӗсен министрӗн ҫумӗ пулса ӗҫленӗ Наталия Яхатинӑна должноҫрен кӑларнӑ. Йышӑнӑва ӗҫ тӑвакан влаҫӑн официаллӑ сайтӗнче вырнаҫтарнӑ. Кун пирки «Правда ПФО» интернет-кӑларӑм хыпарлать.
Хайхи ҫӑлкуҫ пӗлтернӗ тӑрӑх, Наталия Яхатинӑна Чӑваш Республикин юстиципе харпӑрлӑх хутшӑнӑвӗсен министрӗн ҫумӗнчен кӑларасси пирки Чӑваш Енӗн Министрсен Кабинечӗн пуҫлӑхӗ Иван Моторин алӑ пуснӑ. Наталия Яхатина ку должноҫре 2016 ҫул вӗҫӗнченпе вӑй хунӑ. Унччен вара Чӑваш Енӗн патшалӑх харпӑрлӑхӗн комитетӗнче ӗҫленӗ.
Палӑртса хӑварни вырӑнлӑ пулмалла, хальхи вӑхӑтра Чӑваш Республикин юстици министрӗн виҫӗ ҫум: Игорь Михайлов, Роза Лебедева тата Дмитрий Неяскин.
Кремль валли халӑх хушшинче хупӑ ыйтӑм ятарласа ирттернӗ иккен. КУн пирки РБК пӗлтерет.
Ыйтӑм вӑхӑтӗнче вӑл е ку регионта пурӑнакансем регион пуҫлӑхне епле йышӑннине хакланӑ. Чӑваш Ен Элтеперӗ Михаил Игнатьев, тӳрех палӑртар, килӗшменнисен списокне лекмен.
Севастолпольте, Архангельск облаҫӗнче, Коми Республикинче тата Ингушетинче ҫынсем урӑх пуҫлӑх пирки ӗмӗтленеҫҫӗ-мӗн. Ҫав вӑхӑтрах Мускав ҫыннисенчен пысӑк пайне Сергей Соябинин мэр тивӗҫтерет.
Субъектсен ертӳҫисене халӑх влаҫа шанни тӑрӑх хакласси пикри ака уйӑхӗн вӗҫӗнче ҫӗршыв ертӳҫи Владимир Путин ятарлӑ указ алӑ пуснӑ. Унта палӑртнӑ тӑрӑх, регионсен ертӳҫисене 15 критерие шута хурса хаклӗҫ. Ҫав списокра чи пӗрремӗшӗ — субъектсен кӗпӗрнаттӑрӗсене халӑх шанни.
+14.8 °C