Ака уйӑхӗн 19-мӗшӗнче Шупашкарти суту-илӳ точкисенчен пӗрин парковкине халӑх йышлӑ пуҫтарӑннӑ. Кун пирки йӗрке хуралҫисене систерекен тупӑннӑ. Ҫав вырӑна пакунлисем пырса ҫитнӗ.
Вӗсем палӑртнӑ тӑрӑх, унта пухӑнма 31 ҫулти хӗрарӑм-блогер йыхравланӑ иккен. Пыракансене пӗр-пӗринпе паллашма тата хӑйӗн машини патӗнче сӑн ӳкерӗнме шантарнӑ иккен.
Саккуна пӑсса пуҫтарӑннисен тӗлӗшпе административлӑ 23 ӗҫ пуҫарнӑ. Йышра ҫул ҫитмен икӗ ача та пулнӑ иккен.
Раҫҫей Президенчӗ Владимир Путин Чӑваш Енри нумай ача амӑшне Надежда Цветковӑна награда пама йышӑннӑ
Вӑл пӗлтӗрхи ҫулла Атӑлта икӗ ҫамрӑка ҫӑлнӑ.
Малтан шывран хӗре туртса кӑларнӑ, унтан – каччӑна. Яш ҫыран хӗррине илсе тухнӑ ҫӗре сывламан, ӑна пляжри тепӗр ҫын пӗрремӗш медпулӑшу панӑ.
Надежда - 3 ача амӑшӗ. Вӑл штукатур-малярта ӗҫлет.
Ҫӗрле Канаш хулинче «Гранта» хӑрушӑ аварие лекнӗ. Унта пулнӑ икӗ пассажирӑн пурнӑҫӗ татӑлнӑ. Вӗсем 16-ра тата 18 ҫулта пулнӑ.
Руль умӗнче 20 ҫулти каччӑ пулнӑ. Ун чухне шӑпах унӑн ҫуралнӑ кунӗ пулнӑ. Вӑл ашшӗн машинине тапратса тухнӑ та юлташӗсемпе хула тӑрӑх ярӑннӑ. Ҫул хӗресленекен вырӑнта машина «семеркӑпа» ҫапӑннӑ, унтан юпа ҫине пырса тӑрӑннӑ. Икӗ пассажир вырӑнтах вилнӗ, ыттисем, виҫҫӗшӗ, аманнӑ.
Ҫакӑ паллӑ: водителӗн права пулман.
Ӗнер, ака уйӑхӗн 14-мӗшӗнче, каҫхи вунӑ сехетре, Шупашкарти Мускав проспектӗнче 17 ҫулти хӗр 53 ҫулти хӗрарӑм ҫине самокатпа пырса кӗнӗ.
Инкек тротуар ҫинче пулса иртнӗ. Хӗрарӑм ҫулпа утса пынӑ, ҫав вӑхӑтра ун ҫине электричество самокачӗпе ярӑнса пыракан студент пырса кӗнӗ. Суранланнӑ хӗрарӑма пульницӑна ӑсатнӑ. Унта ӑна тухтӑрсем пулӑшнӑ хыҫҫӑн килӗнче сипленме янӑ.
Колледжра иккӗмӗш курсра вӗренекен хӗр ӗнентернӗ тӑрӑх, руле вӑл астумасӑр пӑрса янӑ. Пике тӗлӗшпе халӗ административлӑ ӗҫ пуҫарнӑ.
Паян, ака уйӑхӗн 9-мӗшӗнче, Шупашкарта мотоциклпа машина пырса ҫапӑннӑ.
Инкек ирхи 10 сехет тӗлӗнче хулари Ленин проспектӗнчи 21-мӗш ҫурт тӗлӗнче пулса иртнӗ. 19 ҫулти каччӑ тытса пыракан мотоцикл сулахаялла пӑрӑнакан «Фольксваген Джетта» автомобиль ҫине пырса кӗнӗ.
Икӗ урапаллӑ транспорт хуҫине тухтӑр пулӑшӑвӗ кирлӗ пулса тухнӑ.
Паян Наци вулавӑшӗнче Чӑваш ҫамрӑкӗсен форумӗ виҫҫӗмӗш хут иртрӗ. Ӑна «Хавал» пуҫару ушкӑнӗ «Ҫамрӑксен хаҫачӗпе» пӗрле йӗркеленӗ.
Форума пултаруллӑ чӑваш ҫамрӑкӗсем пухӑннӑ. Раҫҫейӗн тӗрлӗ хулинчен ҫитнисем те пулчӗҫ: Хусантан, Мускавран, Чӗмпӗртен. 25 спикер хӑйсен ӗҫӗ, проекчӗсем,чун киленӗҫӗ пирки чӑвашла каласа кӑтартрӗҫ. Тӗслӗхрен, Шупашкарти Артем Григорьев пӗлтӗр форумра пулнӑ хыҫҫӑн хавхаланса кайнӑ, хӑй хулари тӗрлӗ вырӑнта вырнаҫтарнӑ кофе аппаратсене чӑвашлатнӑ, «Лайӑх кофе» ят панӑ. Анжелика Еремеева Хусантан ҫитнӗ. Вӑл «Ӗмӗт» этноушкӑн ертӳҫи, хӑйӗн пултарулӑхӗ пирки каласа кӑтартрӗ.
Халӗ ҫамрӑксен шутне 18-45 ҫулсенчисем кӗреҫҫӗ. Ҫапла палӑртнӑ Пӗтӗм тӗнчери сывлӑх сыхлавӗн организацийӗ. Вӑл ҫын ӳсӗмӗн ушкӑнӗсене ҫӗнӗрен пӑхса тухнӑ.
45-ран пуҫласа 60-ччен вара халӗ – вӑтам ӳсӗмрисем. 60-75 ҫулсенчисем – ватлӑх енне сулӑннисем.
75-рен пуҫласа 90 ҫулччен ватӑ ҫынсем шутланаҫҫӗ.
90-ран аслӑраххисӗм – вӑрӑм ӗмӗрлисем.
Шупашкарта 17 ҫулти ҫамрӑка «Лиза Алерт» ушкӑн хастарӗсем шыраҫҫӗ. Давид Пигузов пуш уйӑхӗн 22-мӗшӗнче килтен тухса кайнӑ та таврӑнман.
Давид 182 сантиметр ҫӳллӗш, ырхан кӗлеткеллӗ, ҫӳҫӗ ҫырӑ, куҫӗ хӑмӑр. Ҫав кун хура куртка, сӑрӑ кофта, хура джинс шӑлавар, сӑрӑ кроссовка тӑхӑнса тухса кайнӑ.
Давида пуш уйӑхӗн 23-мӗшӗнченпе шыраҫҫӗ. Ӑна, шел те, хальлӗхе тупайман. Мӗн те пулин пӗлсен ҫак номерсемпе шӑнкӑравлама ыйтаҫҫӗ: 8(800)700-54-52, 89196666680 (Наталия Симба), 89199793862 (Николай Дракон).
Пӗлтӗрхи ҫулла Комсомольски тӑрӑхӗнче пурӑнакан пӗр хӗрарӑм мессенджерсенчен пӗринче хушма ӗҫ укҫи ӗҫлесе илме май пурри ҫинчен вуласа пӗлнӗ. Унта ҫырнине 40 ҫулти ял хӗрарӑмӗ ӗненнӗ.
Пӗлтерӳ панӑ ҫынпа ҫыру ҫӳретсе вӑл хӑйӗн банк карттин даннӑйӗсене пӗлтернӗ. Ултавҫӑсем хӗрарӑм ячӗпе темиҫе микрофинанс организацийӗнче 40 пин тенкӗ ытла укҫа илнӗ.
Хӗрарӑма Ростов облаҫӗнчи 19 ҫулти каччӑ улталанӑ иккен. Ӑна йӗрке хуралҫисем халӗ Шупашкара илсе килнӗ.
Пуш уйӑхӗн 10-мӗшӗнче Шупашкарта Халӑх туслӑхӗсен ҫуртӗнче чӑваш ҫамрӑкӗсем пухӑннӑ. Вӗренӳ семинарне Хусанти эксперт, Регионсен хушшинчи чӑваш ҫамрӑкӗсен форумӗн ертӳҫи Юлия Еремеева, Хусанти «Ӗмӗт» этноушкӑн ертӳҫи тата алӑ ӑсти Анжелика Еремеева, чӑваш ҫамрӑкӗсен «Аталан» юхӑмӗн лидерӗ Елизавета Савелькина ҫитнӗ.
Ҫамрӑксем Тутарстанра чӑваш чӗлхипе ҫыхӑннӑ мероприятисене йӗркелемелли опытпа пайланнӑ. Юлия Еремеева вара этнокультура енӗпе грант проекчӗсене мӗнле ҫырмаллине ӑнлантарнӑ. Чӑваш блогерӗсем «ҫавра сӗтел ирттернӗ, унта ӗрлехи проектсене сӳтсе явнӑ, Чӑваш Республикинчи ҫамрӑксен халӑх ассамблейине кӗме йышӑну тунӑ.
+3.3 °C