"Про Город" тунӑ сӑнӳкерчӗк

Шупашкарти Николаев урамӗнче 17-мӗш ҫуртра пурӑнакансем «Про Город» хаҫатран пулӑшу ыйтнӑ. Вӗсен подъездӗнче арҫын пурӑнать-мӗн.

Ҫынсем каланӑ тӑрӑх, малтан вӑл ҫак ҫуртри пӗр хваттерте пурӑннӑ. Анчах пӗрмай эрех ӗҫекенскере пӗртӑванӗ кӑларса янӑ. Халӗ вӑл подъездра ҫӗр каҫать. Унтах эрех ӗҫет. Ҫавӑнпа подъездра лайӑх мар шӑршӑ сарӑлнӑ.

Арҫын кӳршисене пӗлтернӗ тӑрӑх, хутран-ситрен ӑна хваттере ҫӑвӑнма, япалисене ҫума кӗртеҫҫӗ. Вӑл подъездра кӗнеке те вуласа выртать.

Тирпейлӳҫӗ подъезда, ҫав шутра арҫын выртса тӑракан вырӑна та, кулленех тасатать. Ҫынсем участковӑя пӗрре мар чӗннӗ. Вӑл ҫемьере мӗн пулса иртнине пӗлет, анчах нимӗн те тӑваймасть.

cheby24.ru сайтри сӑн

Нарӑс уйӑхӗн 6-мӗшӗнченпе Шупашкарта 11-мӗш троллейбус урӑх маршрутпа ҫӳреме тытӑнӗ. Тӳре-шара ӗненетернӗ тӑрӑх, вӑл кашни 11 минутран ҫӳрӗ.

Троллейбус Чапаев савучӗн чарӑнӑвӗнчен тухса Тӗп пасара ҫитӗ, унтан Вырӑс драма театрӗ еннелле кайса Энергозапчаҫе ҫитӗ, Агрегат савутӗнчен иртсе Хевеш урамне кӗрӗ, «Звездный» лавкка еннелле парӑнӗ те Пролетари урамӗпе «Трактор-3» чарӑнӑва ҫитӗ. Ӗҫ кунӗсенче Вӑйӑмлӑ агрегатсен чарӑнӑвнех кайӗ.

Маршрутпа 11 троллейбус ҫурӗ. Унӑн ҫулӗ 39,7 ҫухрӑмпа танлашӗ.

yamalpro.ru сайтри сӑн

Шупашкарта пурӑнакан хӗрарӑм укҫа ӗҫлесе илес тенӗ те… укҫасӑр тӑрса юлнӑ. Тивӗҫлӗ канурискер ултавҫӑсене 2,5 миллион тенкӗ куҫарса панӑ.

Пӗлтӗрхи чӳк уйӑхӗнче 72 ҫулти хӗрарӑм хушма тупӑш тума сӗнекен реклама курнӑ. Унта хутшӑнас тесен акци илмелле-мӗн. Ватӑ хӗрарӑм вара унччен унашкаллисене хутшӑнса тупӑш тукаланӑ имӗш.

Хайхискер рекламӑра кӑтартнӑ каҫӑпа кайнӑ, харпӑр кабинет уҫнӑ, даннайсене кӑтартнӑ. Кайран унпа палламан ҫынсем ҫыхӑннӑ. Хӗрарӑм акци туянас тесе 50 пин тенкӗ куҫарнӑ. Харпӑр кабинетпа урӑх ҫынсем те усӑ курнине асӑрханӑ. Ара, унӑн ячӗпе 228 пин тенкӗ кредит илнӗ. Вӑл «консультантсемпе» ҫыхӑннӑ, лешсем пулӑшма шантарса каллех укҫа ыйтнӑ.

Хӗрарӑм еткерлӗхе юлнӑ хваттерне сутнӑ 2,5 миллион тенке куҫарса панӑ.

transphoto.org сайтри сӑн

Кӑрлачӑн 28-мӗшӗнче ЧР Министрсен Кабинечӗ Шупашкара тата Ҫӗнӗ Шупашкара троллейбуссем парасси пирки йышӑну тунӑ. Шупашкара 2020 ҫулта туса кӑларнӑ 8 троллейбус лекнӗ. Ҫӗнӗ Шупашкара вара 2 транспорт панӑ.

Шупашкара панӑ 8 троллейбус пӗтӗмпе 125 миллион ытла тенке кайса ларнӑ. Ҫӗнӗ Шупашкара лекнӗ ҫавнашкалах 2 транспорт 31 миллион ытла тенкӗ тӑрать.

Чӑваш Енре пӗтӗмпе Ӗпхӳре туса кӑларнӑ 68 пулмалла. Савутра кӑшӑлвирус инфекцийӗ сарӑлнине пула ку ӗҫе вӑхӑтра тӑвайманнине сайтра хыпарланӑччӗ. Палӑртмалла: Чӑваш Ен троллейбус паркне ҫӗнетме федераци хыснинчен 1,17 миллиард тенке тивӗҫнӗ.

ШӖМ тунӑ сӑн

ШӖМ спорт костюмне вӑрланӑ хӗрарӑма шырать. Вӑл ача кӗтекен хӗрарӑм пулма пултарать.

Калинин урамӗнче вырнаҫнӑ суту-илӳ центрӗнче пулнӑ ку. Кӑрлач уйӑхӗн 26-мӗшӗнче пӗр хӗрарӑм спорт костюмне йӑтнӑ та касса патӗнчен уншӑн тӳлемесӗрех иртсе кайнӑ. Сутуҫӑсем костюм ҫухалнине асӑрхасан кун пирки полицие пӗлтернӗ.

Спорт костюмне камера ҫине лекнӗ хӗрарӑм вӑрлама пултарнӑ. Вӑл 35 ҫулти пек курӑнать. Шурӑ калпак, ҫутӑ кӗрен куртка, шурӑ шӑлавар, хӑмӑр пушмак тӑхӑннӑ пулнӑ. Хура шарф ҫыхнӑ, хура рюкзак ҫакнӑ. Камера ҫине пӑхсан ҫакӑ паллӑ: вӑл ача кӗтме пултарать.

Ӑна паллакан ҫынсене «02» номерпе шӑнкӑравлама ыйтаҫҫӗ.

Шупашкар хулинче пурӑнакансене ҫул-йӗр тата нумай хваттерлӗ ҫурт-йӗр картишне тасатса тӑрасси тата транспорт епле ӗҫлени пӑшӑрхантарать. Кун пирки хула администрацийӗн пуҫлӑхӗ Алексей Ладыков паян Фейсбукра пӗлтернӗ.

Вӑл регион управленийӗн центрӗнче пулнӑ. Асӑннӑ центр ҫынсен пӑшӑрханӑвне вӑхӑтра шута илессипе ӗҫлет. Асӑннӑ центра ҫӗршыв Президенчӗ хушнипе кашни регионтах пӗлтӗр йӗркелерӗҫ.

«Хӗрӳ» темӑсене тӗрӗслесех, лару-тӑрӑва пӗлсе тӑратпӑр. Сӑмахран, кӑҫалхи кӑрлач уйӑхӗнче центра пынӑ ҫырусенчен 50 ытла проценчӗ — Шупашкартан. Кунта халӑх йышлӑран ҫавӑн сӑлтавне ӑнланма пулать. Чи ҫивӗч ыйтусен шутӗнче — урамсемпе картишсенчи юра вӑхӑтра тасатасси, халӑха турттаракан тарнсрт епле ӗҫлени», — тесе пӗлтернӗ Алексей Ладыков Фейсбукра.

Ыйтӑва хуравлама вӑтамран 3 сехет те 39 минут иртет иккен.

Паян 10 сехетре Шупашкарти 20-мӗш шкулта вӗренекенсене эвакуациленӗ. Вырӑна пушарнӑйсем, васкавлӑ медпулӑшу, полици, Росгварди ҫитнӗ.

Иртен-ҫӳрене те ҫывӑха пыртарман, Хусанкай урамӗнчи тротуарпа иртме ыйтнӑ.

Сӑмах май, ку уйӑхра шкулсенче виҫӗ эвакуаци пулнӑ. Унччен 5-мӗш гимназин «А» корпусӗнче тата 17-мӗш шкулта ачасене эвакуациленӗ.

Шупашкар хула ертӳҫисем пассажирсене турттаракансен танлаштарӑмне хатӗрлесшӗн. Кун пирки хула администрацийӗн пуҫлӑхӗ Алексей Ладыков паян Фейсбукра пӗлтернӗ.

Вӑл ӗнентернӗ тӑрӑх, пассажирсене турттаракансем епле ӗҫлени пирки хула ҫыннисем пӑшӑрханса пӗлтернине ертӳҫӗсем йӑлтах курса-пӗлсе тӑраҫҫӗ. Хӑш-пӗр маршрутпа ҫӳрекен транспорт 50 минут таран кӗттерни те пулать иккен.

Иртнӗ эрнере 15, 26, 30, 32, 33, 35, 41, 42, 45-мӗш автобуссен тата 3, 10, 15, 17, 22-мӗш номерлӗ троллейбуссен ӗҫӗнче кӑлтӑксем тупса палӑртнӑ.

«Пирӗн тивӗҫӗмӗр — пахалӑхлӑ общество транспорчӗпе тивӗҫтересси. Ку енӗпе кӑлтӑк пуррине кура ҫитменлӗхе ҫывӑх вӑхӑтра пӗтерӗпӗр», — тесе ҫырнӑ Фейсбукра Алексей Ладыков.

Шупашкарти ҫӑкӑр комбиначӗсенчен пӗрин техника директорне производствӑра ҫын аманнӑшӑн явап тыттарнӑ.

Инкек пӗлтӗрхи авӑн уйӑхӗн 18-мӗшӗнче кӑнтӑрла пулнӑ. 42-ри хӗрарӑм ҫакӑр пӗҫермелли цехра сылтӑм аллине темиҫе ҫӗртен хуҫнӑ. Ҫапла майпа вӑл сывлӑхне йывӑр сиен кӳнӗ.

Пӑтӑрмахшӑн предприятин техника директорӗ айӑплине палӑртнӑ. Шӑпах ӑна ӗҫ хӑрушсӑрлӑхӗшӗн яваплӑ тесе ҫирӗплетнӗ. Хӗрарӑм шар курнӑ оборудовани хупӑлчасӑр пулнӑ.

Арҫын унччен судпа айӑпланманнине, хӗрарӑма кӑмӑл-сипет енчен сиен кӳнине саплаштарнине кура пуҫиле ӗҫе суд чарса лартнӑ, ӑна 5 пин тенкӗ суд штрафӗ хурса панӑ.

moi-goda.ru сайтри сӑн

Паян, Кӑшарнире, ҫынсем вакра шыва кӗреҫҫӗ. Шупашкар хула администрацийӗн пуҫлӑхӗ Алексей Ладыков хӑйӗн ҫумӗсемпе Владимир Филипповпа тата Андрей Петровпа вакра шыва кӗнӗ. Ҫакна вӗсем видео ӳкерсе Инстаграмри страницӑна вырнаҫтарнӑ.

Ҫавӑн пекех Калинин районӗн администрацийӗн пуҫлӑхӗ Яков Михайлов, Шупашкар хулин депутатсен пухӑвӗн депутачӗ Сергей Муравьев та сивӗрен хӑрамасӑр уявра вакка чӑмнӑ.

Палӑртмалла: Роспотребнадзор Кӑшарнире шыва кӗнӗ чухне асӑрхануллӑ пулма ыйтнӑ.