Гагарин урамӗнчи 14-мӗш ҫурт — чӑн-чӑн чӑваш сӑн-сӑпатлӑ кермен! 1997-мӗш ҫулта вӑл керментен Вырӑс драма театрне кӑларса яма пултарайман, ӗнтӗ, эпир! Чӑвашсем сӑпайлӑ халӑх! Трактор тӑвакансен культура керменӗнче ҫирӗм ҫул ытла тертленсе пурӑннӑ хыҫҫӑн Ҫеҫпӗл Мишши ячӗлле театр харпӑр-хӑй ҫуртлӑ пулса тӑма тивӗҫлӗ пулчӗ!

«Ҫеҫпӗл» кинотеатр пулнӑ керменне Вырӑс драма театрне куҫармалла пулнӑ ҫеҫ! Пирӗн ТЮЗ — хӑйӗн юратнӑ ҫуртӗнче ӗмӗрлӗхе тӗпленнӗ пулӗччӗ! Пирӗн мухтавлӑ В.И. Павлов, В.Н. Оринов, Пӑртта, Н.А. Дмитриев, Стас Владимиров, Сергей Павлов паллӑ юрӑҫсем, П.И. Чамжаева, С.Р. Савельева, Л.Ф. Красова, Музыкантова тата ытти артистсем — ҫав Гагарин урамӗнчи 14-мӗш ҫуртра выляма пуҫланӑ-ҫке!

Мускав проспекчӗн 33/9-мӗш ҫурчӗн икӗ сцена! Пӗри ачасем валли, тепри аслисем валли. Иккӗшӗ те вырӑс чӗлхиллӗ спектакльсене вылямашкӑн кирлӗ! Вырӑс драма театрӗ хӑйӗн пӗр ӗмӗрхи паллӑ кунне шӑп ҫавӑнта кӗтсе илтӗрччӗ!

Пирӗн Вырӑс театрӗ валли ҫӗнӗ ҫурт хӑпартсан та ытлашши пулмасть! Константинов ячӗллӗ Вырӑс драма театрӗ тӑрать Йошкар-Ола хулинче!

Малалла...

РИА Новости тунӑ сӑн

Ҫӗнӗ Шупашкарта Раҫҫей эстрада юрӑҫин Олег Газмановӑн концерчӗ пулӗ. Ӑна Ҫӗнӗ Шупашкар хулин ҫуралнӑ кунӗнчех ирттермелле пулнӑ. Анчах ун чухне кӑшӑлвирус енӗпе лару-тӑру йывӑр пулнӑ.

Халӗ ку енӗпе лайӑхах. Концерта суйлав кунне халалласа йӗркелӗҫ. Вӑл химиксен хулинче авӑн уйӑхӗн 17-мӗшӗнче Николаев стадионӗнче иртӗ. Анчах унта кӑшӑлвирусран прививка тунисем ҫеҫ кӗрееҫҫӗ. Зала 70 процент таран тултарӗҫ. Ҫапла 3 пин ҫын вырнаҫӗ.

Сӑмах май, концерта «Химпром» шучӗпе ирттерӗҫ.

minec.cap.ru сӑнӳкерчӗкӗ

Туризм енӗпе ӗҫлекен федераци агентстви Раҫҫейре канакансене хавхалантаракан программӑна вӗҫлессине пӗлтернӗ. Аса илтерер: кешбэк программипе турсене, пуйӑс-самолёт ҫине билетсене ҫурла уйӑхӗн 31-мӗшччен туянма май пурччӗ, каярах ҫав вӑхӑта авӑн уйӑхӗн 15-мӗшӗччен тӑсрӗҫ. Анчах халӗ вӑл программӑна вӑхӑт ҫитичченех вӗҫлессине хыпарланӑ. Ҫакӑ программа валли уйӑрнӑ укҫа-тенкӗ пӗтнипе ҫыхӑннӑ.

Кӑҫалхи 6 уйӑхра 1,6 миллион ытла турист хамӑр ҫӗршывра канса тӑкакланнине ятарлӑ программӑпа усӑ курса чакарма пултарнӑ. Кешбэка туризм отраслӗ кӑшӑлвируса пула йывӑрлӑха кӗрсе ӳкнӗ хыҫҫӑн пама тытӑннӑччӗ. Программӑна кайран татах тӑсрӗҫ.

Кӑҫал Сӑр тата Хусан хӳтӗлев чиккисене чавнӑ ҫынсен паттӑрлӑхне халалласа юрӑ-кӗвӗ альбомӗ кӑларӗҫ. Ӑна юпа уйӑхӗн 28-мӗшӗ тӗлне хатӗрлесе ҫитермелле. Сӑмах май, ҫак темӑна халалланӑ юрӑсен конкурсне кӑҫал Хӗрарӑмсен пӗрлӗхӗ пуҫарнӑ.

Альбома профессионал мусӑкҫӑсемпе юрӑҫсем ҫыртарӗҫ. Унта 11 юрӑ кӗрӗ. Жюрие Родион Газманов ертсе пырӗ. Вӑлах пӗр авторпа юрлама пултарӗ.

Альбомри юрӑсене шкулсенче хӑтлав тӑвӗҫ. Кайран вӗсене тӗрлӗ мероприятире янӑраттарӗҫ.

Чӑваш патшалӑх пукан театрӗ кӑҫалхи сӗнӗ сезонта пӗчӗк куракансене тата вӗсен ашшӗ-амӑшне черетлӗ премьерӑсемпе савӑнтарӗ.

Чӳк-раштав уйӑхӗсенче Марье Левтина хайлавӗ тӑрӑх «Виҫӗ хӗвел» тата Зоя Никонорова ӗҫӗ тӑрӑх «Хахатан ҫӗршывӗнче» премьерӑсем хатӗрлӗҫ. Вӗсене лартассипе ют ҫӗртен чӗнсе илнӗ специалистсем тӑрӑшӗҫ.

2022 ҫулта Марина Карягина ӗҫӗ тӑрӑх «Хᾰйне ҫухатнᾰ путек» спектакль лартасшӑн. Театрӑн илемлӗх ертӳҫи — Чӑваш Республикин тава тивӗҫлӗ артисчӗ Юрий Филиппов пӗлтернӗ тӑрӑх, Антон Чеховпа Николай Носовӑн ача-пӑча валли ҫырнӑ классика хайлавӗсем тӑрӑх спектакльсем тата вырӑс фольклорне тӗпе хурса «Сестрица Аленушка и братец Иванушка» юмах лартӗҫ.

Чӑваш Республикин тава тивӗҫлӗ артистки Елена Хорькова хӑйӗн юбилейӗ тӗлне моноспектакль хатӗрлӗ.

Шӑмӑршӑ районне Чӑваш патшалӑх юрӑпа ташӑ ансамблӗн чаплӑ тумӗсене парнеленӗ. Кун пирки «Хресчен сасси» хаҫатӑн паянхи номерӗнче пӗлтернӗ.

Асӑннӑ МИХра Шӑмӑршӑ район администрацийӗн пуҫлӑхӗн ҫумӗпе — социаллӑ аталану пайӗн ертӳҫипе Александр Чамеевпа интерью пичетленнӗ.

«Шӑмӑршӑ районӗ пӗчӗк пулсан та пирӗн тӑрӑхран паллӑ ҫын — артистсем, драматургсем, республикӑра культура ӗҫне аталантарса пыракансем — сахал мар тухнӑ. Эпир Валерий Николаевич Яковлевпа, Мефодий Иванович Денисовпа тата ытти нумай ентешпе чӑннипех те мӑнаҫланатпӑр. Вӗсем хӑйсем те тӑван ене манӑҫа кӑлармаҫҫӗ, май килнӗ таран пулӑшма тӑрӑшаҫҫӗ. Акӑ Сергей Кувшинов Чӑваш Республикин юрӑпа ташӑ ансамблӗн чаплӑ тумӗсене района парнелеме пултарчӗ. Ӑна, паллах, ку енӗпе ансамблӗн илемлӗх ертӳҫи Юрий Васильев нумай пулӑшрӗ», — каласа кӑтартнӑ Геннадий Максимов журналиста Александр Чамеев.

cap.ru сӑнӳкерчӗкӗ

«Тӗрленӗ Чӑваш Ен» проект Республика кунӗнче старт илнӗ. Унпа килӗшӳллӗн, кашни районти ӑстасем республика карттине тӗрлӗҫ. Уявра Чӑваш тӗррин музейӗ кашни района чиккисене ӳкернӗ картинӑна валеҫсе панӑ.

Ӑстасем ҫӑвӗпех ӗҫленӗ. Акӑ карттӑн пӗрремӗш пайӗсем музея ҫитнӗ. Шупашкар районӗн карттине Любовь Вазюковӑпа Анастасия Андреева тӗрленӗ. Елчӗк районӗнче ку ӗҫе Римма Парферьева пурнӑҫланӑ. Вӑрнар районӗнче вара карттӑна Елена Есенцева тата Елена Шарипова тӗрленӗ. Красноармейски районӗн карртине Жанна Михайлова хатӗрленӗ.

Проект положенийӗпе килӗшӳллӗн, карттӑсен тӗрленӗ пайӗсем музея авӑн уйӑхӗн 15-мӗшӗччен ҫитмелле. Унтан вӗсене «Паха тӗрӗ» хапрӑк ӑстисем пӗрлештерӗҫ. Тӗрленӗ карттӑпа халӑха Чӑваш тӗррин кунӗнче, чӳкӗн 26-мӗшӗнче, паллаштарӗҫ.

Чӑваш тӗрри кунӗ тӗлне Шупашкарти «Радуга» (чӑв. Асамат кӗперӗ) культурӑпа курав центрӗ «Чӑваш тумӗн азбуки» тӗпчевпе пултарулӑх тетрачӗ тӑрӑх Пӗтӗм Раҫҫей ача-пӑча конкурсӗ ирттерет.

«Чӑваш тумӗн азбуки» пултарулӑх тетрачӗ ачасем чӑваш халӑхӗн этнокультурипе кӑсӑкланассине вӑйлатасса шанаҫҫӗ.

Конкурса 5-10 ҫулсенчи ачасем хутшӑнма йыхравлаҫҫӗ. Вӗсен пултарулӑхне ӳсӗмне кура ҫак ушкӑнсенче: 5 ҫултан пуҫласа 7 ҫулччен; 8-тан 10-ччен; сывлӑх енчен хавшак ачасен тӑрӑшӑвне уйрӑм тишкерӗҫ.

Конкурс авӑн уйӑхӗн 1-мӗшӗнче пуҫланнӑ, чӳк уйӑхӗн 26-мӗшӗнче вӗҫленӗ.

Ӗҫсене чӳк уйӑхӗн 15-мӗшӗччен йышӑнӗҫ.

Авӑн уйӑхӗн 11-мӗшӗнче Ҫеҫпӗл Мишши ячӗллӗ Ҫамрӑксен театрӗнче «Культурӑллӑ шӑматкун» пӗтӗм Раҫҫейри акци иртӗ.

Ҫав кун 11 сехетре театр артисчӗсем Василий Павлов, Светлана Савельева, Александр Пӑртта Инстаграмра тӳрӗ тӳрӗ эфира тухӗҫ, вӗсем чӑвашла сӑвӑсем вулӗҫ.

ҫав кунах 17 сехетре театрта «Небесная команда» фильма тӳлевсӗр кӑтартӗҫ.

Юпа уйӑхӗн 1-мӗшӗ хыҫҫӑн Чӑваш Енре «Record» радио калаҫма тытӑнӗ. Ӑна 101.5 ФМ хум ҫинче итлеме май килӗ.

Асӑннӑ хум ҫинче мларах «Авторадио» калаҫнӑ. Малашне вӑл 104.2 ФМ диапазона куҫӗ, «Радио родных дорог» (чӑв. Тӑван ҫулсен радиовӗ) холдинга кӗрӗ.

Сӑмах май, «LoveРадио» та хӑйӗн хумне улӑштарӗ. Ӑна 97.3 ФМ диапазонта шырамалла.

Асӑннӑ улшӑнусем юпа уйӑхӗн 1-мӗш хыҫҫӑн пулса иртессине пӗлтереҫҫӗ.

«Record» радио пирки каласан, вӑл – Раҫҫейӗн ташӑ радиостанцийӗ. 1995 ҫулта уҫӑлнӑскере Раҫҫейӗн 160 ытла хулинче тата Кӑркӑстанра итлеме пулать. Унӑн тӗп музыка формачӗ — Dance CHR тата EDM.