cap.ru сайтри сӑн

Шупашкар хулинчи васкавлӑ медпулӑшу тухтӑрӗсем арҫыннӑн пурнӑҫне ҫӑлнӑ: вӗсем унӑн чарӑнса ларнӑ чӗрине ӗҫлеттерсе янӑ.

Тухтӑрсене ирхине «пуҫа суранлатнӑ» тесе шӑнкӑравласа чӗннӗ. Анчах фельдшерсем вырӑна ҫитнӗ те урӑх ӳкерчӗк курнӑ: пациент тӑнне ҫухатнӑ, сывлама пӑрахнӑ, чӗри тапман. Тухтӑрсем пӗр тӑхтамасӑр экстреннӑй пулӑшу патне шӑнкӑравланӑ.

Ирхи 5 сехет тӗлнелле вырӑна реанимаци бригади килнӗ. Ҫав йышра Елена Федорова тухтӑр, Юлия Артемьева медсестра тата Сергей Кураков медбрат пулнӑ. Вӗсем часрах реанимаци тума пуҫланӑ. Телее, темиҫе минутран пациентӑн чӗри тапма пуҫланӑ. Стационара кайнӑ чухне, ҫул ҫинче, вӑл хӑй тӗллӗн сывлама тытӑннӑ. Артери юн пусӑмӗ те йӗркеленнӗ.

Пациента пульницӑна хӑвӑрт илсе ҫитерекенни — Александр Кузнецов.

«Контактри» сӑн

Шупашкарта ватӑ арҫын хӑй чирлӗ пулнине ӑнсӑртран, Хулан тӗп пульницине арӑмӗпе килсен, пӗлнӗ.

Вӑл 30 ҫул пирус туртнӑ, сывлӑш ҫитменнипе аптӑранӑ, ҫакна ҫулсем иртнипе ҫыхӑнтарнӑ. Тухтӑр ӑна тӗрӗсленме янӑ. Арҫын ӳпке чирӗпе (ХОБЛ) аптӑрани палӑрнӑ.

Хулан тӗп пульницин пульмонологи уйрӑмӗн заведующийӗ Галина Александрова ӑнлантарнӑ тӑрӑх, кун пек чир чухне ӳпке шыҫать, бронхра йӑлмака тулать, ӳпке вара арканма тытӑнать. Ҫавна май ҫынна сывлама та йывӑр.

Тухтӑр каланӑ тӑрӑх, ытларах чухне ку пирус туртнипе пулать. Анчах чир тусана, тӗтӗме тата сиенлӗ газсене пула та йӑл илме пултарать.

Халӗ арҫын килте сипленет, ХОБЛпа чирлекен пациентсен шкулӗ витӗр тухнӑ.

cap.ru сайтри сӑн

Ҫӗмӗрле хулинче пурӑнакан 80 ҫулти хӗрарӑм мобильлӗ пункта сывлӑхне тӗрӗслеме пынӑ. Вӑл хӑйне аванах туйнӑ-ха, анчах тухтӑрсем юн пусӑмне тӗрӗсленӗ те –тонометр 218/102 кӑтартнӑ. Кунсӑр пуҫне унӑн аритми пулнӑ.

Ватӑ хӗрарӑма тӳрех ЭКГ тума тата терапевт патне янӑ. Унтан вара ӑна Ҫӗмӗрлери медицина центрне ӑсатнӑ. Медцентрти тухтӑрсем пациентӑн чӗре таппине йӗркене кӗртнӗ те урӑх эмелсем ӗҫме ҫырса панӑ. Халӗ ватӑ хӗрарӑм хӑйне аванах туять.

Тухтӑрсем каланӑ тӑрӑх, аритми (выр. «мерцательная аритмия») чылай чухне симптомсемсӗр иртет, анчах вӑл инсульт патне илсе ҫитерме пултарать.

Шурӑ халатлисем ҫакна та аса илтереҫҫӗ: 40 ҫултан иртсен юн пусӑмне, юнри холестерин тата сахӑр шайӗсене пӗрмаях тӗрӗслесе тӑмалла.

max.ru/pcheb_21 каналтан илнӗ сӑнӳкерчӗк

Чӑваш Енре пулла кайсан аптӑраса ӳкнӗ арҫын пурнӑҫне ҫӑлса хӑварнӑ. Тӗрӗссипе каласан, пӑтӑрмах пулӑпа пачах та ҫыхӑнман. Арҫын панулми ҫинӗ. Ҫавӑн хыҫҫӑн вӑл аптӑраса ӳкнӗ.

Улатӑрта пурӑнакан 47 ҫулти арҫын шӑши сивчирне ҫаклатнӑ. Тухтӑрсем шухӑшланӑ тӑрӑх, хантавируса арҫын пулӑра ҫаклатма пултарнӑ. Пулӑ тытса ларнӑ чухне вӑл ҫуман панулми ҫинӗ. Ҫак ҫимӗҫе кӑшлакан чӗрчунсем чир лектерсе хӑварама пултарнӑ.

Арҫынна больницӑна илсе пынӑ чухне вӑл хӑйне питех те япӑх туйнӑ. Ҫав вӑхӑтра унӑн пӳри ӗҫлеме пӑрахнӑпа пӗрех пулнӑ.

Шӑши сивчирӗ малтанласа урӑх чир евӗр палӑрма пултарать иккен. Ҫын хӑйне шӑнса пӑсӑлнӑ чухнехи евӗр туять, кайран унӑн юн тымарӗсем тата шалти органӗсем сиенленеҫҫӗ. Шӑпах ҫавӑн пек пулса тухнӑ та Улатӑрти вӑйпиттин.

max.ru/progorod21 каналтан илнӗ сӑнӳкерчӗк

Ӗнер Ҫӗнӗ Шупашкарта ҫул ҫинче инкек пулса иртнӗ.

«Мерседес» машинӑпа ҫула тухнӑ водитель хирӗҫ килекен ҫул ҫине тухса кайса «Лада» автомобильпе ҫапӑннӑ. Ют ҫӗршывра туса кӑларнӑ водителӗ инкекре вилмеллех аманнӑ. Унсӑр пуҫне салонта ларса пынӑ тепӗр ҫынна, 26 ҫулти каччӑна, больницӑна ӑсатнӑ. Анчах вӑл паян куҫне ӗмӗрлӗхе хупнӑ.

«Мерседес» рулӗ умӗнче пулнӑ 26 ҫулти ҫамрӑк водитель правине 2023 ҫулта илнӗ. Эрех ӗҫнипе ӗҫменнине тӗрӗсленме килӗшменрен кӗҫех вӑл водитель прависӗр тӑрса юлнӑ. Удостоверение пӗлтӗрхи кӗркунне ҫеҫ каялла тепре илнӗ.

«Лада» машинӑн водительне (руль умӗнче хӗрарӑм пулнӑ) тата салонти икӗ пассажира (вӗсенчен пӗри 4 ҫулти ача) больницӑна илсе кайнӑ. Тухтӑрсем вӗсен сывлӑхне тӗрӗсленӗ хыҫҫӑн вӗсене киле янӑ.

Вӑрмар районӗнчи пӗр ялта пурӑнакан арҫын тухтӑрсене алӑра эрех черкки тытса кӗтсе илнӗ. Унран та ытларах, тухтӑр хӑйне пулӑшма хӑтланнӑ чухне те вӑл черккене алӑран яман, ним пулман пек ӗҫсе ларнӑ.

Кивӗ Вӑрмар ялӗнче пурӑнакан 50 ҫулти арҫынна япӑх пулса кайнӑ та тухтӑра чӗнсе илнӗ. Анчах арҫын тухтӑр тӗрӗсленӗ самантра та эрех ӗҫнӗ. Фельдшер пациента катетерти юн эрехе пула юхать тесе чарма хӑтланнӑ та арҫын тарӑхса кайнӑ, шурӑ халатлине усал сӑмахпа вӑрҫса пӗтернӗ.

Фельдшер апла пулин те хӑйӗн тивӗҫне пурнӑҫланӑ, анчах хӑйне кӳрентернине каҫарма щутламан, прокуратурӑна евитленӗ. Пӑтӑрмах ял арҫыннине штрафланипе вӗҫленнӗ. Сумми пысӑках мар та (пурӗ 3 пин тенкӗлӗх штрафланӑ) ҫапах та явап тытмах тивет.

cap.ru сайтри сӑн

Санитари вертолечӗ каллех ҫула тухнӑ. Хальхинче вӑл ҫул-йӗр ҫинчи аварире шар курнӑ 23 ҫулти пациента Улатӑр хулинчен Шупашкара илсе ҫитернӗ.

Арҫын аварире пуҫне амантнӑ, унӑн пуҫ мими чӗтреннӗ, ури хуҫӑлнӑ, пилӗкӗ тата ҫурӑм шӑмми суранланнӑ. Сиплевсӗр пуҫне ӑна тӗплӗнрех тӗрӗслемелле те пулнӑ. Ҫавӑнпа сывлӑхӗ кӑшт йӗркеленсен ҫамрӑк арҫынна Республикӑри клиника пульницине илсе ҫитерме санавиаци чӗнсе илме заявка панӑ.

Паллах, тӳпере вӗҫекен вертолет, машинӑпа танлаштарсан, пациента Шупашкар хулине хӑвӑртрах илсе ҫитернӗ. Ҫулпа силленсе пырсан унӑн сывлӑха япӑхланма та пултарнӑ. Республикӑри клиника пульницинче ӑна тухтӑрсем пулӑшнӑ.

cap.ru сайтри сӑн

Чӑваш Енре 44 ҫулти хӗрарӑм хырӑмӗ ӳссе пынине шута хуман, пульницӑна кайман. Нумаях пулмасть унта ҫитмех тивнӗ: хырӑмӗ вӑйлӑ ыратма тытӑннӑ.

Вӑл тухтӑр патӗнче 2007 ҫултанпа пулман иккен. Шупашкарти Хулари клиника пульницинче ӗҫлекен специалистсем тӗрӗсленӗ те унӑн ҫӑмарталӑхӗнче тем пысӑкӑш мӑкӑль ӳссе ларнине асӑрханӑ. Ҫийӗнчех операци тунӑ.

Операци вӑхӑтӗнче ҫӑмарталӑхӗнчен пысӑк мӑкӑль, ҫуралас патне ҫитнӗ ача пысӑкӑшскере, касса кӑларнӑ. Унтан 5 литр шӗвек тухнӑ.

Юрать, вӑхӑтра операци туса ӗлкӗрнӗ. Унсӑрӑн пациенткӑн капсула ҫурӑлма е перетонит пулма пултарнӑ.

Уйрӑм заведующийӗ Ирина Едифанова вӑхӑтра пулӑшни унӑн пурнӑҫне ҫӑлма май панине палӑртнӑ.

cap.ru сайтри сӑн

Чӑваш Енри санитари авиацийӗ Ҫӗмӗрле хулинчи хӗрарӑма Шупашкара илсе ҫитернӗ. Ӑна Республикӑри клиника пульницин тухтӑрӗсем йышӑннӑ.

Хӗрарӑм районти тӗп пульницӑн терапи уйрӑмне килнӗ, пуҫ ыратнине, сулахай алӑ-ури вӑйсӑрланнине каланӑ. Тухтӑрсем компьютер томографийӗ тунӑ та пуҫӗнче темле пысӑк япала ӳснине палӑртнӑ. Унтан специалистсем Шупашкарти тухтӑрсемпе телемедицина консультацийӗ ирттернӗ. Вӗсем хӗрарӑма профильлӗ стационара илсе кайма йышӑннӑ, вертолет чӗнсе илнӗ.

Санавиаци хӗрарӑма Шупашкара ҫав кунах илсе ҫитернӗ. Республикӑри клиника пульницинче ӑна малалла тӗрӗслӗҫ, сиплев палӑртӗҫ. Тухтӑрсем палӑртнӑ тӑрӑх, ӑна кайран реабилитаци те кирлӗ пулма пултарать.

cheb-centr.soc.cap.ru сӑнӳкерчӗкӗ

Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрта кашни ир зарядкӑран пуҫланать. Кунта сӑмах асӑннӑ центрти стационар уйрӑмӗнче пурӑнакансем пирки пырать.

Стационар уйрӑмӗнче пурӑнакан кинеми-мучие кашни кунах, ирхи апат ҫинӗ хыҫҫӑн, хӑтлӑ музыка залне йыхравлаҫҫӗ. Унта ватӑсем ларса зарядка тӑваҫҫӗ. Ҫапла-ҫапла. Мӗншӗн тесен тӑрса хускану тума вӗсене ҫӑмӑл мар: пуҫ ҫаврӑнса кайма пултарать, сулӑнса каясран хӑрамалла. Ҫавӑнпа та ларса тумалли хусканӑва пурнӑҫлаҫҫӗ. Мӗн хыҫҫӑн мӗн тумаллине специалист кӑтартса пырать.

Ҫынсен ҫулне кура ирттерекен хускану ватӑсен шӑм-шакне ҫӑмӑллӑх кӳрет. Хӑйсем калашле, ытлашши хытса ларасран пулӑшать. Зарядка тума ӳркенекенсене е вӑй ҫуккисене вара хистемеҫҫӗ.