Шупашкар ҫынни ӑратлӑ йытӑ ҫури туянма ӗмӗтленнӗ. Шпиц ӑратлӑ йытӑ ҫурине сутасси пирки тӗнче тетелӗнче пӗлтерӳ курнӑ хыҫҫӑн вӑл тӳрех сутуҫӑпа ҫыхӑннӑ. Тавар сутаканни хӗр иккен.
Сутуҫӑ йытӑ ҫуришӗн малтанласа 6500 тенкӗ куҫарса пама ыйтнӑ. Тепӗр 8500 тенкине кайран, ҫурана ятарлӑ служба урлӑ ҫитерсе панӑ хыҫҫӑн, тӳлемелле тесе ӗнентернӗ.
Шупашкар ҫынни укҫана куҫарса панӑ хыҫҫӑн тавар сутакан ҫухалнӑ.
Улталаннӑ арҫын йӗрке хуралҫисенчен пулӑшу ыйтнӑ. Пакунлисем Ӗрӗнпур облаҫӗнчи 25 ҫулти хӗре тытса чарнӑ. Вӑл ҫынсене унччен те ҫавӑн пек майпа улталаса пурӑннӑ иккен. Ҫавӑншӑн ӑна пуҫиле майпа явап та тыттарнӑ. Вӑл вара пӗрре тӑнӑ ҫул ҫинчен пӑрӑнма шутламан.
Шупашкарта пурӑнакан хӗрарӑм ултавҫӑсене 1,5 миллион тенкӗ куҫарса панӑ. Ӑна вӑл кредит илнӗ.
Нарӑс уйӑхӗн варринче ун патне палламан ҫын шӑнкӑравланӑ. Ултавҫӑ анлӑ сарӑлнӑ мелпе усӑ курнӑ: ун ячӗпе такам кредит илесшӗн-мӗн. Ӑна пӑрахӑҫлама кредит илсе тепӗр счет ҫине куҫармалла имӗш.
Хӗрарӑм банка кайнӑ. Телефонпа такампа калаҫсах тӑнӑ. Банк ӗҫченӗ ҫакна кура укҫа мӗн тума кирлипе кӑсӑкланнӑ. Лешӗ дача илессине каланӑ. Ку банкра ӑна кредит паман. Хӗрарӑм урӑх банксене кайнӑ. Ҫапла вӑл 1 миллион та 475 пин тенкӗ кивҫен илнӗ, ӑна куҫарса панӑ.
Республикӑра пурӑнакан ҫынсен мессенджерне ҫӗмӗрсе укҫа ыйтнӑ. Ҫапла темиҫе ҫын ултавҫӑсене укҫа куҫарса панӑ.
Вӗсем мессенджерта чӑнах та тусӗ ҫырать-и е ҫук-и - тӗрӗслемен.
Вӑрнар районӗнчи 57-ри арҫын мессенджерта пӗлӗшӗ кивҫен ыйтать тесе 14,5 пин тенкӗ куҫарса панӑ. Хай ун патне шӑнкӑравлама ӑс ҫитереймен. Аккаунта ултавҫӑсем ҫӗмӗрнӗ иккен.
Ҫак мелпех Канаш районӗнчи хӗрарӑма улталанӑ. Тусӗ кивҫен ыйтать тесе вӑл 20 пин тенкӗ куҫарса панӑ. Тепре куҫарма ыйтсан тин вӑт иккӗленме пуҫланӑ, "тусӗнчен" пӗлтӗр иккӗшӗ ӑҫта канни пирки ыйтнӑ.
Полици ҫав ултавҫӑсене шырать.
Нарӑс уйӑхӗн 16-мӗшӗнче Патӑрьел районӗнче пурӑнакан арҫын манипулятор установки туянма хатӗрленнӗ. Ӑна сутни пирки вӑл тӗнче тетелӗнче курнӑ.
Хайхискер сутуҫӑпа ҫыхӑннӑ та ӑна 500 пин тенкӗ куҫарса панӑ. Кун хыҫҫӑн лешӗ ҫыхӑнӑва тухма пӑрахнӑ.
Ултавҫа тепӗр регионта тупнӑ. Йӗрке хуралҫисем Ижевск хулине командировкӑна кайса ӑна тытса килнӗ. Чӑваш арҫынни укҫа куҫарнӑ карттине блокировка тунӑ.
Ҫав ҫын – 22 ҫулти арҫын, унччен судпа пӗрре кӑна мар айӑпланнӑ.
Шупашкар хулинче пурӑнакан темиҫе ватӑ иртнӗ ҫул вӗҫӗнче ултавҫӑсен капкӑнне ҫакланнӑ. Хайхисене тӑванӗсем пӑтӑрмаха лекнӗ, вӗсене пулӑшас тесен укҫа кирлӗ тесе телефонпа хӑратнӑ. Ҫапла майпа 62 ҫултан пуҫласа 85 ҫулсенчи 5 ватӑ улталаннӑ. Унтан вӗсем йӗрке хуралҫисенчен пулӑшу ыйтнӑ.
80-ри кинемей, сӑмахран, курьера 500 пин тенкӗ тыттарнӑ янӑ. Ӑна хӗрӗ машинӑпа инкеке лекнӗ, пуҫиле майпа явап тыттарасран укҫа парсан ҫӑлӑнса юлма пулать тесе ӗнентернӗ.
Ҫавӑн пек меслетпе ватӑсене 900 пин тенкӗлӗх улталанӑ.
Ҫӑмӑл укҫа ӗҫлесе илме май пурри ҫинчен 24 ҫулти каччӑ тӗнче тетелӗнчи пӗлтерӳ тӑрӑх пӗлнӗ. Укҫан 10 процентне вӑл хӑйӗн кӗсйине чикнӗ, ыттине «ӗҫпе тивӗҫтерекенсене» куҫарса панӑ.
Кӑрлач уйӑхӗн вӗҫӗнче Шупашкарта пурӑнакан 78 ҫулти хӗрарӑм патне палламан ҫын шӑнкӑравланӑ. Вӑл банк ӗҫченӗ имӗш. Хайхискер такамсем унӑн банкри укҫине хапсӑннине пӗлтернӗ. Ватӑскере кун пирки никама та калама хушман.
Палламан ҫын хӗрарӑма банкри укҫине илсе урӑх счетсем ҫине куҫарма ӳкӗте кӗртнӗ. Ҫапла хӗрарӑм 10 млн тенкӗ куҫарнӑ.
Кунпа кӑна ҫырлахман ултавҫӑсем. Хӗрарӑмӑн хваттерне салук хурса такам кредит илме хӑтланать-мӗн. Ӑна хваттере часрах йӳнӗрехпе сутса укҫине куҫарма хушнӑ. Ҫапла хӗрарӑм тепӗр 3 млн тенкӗ куҫарнӑ.
Вӑл ултавҫӑсемпе калаҫнине 3 эрнерен кӑна ӑнланнӑ.
Шупашкарти 32 ҫулти таксист ултавҫӑсен тӗлне лекнӗ. Ун патне саккас килнӗ: хӗре Канаша леҫсе ямалла.
Клиента кӗтсе ларнӑ чухне ун патне шӑнкӑрав килнӗ - хӗрӗн ӗҫри пуҫлӑхӗ-мӗн. Хайхискер уншӑн укҫа куҫарса парассине каланӑ. Ҫапла таксист картта номерне те, смспа килнӗ кодсене те пӗлтерне. Кун хыҫҫӑн унӑн номерӗ ҫинчен 24 пин тенкӗ ҫухалнӑ.
Ултавҫӑ кунпа ҫырлахман-ха. Вӑл каллех шӑнкӑравланӑ. Кун хыҫҫӑн картта ҫинчен тепӗр 9 пин тенкӗ ҫухалнӑ.
Ку тӗслӗх тӗлӗшпе пуҫиле ӗҫ пуҫарнӑ.
Мари Элта пурӑнакан арҫын трактор утянма хӑтланса 490 пин тенкӗ укҫасӑр тӑрса юлнӑ. Пӑтӑрмаха ҫакланнӑскер пирӗн республикӑри Етӗрне районӗнчи йӗрке хуралҫисенчен пулӑшу ыйтнӑ.
Арҫын каланӑ тӑрӑх, тӗнче тетелӗнче вӑл ял хуҫалӑх техникине сутасси ҫинчен пӗлтерӳ курнӑ хыҫҫӑ ҫав номерпе шӑнкӑравланӑ. Палламан ҫын трактор пурри ҫинчен пӗлтернӗ, пырса курма сӗннӗ. Трактор Етӗрне районӗнчи пӗр ялта-мӗн, анчах хуҫине пӗлтерме хушман, вӑрттӑн пырса пӑхма сӗннӗ, ахальлӗн йӳнӗрехпе сутма май килмӗ тесе тыттарнӑ.
Каланӑ — тунӑ. Мари Эл ҫынни Етӗрне районне ҫитсе трактора пӑхса кайнӑ, унтан палламан ҫынна 490 пин тенкӗ куҫарса панӑ. Трактор хуҫи вара техникӑна сутма килӗшмен, эп укҫа илмен тенӗ.
Укҫана илекенни, чӑн та, урӑххи пулнӑ.
Шупашкарта пурӑнакан 51 ҫулти хӗрарӑм ун ячӗпе такам кредит илме пуҫланӑ тенине ӗненнӗ. Ултавҫӑсем ку меслетпе тӑтӑшах усӑ кураҫҫӗ. Ҫак хӗрарӑм та вӗсене ӗненнӗ.
Палламан ҫын кредит илме хатӗрленнӗ «ултавҫа» тупас тесе ӑна онлайн-займ илме, укҫана кӑтартнӑ счет ҫине куҫарма ыйтнӑ.
Укҫана пӗрремӗш хут куҫарсанах банк унӑн карттине блокировка тунӑ. Кун хыҫҫан вӑл нухрата банкоматран илнӗ те палламан счет ҫине куҫарнӑ: 812 пин тенкӗ. Ҫапла вӑл ултавҫа 2,9 миллион ытла тенкӗ куҫарса панӑ.
Каҫхине хӗрарӑм тусӗпе шӑнкӑравласа калаҫнӑ. Ҫавӑн чухне лешӗ ӑна ултавҫӑсен серепине лекнине ӑнлантарнӑ.
Сӗнтӗрвӑрри районӗнче пурӑнакан 22 ҫулти хӗрӗн ултавҫӑсене пула 2 миллиона яхӑн тенкӗ кредит тӳлеме тивӗ. Ун патне палламан ҫын шӑнкӑравласа такам ун ячӗпе кредит илме хӑтланнине пӗлтернӗ. Ӑна пӑрахӑҫлама хайхискер темиҫе операци тума ыйтнӑ. Вӗсене пурнӑҫласан вӑл ултавҫӑсен счечӗ ҫине 1 миллион та 991 пин тенкӗ куҫарнӑ. Ку укҫа - банкран машина туянма илнӗ кредит.
Кун тӗлӗшпе пуҫиле ӗҫ пуҫарнӑ.
+12.3 °C