Хĕрӳ хĕвел хĕрле хĕрелсе анчĕ...1

Хĕрӳ хĕвел хĕрле хĕрелсе анчĕ...

Хĕрӳ хĕвел хĕрле хĕрелсе анчĕ,

Ыраш ăшне вăшпатрĕ путене.

Çĕре хуралламашкăн тепĕр анчăк —

Сар уйăх — час хăпарĕ тӳпене.

Çатан çумне таяннă шурă хурăн

Тĕтреллĕн тĕлĕрет шăп сывлăшра.

"Тĕнче юмах пек... Туй çакна та — пурăн!" —

Тесе чĕнетĕп эп хама ăшра.

Çăвар тулли кăранклатать çăханĕ,

Хутран-ситрен хухлет пĕр тăмана.

Анчах этем епле ăна ылханĕ,

Епле ăна вăл хурĕ тăшмана?

Пуриншĕн те тивлетлĕ çакă ирĕк,

Пурнасшăн пурте пĕр пекех çунать.

Илтетĕн-и, мĕскер калать ав çирĕк:

"Пĕр айăп та тăваймăп чĕр чуна".