Çил-тăманлă каç


Иван Егорова

Чупрăм-тухрăм урама

чун савнине шырама.

Çунтăм, тупасси пулмарĕ,

çулăм хыпрĕ чунăма.

 

Чун савнийĕм, чун савни,

ытла путсĕр самани.

Кала, тусăм: тупăнсассăн

савăн-и е савмăн-и?

 

Чун савнине савасси —

вăхăтлăха савнасси,

вăрахлăха савăнмашкăн

хама мĕскер сунас-ши?

 

Хӳхлев

1

Касантей каланă: "Çын вăл выльăх,

уйрăмах — чăваш... Çапла, çапла..."

Тен, хăш чух, капла тенишĕн çылăх,

тепĕр чух янрать-тĕр — сăвапла.

 

Пăхăр-ха, мĕнле кăна çын çук халь.

Пăхăр-ха, мĕн хăтланмасть чăваш!

Аллине лексен ан йĕр, ан çухăр,

пуçăнтан çапсассăн — ан анраш.

 

Çаратсан та, тĕп тусан та чăт эс.

Шан: пулать чăваш та тĕрлĕрен.

Пĕр йышшийĕ — шелсĕр, сивĕ, çăтăх,

тепĕрийĕ — урăхрах, ĕнен.

 

Эп яш чух пĕтме пултарнă теççĕ.

Те чăнах вăл çакă, те суя?

Ыр сăнар! Иртеççĕ те иртеççĕ

умăмран сăнсем — курап, туяп.

 

Ыр пике! Эс пулнă-ши? Мĕн тейĕ

тăвăл — кутсăр-пуçсăр çил-тăман?

Пирĕшти эс пулнă пулĕ, фея, —

тăманра шăнса вилме паман...

 

2

Каласамччĕ эс мана, тăванăм,

каласамччĕ, чей тултарнă май,

ма кунта çанталăк пит тăманлă,

ма ыр çын сахал, хурах нумай?

 

Çул çухатрăм эпĕ, çĕтсе кайрăм,

пырса тухрăм юр аша-аша

çил-тăман урса хутернĕ майăн

те Кăтратана, те Саврăша.

 

Такамсем тӳрех çапса ӳкерчĕç,

хывса илчĕç çийĕм-пуçăма.

Тĕп тăвас темерĕç — те ӳркенчĕç,

те тĕшмĕртеймерĕç, уçă мар.

 

Пĕр мĕлки пуçран ачашласассăн

кирпĕчпе е пуш кĕленчепе —

эп тăна çухатнă... Кассăн-кассăн

çил уланă... Выртнă эп чипер.

 

Халь кунта ларатăп-юптаратăп.

Мĕн мана халь — тăвăл, юр хĕвни!

Эсĕ, кил хуçи, чей тултаратăн.

Эс хуçи пулсассăн, эп — хăни.

 

Хăнине хуçи юп кураканччĕ

Кăтартсам мана хĕрачуна.

Вăл-çке, вăл пĕртен-пĕр çăлаканçă

çĕтсе кайнă сăвăç-ачана.

 

Такăнса уксе çĕрле килӳçĕн

çул çинчи каска пек сăвăçран,

вăл каланă: "Кам-ши ку — вил ӳсĕр?"

Сĕтĕрнĕ вара — аран-аран.

 

Каçĕ урнă — çиллĕ те тăманлă...

Ма çапла терт курнă хĕр нумай,

тен, калайăн, ыр хуçа, таванăм,

тен, калайăн, чей тултарна май?

 

Ыр хуçа, хĕрне эс кăтартмарăн

çавăн чух мана... Çак кунчченех,

хальчченех шутлап: хĕрӳ, мăнтарăн, —

ас тивмесĕр юлнă кучченеç.

 

Касантей те çав майлах юрланă...

Ас тивмен пирки вăл тутлă та.

Ав тулта каллех хĕлле, юр ларнă.

Вут-чĕрем каллех хыт талтлатать.

 

Юлнă ĕç çине тахçан юр çунă,

çул-йĕрсем те питрĕннĕ тахçан.

Эпĕ çеç халь те пулин яш чунлă,

эпĕ çеç манман сана, хуçам.

 

Эпĕ çеç хальччен те тунсăхлатăп сан,

хуçан, юмахри пек хĕрне.

Ĕмĕтлентĕм, талпăнтăм, сăхлантăм...

Кăтартмарĕç юмах пекскерне.

 

Çук ача-пăча ман, çук ман арăм.

Ăраскал тени пулмарĕ çав.

Савăнăç пачах та эп курмарăм,

ылханса телейсĕр пурнăçа.

 

4

Касантей калавĕ хӳхĕм, капăр, —

хăйĕн мар пулин те, шеп пырать.

Пур-тăр çав унта темскер, çук мар-тăр:

çурма çутă — итлеме юрать.

 

Хĕрӳ чунлăн, çулăмлăн çуренĕ,

тĕнче каснă, çитнĕ пин çĕре.

Пăр та, юр та, çумăр та чĕрешĕн

савăнăç çеç пулнă тĕнчере.

 

Тĕрлĕ сăн, сăнар ума ӳкернĕ.

Юмах пек поэзи çĕршывне

Перççире пуль тенĕ, ĕмĕтленнĕ

Шираза çитмешкĕн ун чухне.

 

Ширазран мĕн чухлĕ тухнă лирик!

Саади, Хафиз... ытти мĕн чуль!

Ăсĕ ирĕк пулнă, чунĕ ирĕк.

Ăсăм ирĕк ман та, ирĕк — чун.

 

Багдадра юмахçă Шахразада,

çирĕп чунлă çепĕç сар пике,

усала ырăпала тасатнă

хам курман эп савнă хĕр пекех

 

5.

Сăввăма самай хыт шăратсан та,

ни ачаш мар халь эп, ни хаяр.

Эс пулсассăн çепĕç Шахразада,

эп пулам-и харсăр Шахрияр?

 

Яшлăха каллех кĕмешкĕн тивĕ,

кайăп Саврăш, Кăтрата таран.

Чун савнийĕм явнă çичĕ çивĕт,

çиччĕшне те — çутă хăюран.

 

Тен, çулсем Саврăшпуçне çитерĕç?

Инçех мар курнать кунтан Савкаç.

Савкаçра хĕрсем халь те чипер-и?

Улахсем лараççĕ-и каç-каç?

 

Вĕсене паллаттăм эпĕ лайăх.

Кашниех — илемлĕ те маттур.

Вĕсем пурте ытарми сар кайăк.

Кашниех — хаваслă та сатур.

 

Кашниех-тĕр — çут тĕнче илемĕ.

Саади те курнă тет çапла.

Ман чуна çеç курманни иленнĕ.

Курăнмасть хăй хĕрĕх çул ытла.

 

Яшă ĕмĕр хаклă теççĕ, хаклă,

маншăн та пит хаклă, иçмасса.

Пур пĕрех калатăп эп, çапах та:

каясси пулмасть пуль Шираза.

 

Унта мар-тăр, Саврăша халь кайăп.

Чун савни сăнарĕ ман унта

сăнарланнă — ытарми сар кайăк.

Сарă кайăк — савнăç поэта.

 

6.

Юлманах пуль эс, хуçа, кĕрӳсĕр?

Юлманах пуль мăшăрсăр тăрса

куçăмпа хальччен курман хĕрӳ сан —

куç умне юмаххăн курăнса?

 

Вăл пулма пултарнă манăн арăм.

Темшĕн-çке — тухса та курăнман.

Кĕрĕвӳ эп ĕнтĕ пулаймарăм.

Эсĕ пулаймарăн хуньăм ман.

 

Чĕрери кăварлă хĕрĕве те,

ĕмĕтри çутта та пытарса

пĕр ӳпкевсĕр тухса кайрăм эпĕ,

тухса кайрăм эпĕ тав туса.

 

Ах, тепре çапла тăман тухинччĕ!

Ах, тепре курасчĕ тамаша.

Ман тепре çĕтсе çӳрессĕм килчĕ,

ас туса юр хĕвнĕ Саврăша.

 

Эп хавас — ан тив, çапса ӳкерччĕр.

Хывса илччĕр, кам мĕн илеет.

Тĕп тума çеç, тĕп тума уркенччĕр

е ан тĕшмĕртейччĕр — телее.

 

Тĕттĕмре, çĕрле таçтан килӳçĕн,

такăнса манран ыр хĕрача

тĕлĕнтĕр: "Ах, кам-ши ку — вил ӳсер?"

Тĕлĕнтĕр, ан тартăр хăраса...

 

7.

Савнă хĕрĕн çăлтăр куçĕсем

юратса пăхмарĕç ман çине.

Саврăшăн тăманлă каçĕсем

савăнăç кӳмерĕç чĕрене.

 

Савнă хĕрĕн çепĕç пӳрнисем

сĕртĕнсе курмарĕç кăтрама.

Сĕртĕнеймĕç Турă пӳрмесен.

Кăмăл хуçĕк, пуçăм пăтранать.

 

Савнă хĕрĕн çӳп-çӳхе тути

йăл кулмарĕ тем пăшăлтатса.

Тен, вăл, хĕр тутийĕ — пыл тути?

Кураймарăм эпĕ тутанса.

 

Савнă хĕрĕн чĕвĕл чĕлхине

ман илтсе пулмарĕ çавăн чух.

Хурлăх пусрĕ çамрăк чĕрене,

тăвăрланчĕ, çунчĕ çамрăк чун.

 

Ĕнтĕ ĕмĕр хурлăн сĕтĕрнеп.

Ĕнтĕ ĕмĕр тăлăх та пĕччен.

Савнă хĕрĕн çутă сăнарне

пур пĕрех манмастăп халиччен.

 

8.

Курăнсам, тухсамччĕ куç умне.

Эс мĕн ятлă: Лейла, Марине?

Хуть мĕн ятлă пул, тухсам, тухсамччĕ,

лăплантар шуйханнă чĕрене.

 

Эс пĕлетĕн — мĕн вăл çил-тăман,

эс пĕлместĕн — пĕтрĕ пурнăç ман.

Çил-тăманĕ халь те ахăрать те,

çавăнпа чĕрем те лăпланман.

 

Çавăнпа хĕрхенччĕ эс пăртак,

курăнсамччĕ кăмăлу пуртан.

Ватлăхра хуть çулăмлă чĕреçĕм

лăпкăраххăн таптăр кăкăрта.

 

Çамрăк чух вăл пулчĕ: куртăм шар.

Пулăшрăн — пурнатпăр уйрăмшар.

Тăна кĕтĕм — эс тарса пытаннă.

Тух, килсе ларсамччĕ юнашар.

 

Ас илсессĕн çавă юр-кĕрте,

ыйхăсăр ларатăп çур çĕрте.

Курăнмарăн эс, чун лăпланмарĕ.

Хĕрхенместĕн-шим вара пĕртте?

 

Кам пĕлет эс Лейла маррине?

Тен, чăнах та эсĕ Марине?

Мĕншĕн курăнмасăрах тухатрăн,

ĕмĕрлĕх вырнаçрăн чĕрене?

 

9.

Нихăçан парса курманччĕ маххă,

пуç пĕкес йăла вăл маншăн мар.

Анчах эп те чул чĕреллĕ мар-ха,

эпĕ те пĕлетĕп макăрма.

 

Иртрĕ пурнăç, пĕтрĕ, — макăратăп,

хурланса асаплăн пуç усап,

асăмра çурхи сăнсем куратăп:

çил-тăманлă каç — çурхи шур сад.

 

Шурă тĕтĕм тейĕн, шур юр тейĕн

çавăрса илейнĕ садсене.

Эп унта утса çӳреп телейлĕн,

эп унта çуретĕп пĕчченех.

 

Нихăçан кун пек илемлĕ, тарăн

туйăмсем пулманччĕ ĕлĕкрех.

Весем пулнă мĕскĕн те мăнтарăн.

Çаврăннă эп хурлă тĕлĕкре.

 

Кам эс маншăн? Маншăн эс сар кайăк.

Маншăн эсĕ пурнăçри тивлет.

Нихăçан сана эп манса каймăп —

ас илӳ чуна кайса тивет.

 

Эсĕ вăл, эс — манăн ăраскалăм.

Ас илеп те çеçкери сада,

сан сăнна курах каятăп - калăн,

çав садран сана эп ăсатап...

 

Татах хӳхлев

1.

Паян эп темшĕн уйрăмах салхуллă.

Пăхсассăн ман çине — тӳрех пуç усăн.

Курам-ха шухăшпа сана йăл кулнăн,

курам та ыталам, юратнă тусăм.

 

Чăнах эс ĕнтĕ хĕрача, çап-çамрăк,

эп хам та яшă-ха, иртмен-ха вăхăт.

Сана хам майлă пур пĕрех эп çаврăп,

ик куçунтан ытараймасăр пăхăп.

 

Юласчĕ пирĕн — ватăла пĕлмесĕр —

ялан çап-çамрăк, савăк та илемлĕ.

Ах, пулас марччĕ мĕскĕн те телейсер,

пуласчĕ ирĕк, сывă та телейлĕ.

 

Манпа чухне хавасла пул, ан ютшăн.

Эс ман юрра та илтнĕ пуль, пĕлен-тĕр?

Кăтарт-ха юрласа, кăтарт-ха шӳтшĕн,

кăтарт та, савăнам эп, чун килентĕр.

 

Пулин — тулта юр çурĕ те лăр çапрĕ.

Вĕçсе çул хыççăн иртрĕ çул хĕн-хурлăн.

Эс пулăн маншăн пур пĕр ĕмĕр çамрăк,

ыр пирĕшти те фея ĕмер пулан...

 

2.

Ыр пирĕштийĕм, фея, тусăм, тус,

те çаврăнмах пуçларĕ манăн пуç,

тавра каллех çавăрттарать тăман:

шăнатăп — эпĕ кĕрĕк тăхăнман.

 

Тен, тăхăннă та пулнă — çук çире,

кунти çынсем ытла усал, сĕре,

çапса ӳкерчĕç, хывреç кĕрĕке...

Ан хатĕрле, ах, тусăм, кĕреке.

 

Ан тултарсам сим пыл-мăрссалуна.

Тавах! Тавсси! Парсам-ха аллуна.

Сана халь ĕненем, сана шанам.

Эппин, ĕçсе парам та ăшăнам.

 

Ман мĕн тăвас-ха урăх, мĕн калас,

кунта ытла хăватлă мăрссала.

Ах, тус-тăванăм, çакă кĕреке

вăл тĕрĕслет пуль манăн тĕреке?

 

Эп пур пĕрех çухатмăп-ха тăна,

эс килĕшсессĕн — ярăп хăтана,

Ан тив, тулта туй туччăр çил те юр,

пире валли пур хăтлă шурă çурт.

 

Пире валли пур тулăх кĕреке.

Упрар-ха, ӳстерер-ха кĕрнеке.

Çавна çеç манас марччĕ, тусăм, тус,

часах ватта та юлĕ çамрăк пуç.

 

Эпир пурте-çке шанакан çеçке.

Эппин, ырлар-ха çак хитре ĕçке.

Анчах ăçта эс, фея, тусăм, тус,

е çаврăнсах-ши кайрĕ хĕрнĕ пуç?

 

Сим пыл та, эс те, çил-тăман та çук,

умра çурта кăна çунать çап-çут —

каç-каç эп Пушкин пек курнас тесе,

çурта çутса çыратăп хĕрттерсе...

 

3.

Ĕнентĕм эпĕ, ачаллах ĕнентĕм,

тĕл пулăп терĕм ĕмĕтри çынна.

Анчах та ак паян та эс, ĕнер те,

ыран та шалт! çеç питĕрнĕ чунна.

 

Ăна уçмастăн, курăнас теместĕн,

питне те кăтартмастăн-çке, савни.

Шутлатăн пулĕ: "Шанчăксăр ку, мескĕн".

Нимех те мар эп çулăмпа çунни.

 

Мул çук, паллах, ман, тусăм, хам эп — ылтăн.

Эс мула мар хакла, хакла — хама.

Пуçа ухса сана мухтарăм хыттăн

эп сирĕн патăрта — чĕнмен хăна.

 

"Чĕнмен хăна вал тутартан хăрушă", —

тенийĕ асна килчĕ пулĕ çав.

Тавах-çке çакăрушăн-таварушăн,

тавах чейӳшĕн, тав пурăнăçа.

 

Тен, çавăнпа хальччен эп сывă, чĕрĕ

поэт пулса çуретĕп тенчере?

Кала-ха эс, калаччĕ, Саврăш хĕрĕ,

ма саншăн çав тери çунать чере?

 

Çук, чĕнмĕн эс уç сасăллăн, саламлăн.

Ыр тунă эс мана, анчах савман.

Умна выртса йĕрсен те эс каламăн:

"Лăплан, эп сан пулсассăн, эсĕ — ман..."

 

4.

Ан тив, пире йĕрлеççĕ те кăнтаççĕ.

Ан тив, поэзи мар халь тăрантать.

Поэтăн пур пĕр çулăмлă фантази:

пуян та вăл, хĕрӳ те, тарăн та.

 

Эп Чăвашра та палăртăм пуль тетĕп,

Тутар çĕршывĕнче те ман ята

илтес тесен çине-çинех илтетĕн.

Час-час ăна Мускав та янратать.

 

Ма пытарас, Римпа Париж та, Лондон

хăй чĕлхипе вуларĕç ман сăвва.

Эп кам? Поэт. Ăнлантăн-и? Ăнлантăн.

Пулать-и поэта кăштах савма?

 

Пулать. Халь çеç ак яппунла та тухрăм.

Вуласчĕ те, пĕлмерĕм вулама.

Çӳре пуçларĕ ят миçе пин çухрăм!

поээи вăл рур сывлăш, вут ама.

 

Сана та эпĕ шутласа кăлартăм

епле илемлĕ, хӳхĕм те паха

ыр пирĕштийĕм, фея! Çут талантăм

çук сăнара кăларчĕ юмаха...

 

5.

Илем вăл вăрттăнлăх, вăл сирĕлсен

илем те çухалать пĕр йĕрсĕр.

Кайсах пĕтмерĕç-ха ун сăрĕсем.

Ыр чунлăх пулаймасть ыр енсĕр.

 

Ыр чунлă эсĕ, сан ыр ен нумай,

ĕмĕтĕмре сăнар туса ырланă

кăшт тунсăхлă, черченкĕ те ытарлă

курăнакан пике, — çул иртнĕ май.

 

Эс кивелместĕн, çĕнелсех пыран,

çаплах-ха хыптаран та çунтаран

ман ăшăма, вил чунланма памастăн,

чĕп-чĕррĕн, чăн пекех, умра тăран.

 

Ку ĕнтĕ ĕмĕт вăл, чун ăнтăлни:

чун тĕмсĕлсе чăн илеме тупасшăн,

вăрттăнлăха яланлăх тус тăвасшăн

çурта çутса вĕç-хĕрсĕр кĕл туни.

 

Илем — асамлăх вăл, вăл — юрату.

Çук юрату — çав вăрттăнлăх çухалчĕ.

Вăрахлăха пулсассăн çухату,

вăрахлăха сан хуçăк чун çуначĕ.

 

Тен, кам пĕлет, сыв мар яланлăха?

Тен, çук та çав çунат? Тен, чунĕ пушă?

Пăхатăн та — шухăшлама хăрушă:

капла — текех лекеймĕн яшлăха.

 

Капла, мĕнех калас, пĕтес пулать,

тинех шăпа пиртен вилсе кулать,

тинех вилеслĕн хутланан асаплăн —

ик куçăма тулли куççуль тулать...

 

6.Санпа сыв пуллашмасăр уйрăлап,

мĕн-ма тесен çут сăнару манпах вăл.

Тен, виличчен те çав хитре халап

мана тĕпрен кисрентерме пăрахмĕ?

 

Ан курăн чăнлăхри, суйи çеç курăн.

Ача пек савăнам та тĕлĕнем:

сассу — шăнкрав, пĕву сан — йăрăс хурăн,

куçу — çут çăлтăр... Тĕлĕк тĕлленем.

 

Кĕрсем тĕлĕкĕме... Ан кай кĕмесĕр.

Ан курăн леш, пул ĕмĕтри хĕрех.

Çук, курăн... курăнсам çапах... Тен, эсĕ

халапринчен нумай хут хӳхĕмрех.

 

Анчах хăратăп эп, сехĕрленетĕп

ума тухса тăрассăнах сехмет,

вара шухăшлама та именетĕп,

шухăшласассăнах хăпать сехрем.

 

Кун-çул иртсе пырать, нумай юлмарĕ,

телейлĕ пултăм пулĕ пĕр енчен,

тепĕр енчен телей пачах пулмарĕ,

халь тин пулайме — мăшарсăр, пĕччен.

 

Тухатрĕ хĕр мана, пуçа çухатмăш,

çил-тăманра, пăлхавлă яшлăхра.

Тен, тухатлать пулсан, чăнах — тухатмăш,

тухатмăша халь тухнă, ватлăхра?

 

7.

...Миçе кун тетĕрет, юр асать — айтурах!

Уйăха курма çук, курма çук хĕвеле.

Таврăнатăп киле çуллен-çул сайрарах,

ватăлап çуллен-çул, çуллен-çул кивелеп.

 

Юр çаплах чӳхенет, çаврăнать ял çинче,

тухрăм эп кил умне çав юра сăнама.

Каçхи юр çутинче, çутă асамĕнче

килчĕ яшлăх ума — çĕклесен асăма.

 

Яш чухне юр ялтравĕ, вылявĕ-вăййи

йыхăратчĕ мана çеçкери шур сада.

Çутă шанчăк хавас, пăхса ытарайми

йăлкăшатчĕ умра васкаса ман пата.

 

Чунăма вырнаçатчĕ нихçан пĕтмес пек...

Вăхăт иртрĕ нумай, яшлăх çук, шанчăк çук.

Курăнать шурă юр та халь урăх тĕспе,

вил тĕспе курăнман вăл яш чух, çамрăк чух.

 

Иртрĕ ĕмĕр... Сиссе юлаймарăм çавна.

Çук малашлăх ман, çук кил ăшши, çук савни.

... Ял çинче юр çаплах чухенет, çаврăнать,

тĕлĕк пек туйăнать вуншар çутă çунни.

 

8.

Çĕр варринче эп кайрăм шухăша.

Шутлатăп та: тен, каймалла та марччĕ?

Сикет чĕре, сикет те туртăшать —

кăшт лăпкăрах тапма ытла та манчĕ.

 

Ма ĕрĕхен тапма чарăнасла?

Сӳнесшĕн-им? Сӳнех. Çитет пуль — çунтăн.

Пăлхантăм эп чĕре çурăласла,

анчах та мĕн усси: халех хуть çурăлтăр.

 

Кунчуль усрарĕ çут çанталăк — тав.

Савни. Туссем. Кив вĕрентӳ. Çĕн пурнăç...

Пурте суя иккен, пурте ултав.

Хăй çут тĕнчи çапла хаяр-мен, урмăш.

 

Нумай тытмасть пире вăл Çĕр çинче.

Час нӳрлĕ çĕр айне персе чикет те,

пулма та пăрахатпăр асĕнче.

Пурте иртет, пурте пĕтет черетлĕн.

 

Ним те юлмасть, пурте харам, суя:

ма çараçлантăмăр-ха илĕм-тилĕм?

Ним те юлмасть, пурте каять сая.

Ним те юлмасть, малта — пĕтеслĕх, вилĕм...

 

9

Халь, кунăм пур чухне, эп хам та пур.

Кунсем пĕтсен эп пулмăп, ан та шырăр.

Пĕтеслĕхсен ташши шуйттан ташши вăл.

Ăна ташлаççĕ усалсем сатур.

 

Юласчĕ ман кунта пĕр пĕчĕк юрă пек.

Анчах вăл анлă пултăр, анлă, тарăн.

Юрланайсассăн — эп вара, мăнтарăн,

тăванлăх тупăп сирĕн чĕрĕрпе.

 

Таçти сассен çӳçенчĕк тĕтринче

хорал йывăрланса çĕкленнĕ евĕр

вăл пултăр — çак илем, илем кĕрлевĕ —

кашни ентешĕн уçă чунĕнче.

 

Хуллен пĕччен пуçла та юрлама,

сисмесĕрех çав самантра эс курăн:

çак юрăран тăванраххи çук урăх!

Ытти — пĕри те чăн-чăн юрă мар.

 

Çĕнтерчĕ вăл сивве те сĕмлĕхе.

Ăшша, çутта çынсем патне çитерчĕ.

Пĕтеслĕхне яланлăха çĕтерчĕ.

Ку — вĕçсĕрлĕх. Эс кĕр вĕçсĕрлĕхе...

* * *

Асап та хурлăх, хурлăх та асап

курма çуралнă пулнă эпĕр, ахăр.

Тен, çавăнпа сăну пит хурлă сан?

Ан макăр-ха, ан йĕр эс хурланса,

вилмен-ха эп, кайман-ха, ăсанман-ха.

 

Ыр кураймарăмăр çак тĕнчере,

леш тĕнчере ыр курасси, тен, пулĕ?

Çак шухăш асăмра чĕп-чĕрĕрен —

йуç армути йӳçекĕ чĕрере.

Авкаланать чĕреçĕм тивнĕн пуля.

 

Кайсан та ан хӳхлеччĕ, ăсансан.

Эс эп вилсен пачах ан йĕр, ан макăр.

Кĕл ту. Çурта çутсамччĕ асăнса.

Аса кăшт илкеле кайран — савса.

Вара... кĕтеп: масаралла çул такăр.

Çавăн пекех пăхăр

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... »
Хаклав:
Шухăшĕ:
Чĕлхе илемлĕхĕ:
Содержанийĕ: