Те çĕртен, те çӳлтен йăтăнать шап-шур юр...

Любовь Мартьянова | Сăвă | 596


Т. С.

 

Те çĕртен, те çӳлтен йăтăнать

шап-шур юр,

йăлт пăтраннă паян, те тĕнче çаврăнать.

Ман чунран сан чунна пурпĕрех

сукмак пур,

Çула тухăн кăна — çил-тăман чарăнать.

 

Юрлас юррăм та пур çавраçил кĕввилле,

Хама майлă тĕнче хама майлă кунра,

Пурăнмастăн, апла, малалла кивĕлле,

Тахçанах сан апла ăшă кăнтăр чунра.

 

Илĕртет-ши вара çав оливка ращи,

Ырă канлĕх сапан, лăпкакан ăш хĕвел...

...Çил-тăман юрринче çуккă кăнтăр шăрши,

Ан ятла та мана, ахальрен — ан хĕрел.

 

Те çертен, те çӳлтен йăтăнать

шап-шур юр,

Хĕллехи кунăмра хăйĕн ырлăхĕ пур.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: