Кĕркуннехи юрă1

Кĕркуннехи юрă

Сĕм вăрманăн çулçийĕ,

Çулла пулсан, — кашлани,

Кĕркуннене çитсессĕн —

Çил-тăвăлпа саланни;

Çамрăк пуçăн çитĕнни —

Ача чухне савăнни,

Ара кĕрсе çитсессĕн —

Хуйхăпала пусрăнни.

Кăнтăр енне, çур енне

Кайăк кайрĕ сивĕрен,

Кайăк тинĕс уттине

Канма анчĕ йĕркерен.

Аслă ĕçкĕ-çикĕрен

Салантăмăр кăмăллă.

Часах курас çуккинчен

Пирĕн пуçсем хуйхăллă.

Кĕркуннехи пĕлĕтсем

Çĕр çумĕпе шăваççĕ,

Кĕмĕл-ылттăн çăлтăрсем

Çиле хирĕç чупаççĕ.

Пирĕн юлташ-тантăшсем

Пуçа чиксе утаççĕ,

Шуратакан шухăшсем

Умĕсенех пыраççĕ.