Матурлăхăм...
Матурлăхăм,
Саттурлăхăм,
Хăш вырăнта
Пусăрăнтăн?
Яштак пĕвĕм,
Кăтра çӳçĕм,
Кам умĕнче
Хуçăлтăн?
Хĕрлĕ питĕм,
Шурă çийĕм,
Мĕншĕн каплах
Хуралтăн?
Хаяр чĕрем,
Кĕлеткемрен
Мĕншĕн каплах
Тапрантăн?
Пӳлĕх пӳрсен,
Турă тавăрĕ,
Хĕвел пекех
Çавăрса.
Киле çитсен,
Сассăм юрлĕ,
Саркайăк пек
Савăнса.
Эх, аттиçĕм,
Эх, аниçĕм,
Сирĕн ума
Тăрăттăм,
Сире савса
Пуçа сулса,
Чунтан-ăшран
Пуплĕттĕм.
Атте пӳрчĕ —
Сарă пӳртре
Саркаланса
Ларăттăм;
Пĕтĕм пĕлĕш
Умне тăрса
Касак ташши
Ташлăттăм.
Ах, чунăмçăм,
Шух чунăмçăм,
Хăш вырăнта
Пусăрнăн?
Икĕ куçăм,
Шăрçа куçăм,
Мĕскер курса
Тăранăн?
Хура утсем
Туртара мар,
Çапах тупă
Туртаççĕ.
Аллăм-урам
Тăлăллă мар,
Çапах çыншăн
Утаççĕ.
Шухăшласан
Шуралатăп,
Хĕрсе кайсан
Хĕрелеп.
Кулянсан та
Кулса ярап,
Хуйхăрсан та
Юрлатăп.
Эх, тăвансем,
Эх, юлташсем,
Хăш чух мана
Астăвăр;
Турă умне
Кĕлле тăрсан,
Ман чуншăн та
Кĕл тăвăр.
1914, октябрь, Саратов
Шухăшсем
Hiring https://contractorfinder...
Hiring https://contractorfinder...
Ĕлĕк , вуншар çул каялла , тейĕпĕр , вул...
Пĕр калаврах ĕç-пуçĕ целăй романлăх !!!
Мана питĕ килĕшрĕ...
Вуланă ...
Енчен те " кĕрхи кунсем иртмеççĕ кăлăх"п...
Тем, сăвăн тĕллевне ăнланаймарăм, каçарă...
Ара , криминал та ку ! Çавăнпа та КУЛĂШЛ...
"Виççĕмĕш страница çитсен сасăпах кулкал...