Хăмла юрри


Пĕрремĕш çавра

 

Ши кайрăм,

пи кайрăм,

пуçа

хĕвеле май тайрăм.

Çĕр çаврăнчĕ

тĕнĕлĕ тавра,

хам

шăчă тавра çаврăнтăм,

çӳле улăхса çитрĕм те

йăва çавăртăм.

 

Тĕп тунамăн тĕрекне,

çич хунавăн хăватне,

тĕнчен тăватă енне туртăнан

утмăл та ултă тымарăм пур,

тăрантакан сĕткенĕн çулĕ пур,

вĕсенчен те хаклăрах

ӳтлентернĕ анне варĕ пур,

пурнăç кăкăрĕ пур.

 

Кăвапана ĕме-ĕме

çивиттине те сиртĕм эп,

çич папкама кăлартăм эп,

мăя тăсса кармашрăм эп,

çут тĕнчепе паллашрăм эп,

шăрăх чухне ĕсĕклесе

анне сĕтне шырарăм эп,

ун кăкăрне шырарăм эп.

 

Çĕр çаврăнчĕ

тĕнĕлĕ тавра,

хам

шăчă тавра çаврăнтăм,

çӳле улăхса

йăва çавăртăм,

çĕр-аннеме юратса

юрă юрларăм.

 

Иккĕмĕш çавра

Тĕп тунамăн тĕрекне,

çич хунавăн хăватне,

тӳпен тăватă енне туртăнан

çитмĕл те çичĕ çулçăм пур,

сĕткен чуппине чĕртекен çулăм пур,

вĕсенчен те хаклăрах

пуçран ачашлакан аттеçĕм пур,

атте кулли пур.

 

Çивиттине эп сиртĕм те,

çич папкама кăлартăм та,

çут тĕнчепе паллашарăм та

çакна ăнлантăм,

ӳтлентерекен те кирлĕ çав,

кăкăр çитерекен те кирлĕ çав.

Куçа уçсан, пĕве кайсан

ăшшăн ачашлакан та кирлĕ çав…

Çивиттине эп сиртĕм те

çакна ăнлантăм.

 

Çут тĕнчепе паллашрăм та

атте енне кармашрăм эп,

ши кайрăм та,

пи кайрăм та

тата çакна ăнлантăм эп,

атте-анне сивех ан пултăр,

ытла сивви –

тăн ӳкнĕн,

пепкийĕн кун-çулне амантĕ те

шантарĕ.

Ытла ăшши

тата хăрушăрах,

пепкейĕн ăш-чикне пăтратĕ те

çунтарĕ.

 

Çивиттине пĕр сиртĕм те

шăрăх кунне еĕтӳсрĕм эп,

анне сĕтне шырарăм эп.

Çак тĕнчепе паллашрăм та

хура куна та куртăм эп,

атте ăшши шырарăм эп.

 

Çĕр çаврăнчĕ

тĕнĕлĕ тавра,

хам

шăчă тавра çаврăнтăм,

çӳле улăхса

йăва çавăртăм,

хĕвел-аттеме юратса

юрă юрларăм.

 

Виççĕмĕш çавра

Тĕп тунамăн тĕрекне,

çич хунавăн хăватне

аялалла авăнса тăракан

сакăр вун сакăр сапакам пур,

юнсене хăвалакан хăватăм пур,

вĕсенчен те хаклăрах

пурнăçа тытса, йĕркелесе тăракан

этем алли пур,

хуçа алли пур.

Кăвапама ĕмнĕ чух

анне сĕчĕ

çитмерĕ,

этем алли çитерчĕ.

Çут тĕнчене тухнă чух

пурнăç çулне

пĕлмерĕм,

этем алли кăтартрĕ.

Ши каяс чух,

ӳсес чух

атте ăшши

çитмерĕ,

этем алли ăшăтрĕ.

 

Сакăрвун сакăр сапакам пур,

юнсене хăвалакан хăватăм пур.

Аллă кăшăллăх авмалăх,

кĕр кĕреки кĕрлемелĕх,

хуçа чапне çĕклекен хăватăм пур.

 

Çивиттине эп сиртĕм те,

çич папкама кăлартăм та,

çут тĕнчепе паллашрăм та

çакна ăнлантăм,

анне кăкăрĕ те кирлĕ çав,

атте ăшшийĕ те кирлĕ çав.

тата çĕр хут та ытларах

этем аллийĕ кирлĕ çав.

 

Çĕр çаврăнĕ

тĕнĕлĕ тавра,

хам

пичкере йӳçсе çаврăнăп,

кĕрекере кăпăкланса

хăна пуçне çавăрăп,

этем ĕçне мухтаттарса

виçĕ çавра

юрă юрлаттарăп.

 

1973, пуш.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... »
Хаклав:
Шухăшĕ:
Чĕлхе илемлĕхĕ:
Содержанийĕ: