Артистка


Пĕрремĕш хут Шупашкара хăçан килнĕччĕ-ха Микола? Çапла, шкулта вĕреннĕ вăхăтра, пĕрремĕш класа пĕтернĕччĕ ун чухне вăл. Ялта ĕне ферми тума тытăннă та, ашшĕ кунсерен хулана строительство материалĕсем турттарма чупатчĕ. «Кирпĕч заводне миçе хутланине манса та кайрăм ĕнтĕ», — текелет вăл киле каçа юлса çав териех ывăнса таврăнсан. Ыран ăçта каясси паллăччĕ ун, каллех — хулана. Шуçăмлах тăратчĕ те машинăпа трактор паркне уттаратчĕ. Завод хапхи уçăлнă çĕре çитсе тăма васкатчĕ. Каярах юлтăн — унта машина черечĕн вĕçĕ пушă хӳри пек таçтан тăсăлатчĕ. Ара, вăл вăхăтра ялсенче пысăк стройка пыратчĕ çав. Миколăсен колхозĕнче те фермăпа пĕрлех вăтам шкул çуртне çĕклетчĕç. Унта валли те стройматериал темĕн чухлех кирлĕ.

Çуллахи каникул вăхăтĕнче ывăлĕ ĕçрен ывăнса таврăннă ашшĕне сăпса пек сырăнса ыйтса йăлăнтарнă хыççăн Петĕр пичче мăшăрĕ çине тинкерчĕ.

— Хăпмасть вĕт çак ача манран, — терĕ вăл çывăрас умĕн хаçат вулас тесе алкум картлашки çине вырнаçса. — Эс мĕн шутлатăн, ыран хампа пĕрле илсе кайса ывăнтарса килес пуль.

— Ара, ачи Шупашкара илсе кай-ха тесе ыйтса ывăнчĕ пуль, — Миколăна шурă пуçĕнчен ачашларĕ амăшĕ. — Килĕш ĕнтĕ, ан тархаслаттар ачана, курса çӳретĕр. Пире хамăра никам тĕнче кăтартман та, çавăнпа ялтах юлтăмăр ак.

Микола амăшĕ Петĕре качча тухсан пурăнма хулана куçса кайма тем пекех йăлăннă. Те хăйсем ялта начартарах пурăннăран, те çынсем хулари илĕртӳллĕ пурнăç пирки каласа панипе хăпартланса, хула пурнăçĕ ăна хытах илĕртнĕ. Анчах та çемьере чи кĕçĕнни Петĕр ашшĕ-амăшĕн кил-çуртне пăрахас темен ĕнтĕ. Ялтах тĕпленсе вăй хурса лайăх пурнăç тумашкăн тăрăшма тытăннă вара çамрăк çемье.

Пĕрремĕш ачи, Микола, çуралсан амăшĕ хăйĕн тахçанхи вăрттăн ĕмĕтне кăштах та пулин пурнăçа кĕртме май пуррине чухланă. Хăйсем пулмасан та, ачисем хăть çитĕнсен хула пурнăçĕпе киленччĕр! Çавăнпа ывăлĕ ашшĕне хула кăтарма тархасласан-тархасласан мăшăрĕн кăмăлĕ çаврăннишĕн питех те хĕпĕртерĕ. Пĕрре кайса курсан вăхăт кăтартĕ мĕн пуласса.

Кирпĕч завочĕ Шупашкар хĕрринерех вырнаçнăччĕ. Унта çитме икĕ сехете яхăн каймалла пулин те Микола ларса та, груз турттармалли машина чӳречинчен вĕлтлетсе юлакан тавралăха мăйĕ ыратиччен пăркаласа пăхса пырсан та ывăнмарĕ. Паян ашшĕпе тухни уншăн — нимĕнпе виçейми телей. Мĕн чухлĕ илтнĕ вăл Шупашкар пирки! Шкула кайиччен те, халĕ вĕрентекенрен те. Ытла та юмахри пекех каласа параççĕ ун çинчен. Завод хапхи патĕнче вара амăшĕн аппăшне курсан чунĕ çунатланса вĕçме хатĕрччĕ. Халех ашшĕпе каялла ларса каймасса ăнланчĕ пĕчĕк чун, аппăшĕ ăна хăйпе хула кăтартса çӳрĕ.

— Каçхине юлашки рейспа илсе кайăп ăна, — терĕ ашшĕ. — Çак вырăнах килме тăрăшăр вара. Кăштах хулара уçăлтарса çӳре.

Ун чухне ăçта кăна çитмерĕç пуль вĕсем. «Ывăнтăн та пуль, ачам, ман пата таврăнса канар», — темиçе хут та калакаларĕ аппăшĕ. Анчах Атăл хĕрне пĕрре килсе лекнĕ сакăр çулхи ачана шыва кĕртмесĕр кунтан хăптарăн-и? Чăмса курмасан та, урисене йĕпетсе илни те мĕне тăрать! Паянах кун пирки ялти тантăшĕсем пĕлĕç те ăмсаннипе хăмпă пекех хăпарса кайĕç ĕнтĕ. Атăл тăрăх килекен шурă пăрахучĕ тата мĕнле-ши? Ун çине пăхса тăнипе Миколăн çăварĕ хăйне хăех карăлнă иккен, хупма та маннă. Аппăшĕ кула-кулах ача çăварне аллипе хупларĕ.

— Асту, ытла ун пекех ан кар-ха, сисместĕн те, пăрахучĕ кĕрсе кайĕ тата, — ача тĕлĕннипе тата савăннипе киленчĕ вăл.

Çаксем пурте, пурте тахçан пулнăскерсем. Ун чухне хули питех пысăк та марччĕ пек. Çавăн хыççăн тата темиçе пулнă вăл кунта, анчах ашшĕпе амăшĕ парнеленĕ çав ачалăхри пĕрремĕш пылак куна асран кăлараймасть. Ĕнер, çук, паян кăна, анчахрах пулса иртнĕн туйăнать хăш чухне. Акă вăл Атăл хĕрринче, аппăшне аллинчен тытнă та таçталла тинкерет. Çăварĕ карăлнă, куçĕ пĕр мăчлатмасăр пăхать те пăхать. Халиччен курман кайăксем вĕçеççĕ, сасартăках шыва чăмса илеççĕ те пулă йăтса çӳлелле чу! хăпарса каяççĕ. Пуç çийĕн тата самолетсем пек вирхĕнсе иртеççĕ вĕсем. «Чарлансем», — терĕ аппăшĕ вĕсене. Ялти кураксемпе çерçисем пек мар вара — шурă, тĕлĕнмелле ярăнса вĕçеççĕ. Тытса курасчĕ пĕрне!

Хула урамĕсемпе утса тем тĕрлĕ тĕлĕнтермĕш курчĕ ун чух пĕчĕк Микола. Халĕ акă, çав урамсемпе çĕр-çĕр хут та иртсе çӳренĕрен-ши, нимĕнпех те илĕртмеççĕ пек туйăнать. Хăнăхнă. Ун чухнехи пек те мар ĕнтĕ, çĕнелнĕ, хитреленнĕ, капмар çуртсем ӳсе-ӳсе ларнă. Çартан таврăнсанах кунта ĕçе вырнаçсан, астăвать-ха, халĕ нумай хутлă çуртсем ларакан вырăнсенче комбайнсем тырă выратчĕç. Тем вăхăтра пурăнмалли çуртсем туса хута ячĕç. Шупашкара ĕçлеме вырнаçатăп тесе сăмах кăларсан амăшĕ ăна пил панă пекех çапла каларĕ:

— Аппу каланă тăрăх, Шупашкар халĕ хăвăрт ӳсет. Пире пырса курмалăх пĕр-пĕр çĕнĕ çуртĕнче хваттер туянмаллах, Микола, — ун куçĕнче каллех тахçан Микола ача чухнех астăвакан тунсăх çути палăрчĕ. — Пире ялтах пурăнма тиврĕ, эсир те пулсан хула пурнăçне курăр.

Мĕншĕн ăна ялта килĕшмест, мĕншĕн вăл çаплах хулана туртăнать — амăшĕ нихăçан та каламан. Тен, аппăшĕн сăмахĕ-юмахĕ чĕрине тыткăнланă, тен, унăн пĕр-пĕр заводра вăй хурас кăмăлĕ пысăк пулнă. Ачаранпах, шкулта вĕреннĕ вăхăтрах Микола амăшĕ артиска пулма ĕмĕтленнĕ теççĕ. Качча кайиччен те, кайсан та çак ĕмĕтпех пурăннă иккен вăл. Ывăлĕ çакна çитĕнсен кăна пĕлчĕ. Телейĕ çапла килнĕ ĕнтĕ ун, пĕр театр училищине те вĕренме кĕреймен. Ăнсăртран кӳршĕ ялти Петĕрпе паллашнă та ирĕлсе каймалла юратса пăрахнă. Çакăнпа пĕтĕм ĕмĕчĕ хупланнă та темелле. Юратсан пур ĕмĕтленнĕ ĕмĕте те вĕçне çитерме пулать теççĕ те, вăл вара урăхларах çулпа кайнă ав. Паллашсан çур çултанах качча тухнă. Кăштах тăхтасан ун Петĕрне такам çавăрса ярасран хăранă евĕрех. Петĕрĕ те, ăна пĕрре курнипех çулăмланса кайнăскер, урăх никам пирки те шутлайман.

Çапла вĕçленнĕ ĕмĕт, ялти колхоз уй-хирĕпе ферминче ырми-канми тăрăшсах ывăл та, хĕр те çитĕнтерчĕ хĕрарăм. Анчах çаплах теме шанчĕ, ĕненчĕ, кĕтрĕ. Тен, ачисенчен хăшĕ те пулсан ун вăрттăн ĕмĕтне пурнăçа кĕртĕ терĕ-ши? Ун чухне мăнукĕсене пăхма хулана кайса пурăнса куратăпах тет-ши?

 

* * *

Аслă çултан пăрăнсан умри айлăмра сип-симĕссĕн ешерекен вăрман курăнчĕ. Кунти вырăнсенче халиччен çӳресех кайманскер, Микола тӳрем вĕçленсе айлăм пуçлансанах машинине чарчĕ. Малалла темĕнле çул-ха унта, кам пĕлет? Тĕрĕссипе ун çак умри вăрман витĕр выртакан çулпа каймалла марччĕ асфальт сарнипех малалла вĕçтермеллеччĕ. Анчах вăл хăйне хăй тытса чараймарĕ. Унăн пĕр-пĕр улах вырăн тупса кĕске юбка айĕнчен илĕртӳллĕ курăнакан йăрăс ураллă хыçри ларкăч çинче ларакан хĕрпе ăшшăн калаçас килчĕ. Аслă çулпа пынă чухне те вăл тин кăна çуса иртнĕ çумăрпа йĕпеннĕ çап-çутă асфальт çине пăхса пыман пекех вĕçтерчĕ. Урисене салонри куç кĕски витĕр шăпах курăнмалла вырнаçтармă хĕр çинчен куçне илеймерĕ те тейĕн. Машина вара, хуçи кăмăлне ăнланнă пекех, пĕр тикĕссĕн малалла кустарчĕ. Калăн, вăл хăйне хăех тытса пырать. Хуçи çук та тейĕн. Çак кукăра çитсен вара Микола малалла капла кайма хăват çитереймерĕ, хăвăртлăха чакарса хĕр сисиччен руле сулахаялла пăрчĕ, ахаль çул çине тухрĕ. Çакна тарăн шухăша путнăран куçĕсене хупнă хĕр туймарĕ. Сасартăк пăрăннă машина ăна кăштах сулăнтарчĕ, çавна май вăл куçне уçрĕ. Микола кирлĕ мар вырăнта пăрăннине курчĕ вăл, анчах нимĕн те шарламарĕ. Урисене те хускатмарĕ, лакăм-тĕкĕм вырăнсенче кăна кăштах кисренкелесе илчĕ. Оисрĕ ĕнтĕ хĕр: руль умĕнчи çамрăка килĕшеççĕ вĕсем. Тен, хăй çапла илĕртме пултарнăшăн савăнчĕ те-и?

Микола салонран тухрĕ. Тӳпемрен айлăм çав тери илемлĕн курăнать. Вăрмана çитме инçех те мар иккен. Çухрăма яхăн пуль. Халь кăна кунта илсе çитернĕ çул малалла та хăй еккипех кукăр-макăрланса каять, унтан чăрăшлăха кĕрсе çухалать. Эппин, кайма çул пур. Каччă пĕр самант аптăраса тăчĕ. Хускалмалла-ши е каялла çаврăнса хĕр ыйтнă çĕре аслă çулпах вĕçтермелле? Тата мĕншĕн кунта пăтрашăнса кĕрсе кайрĕ-ха? Хăй те сисмен. Машинăна çапла чипер ураллă хĕрсем ларсан хăнăхнă аллисемпе урисем хăйсемех пĕлеççĕ иккен ăна ăçта илсе каймаллине. Хальччен кун пекки пулманччĕ вĕт-ха? Çук, пулман. Ку хĕрĕ ытла çамрăк

курăнать. Чи нумаййи те пĕр вун ултă çулта пуль. Тата пули-пулми кукăрсенче палламан яшсемпе курнăçланса çӳрекенскер пек те мар. Пăхма, паллах, чипер. Вокзалта клиентсене кĕтсе ларнă чухне пырса шаккарĕ вăл машина кантăкĕнчен. Хула хĕрринчи пĕр яла леçме ыйтрĕ.

Микола ун чухне пĕр шухăшсăр тӳрех персе ячĕ: «Мĕн чухлĕ тӳлетĕн?» Малтанах хĕрĕ ăçта каяссине те тăнламарĕ. Укçа çапма тесе мар, хула тăрăх кăштах уçăлса çӳреме кăна тухнăччĕ вăл. Укçи пулсан та пăсмасть. Авланиччен хваттер туянас кăмăлĕ пысăк ун. Тата паян пушă вăхăт та пур. Тен, Алик калашле, приключенисем те килсе тухĕç? Тăрсан-тăрсан пулкалать ун пекки. Хальхинче те инçете каяс килмерĕ. Пĕр-ик клиента лартса çитеретĕп те киле таврăнса упа пек çывăрăп-ха терĕ. «Мĕн чухлĕ ыйтатăн, çавăн чухлĕ тӳлĕп, мĕншĕн тесен ман васкамалла», — илтрĕ вăл хĕрĕн шăнкăрав сассине. Вара пуçне ялтах çĕклерĕ. Тимлесерех пăхрĕ те — умĕнче яштака та куçа шартарса яракан чипер сăн-питлĕ хĕр тăрать иккен. «Ăçта? — ăс-тăнне темĕнле вăрттăн шухăш пырса çапрĕ унăнне. — Эп илтсех юлаймарăм, тепĕр хут калăр-ха». «Кунтан инçех мар, çирĕм çухрăмсем-и? Ăсатса яраймăр-ши, кӳрентермĕп», — куçĕсенчен йăлăнчăк хĕлхемĕ кăна мар, темле вăрттăн илĕртӳлĕх сирпĕтсе калаçрĕ хĕр. Ытла хаклă япала ыйтнăнах тинкереççĕ тата вĕсем. «Маршрутлă автобуспа кай», — тесе чутах персе яратчĕ Микола. Çук, чĕлхи çаврăнмарĕ. Паян темле пысăк савăнăç пуласса сиснĕн хыçалти алăка карăнса уçрĕ те хĕре ларма сĕнчĕ.

Хуларан тухиччен питех сăнамарĕ ăна каччă. Калаçмарĕ те. Кунта машина нумай чупать — тимлĕрех пулмалла. Анчах хăвпа юнашар кам ларнине пĕлесех килет çав çыннăн, çавăн пек туртăмпа çуратнă ăна çут çанталăк. Тата кам ларать-ха унта! Ăх, пĕрре хĕве хупса курасчĕ çавăн пеккине!

Хĕр нимĕн те шарламасăр пычĕ. Микола вара хуларан тухсан салона умри кантăк тăррине хыçалтине курма тесе çакнă куç кĕски витĕр сăнама пуçларĕ ăна. Хăйне систермесĕр, вăрттăн. Çапла хĕр илемĕпе каçăхса кайсах чунне ыраттарса-çунтарса çак пăрăнчăка сирпĕнсе кĕчĕ те ĕнтĕ. Унта çак хĕрпе темĕнле уяв кĕтет тейĕн ăна.

Тавралăхри илемпе киленсе ăшне путса хăйпе хăй анраса тăракан Микола машина алăкĕ уçăлса хупăннипе тăна кĕчĕ. Вăл вартах çаврăнчĕ те хĕр утса килнине курчĕ.

— Малалла каймăпăр-им? Кунта çулĕ питĕ лайăх вĕт, — чĕрене тивмелле сасăпа каларĕ вăл.

— Эпĕ, темĕн, йăнăш пăрăнса кĕтĕм пулас, каçарăр. Халех каялла тухăпăр, — аптăранăран персе ячĕ Микола.

— Тĕрĕсех пăрăннă, çакăнтан кайсан тӳрĕрех пулать мана. Эп паçăр сире калама маннă. Кунтан виçĕ çухрăм ьггларах кăна. Анчах йĕпе-сапара машинăсем çăрса хăвараççĕ çула, çавăнпа сирĕнни пек çăмăл машинăпа иртме çук, — те чăнласах, те суйса калаçать пике — çав урасем халĕ те куç умĕнчен каймаççĕ. Акă вăл тăрать, чипер те кĕмĕл кашăкпа çăтса ямаллискер.

— Тавралла кайсан — тепĕр вунă çухрăм. Унтан яла асфальт кĕрет.,. Хĕр тата темĕн каласшăнччĕ пулас, анчах Микола ун çине шăтарасла тинкернипе вăтанса-ши шăпланчĕ. Сумкине мелсĕррĕи кăкăр умне тытрĕ те уçма хăтланчĕ. Çак самантра Микола хĕрĕн сылтăм аллинчи пӳрнинче çĕрĕ пуррине асăрхарĕ. «Качча кайнă», — вĕçрĕ пуçра шухăш. Хĕр Микола çĕрĕ çине пăхнине асăрхаса /ăçтан сисеççĕ ăна тульĕк хĕрсем! Качча кайнипе кайманнине тĕрĕслес пек самантра пăхса илетĕн — вăл çакна асăрхать те/ васкасах сумкине уçрĕ, пĕчĕкçĕ енчĕк туртса кăларчĕ. Темиçе хут укçа шутласа илчĕ те хăвăрт ун енне тăсрĕ. «Тархасшăн, ку — илсе çитернĕшĕн. Çитет-и, тен, хушмалла?» — каллех тунсăхлă та тем ыйтма хатĕр куçĕсемпе йăлăнса пăхрĕ вăл. Çакă Микола чунне аçа çапнăн çавăрса хучĕ.

— Кунтах анса юлсан вара мĕнле çитĕр-ха килĕре? — ыйтрĕ Микола. Хĕре ытла хăвăрт вĕçертес килмерĕ унăн.

— Каç пулман вĕт, инçе те мар терĕм-иç, — хальхинче чăнахах каларĕ пулас пике. — Вăрман витĕр тухасси кăна-ха, вара чиперех çитĕп. Юрĕ, сирĕн вăхăтăр çук пулас, тытса тăмăп. Эпĕ кайрăм.

Хĕр укçине Микола аллинчен хăвăрт тыттарчĕ те çулпа малалла утрĕ. Каччă пĕр самант аптăраса малалла мĕн пуласса шутламасăр хĕр хыççăн пăхса юлчĕ. Акă вăл вăрмана кĕрсе çухалчĕ. Унăн кĕске юбки пытарма пултарайман урасем курăнмаççĕ ĕнтĕ. «Кайрĕ, — пуçне тăн! пырса çапрĕ шухăш. — Кӳрентертĕм ăна çитес çĕре çитермесĕр. Эх, мĕншĕн таврари çулпа илсе каймарăм-ши? Хăш ялта тата хăш çуртра пурăннине пĕлĕттĕм». Хĕр машинăра ларса пынă чухне пуçĕнче тĕвĕленнĕ шухăшĕ те тухса ӳкрĕ ĕнтĕ. Вăл кайнă енне мĕскĕннĕн тепре тинкерчĕ те «Жигулийĕ» патне таврăнчĕ. Кабинăна лариччен малти кустăрмине тарăхса тапкаласа илчĕ. «Эсех пĕтеретĕн мана, эс пулмасан çапла намăс курас çукчĕ. Ыранах сутса яратăп. Санăн руль умне ларсан пуçа темĕнле усал шухăш та пырса кĕрет», — мăкăртатрĕ вăл. Хальччен ун пекки пулманччĕ, анчах халь темшĕн çапла пулса тухрĕ. Чунра темскер пур. Мĕн-ши? Нумай шухăшласа тăмарĕ, руль умне ларса зажигани уççине çиллессĕн пăрчĕ те аслă çул еннелле вĕçтерчĕ...

Киле пăсăк кăмăлпа таврăнчĕ пулин та вырăн çине лаплатса ӳкмерĕ вăл. /Чун тăвăлса килсен яланах çапла тăваканччĕ./ Çăвăнчĕ, апат çирĕ, унтан телевизор курма ларчĕ. Пур канала та пăхса тухрĕ. Анчах тем кăтартаççĕ вĕсенче, пĕри те пуçа кĕмест. Паян ăнсăртран пырса лекнĕ хĕре çапла кӳрентернĕшĕн хăйне хăй ятларĕ çеç. Çывăрас килмест. Чунĕпе туйрĕ: ку хĕрпе татах курнăçĕ-ха. Анчах ăçта, хăçан? Тĕл пулĕç-ха, мĕншĕн тесен пике ун чунне темĕн пăрахса хăварчĕ. Мĕн вăл? Вут... Чĕрĕ вут. Ăна чĕртмелле. Мĕнле? Эппин, курнăçмаллах унпа. Микола ăна шыраса тупĕ. Сăнне астуса юлчĕ, тен, тепрехинче те çав вырăнах такси шырама пырĕ? Хăш яла кайнине те кăшт тĕшмĕртет. Хăйĕн тăван ялĕ-ши е упăшкин? Пур пĕрех мар-и? Пĕрре курсах куç умĕнчен кайма пĕлмест те — кунта темскер пурах. Хăçан çитĕ-ши тепĕр тĕл пулу саманчĕ? Ун чухне хĕрпе хăйне кун пек тытмĕччĕ...

 

* * *

Ленăн ачаранах ĕмĕтленнĕ ĕмĕчĕ пурнăçланчĕ. Акă вăл диплом илчĕ. Текех ахаль çын мар ĕнтĕ, актриса! Хĕр вĕçсе каяс пек çӳрерĕ, чунĕ çичĕ пĕлĕт çинчех, çăтмахри пек савăнăçне пĕтĕм тĕнчене каласа парас килчĕ. Мĕн тери лайăх иккен шухăшланă ĕмĕт çитсе пыни! Умри çул такăр та тикĕс, пĕр чăрмавсăр пырас пек туйăнать. Ара, професси пур, мĕн кирлĕ тата урăх! Ыттине куç курĕ, ĕçлесси вĕренесси мар, пĕлӳ илсен ĕçлеме те пулĕ тесе хавхаланса çунатланчĕ çамрăк хĕр чунĕ. Пурнăçăн сулнăкĕсенчен пĕр çын та пăрăнса иртейменни çинчен кам шутлатăр ĕнтĕ çамрăк чух? Пурне те çĕнтерес пек туйăнать çав... Çамрăк, вăй-хăват пур...

Пулас мăшăрĕпе те ĕçре паллашрĕ Лена. Пĕр спектакльти телейлĕ çамрăк çемье пурнăçне сцена çине кăларнăччĕ Кольăпа. Театрта аншлаг хыççăн аншлаг пулса пынăран вĕсен ячĕ-сумĕ те халăх хушшинче самаях сарăлчĕ. Сезон вĕçленсен вара гастроле кайрĕç. Çу каçипе ăçта кăна çитмерĕç пулĕ. Репертуарта ку спектакль кăна марччĕ-ха, анчах куракансем ăна пуринчен те ытларах кăмăлласа йышăнатчĕç, Ленăна хăйне те питĕ килĕшетчĕ вăл. Ара, савнă çынпа пĕрле юратакан çамрăк çынсен сăнарне калăпламалла-çке. Чунне парса вылярĕ вăл роле. Пурнăçри пекех... Хăш чухне Коля ăна сцена çинче ăшшăн ыталанă пек те туйăнмастчĕ. Таçта, вăрттăн та улах вырăнта пĕтĕм хĕрӳлĕхĕсене парнелесе ыталанатчĕç, чуп тăватчĕç пек. Ун чухне вара Лена хăй сцена çинчине манса та каятчĕ. Куракан вара çакна сисмет те пуль çав, тăвăллăн алă çупатчĕ. Каччă ытамĕнче ăсне çухатнă артистка вара сцена çинчи пурнăçа аран-аран таврăнатчĕ. Мĕн тери йывăр та çав вăхăтрах мĕн тери çăмăл иккен юратнă çынпа савакан мăшăр рольне калăплама!

■ Страницăсем: 1 2 3 4 5 6 ... 8

Вулавçăсен шухăшĕ Вулавçăсен шухăшĕ


Андрей (2011-10-18 12:12:23):

Петĕр Петтин философийĕ килĕшет.

 

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... »
Хаклав:
Шухăшĕ:
Чĕлхе илемлĕхĕ:
Содержанийĕ: