Юрла чĕрем

Чуна çĕклет илемлĕ пурнăç ирĕ,

Юрлас килет хаваслă та-хитре.

Есенин пек пуласчĕ çепĕç лирик,

Корчагин пек пуласчĕ вут чĕре.

Кун-çулăма тĕтре ан хупăрлатăр,

Инкек-синкек ан хуçтăр кăмăла.

Юрла, чĕрем, юрла, пул чăрсăр, паттăр,

Ан парăн эс нимле çил-тăвăла!

Эп тăшмана хĕçпе тăрса çĕнтернĕ,

Суранăма эп тивĕç çĕнтерме.

Юрла, чĕрем, хĕлĕхсене ĕнернĕ,

Нихçан та эсĕ ан хăй ӳркенме!

Тăван ялтах епле ман савăк, ырă,

Тăван ялтах мĕн чухлĕ пур çĕнни.

Нихçанхинчен хитре халь вăйлă тырă,

Витрелетсе парать колхоз ĕни.

Çум çумласа хиртен хĕрсем кĕреççĕ —

Такăрланать сукмак ман пӳрт умне.

Вĕсем манран çĕн юрăсем кĕтеççĕ, —

Хăйсен ятне, ĕçне тивĕçлине.

Куç умĕнчех ĕçленĕ ĕçĕсем те, —

Çырла пекех хăйсем те чип-чипер.

Юрла, чĕрем, юрла пурин çинчен те,

Пĕрне те эс туймасăр ан ирттер!

Çĕнĕ комментари хуш