Трахомпа Пахом


Сар сухаллă,

Хăрах ураллă,

Ни пысăк, ни пĕчĕк,

Тумтирĕ пит çĕтĕк,

Пахом патне пӳрте

Пĕр ирпе

Вăраххăн уçса алăка

Сулахай алăпа

Кĕрсе тăчĕ пĕр çын.

— Килĕр.

Кунтарах иртĕр, —

Сак кăтартрĕ кил хуçи. —

Кирек кам пултăр —

Хăна пулăр.

— Христа-рати

Парать-и?

Пуçтарма тухрăм.

Кун чул çеç пухрăм.

Памаççĕ,

Кулаççĕ, —

Хутаççине çĕклесе

Кăтартрĕ силлесе.

— Колхоза кĕмелле.

Мĕн... çӳремелле.

Пулăн тутă — ĕçлесен, —

Сĕнет Пахом чĕререн

— Илмеççĕ.

«Кирлĕ мар» теççĕ, —

Майпен ларчĕ сак çине,

Мăч-мăч хупса куçсене.

— Ху кĕресшĕн мар-и, тен?

Тен, тарса çӳрен?

— Апла мар, —

Хăна карчĕ çăвар.

— Кулак?

— Эс ан кулах.

— Кам тата? —-

Пахом хыттăн ыйтать.

— Трахом...

— Трах-о-ом! — тĕлĕнчĕ Пахом.

— Çапла. Ниçта вырăн çук

Ку чух.

Хваттер ямастăн-а? —

Тархасларĕ хăна.

— Хваттере?!

Кай çăва патне — лере.

Çук сан валли хваттер.

Арăм, тыт ухват, хӳтер! —

Пачĕç ĕнсерен,

Тапрĕç кутĕнчен.

— Вил.

Тек ан кил! —

Тапрĕ Пахом урипе

Пĕтĕм вăйĕпе.

Лăкăр-р

Лăкăртатрĕ Трахом.

— Тĕп тăвăпăр! —

Савăнчĕ Пахом. —

Эп кăна мар,

Халăх кĕрешет санпала, —

Шалт хупрĕ алăка

Икĕ алăпа.

— Арăм, шăлкала

Вăл ларнă вырăна çапла! —

Хушрĕ Пахом

Ересрен трахом.

Упаленчĕ лешĕ çыр хĕррипе

Ерипе.

— Тепре кăна тапмалла

Шывалла, —

Юнарĕ Пахом кантăк витĕр —

Мĕнпур чир-чĕр пĕттĕр.

Çĕн саманара

Ялта е хулара

Пурнар сывă та таса,

Пырар патварланса.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... »
Хаклав:
Шухăшĕ:
Чĕлхе илемлĕхĕ:
Содержанийĕ: