csutest.com сӑнӳкерчӗкӗ

Ака уйӑхӗн пуҫламӑшӗнче Шупашкарта пӗрремӗш ушкӑнри сусӑр хваттерне мелицина маски тӑхӑннӑ виҫӗ ҫын пырса кӗнӗ. Трактор тӑвакансен проспектӗнчи ҫуртри хваттерте ҫав вӑхӑтра 56 ҫулти арҫын пӗчченех пулнӑ. Сусӑр кӳлепипе ҫӳрекенскер хӑйне хӳтӗлеймен. Кӗтмен «хӑнасем» компьютер тата телефон ҫаратса кайнӑ.

Пуҫиле шыравӗн ӗҫченӗсем вӑрӑ-хурахсем епле машинӑпа кайнине палӑртнӑ, кайран пуҫтахсем камсем пулнине пӗлнӗ. Хурахсем 19-42 ҫулсенчи виҫӗ арҫын пулнӑ. Ушкӑнри икӗ ҫын унччен судпа айӑпланнӑ иккен. Чӑваш Ен Шалти ӗҫсен министерствин пресс-службинче пӗлтернӗ тӑрӑх, ушкӑнри чи асли хула центрӗнчи суту-илӳ центрӗсенче вӑрӑ ӗҫӗпе аппаланнине те палӑртнӑ. Тепрехинче вӑл тата урампа иртсе пыракан хӗрарӑма телефонпа шӑнкӑравлама ирӗк ыйтнӑ. Хӑйӗн телефонӗн аккумуляторӗн зарядки ларнине ӗнентернӗ те хаклӑ япала алла лексен йӑтса тарнӑ.

Вӑрӑ-хурахсем тӗлӗшпе пуҫарнӑ пуҫиле ӗҫе халӗ тӗпчесе пӗтернӗ.

#сусӑрсем, #вӑрӑ-хурахсем, #ШӖМ, #пӑтӑрмахсем, #пуҫиле ӗҫсем, #Шупашкар