https://vk.ru/wall-210944455_8257 сӑнӳкерчӗкӗ

Чӑваш Енри тата тепӗр тӑватӑ ҫынна «Чӑваш Республикин культурӑн тава тивӗҫлӗ ӗҫченӗ» хисеплӗ ят панӑ. Документа республикӑн влаҫ органӗсен официаллӑ порталӗнче вырнаҫтарнӑ.

Вӗсенчен иккӗшӗ — ӳнер шкулӗсен преподавателӗсем. Вӗсем: Эдуард Волчков тата Светлана Карамаликова. Эдуард Владимирович Куславккари ача-пӑча ӳнер шкулӗнче преподавательте тӑрӑшать, Светлана Ильинична — Елчӗкри ача-пӑча ӳнер шкулӗнче.

Шупашкарти Филипп Лукин ячеллӗ ача-пӑча 5-мӗш музыка шкулӗнче ӗҫлекен Оксана Рузавина та хисеп ятне тивӗҫнӗ. Вӑл та, эпир маларах асӑнса хӑварнисем пекех, преподаватель.

Пысӑк хисепе тивӗҫнисенчен йышӗнче музей ӗҫченӗ те пур. Вӑл — Ольга Кушманова. Ольга Геннадьевна — Чӑваш наци музейӗн маркетинг тата культурӑпа вӗренӳ ӗҫӗн пайӗн заведующийӗ.

#ят-сум, #чыславсем, #шкулсем, #музейсем, #Елчӗк, #Куславкка