Шупашкарти электромеханика колледжӗн студенчӗ Андрей Юманов ҫуллахи каникулта хулари пляжра нимеҫӗ пек ӗҫленӗ. Ҫак тапхӑрта, виҫӗ уйӑхра, вӑл икӗ ҫынна путасран ҫӑлнӑ: 11 ҫулти ачана тата 28-ти арҫынна.
Паттӑрлӑх кӑтартнӑшӑн, хастар пулнӑшӑн Инкеклӗ лару-тӑру министерстви тата Шупашкар хула администрацийӗ Андрей Юманова тав хучӗпе чысланӑ.
Халӗ каччӑ малалла вӗренет. Вӑл - 3-мӗш курсра.
Шупашкар районӗнчи Хураҫырма ялӗнче арҫын ҫухалнӑ. Ӑна полицейскисем, нимеҫӗсем шыраҫҫӗ. Хыпара «Лиза Алерт» ушкӑнра та вырнаҫтарнӑ.
Владимир Яковлевич Николаев ҫӗртме уйӑхӗн 21-мӗшӗнче ҫухалнӑ. Килтен тухса кайнӑ чухне тӗттӗм кӑвак тӗслӗ куртка, тӗттӗм шӑлавар, хура кроссовка, сӑран кепка тӑхӑннӑ пулнӑ, кӑвак хутаҫ йӑтнӑ.
Арҫын 55 ҫулта. Хӑй 175 сантиметр ҫӳллӗш, имшеркке кӗлеткеллӗ. Ӑна тухтӑрсен пулӑшӑвӗ кирлӗ.
Владимир Николаева курнӑ тӑк ҫак номерсемпе шӑнкӑравлӑр: 8 800 700 5452 е 112.
Ҫу уйӑхӗн 22-мӗшӗнче Шупашкарти ҫурҫӗр-хӗвеланӑҫ районӗнче пурӑнакан 90-ри кинемей ҫухалнӑ. Елизавета Карпеева килтен 15 сехетре тухса кайнӑ. Ун чухне хура пальто, хура гамаш, хура пушмак тӑханнӑ пулнӑ.
Мӑнукӗ каланӑ тӑрӑх, кинемей ку таранччен ҫухалса ҫӳремен, Кӳкеҫри пахчана ҫеҫ кайкаланӑ. Тӑванӗсем унта кайса пӑхнӑ - унта вӑл ҫук. Вӗсем пӑлханса ӳкнӗ, ҫынсенчен пулӑшу ыйтнӑ. Ватӑскере нимеҫӗсем шырама тытӑннӑ. Тавах Турра, ӑна тупнӑ. Савӑнӑҫлӑ хыпара тӑванӗсем ӗнер пӗлтернӗ.
Ҫӗнӗ Шупашкарта сусӑр хӗрачана пӗр талӑк шыранӑ. Вӑл пуш уйӑхӗн 3-мӗшӗнче 16 сехетре ҫухалнӑ. Вӗсем урамра асламӑшӗпе /е кукамӑшӗпе/ уҫӑлса ҫӳренӗ. Тӑрук хӗрача унран тарнӑ.
Хӗрачана йӗрке хуралҫисем кӑна мар, нимеҫӗсем те шыранӑ. Ӑна пӗр талӑкран ҫеҫ тупнӑ.
Ирхине Шупашкар еннелле каякан водитель ҫул хӗрринче хӗрача ларнине асӑрханӑ. Вӑл ӑна полици уйрӑмне илсе ҫитернӗ. Хӗрачана пульницӑна вырнаҫтарнӑ. Унӑн кӑмӑлне лӑплантармалла.
Ҫакӑ паллӑ: хӗрача тӗлӗшпе нимӗнле преступлени те туман.
Нимеҫӗсем Шупашкарти тата Ҫӗнӗ Шупашкарти троллейбуссемпе тӳлевсӗрех ҫӳреме тытӑнӗҫ. Кун пирки ЧР Патшалӑх Канашӗн председателӗ тата "Эпир пӗрле" регионти штабӑн ертӳҫи Леонид Черкесов пӗлтернӗ. Ҫак хуласен троллейбус предприятийӗсемпе килӗшӳ тунӑ. Малашне ытти муниципалитетпа та калаҫса татӑласшӑн.
Нимеҫӗн транспортпа тӳлевсӗр ҫӳрес тесен бейдж, маршрут хутне тата удостоверение кӑтартмалла.
Пульницӑсенче ӗҫлекен нимеҫӗсене вӗри апатпа тивӗҫтермелле тӑвасшӑн. Ҫавӑн пекех вӗсене тӳлевсӗрех медтӗрӗслев витӗр тухма, сипленме, кирлӗ тӗк реабилитаци витӗр тухма май туса парасшӑн.
Леонид Черкесов палӑртнӑ тӑрӑх, нимеҫӗ-медиксен ординатурӑна вӗренме кӗмешкӗн, ӗҫе вырнаҫмашкӑн та ҫӑмӑллӑхсем пулмалла.
Вырсарникун Ҫӗнӗ Шупашкарта ҫухалнӑ хӗрарӑма шыранӑ. Тупнӑ. Анчах, шел те, вӑл вилнӗ.
Хӗрарӑм каҫхине аппӑшӗ патне кайма тухнӑ. Анчах унта вӑл ҫитеймен. Ирхи 4 сехетре вӑл хӗрӗ патне шӑнкӑравланӑ та темӗнле вӑрманта пулнине, шӑнса хытма пуҫланине каланӑ. Кайран телефона пачах тытман.
Хӗрарӑма полицейскисем, тӑванӗсем, нимеҫӗсем шыранӑ. Пӗр предприяти хуралҫи ӑна курса юлнӑ иккен. Вӑл каласа кӑтартнипе ӑҫтарах шырамаллине ӑнланнӑ. Вӑхӑт кӑштах ҫеҫ иртнӗ – шырав чарӑннӑ. Хӗрарӑмӑн виллине тупнӑ…
«Лиза Алерт» отряд хастарӗсем юпа уйӑхӗн 6-мӗшӗнче ҫӗрӗпех 73 ҫулти арҫынна шыранӑ. Вӑл ҫухални пирки 21 сехет те 25 минутра пӗлтернӗ.
Ватӑ арҫын ӑс-тӑн енчен арпашӑннӑ. Вӑл кӑнтӑрла урама уҫӑлма тухнӑ та киле таврӑнман. Ҫӗрле ун чухне 3 градус таранах шӑнтмалла пулнӑ. Арҫын ҫумӗнче телефон та пулнӑ. Анчах шӑнкӑравласан вӑл ӑна тытман. Темле майпа арҫын телефона тытнӑ, темиҫе сӑмах каланӑ. Ҫӑкна пула нимеҫӗсем «ребус» хуравне тупнӑ. Вӗсем старике ҫур ҫӗр иртни 1 сехетре тупнӑ.
Сӑмах май, нимеҫӗсем пӗлтӗр те ҫак арҫынна шыранӑ. Ун чухне те вӑл ӑс енчен арпашӑннӑ.
Ҫӗмӗрле районӗнче арҫынпа хӗрарӑм кӑмпана кайсан ҫухалнӑ. Вӗсене полици, ҫӑлавҫӑсем, нимеҫӗсем шыранӑ.
Вӗсем вӑрманта ҫухални пирки ӗнер 23 сехет ҫурӑра пӗлтернӗ. 1979 тата 1982 ҫулта ҫуралнӑ арҫынпа хӗрарӑм Ҫӗмӗрле вӑрманӗнче каялла тухмалли ҫула тупайман.
Ҫур ҫӗр иртни 3 сехетре кӑмпаҫӑсене тупнӑ. Вӗсем Речной поселокӗ ҫывӑхӗнче юхӑннӑ пионер уйлӑхӗ патӗнче тупнӑ. Арҫынпа хӗрарӑм ҫӗр каҫас тесе кӑвайт чӗртнӗ. Вӗсем ҫӑлавҫӑсене курсан питӗ савӑннӑ. Ара, ҫав вӑхӑталла шӑпах ҫумӑр ҫума тытӑннӑ.
Авӑн уйӑхӗн 8-мӗшӗнче Ҫӗрпӳ районӗнче 83 ҫулти арҫын ҫухалнӑ. Тӑванӗсем тепӗр кунхине нимеҫӗсенчен пулӑшу ыйтнӑ. Ватӑ арҫын вара чир-чӗрпе аптӑранӑ.
Ватӑскере хӑвӑртрах шыраса тупмалла пулнӑ, мӗншӗн тесен каҫхине самай сивӗтет. Ҫитменнине, ҫумӑр ҫунӑ, ҫил кастарса вӗрнӗ. Арҫын хӑй ӑҫта ҫӳренине ӑнланмасть-мӗн, чирне пула эмелсем ӗҫсе тӑрать.
Авӑн уйӑхӗн 10-мӗшӗнче ӑна кӳршӗ ялта тупнӑ. Вӑл шӑнса хытнӑ, питӗ ывӑннӑ. Ватӑскер сивӗре, ҫумӑр айӗнче виҫӗ кун ҫухалса ҫӳренӗ.
Ҫӗнӗ Шупашкарта ачасем уҫӑлма кайнӑ та таврӑнман. Каҫхи 11 сехетре амӑшӗ полицие пӗлтернӗ. Шӑпӑрлансене ирхине хулара балкон айӗнче тупнӑ.
Хӗрарӑм полицие каласа кӑтартнӑ тӑрӑх, 9-ти тата 13 ҫулти ывӑлӗсем йытӑпа уҫӑлма кайнӑ та таврӑнман. Унччен ачасем ҫӗрлечченех уҫӑлса ҫӳрени пулнӑ-ха. Киле таврӑнманни вара – ҫук.
Полици, нимеҫӗсем ҫӗрӗпе вӗсене шыранӑ, путвалсене, чартаксене пӑхнӑ. Ирхи 8 сехетре вӗсене тата йытта Пионерсен урамӗнчи балкон айӗнче тупнӑ.
Арҫын ачасем киле таврӑнма хӑранӑ-мӗн, киле час таврӑнманшӑн амӑшӗ вӑрҫасран шикленнӗ.
+17.3 °C