Юпа уйӑхӗн 10-мӗшӗнче 10 сехет те 15 минутра Шупашкарти пӗр урамра ватӑ хӗрарӑм тӑнне ҫухатнӑ. Ҫакна иртен-ҫӳрен курнӑ та тӳрех васкавлӑ медпулӑшу чӗннӗ. Анестезиологи тата реанимаци бригади вырӑна 5 минутранах ҫитнӗ.
Хӗрарӑма медпулӑшу машинипе пульницӑна илсе кайнӑ, анчах ҫул ҫинче вӑл сывлама пӑрахнӑ. Сергей Кузнецов тухтӑр унӑн клиника вилӗмӗ пулнине палӑртнӑ. Реаниматологсем пӗр тӑхтамасӑр пациента пулӑшма пуҫланӑ.
Ватӑ хӗрарамӑн ӳпкине искуственнӑй майпа сывлаттарнӑ, чӗрине массаж тунӑ, юн тымарӗнчен эмелсем янӑ. Телее, тухтӑрсем ватӑ хӗрарӑмӑн чӗрине ӗҫлеттерсе янӑ. Вӑл чӗрепе юн тымарӗсен чирӗпе аптӑрать-мӗн.
Кӑҫал ҫу уйӑхӗн 26-мӗшӗнче 18 сехет ҫурӑра Ҫӗнӗ Шупашкара васкавлӑ медпулӑшу килни пирки, унта тухтӑрсене ҫамрӑксем тапӑнни ҫинчен пӗлтернӗччӗ. Кун тӗлӗшпе пуҫиле ӗҫ пуҫарнӑччӗ. Ҫак кунсенче ӑна суд пӑхса тухнӑ.
Суд 26-ри арҫынна ҫирӗп режимлӑ колоние 9 уйӑхлӑха, 19 ҫулти каччӑна колони-поселение 11 уйӑх та 20 кунлӑха яма йышӑннӑ.
Следстви тата суд палӑртнӑ тӑрӑх, ҫав кун васкавлӑ медпулӑшу шӑнкӑрав йышӑннӑ хыҫҫӑн Ҫӗнӗ Шупашкарти Совет урамӗнчи 14-мӗш ҫурт картишне килнӗ. Каччӑсем ун чухне ӳсӗр пулнӑ, машинӑран тухнӑ санитара тапӑннӑ. Хайхискерсем ӑна ачасен, ытти ҫынсен умӗнчех хӗненӗ.
Шупашкар районӗнче пурӑнакан пӗр каччӑна сӑпса сӑхнӑ. Хайхискерӗн ҫакна пула анафилактика шокӗ пулнӑ. Кун пирки Чӑваш Енри катастрофа медицинин тата васкавлӑ медпулӑшӑвӑн служби пӗлтерет.
Ҫак каччӑ сӑпса сӑхни пирки ытти ҫынна каланӑ. Кайран вӑл тӑнсӑр кайса ӳкнӗ. Тӑванӗсем часрах васкавлӑ медпулӑшу чӗннӗ. Тухтӑрсем яла 13 минутран ҫитнӗ. Ҫав вӑхӑталла каччӑ мӗн пулса иртнине япӑх ӑнланнӑ.
Тухтӑр унӑн анафилактика шокӗ пулнине палӑртнӑ. Анестезистсем венӑран эмел ямашкӑн катетер лартнӑ. Пациента машинӑна хурса пульницӑна кайнӑ.
Юрать, васкавлӑ медпулӑшу вӑхӑтра ҫитнӗ, ку каччӑн пурнӑҫне ҫӑлма пулӑшнӑ.
Ыран, юпа уйӑхӗн 5-мӗшӗнче, республикӑри пульницӑсенче Пӗрлехи диспансеризаци кунӗ иртӗ. Ҫак кун кӑмӑл пур тӑк – участковӑй тухтӑр патне ҫитӗр, сывлӑха тӗрӗслеттерӗр.
Диспансеризаци вӑхӑтӗнче тухтӑр сывлӑх тӗлӗшӗнчен кӑлтӑксем тупса палӑртать тӗк пациента тӗплӗнрех тӗрӗсленме ярать. Эсир ҫуралнӑ ҫула кура вӑхӑтра диспансеризаци тухаймарӑр-и? Апла профилактика медицина тӗрӗслевӗ витӗр тухма пултаратӑр.
ЧР Сывлӑх сухлавӗн министерстви пӗлтернӗ тӑрӑх, ыран тухтӑрсем пациентсене иртен пуҫласа кӑнтӑрлаччен йышӑнӗҫ. Каласа хӑварар: Пӗрлехи диспансеризаци кунӗ чӳк уйӑхӗн 2-мӗшӗнче тата раштав уйӑхӗн 7-мӗшӗнче иртӗҫ.
Шупашкара Мускав хирургӗ Евгений Зорин килнӗ. Вӑл хырӑмлӑха резекци тумалли операципе ӑсталӑх класӗ ирттернӗ. Ку операци мӑнтӑр ҫынсене кирлӗ, вӗсем начарланаймаҫҫӗ пулсан вӑл шӑпах пулӑшӗ.
Пирӗн республикӑра ку таранччен кунашкал операци туман-ха. Ку – пӗрремӗш. Пӗр хӗрарӑм мӑнтӑр, ниепле те начарланайман. Тухтӑрсем ӑна кунашкал операци ирттерме сеннӗ, вӑл килӗшнӗ. Евгений Зорин Шупашкар пульницинче кунашкал икӗ операци тунӑ.
Хырӑмлӑха резекци туни мӗн-ха вӑл? Хирург хырӑмлӑхран 1 сантиметр диаметрлӑ ҫӳхе ҫанӑ тӑвать, хырӑмлӑх 10 миллилитр ҫеҫ тӑрса юлать, ыттине касаҫҫӗ. Ҫапла майпа пациент сахалрах ҫиме тытӑнать, начаранать.
«Республикӑн синкер медицини тата васкавлӑ медицина пулӑшӑвӗ» хысна учрежденийӗнче пӗлтерне тӑрӑх, васкавлӑ пулӑшу номерӗпе теприсем шӳтлесе те шӑнкӑравлаҫҫӗ.
Тӗрӗссипе, тухтӑрсен выляса ларма вӑхӑт ҫук. Иртнӗ эрнере, авӑн уйӑхӗн 16-22-мӗшӗсенче, диспетчерсем 10 пин ытла шӑнкӑрав йышӑннӑ. Васкавлӑ пулӑшу машини 5720 пациент патне тухса кайнӑ. 3209 ҫынна пульницӑна вырттарма илсе кайнӑ. Кая юлмасӑр пулӑшмалла тӗслӗхсем те пулаҫҫӗ. Иртнӗ эрнере ун пеккисем 5 процент тупӑннӑ.
Диспетчер ыйтӑвне тӗрӗс те уҫӑмлӑн хуравлама сӗнеҫҫӗ. Апла тусан васкавлӑ пулӑшу машини вырӑна хӑвӑртрах тухса кайӗ. Ӑҫта пымаллине те йӗркеллӗ ӑнлантарма ыйтаҫҫӗ. Ҫын урамра пулсан хушма ориентирсене кӑтартма сӗнеҫҫӗ.
«Сывлӑх сыхлавӗ» наци проекчӗпе килӗшӳллӗн кӑҫал пирӗн республикӑна мобильлӗ 16 фельдшерпа акушер пункчӗ килнӗ. Вӗсенчен саккӑрӑшӗ утӑ уйӑхӗнче ҫитнӗ. Ҫак кунсенче республикӑна таиа тепӗр 8 ФАП килнӗ. Ҫавӑн валли федераци хыснинчен 55 миллион тенкӗ уйӑрнӑ тесе пӗлтерет Чӑваш.Енӗн Сывлӑх сыхлав министерстви.
Пӗлтӗр пирӗн республика туяннӑ пилӗк мобильлӗ ФАПпа пӗрлех Чӑваш Енре куҫса ҫӳрекен 21 феььдшерпа акушер пункчӗ ӗҫлӗ. Вӗсем кашни районта пӗрер пулӗҫ. Кунсӑр пуҫне тата ҫулталӑк вӗҫлениччен куҫса ҫӳрекен маммограф тата флюорограф илсе килӗҫ.
Урапа ҫинчи ФАПсем сахал йышлӑ ялсене ҫитӗҫ. Вӗсем пулӑшнипе ялта пурӑнакан 33 пин ҫынна тухтӑрсем тӗрӗслӗҫ тесе шантараҫҫӗ ЧР Сывлӑх сыхлав министерствинче.
Авӑн уйӑхӗн 17-мӗшӗнче Республикӑри клиника онкодиспансерӗнче пуҫ тата мӑй усал шыҫҫисене малтанхи тапхӑрта тупса палӑртмалли кун ирттерӗҫ. Ҫынсем ҫав кун онкологпа ятарлӑ направленисӗр тӗл пулса калаҫма пултарӗҫ.
Йышӑну ирхи 8 сехетрен пуҫласа 14 сехетчен пулӗ. Пациентсемпе Елена Колчина тата Дмитрий Кононцев консультаци ирттерӗҫ.
Ҫак тухтӑрсем патне лекес тесен электронлӑ регистратура урлӑ ҫырӑнма май пур. Республикӑри клиника онкодиспансерӗ Шупашкарти Гладков урамӗнчи 31-мӗш ҫуртра вырнаҫнӑ.
Ҫӗнӗ Шупашкарти васкавлӑ медпулӑшу тухтӑрӗсем тин ҫуралнӑ ачан пурнӑҫне ҫӑлнӑ, тӑрук ҫӑмӑлланнӑ амӑшне пулӑшнӑ.
Ҫурла уйӑхӗн 24-мӗшӗнче ир-ирех ҫамрӑк хӗрарӑм «03» номерпе шӑнкӑравласа шыв кайнине пӗлтернӗ. Тухтӑрсем 6 минутран ун патне ҫитнӗ. Шурӑ халатлисем киличчен пӗр минут маларах хӗрарӑм ҫуратма пуҫланӑ.
Лару-тӑру ҫӑмӑлах пулман: ача вӑхӑтран маларах ҫуралнӑ, унӑн асфикси пулнӑ. Тухтӑрсем пӗр тӑхтамасӑр пӗчӗкскере пулӑшнӑ: кӑвапине каснӑ, сывлав органӗсене йӑлмакаран тасатнӑ, маска витӗр ингаляци тунӑ. Вӗсем ачана амӑшлӑх центрне чиперех илсе ҫитернӗ.
Халӗ амӑшӗпе ачи килте ӗнтӗ. Вӗсем иккӗшӗ те хӑйсене лайӑх туяҫҫӗ.
Ӗнер, ҫурла уйӑхӗн 21-мӗшӗнче, Шупашкарта автобуспа троллейбус ҫапӑннӑ. Инкек вырӑнне Катастрофа тата васкавлӑ пулӑшӑвӑн республикӑри центрӗн 5 бригади пырса ҫитнӗ. Пилӗк ҫын суранланнӑ. Ку хыпара ҫӗршыври тӗрлӗ МИХ сайтӗнче хыпарланӑ. Инкек Иван Яковлев проспектӗнче ирпе пулса иртнӗ.
Васкавлӑ пулӑшу паракансем пирки каласан, ҫурла уйӑхӗн 11-мӗшӗнче Красноармейски районӗнчи велосипедистпа пулӑшнӑ. Ӑна машина ҫапса хӑварнине 112 номерпе 20 сехет те 19 минутра хыпарланӑ. Инкек хыҫҫӑн 12 минутран бригада вырӑна васканӑ. Велосипедиста Шупашкара васкавлӑн илсе килнӗ. Васкавлӑ пулӑшу машинине хирӗҫ анестезиологипе реанимаци бригади тухса кайнӑ. Унтан арҫынна Шупашкарти тухтӑрсем йышӑннӑ.
-5.7 °C