Паян 11 сехет те 25 минутра Муркаш округӗнчи Кашмаш шкулӗнче 8-мӗш класра вӗренекен ача иккӗмӗш хутри чӳречерен тухса ӳкнӗ (е хӑй сикнӗ).
Ку виҫҫӗмӗш урок вӑхӑтӗнче пулса иртнӗ. Арҫын ача чӳречерен сиксе тӑпра ҫине ӳкнӗ, ура ҫине тӑрайман. Ӑна медпулӑшу кирлӗ пулнӑ. Арҫын ачана васкавлӑ медпулӑшупа Шупашкара Республикӑри ача-пӑча пульницине илсе ҫитернӗ.
Халӗ Муркаш округӗн прокуратури тӗрӗслев ирттерет.
Шупашкар районӗнчи Ҫӗнӗ Тренкассинчи РФ Геройӗ Д.Семенов ячӗллӗ вӑтам шкулта агротехнологи класӗ уҫӑлнӑ.
Шупашкар районӗн хаҫачӗ «Тӑван Ен» халӑх тетелӗнче пӗлтернӗ тӑрӑх, аграри класӗ чечек ӗрчетес енӗпе ӗҫлеме пуҫлӗ. Аграри класне Чӑваш патшалӑх аграри университечӗ пулӑшнипе уҫнӑ.
Ку класра шкул ачисем ӳсен-тӑран тата чечек ӳстерес ӗҫре ҫӗнӗ йышши меслетсене тӗпчеме пуҫлӗҫ, ҫавӑн пекех ҫӗнӗ йышши технологисемпе усӑ курса тӗрлӗ сӑнав туса ирттерӗҫ.
Агрокласа шкул ачисене ял хуҫалӑх производствин, биотехнологин никӗсне вӗрентес, ӑнлантарас тӗллевпе уҫнӑ.
Ҫӗнӗ Шупашкарти шкулсенчен пӗринче педагога укҫа енчен хӗсӗрленине тупса палӑртнӑ. Кӑлтӑка прокуратура асӑрханӑ.
Кӑҫалхи кӑрлач уйӑхӗнчен пуҫласа ҫу уйӑхӗн вӗҫӗччен учительсенчен пӗрне ыттисенчен самай сахалтарах преми парса пынӑ. Вӗрентекен вара ытти чухнехи пекех ӗҫленӗ, ӑна дисциплина тӗлӗшӗнчен явап тыттарман. Унчченхи приказсене тишкернӗ те, тӑрӑшса ӗҫленине палӑрнӑ.
Суйласа преми панӑшӑн шкул директорне прокуратура штрафлама йышӑннӑ.
Вӑрмарти Г.Е. Егоров ячӗллӗ вӑтам шкулта тӑрӑшнӑ хӗрарӑма пӗлтӗрхи чӳк уйӑхӗн 1-мӗшӗнче ӗҫрен кӑларса янӑ. Анчах саккуна пӑсса кӑларса янӑ-мӗн.
Хӗрарӑм пус усса ларакан йышши пулман, саккуна та аван пӗлнӗ, ҫавна май вырӑнти прокуратурӑна пулӑшу шыраса кайнӑ. Хӗрарӑма ӗҫе кӑҫалхи пуш уйӑхӗн 14-мӗшӗнчен каялла илмелле тунӑ. Анчах ӑна тепӗр тӑватӑ кунтан, пуш уйӑхӗн 18-мӗшӗнче, ҫеҫ, илнӗ.
Прокуратура хута кӗнӗ хыҫҫӑн хӗрарӑма ӗҫе 2024 ҫулхи чӳк уйӑхӗн 2-мӗшӗччен илмелле тунӑ.
Шупашкарти 38-мӗш шкулта Чӑваш Республикин тава тивӗҫлӗ учительне Иван Дубанова халалласа мурал уҫнӑ.
Иван Степанович ҫак шкулта 40 ҫула яхӑн ӗҫленӗ, ачасене географи предметне вӗрентнӗ. Вӑл Горький хулинчи педагогика институтӗнче аслӑ пӗлӳ илнӗ.
Ачасене вӗрентнисӗр пуҫне Иван Дубанов экскурсисемпе экспедицисем йӗркеленӗ. Вӑл 15 кӗнеке пичетлесе кӑларнӑ, ҫак йышра тавра пӗлӳ тата топонимика словарӗсем пур.
Иван Степанович пирӗнтен нумаях пулмасть, 2024 ҫулхи раштавӑн 31-мӗшӗнче, ӗмӗрлӗхех уйрӑлса кайнӑ.
Ӗнер, авӑн уйӑхӗн 1-мӗшӗнче, пирӗн республикӑра виҫӗ шкул уҫӑлнӑ.
Шупашкарти Хӗвеллӗ микрорайонти шкула 1400 ача вӗренмелӗх тунӑ. Вӑл хулари 44-мӗш лицейӑн иккӗмӗш корпусӗ шутланать. Унта ӗнер пӗрремӗш класа каякан 400 ачана йышӑннӑ. Шкулта хальлӗхе 1-8-мӗш классенче вӗренекенсем пӗлӳ илӗҫ.
Ҫӗнӗ Шупашкарти Никольски микрорайонти шкула 1100 ача вӗренмелӗх тунӑ. Вӑл асӑннӑ хулари 9-мӗш вӑтам шкулӑн филиалӗ шутланать.
Кӳкеҫре 825 ача вӗренмелӗх шкула хута янӑ.
Чӑваш Енӗн Наци вулавӑшӗнче авӑн уйӑхӗн 3-мӗшӗнче Креативлӑ индустри шкулӗ уҫӑлӗ. Унта республика Элтеперӗ, креативлӑ индустри енпе ӗҫлекен специалистсем, ашшӗ-амӑшӗпе ачисем хутшӑнӗҫ.
Шкулпа вулавӑш директорӗ Роза Лизакова паллаштарӗ. Хӑнасем виҫӗ студире пулса курӗҫ: дизайн, анимаци тата 3D-графика, фото-, видеопроизводство студийӗсенче.
Креативлӑ индустри шкулне «Придумано в России» (чӑв. Раҫҫейре шухӑшласа кӑларнӑ) федераци программипе килӗшӳллӗн уҫаҫҫӗ иккен. Укҫана Раҫҫейӗн тата республикӑн Культура министерствисем тата республика хыснинчен уйӑрса панӑ.
Вӑтам классенче вӗренекен шкул ачисен малашне обществознани предмечӗ пулмӗ.
«Авӑнӑн 1-мӗшӗнчен ачасене ҫӗнӗ программӑпа вӗрентме пуҫлӗҫ. 6-7-мӗш классен обществознани вуҫех пулмӗ. 8-9-мӗш классен урокӗсен шутне чакарӗҫ: 136 сехетрен 68 сехет юлӗ», — хыпарланӑ Телеграмри «Пуринчен малтан» каналта.
Обществознани вырӑнне ачасем истори вӗренӗҫ. Вӑтам классенче ҫавӑн пек урок хальхинчен 1,5 хут нумайрах пулӗ.
Чӑваш Республикин Вӗренӳ министерстви чӑваш чӗлхине шкулсенче вӗрентесси питех те аван пулса пынине пӗлтернӗ. Кун пек хурава Шупашкарти шкулсенчен пӗринче чӑваш чӗлхи учителӗнче ӗҫлекен Александр Степанов патне те ярса панӑ.
Александр Марсович пӗлтернӗ тӑрӑх, уйӑх ҫурӑ каялла республикӑри вӗрентекенсем тӳре-шара патне нумай чӗлхеллӗ классем (шкулсем) уҫасси тата вӗсенче чӑваш чӗлхине тарӑннӑн вӗрентесси пирки ҫырнӑ.
«Ну мӗнех, ку ҫырупа килӗшӳллӗн, чӑваш чӗлхипе ҫыхӑннӑ лару-тӑру питӗ аван», — кӑшт тӗлӗнсерех хыпарланӑ Александр Степанов хӑйӗн страницинче.
159 шкулта пуҫламӑш классенче вӗренекенсем пур предмета та (вырӑс чӗлхипе литература вулавӗсӗр, ют чӗлхесемсӗр пуҫне) чӑвашла вӗренеҫҫӗ иккен.
«Чӑннипе каласан, хамӑр республикӑшӑн «савӑнмалли» кӑна юлать. Паллах, ӗненес килет, кун ҫинчен ҫырура каланӑ, ӗҫлӗ ушкӑн хӑйӗн ӗҫне тивӗҫлӗ пурнӑҫласса шанатӑп», — пӗтӗмлетнӗ хастар вӗрентекен.
Чӑваш Енре чӑваш ачисен «Эткер» смени черетлӗ хутчен ӗҫлеме тытӑннӑ. Кун пирки Александр Степанов чӑваш чӗлхипе литературин вӗрентекенӗ «Контактра» халӑх тетелӗнчи хӑйӗн страницинче пӗлтернӗ.
«Кӑҫал эпир ӑна Ирпипе, Ирина Диаровӑпа, 10-мӗш хут ирттеретпӗр. Тӗлӗнмелле!!! Тӗрлӗ регионта пурӑнакан чӑваш ачисем Шупашкарта пухӑнса пӗр-пӗринпе пӗр чӗлхе тупса «Чӑваш тӗнчине» туйма тытӑнӗҫ. Шанас килет паллах. Паянхи кун вӗсем пӗр-пӗринпе паллашрӗҫ, юрларӗҫ те ташларӗҫ, хӑйсен тӑван енӗ ҫинчен постер хатӗрлерӗҫ, ыттисене паллаштарчӗҫ», — каласа кӑтартнӑ хастар вӗрентекен хӑйӗн страницинче.
Чӑн та, питех те пӗлтерӗшлӗ ӗҫ туса ирттереҫҫӗ.
+5.3 °C