Шупашкарти 31 ҫулти арҫын Ҫӗнӗ ҫул каникулӗнче ултавҫӑсене 1 млн та 700 пин тенкӗ кусарса панӑ. Йӑлтах раштав уйӑхӗн 26-мӗшӗнче пуҫланнӑ.
Ун патне телефон ҫыхӑнӑвӗн операторӗн ӗҫченӗ ҫыхӑннӑ имӗш. Арҫынран номере упраса хӑварас кӑмӑл пурри-ҫуккипе кӑсӑкланнӑ. Кун хыҫҫӑн ун патне палламан ҫынсем шӑнкӑравлама тытӑннӑ. Вӗсем - банк, полици, патшалӑх палӑшӑвӗсен порталӗн ӗҫченӗсем имӗш. Хайхи Шупашкар арҫыннӑн аферистсене тытса чармалла-мӗн. Ҫапла вӑл виҫӗ банкра кредит илсе ултавҫӑсене 1 млн та 700 пин тенкӗ куҫарса панӑ.
Кӑрлач уйӑхӗн 12-мӗшӗнче Шупашкартан Мускава каҫхи авиарейспа вӗҫсе кайма ӗмӗтленнӗ пассажирсен тепӗр ирччен кӗтме тивнӗ.
Асӑннӑ рейспа хутлакан «Победа» авиакомпанин самолёчӗ ҫула 10 сехет те 30 минут кая юлса хускалнӑ.
Шупашкара Мускавран вӗҫсе килнӗ самолёт анса ларнӑ хыҫҫӑн унӑн тӗп шассинче пушар пирки систерекен тытӑм ӗҫлесе кайнӑ. Ҫавӑн хыҫҫӑн пилотсем «Тревога» сигнал панӑ. Инкекпе ҫӑлав расчечӗсем ҫийӗнчех ура ҫине тӑнӑ.
Телее, ним те ҫунма пуҫламан. Самолёта ятарлӑ вырӑна туртса илсе кайса лартнӑ.
Шупашкарта пурӑнакан Иван Кирилловичпа Галина Михайловна Львовсем пӗрле 50 ҫул пурӑннине паллӑ тунӑ. Вӗсем икӗ хӗр ӳстернӗ, халӗ тӑватӑ мӑнукпа савӑнаҫҫӗ.
Иван Львович пурнӑҫӗн ытларах пайне строительствӑна халалланӑ, Шупашкарти пир-авӑр комбинатӗнче инженерта ӗҫленӗ. Галина Михайловна медицина тытӑмӗнче вӑй хунӑ. Вӑл иглорефлексотерапи мелӗпе хӗсӗрлӗхе сипленӗ.
Шупашкарта рельс тӑрӑх ҫӳремен пӑравуспа ярӑнтарӗҫ. Хӗрлӗ тӗҫлӗ ҫӗнӗ аттракциона Гостехнадхор инспекцийӗнче тӗрӗсленӗ.
Унпа ярӑннишӗн 250 тенкӗ тӳлемелле. Пӗчӗк ачасене аслисемсӗр лартмӗҫ.
Маларах эпир Гостехнадзор терӗмӗр те, аттракционсене тӗрӗслесе тӑрать. Пӑравуса туяннӑ чухне хула ертӳҫисем ӑна Мускав ҫыранӗпе ҫӳреттерес ӗмӗтлине пӗлтернӗ.
Шупашкарта пурӑнакан хӗрарӑм ывӑлӗ ӑҫта пулнине чӳк уйӑхӗнченпе пӗлмест. Вӑл полицие пулӑшу ыйтма пынӑ.
Руслан Любинарский чӳк уйӑхӗн 23-мӗшӗнче килтен тухса кайнӑ. Унтанпа вӑл килсе курӑнман, тӑванӗсемпе ҫыхӑнӑва тухман. Хӑйӗнпе ҫумӑн докуменчӗсем те пулман унӑн.
Ҫухалнӑ кун Руслан хура куртка, сарӑ кофта, сӑрӑ джинс шӑлавар, хура пушмак тӑхӑннӑ пулнӑ. Унӑн сулахай куҫ харши ҫийӗн суран йӗрӗ пур. Руслана куракансене полицие 02 номерпе шӑнкӑравлама ыйтаҫҫӗ.
«Чӑваш Ен» ПТРКн радиожурналисчӗ Алексей Мулянов пурнӑҫран уйрӑлнӑ. Вӑл 41 ҫулта пулнӑ. Алексейӑн чери йывӑр чир хыҫҫӑн тапма пӑрахнӑ.
Радиора вӑл 2003 ҫултанпа ӗҫленӗ. Вӑл ашшӗн Николай Муляновӑн ҫулӗпе кайнӑ. Пӗрремӗш кунранпах Алексей «Вести – Чувашия» хыпарсен кӑларӑмне хатӗрлеме пуҫланӑ, унтан - «Вести ФМ» кӑларӑма.
Алексей «Столичные вести», «Будни ЖКХ», «Вокруг дорог» кӑларӑмсен авторӗ тата ертӳҫи пулнӑ. Унпа ыран Шупашкарти Граждан урамӗнчи 19-мӗш ҫуртра 10 сехетре сывуллашӗҫ.
Шупашкар хулинче нумай хваттерлӗ ҫуртсенчен пӗринчи подъезда наркотик хума пынӑ ҫамрӑка тытса чарнӑ.
Миттов бульварӗнчи ҫав ҫуртра кӑрлачӑн 9-мӗшӗнче пакунлисем ҫав самантра урӑх преступление уҫса парассипе ӗҫленӗ. Картлашкапа утса хӑваракан ҫамрӑкран вӗсем мӗн те пулин пӗлмест-и тесе ыйтса пӗлес тенӗ. Анчах лешӗ ним те чӗнмен, чупса тарма тӑнӑ.
Каччӑ ҫав ҫуртри подъёзда наркотик хурса хӑварма пынӑ иккен. Ун ҫумӗнче марихуна пулнӑ. 3,6 грамм ытларах.
Асӑннӑ каччӑ малтан та ҫавӑн пек хӑтланнӑ иккен, ирӗке тухсан вӑл каллех унчченхи мелпех укҫа ӗҫлесе илес тенӗ. Халӗ ун тӗлӗшпе каллех пуҫиле ӗҫ пуҫарнӑ.
Шупашкарта юр ирӗлтерекен станци хута ярасшӑн. Вӑл Калинин районӗнче Трактор тӑвакансен проспектӗнче, Кӑкшӑм юханшывӗ ҫывӑхӗнче, пулӗ. Проекта патшалӑх эксертизине янӑ. Унпа килӗшӳллӗн, юр ирӗлтерекен установка лартма, урамри юра купаламалли лапам, хура каяшне упрама вырӑн тума палӑртнӑ.
Юр шывне тасатакан сооруженисене ярӗҫ. Ӑшӑ ҫанталӑкра вӑл Кӑкшӑм юханшывне лекӗ, сивӗре вара – хулари хозфекал тытӑмне. Кунсӑр пуҫне тасатнӑ шывпа территорие шӑварӗҫ, установкӑна ӗҫлеттерӗҫ.
Шупашкар хулинче пурӑнакан 14 ҫулти ача карас телефонӗ туянас тенӗ. Ӑна Ҫӗнӗ ҫулта ҫывӑх ҫыннисем укҫа парнеленӗ. Ача ҫав укҫапа ҫӗнӗ йышши телефонлӑ пулма ӗмӗтленнӗ.
Смартфон сутасси ҫинчен калакан пӗлтерӗве каччӑ паллӑ мессенджерсенчен пӗринче асӑрханӑ. Ун пек телефон 100 пин тенкӗ ытла тӑрать. Пӗлтерӳре телефона 10 пинрен те йӳнӗрехпе туянма май пуррине пӗлтернӗ.
Ача Ҫӗнӗ ҫулта хӑйне парнеленӗ укҫана, 11 пин тенке, куҫарса панӑ. Анах унтан татах укҫа ыйтнӑ. Каччӑ хӑйне улталанине ӑнланса илнӗ хыҫҫӑн пакунлисенчен пулӑшу ыйтнӑ.
Ӗнер Шупашкарти «Университет-2» микрорайон пӗр вӑхӑтлӑха ҫутӑсӑр тӑрса юлнӑ. Ҫутта унти ҫуртсенче 17 сехет те 40 минутра сӳнтернӗ. Малтанласа пӗлтернӗ тӑрӑх, Лукин тата Миначев урамӗсенчи нумай хваттерлӗ 12-14 ҫурт ҫутӑсӑр тӑрса юлнӑ.
Сӑмах май каласан, асӑннӑ ҫуртсенчен чылайӑшӗнче уйрӑм газ кӑмакисем вырнаҫтарнӑ, вӗсем вара ҫутӑсӑр ӗҫлемеҫҫӗ. Апла пулсан, ҫутӑ сӳнсен хватерсенче ӑшӑ та пулмасть.
+16.3 °C