Шупашкар хула администрацийӗн пуҫлӑхӗ Денис Спирин хулара хутса ӑшӑтмалли сезон хӑҫан пуҫланассине пӗлтернӗ. Ахӑртнех, авӑн уйӑхӗн 26-мӗшӗнче. Ҫапла ҫырнӑ вӑл Телеграм-каналӗнче.
Малтан ача пахчисенче, шкулсенче, пульницӑсенче ӑшӑ парӗҫ, кайран - нумай хваттерлӗ ҫуртсенче. Сезон пуҫлансан 7-10 кунран пур ҫӗре те ӑшӑ ҫитмелле.
Аса илтерер: Ҫӗмӗрлере — авӑнӑн 14-мӗшӗнче, Ҫӗнӗ Шупашкарта авӑнӑн 19-мӗшӗнче ӑшӑ янӑ. Паянхи куна республикӑри чылай районта хутса ӑшӑтмалли сезон пуҫланнӑ.
Паянтан Ҫӗмӗрле хулинче хутса ӑшӑтмалли сезон пуҫланать. Ҫапла пӗлтерет хула администрацийӗ.
Чи малтан ача пахчисене, социаллӑ учрежденисене ӑшӑ парӗҫ. Пурӑнмалли ҫуртсенче те кӗҫех ӑшӑ пуласса шантараҫҫӗ. Ҫывӑх кунсенче офиссенче тата ытти учрежденире те ӑшӑ парӗҫ.
Йӗркепе килӗшӳллӗн, вӑтам сывлӑш температури 5 кун 8 градус тӑрсан ӑшӑ пама тытӑнмалла. Хальлӗхе ун пекех сивӗ пулман-ха. Ҫапах ҫӗмӗрлесен ав хваттерӗсенче ӑшӑ пулӗ.
Ҫӗмӗрлере 38 ҫулти арҫынна тытса чарнӑ. Ун тӗлӗшпе пуҫиле ӗҫ пуҫарнӑ.
Следстаи версийӗ тӑрӑх, авӑн уйӑхӗн 1-мӗшӗнче 23 сехет тӗлӗнче ҫак ӳсӗр арҫын савни пулнӑ хӗрарӑм патне килнӗ. Хайхискер кӗвӗҫнипе ҫав хӗрарӑмӑн ҫӗнӗ савнине ҫӗҫӗпе тапӑннӑ. Лешӗ тепӗр кунхине реанимацире вилнӗ.
Ҫак арҫын савни пулнӑ хӗрарӑмпа ун патне хӑнана килнӗ пӗлӗшне те суранлатнӑ. Халӗ хӗрарӑм пульницӑра сипленет, арҫынна вара медпулӑшу кӳнӗ хыҫҫӑн киле янӑ.
38 ҫулти арҫын вара преступлени вырӑнӗнчен тарнӑ. Ҫапах ӑна хӑвӑрт тытса чарнӑ.
Ҫурла уйӑхӗн 31-мӗшӗнче Чӑваш Енре сасӑлав пуҫланнӑ. Ку - срокран маларах иртекенни. Авӑн уйӑхӗн 10-мӗшӗччен пырӗ вӑл, ӗҫ кунӗсенче 16 сехетрен пуҫласа 20 сехетчен сасӑлама пулать. Канмалли кунсенче - участок йӗркеленӗ графикпа килӗшӳллӗн.
Авӑнӑн 11-мӗшӗнче 19 муниципалитет округӗнче сасӑлав иртӗ. Ҫавӑн пекех Шупашкарта, Ҫӗнӗ Шупашкарта, Улатӑрта, Ҫӗмӗрлере, Красноармейски муниципалитет округӗнче суйласа ҫитермелли пур.
Ҫӗмӗрлере пурӑнакан ҫамрӑк хӗрарӑма ҫын машинине хускатса ҫула тухнӑшӑн тата унпа тепӗр автомобиле сиенлетнӗшӗн явап тыттарма йышӑннӑ.
26 ҫулти хӗрарӑм кӑҫалхи ака уйӑхӗнче хӑйӗн хӗр-тусӗ патӗнче хӑналаннӑ. Кил хуҫи ҫывӑрса кайсан автомобиль ҫӑрин уҫҫине илсе ҫула тухнӑ. Хӑйӗн вара водитель прави те пулман. Ҫӗмӗрле тӑрӑх ярӑнса ҫӳренӗ хыҫҫӑн хӑна машинӑна вырӑна пырса лартма тӑнӑ. Ҫавӑн чухне тепӗр автомобиль ҫине пырса кӗнӗ.
26-ри хӗрарӑма суд тӗрмене хупмасӑр ҫулталӑклӑха ирӗкрен хӑтарма, ют пурлӑха сиенлетнӗшӗн 60 пине яхӑн тенкӗ тӳлеттерме йышӑннӑ.
Ҫӗрпӳ хулипе Пӑрачкав ялӗ Пӗтӗм Раҫҫейре хулара хӑтлӑх кӗртес енӗпе хатӗрленӗ проектсен конкурсӗнче ҫӗнтерӳҫӗ пулнӑ. Ҫапла вӗсем 70-шер миллион тенкӗ ҫӗнсе илнӗ.
Ку укҫапа Ҫӗрпӳре хулан кивӗ пайӗнче вырнаҫнӑ ача пахчине тата ун ҫывӑхӗнчи урамсене хӑтлӑлатӗҫ. Пӑрачкавра вара Коопераци урамне илем кӗртӗҫ. Унта культурӑпа архитектура еткерлӗхӗн объекчӗсем нумай. Вӗсен ку ӗҫсене 2023–2024 ҫулсенче тумалла.
Палӑртмалла: ытти ҫулсенче ку конкурсра Канаш, Сӗнтӗрвӑрри, Етӗрне, Улатӑр, Ҫӗмӗрле хулисем ҫӗнтернӗ. Кӑҫал конкурса 75 регионтан 280 заявка килнӗ. 160 проект ҫӗнтернӗ.
Шупашкар хулинче пӗр хӗрарӑм ют ҫын ачине илсе кайнӑ. Шӑпӑрлан хулари кӳлмекре кӳмере выртнӑ.
Пӑтӑрмах ҫурла уйӑхӗн 17-мӗшӗнче 16 сехетре пулса иртнӗ. Симӗс тӗслӗ кӳмери ача ҫухални пирки полицие пӗлтернӗ. Пӑтӑрмах вырӑнне ҫывӑхри полици нарячӗсем пырса ҫитнӗ. Вӗсем видеокамерӑсене пӑхнӑ та симӗс кӳмеллӗ хӗрарӑма Ярославль урамӗнче асӑрханӑ. Кам ачине тӗксе пынине хӗрарӑм ӑнлантарса парайман — вӑл вил ӳсӗр пулнӑ.
Пӗчӗк арҫын ачана больницӑна илсе кайнӑ. Тепӗр сехетрен ача амӑшӗ те тупӑннӑ.
Ҫӗмӗрлере пурӑнакан 31 ҫулти хӗрарӑм йӗрке хуралҫисене ӑнлантарса панӑ тӑрӑх, 11 уйӑхри ывӑлне кӳмере ӳсӗр хӗрарӑмпа, хӑйӗн тусӗпе, хӑварнӑ. Аслӑ хӗрӗпе амӑшӗ аттракционсем патне кайнӑ. Телефон кӳмере пулнӑ. Амӑшӗ кайран пӑхать те — кӳме те, ача та ҫук. Вара вӑл ҫынсене полицие шӑнкӑравлама ыйтнӑ.
Икӗ хӗрарӑма та — ача амӑшне те, унӑн тусне те — административлӑ майпа явап тыттарма йышӑннӑ.
Ҫӗмӗрле хулинче 23 ҫулхи ҫамрӑк 15 ҫулхи ачаран укҫа тапӑннӑ.
Кӑҫалхи ҫу уйӑхӗн 31-мӗшӗнче 23 сехет тӗлӗнче Ҫӗмӗрлери ҫуртсенчен пӗрин картишӗнче ӳсӗр ҫамрӑк хӑй паллакан 15 ҫулти яша пуҫӗнчен 3 хутчен ҫапнӑ, унтан вӑл унран 10 пин тенкӗ укҫа ыйтнӑ, памасан хӗнессипе хӑратнӑ.
Хӑраса ӳкнӗ яш укҫа пама шантарнӑ, анчах «кӗмӗл» килте тесе каланӑ, илсе тухма пулнӑ. Яш пурӑнакан кил патне ӳсӗр ҫамрӑк пӗрле кайнӑ. Унтан яш тарса пытаннӑ та йӗрке хуралҫисене чӗнсе илнӗ.
Пуҫтах ҫамрӑка суд 3 ҫуллӑха тӗрмене хупмасӑр ирӗкрен хӑтама йышӑннӑ.
Чӑваш халӑх сайтӗнче тин кӑна Канаш районӗнче пӗвере арҫын путса вилни пирки пӗлтернӗччӗ. Паян республикӑра каллех инкек пулнӑ. Ҫӗмӗрлере пӗвере 37 ҫулти арҫын виллине тупнӑ.
Малтанлӑха пӗлтернӗ тӑрӑх, арҫын юраман вырӑнта шыва кӗнӗ.
Инкеклӗ лару-тӑру министерстви пӗлтернӗ тӑрӑх, республикӑра юлашки талӑкра икӗ ҫын шыва путса вилнӗ.
М-12 ҫула тунӑ ҫӗрте ӗҫлекен виҫӗ арҫын темӗнле япалапа наркӑмӑшланнӑ. Вӗсене ӗҫтешӗсем бытовкӑра тупнӑ. Ҫав вӑхӑт тӗлне виҫҫӗшӗ те комӑра пулнӑ.
Ҫӗмӗрлери васкавлӑ медпулӑшу бригади хӑвӑртрах реанимаци мероприятийӗсем тума пуҫланӑ. Хушма медпулӑшу машинисем ҫитиччен икӗ арҫын тӑна кӗнӗ. Вӗсене Ҫӗмӗрлери пульницӑна илсе кайнӑ.
Виҫҫемӗш арҫын тӑна кӗмен-ха, вӑл комӑра. Ӑна та Ҫӗмӗрлери пульницӑна илсе кайнӑ. Тухтӑрсем каланӑ тӑрӑх, унӑн сывлӑхӗ йывӑр.
+7.3 °C