kolosinform.ru сайтри сӑн

Шупашкарта пурӑнакан 42 ҫулти арҫын фермертан какай туянас тенӗ. Ку пӗлтерӗве вӑл мессенджерта асӑрханӑ та сутуҫӑпа ҫыхӑннӑ.

Хайхи арҫын унпа 10 пин тенкӗлӗх какай туянма калаҫса татӑлнӑ та укҫа куҫарса панӑ. Анчах ӑна нимӗнле какай та килсе паман.

Кун хыҫҫӑн арҫын полици уйрӑмне кайса хӑйне улталани пирки каласа кӑтартнӑ. Кун тӗлӗшпе пуҫиле ӗҫ пуҫарнӑ.

cap.ru сӑнӳкерчӗкӗ

Шупашкарта фермерсен ҫӗнӗ мини-пасарӗ уҫӑлнӑ. Вӑл И.Франко урамӗнчи 16-мӗш ҫурт ҫывӑхӗнче вырнаҫнӑ.

Мини-пасарта хӑйсен продукцине сутакан ҫынсене вырӑнпа тӳлевсӗр тивӗҫтереҫҫӗ. Унта 20 сутуҫӑ валли вырӑн пур. Меллӗ пултӑр тесе сумкӑсем лартмалли вырӑнсем пур, ҫумӑр лекесрен тӑррине витнӗ.

Вырӑнти ял хуҫалӑх производителӗсем пасарта сыр, чей, ҫырла, пахча ҫимӗҫ, ешӗл ҫимӗҫ тата ыттине сутаҫҫӗ.

bangkokbook.ru сайтри сӑн

Шупашкарти хӗрарӑм ача ҫуратмалли ҫуртра мар, килтех ҫӑмӑлланма шутланӑ. Ҫапла тухтӑрсем пулӑшмасӑрах ҫут тӗнчене арҫын ача килнӗ.

Пепкене Шупашкарти Ленин районӗн ЗАГС пайӗнче регистрациленӗ. Кун пек чухне кӳнтелен кирлӗ. Ачан ашшӗ-амӑшӗ ӑна илсе килнӗ. Саккунпа килӗшӳллӗн, кӳнтеленӗн ача пульницӑра мар, килте ҫуралнине ӗнентерсе хут ҫырмалла.

letsgophotos.ru сайтри сӑн

Шупашкарта ҫуралнӑ хӗрачана хӑйне евӗр ят панӑ. Ашшӗ-амӑшӗ ӑна Калинин район администрацийӗн ЗАГС пайӗнче регистрациленӗ. Хӗрача Аврелия ятлӑ.

Аврелия – латин чӗлхинчен килнӗ, Юлий Цезарӗн амӑшӗ ҫапла ят пулнӑ. Вӑл «Аврелий» арҫын ятӗнчен пулса кайнӑ, «ылтӑн» тенине пӗлтерет.

ЗАГС ӗҫченӗсем каланӑ тӑрӑх, Калинин районӗнче кунашкал ята юлашки икӗ ҫулта регистрацилемен.

svoiludi.ru сайтри сӑн

Хула кунӗнче, ҫурла уйӑхӗн 20-мӗшӗнче, Шупашкарти Анне палӑкӗ умӗнче «Чечексен балӗ» иртӗ. Вӑл 16 сехетре пуҫланать.

Унта хутшӑнакансем чечекрен тӗрлӗ япала тӑвас енӗпе ӑмӑртӗҫ. Шлепкесем, сумкӑсем, эрешсем… Темпе те тӗлӗнтерӗҫ вӗсем. Йӑлтах – чечекрен: чӗрринчен тата искуственнӑйӗнчен, типӗтнинчен…

Конкурса ҫав кунах пӗтӗмлетӗҫ. Заявкӑсене вара ыранччен, ҫурла уйӑхӗн 16-мӗшӗччен, йышӑнаҫҫӗ.

Сӑмах май, ҫав вырӑнта кӑҫал ҫулла тӑршшӗпех «Чечексен фестивалӗ» ӗҫлет.

forum.na-svyazi.ru сайтри сӑн

Чӑваш Енри ҫамрӑк ӳнерҫӗ Василий Чапай троллейбус ҫине чӑваш хӗрӗн сӑнарне, Анне палӑкне ӳкерни пирки хыпарланӑччӗ.

Ҫак троллейбус ҫурла уйӑхӗн 20-мӗшӗнче, Шупашкарӑн ҫуралнӑ кунӗнче, ҫула тухӗ. Вӑл 1-мӗш маршрутпа 9 сехет те 2 минутран пуҫласа 19 сехет те 48 минутчен ҫӳрӗ.

Хӑйне евӗр илемлӗ троллейбус ӑҫта ҫитнине «Ӑслӑ транспорт» сарӑмра та сӑнама пулать. Унта ӑна «976 Нарспи» тесе паллӑ тӑвӗҫ.

Ҫавӑн пекех Хула кунӗнче ретро-троллейбус ҫула тухӗ. Унпа 9 сехет те 6 минутран пуҫласа 16 сехет те 57 минутчен ярӑнма май пур. Вӑл ҫав маршрутпах ҫӳрӗ.

Вера Иванова сӑнӳкерчӗкӗ

Шупашкарта кинемейсем спектакльсем лартаҫҫӗ. Хальхинче вӗсем ачасене «Кушак аҫипе тилӗ» юмах кӑтартса панӑ. Юмахра Кушак аҫин рольне калӑпланӑ 74 ҫулти Римма Игнатьева: «Хальхинче питӗ тимлӗ итлекен куракансем пулчӗҫ», — тесе ырланӑ шӑпӑрлансене.

Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центра ҫӳрекен ватӑсем «Ретрогварди» проекта хутшӑннӑ май Пукане, Мода, Пантомима тата Драма театрӗсенче выляҫҫӗ. Центрта ӗнентернӗ тӑрӑх, ваттисем лартнӑ спектакльсене тӗрлӗ ҫулхи куракансем кӑмӑлтан йышӑнаҫҫӗ.

forum.na-svyazi.ru порталтан илнӗ сӑнӳкерчӗк

Чӑваш Енӗн Правительствин кивӗ ҫуртне юсаса ҫӗнетӗҫ. Ку ӗҫе 2025 ҫул тӗлне пурнӑҫлама палӑртаҫҫӗ. Ҫакӑн пирки республикӑн строительство министрӗ Павел Данилов «Правде ПФО» тӗнче тетелӗнчи хаҫата пӗлтернӗ.

Ҫав ҫурт 10 ҫул пушӑ ларать. Ҫуркунне юсав ӗҫӗсем пуҫланнӑ. Асӑннӑ ҫурт, сӑмах май калсан, федераци пӗлтерӗшӗллӗ культура эткерлӗхӗ шуитланать.

Павел Данилов пӗлтернӗ тӑрӑх, паянхи куна ӗҫсене 430 миллион тенкӗлӗх туса ирттернӗ. Чӳк уйӑхӗнче шалти ӗҫсене кӳлӗнмелле. Реконструкцие 2025 ҫулта вӗҫлесшӗн.

tambov-news.net сайтри сӑн

Шупашкар арҫынни машинӑпа питӗ пысӑк хӑвӑртлӑхпа ҫӳреме юратнӑ. Куншӑн унӑн 200 ытла штраф пухӑннӑ. Пӗтӗмпе - 126 пин тенкӗлӗх.

Арҫынна штрафсене 5 кун хушшинче тӳлесе татмалли пирки асӑрхаттарнӑ. Ҫавӑн пекех ӑна Раҫҫейрен тухма чарассине, транспорт рулӗ умне лармалли ирӗке чикӗлессине каланӑ. Анчах арҫын хӑнк та туман. Вӑл каланӑ тӑрӑх, руль умӗнче урӑх ҫын ларнӑ.

Юлашкинчен приставсем машинӑна арестленӗ, ӑна сутма тӑратнӑ. Укҫипе вара штраф парамӗсене татнӑ.

Шупашкар хулинчи халӑхӑн соцаллӑ ыйтӑвӗсене тивӗҫтерекен центрта ҫул ҫитмен амӑшӗсене тата амӑшӗ пулма хатӗрленекен ҫамрӑк хӗрсене пулӑшаҫҫӗ. Унта нумаях пулмасть унта «Маленькая мама» (чӑв. Пӗчӗк амӑшӗ) проект ӗҫлеме пуҫланӑ.

Ҫак эрнере учрежденире «Никама та памастӑп» тӗлпулу-диалог иртнӗ. Унта ҫул ҫитмен амӑшӗсемпе вӗсен ҫывӑх ҫыннисене йыхравланӑ.

Центрта Ҫул ҫитмен амӑшӗсене социаллӑ пурнӑҫ тата психологи енчен пулӑшакан служба та ӗҫлет.

Тӗплӗнрех ыйтса пӗлмелли телефон номерӗ +78352534294.