Паян Атӑл леш енче санатори ҫывӑхӗнче икӗ каччӑ ҫухалнӑ. Кун пирки «Про Город» хаҫата халӑх корреспонденчӗ пӗлтернӗ.
Малтанлӑха пӗлтернӗ тӑрӑх, 20 ҫулти икӗ каччӑ шывра путнӑ. Вӗсене пӗр ҫын ҫӑлма тӑрӑшнӑ, анчах май килмен.
Инкек 14 сехет ҫурӑра пулнӑ. Ҫав вӑхӑтра ҫил вӑйланнӑ, пысӑк хумсем тухнӑ. Унта пулнӑ ҫынсем икӗ каччӑна хум хупланине, ун хыҫҫӑн вӗсем ишсе тухайманнине курнӑ. Вырӑна полицейскисем, тухтӑрсем, ҫӑлавҫӑсем килнӗ.
Шупашкарти Калинин районӗн квартал уполномоченнӑйӗ ҫӗртме уйӑхӗн 11-мӗшӗнче чикансен тапӑрӗ пурӑнакан вырӑна тӗрӗсленӗ. Вӑл Алькеш поселокӗнчи Аялти иккӗмӗш тата Пионерсен иккӗмӗш урамӗсенче пулнӑ.
Тӗрӗслев вӑхӑтӗнче ҫакӑ палӑрнӑ: чикансем никамран ирӗк ыйтмасӑр, документсемсӗр ҫурт тума тытӑннӑ. Уполномоченнӑй тапӑрти аслӑ ҫынпа калаҫнӑ, ҫак объекта тума юраманни пирки, пурӑнакан вырӑна ҫӳп-ҫапран тасатмаллине ӑнлантарнӑ.
Уполномоченнӑй ку информацие, ҫырнӑ протокола, полицие панӑ.
Красноярск крайӗнчи йӗрке хуралҫисем Чӑваш Енре 16 ҫулти каччӑна тытса чарнӑ. Вӑл порнографи материалӗсене сарнӑ тесе шутлаҫҫӗ. Материалсем ҫинче вара Красноярск крайӗнчи 12 ҫулти хӗрача пулнӑ.
Каччӑ каҫал кӑрлач уйӑхӗнче ҫак хӗрачана порнографи содержаниллӗ сӑнсем, видеосем ӳкерсе яма ӳкӗте кӗртнӗ. Вӗсене илсен вара хӗрачан пӗлӗшӗсем патне тӗнче тетелӗ урлӑ ярса панӑ.
Ҫу уйӑхӗнче ҫак каччӑна йӗрке хуралҫисем тытса чарнӑ. Ун тӗлӗшпе пуҫиле ӗҫ пуҫарнӑ.
Мускав облаҫӗнче пурӑнакан 33 ҫулти арҫынна пӑшал тата ҫар припасӗсем упранӑшӑн суд тӑвӗҫ. Ҫак арҫын М-12 ҫула тунӑ ҫӗрте, Йӗпреҫ округӗнче, ӗҫленӗ. Шӑпах ҫавӑн чухне, хӑй ӑнлантарнӑ тӑрӑх, вӑл пӑшалпа ҫар припасӗсене тупнӑ. Ун чухне вӗсем ҫӗр чавнӑ.
Алӑпа тунӑ пӑшал тата ҫар припасӗсем хутаҫра пулнӑ.
Кӑҫал пуш уйӑхӗнче ҫак арҫынна Канашра полицейскисем чарнӑ. Тӗрӗсленӗ чухне шӑпах ҫав хутаҫа тупнӑ вӗсем. Арҫын тӗлӗшпе пуҫарнӑ пуҫиле ӗҫе кӗҫех суд пӑхса тухӗ.
Кӗҫех суту-илӳ центрӗсенче полицейскисем тӑма пуҫлӗҫ. Анчах чӑн-чӑннисем мар, картонран тунисем.
Вӗсен аллинче информаци листовки пулӗ. Унта ҫынсене ултавҫӑсенчен мӗнле хӳтӗленмелли пирки ҫырса кӑтартнӑ.
Ҫак «полици лейтенанчӗсем» йӗрке хуралҫисем тата банк ӗҫченӗсем нихӑҫан та мессенджер урлӑ шӑнкӑравламаннине, укҫана хӑрушсӑр счет ҫине куҫарма ыйтманнине аса илтерӗҫ. Палламан ҫын шӑнкӑравласан унпа калаҫмалла мар, телефона сӳнтермелле.
Муркаш тӑрӑхӗнчи Хорнуй ялӗнчи 70 ҫулти арҫын ҫула кӗскетсе вӑрман урлӑ тухма хӑтланнӑ. Анчах ҫухалса кайнӑ.
Ку хыпар полицие ака уйӑхӗн 26-мӗшӗнче ҫур ҫӗр иртни 2 сехетре ҫитнӗ. Ватӑ арҫын каланӑ тӑрӑх, вӑл каҫхине Шупашкартан Ивановка таран автобуспа ҫитнӗ, киле вӑрман урлӑ кайма тухнӑ. Ҫухалса кайсан ҫумӑр айне лекнӗ, шӑнса кӳтнӗ.
Алексей Илларионов аслӑ инспектор ертсе пыракан экипаж вырӑна тухнӑ. Инспектор арҫын патне шӑнкӑравласа вӑл ӑҫта пулнине ӑнланма хӑтланнӑ, телевышка патне утма ыйтнӑ. Унтан полицейски машинӑн ҫутӑ тата сасӑ сигналӗсене ҫутнӑ. Арҫын ҫапла тухнӑ. Йӗрке хуралҫисем ӑна киле леҫсе янӑ.
Ака уйӑхӗн 11-мӗшӗнче Шупашкарти 9-мӗш Пилӗкҫуллӑх проспектӗнчи ҫуртра, 17-мӗш хутра, каччӑ балкон урлӑ каҫса аялалла сикме тӑнӑ. Ҫакна ҫынсем асӑрханӑ та часрах полицие шӑнкӑравланӑ.
Вырӑна Максим Родионов старшина тата Никита Черноносов сержант ҫитнӗ. Пӗри аялта юлнӑ, каччӑпа громкоговорительпе калаҫнӑ. Тепри 17-мӗш хута хӑпарнӑ та меллӗ самант тупса 20 ҫулти каччӑна балкон ҫинчен сӗтӗрсе антарнӑ.
Техникумра вӗренекен ҫак студента тухтӑрсен аллине панӑ.
Банк менеджерӗ Алексей Воробьев пуш уйӑхӗн 12-мӗшӗнче 300 пин тенкӗ кредит илнӗ арҫын питӗ хумханнине асӑрханӑ та унпа пырса калаҫма шутланӑ.
Ҫакӑ палӑрнӑ: Ҫӗрпӳ округӗнче пурӑнакан 31 ҫулти арҫынна ултавҫӑсем кредит илсе темӗнле счет ҫине куҫарма ыйтнӑ иккен. Хайхискер банк менеджерӗпе калаҫсан палламан ҫынсем хӑйне улталанине ӑнланнӑ. Кун хыҫҫӑн вӑл полицие кайнӑ. Кун тӗлӗшпе пуҫиле ӗҫ пуҫарнӑ.
Ҫак кунсенче полицейскисем Алексей Воробьева тав ҫырӑвӗпе чысланӑ.
Тутарстанра, Чӑваш Ен чиккинчен 42 ҫухрӑмра, ҫул-йӗр инспекторӗсем минивэна чарса салона пӑхма шутланӑ. Багажникре вӗсем 6 заряд взрывчатка (кашни 400-шер грамм) тупнӑ. Хыҫалти ларкӑч айӗнче тепӗр 16 взрывчатка пулнӑ. Руль умӗнче вара 64 ҫулти арҫын ларнӑ. Вӑл Мускавран киле Хабаровска кайма тухнӑ. Взрывчаткӑсем ӑҫтан тупӑннӑ? Арҫын ӑнлантарайман.
Ун тӗлӗшпе пуҫиле ӗҫ пуҫарнӑ. Куншӑн 6-8 ҫул таран тӗрмене хупма пултараҫҫӗ.
Шупашкарти Лукин урамӗнчи ҫуртра велосипед ҫухалнӑ. Вӑл тамбурта тӑнӑ. Хуҫисем урама тухса ӑна шыранӑ, анчах тупайман. Ирӗксӗрех полицие кайма тивнӗ.
20 пин тенкӗ тӑракан велосипеда шырама полици прапорщикӗ Иван Сурнаев служба йыттипе, нимӗҫ овчаркипе Зверьпе ҫитнӗ. Йытӑ вӑрӑ йӗрӗ ҫине ӳкнӗ. Ун тӑрӑх кайса вӑл велосипепеда лартса хӑварнӑ вырӑна илсе ҫитернӗ. Икӗ кустӑрмаллӑ транспорта хуҫине тавӑрса панӑ.
+4.3 °C