Лаша


1

Лаша çинчен-ха ман сăмахăм,

Ытла та савăк мар юмахăм.

Тӳрех калам-ха, халь, кутемĕн

Лаша ютланчĕ мар-и темĕн.

Ут-урхамах вăл чун йăпатмăш

Хресченшĕн, чăн юлташ-юнтармăш.

Ялта, лаша, чĕр туртăм тетпĕр,

Каларăша пурте пĕлетпĕр.

Лаша тени кĕç кĕрĕ акă

Леш, «Хĕрлĕ кĕнеке» ăшне.

Хытах шухăшлаттарĕ çакă

Ыраттарса хресчен чунне.

Мана та çак сăнар пит çывăх,

Урхамаха манни вăл çылăх.

Ах, шур çилхеллĕ урхамах!

Калам-ха ун пирки сăмах…

Лашаллă çын — чунпа çунатлă,

Пурнать вăл пурнăçра ынатлă.

Лаша кӳлесчĕ çур та, кĕр те,

Лашапала пырать ĕç-хĕл те.

 

2

Ут, çилçунат та урхамах,

Юмахсенчи вĕçен уртмах.

Мĕн чухлĕ ят янаварта!

Килсе кĕрет аса вăртах.

Ачалăхри чĕвен Сатур,

Асрах-ха юлнă çав маттур.

Çилпе вăшăлтатан çилхи,

Тĕпĕртетсе чупан тихи.

Кайсассăн аслă Тӳреме1

Епле хавасчĕ çӳреме

Тулли лавпа е пушăлла.

«Лаша та чун, ан пушăла

Унпа этем пек пулмасан,

Ĕçӳ те ăнмĕ тусăм сан».

Теен Йынкка тете кулли,

Халь питĕ аякка юлни

Килет çаплах-ха асăма

Çав ырă вĕрентӳ сăмах.

Кун каçипе, сĕм çитиччен

Эпир уйра — çу каçиччен.

Хĕрӳ ĕçре чунпа çуталнă.

Пирте атте-анне çуратнă

Çак кăмăла мĕн ачаран,

Епле-ха халь ăна чаран?

Ыр туйăма, юратăва,

Чун-чĕрери ыратăва

Тĕрлетĕп шурă хут çине.

Ăна, лаша кĕçеннине,

Тăпăртатса чĕвĕннине,

Манаймăп эпĕ ĕмĕрне

Чунри ачалăхăм хĕмне.

 
1 Аслă Тӳрем — Курнавăш хирĕнчи вырăн ячĕ

Çавăн пекех пăхăр

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... »
Хаклав:
Шухăшĕ:
Чĕлхе илемлĕхĕ:
Содержанийĕ: