Хунар

Хунарсем

Кĕçех хула ыйăха путрĕ

Çутă хыççăн çутă сӳнсе;

Хуралçă Уйăх хунарне çутрĕ

Çăлтăрсене вăййа чĕнсе.

Çӳл тӳпере те Çĕр çинче

Çунаççĕ хунарсем ирччен,

Сăпка юрри юрлать тĕнче…

Пĕр эпĕ çеç çак каç пĕччен.

Çуллахи шăплăха хăратнă

Такси çунат хушса вĕçет,

Чунра аса илӳ вăратрĕ,

Куçне çаплах пĕрмай хĕсет.

Ним ăнланмасăрах утатăп —

Асамĕ йышлă ку тĕнчен.

Юлташ пулса юлма ыйтатăп

Хунарсене çутăличчен.