Чӑваш Республикипе ӗҫлекен Россельхознадзор управленийӗ хыпарланӑ тӑрӑх, «Центр» ТМЯП ӗҫӗнче кӑлтӑксем тупнӑ.
Аса илтеретпӗр, нарӑсӑн 4-мӗшӗнче Кӳкеҫ лицейӗнче ачасем наркӑмӑшланнӑ: пӗрине пульницӑна хунӑ, ултӑ ачан килте сипленме тивнӗ. Лицейри ачасене вӗри апатпа «Центр» ТМЯП тивӗҫтерни паллӑ.
Ҫакӑн хыҫҫӑн тӗрӗслев органӗсем хӑйӗн ӗҫне пуҫӑннӑ. Чӑваш Республикипе ӗҫлекен Россельхознадзор управленийӗ «Меркурий» ФГУП урлӑ иртекен электронлӑ хутсене тӗрӗсленӗ те 2025 ҫулхи кӑрлачӑн 13-мӗшпе 20-мӗшӗнче Кӳкеҫри лицея 177 килограмм аш кӳрсе килнине (ӑна Комсомольски тӑрӑхӗнчи Зарифзянов И.Р. фермер хуҫалӑхӗнче туса илнӗ, Соловьев Н.М. усламҫӑ тирпейленӗ) асӑрханӑ. Ку аша «Proteus йӑхӗнчи бактерисем» кӑтарту тӗлӗшӗнчен тӗрӗслемен иккен.
Ҫапла май, апат-ҫимӗҫпе тивӗҫтерекен «Апат-ҫимӗҫ продукцийӗн хӑрушсӑрлӑхӗ» техника регламенчӗ ыйтнине пурнӑҫламан. Ҫакӑншӑн айӑплисен явап тытма тивӗ.
Кӳкеҫри лицейра ачасем наркӑмӑшланнӑ. Ку нарӑс уйӑхӗн 4-мӗшӗнче пулнӑ.
ЧР Сывлӑх сыхлавӗн министерстви пӗлтернӗ тӑрӑх, нарӑсан 5-мӗшӗ тӗлне 7 ача тухтӑрсенчен пулӑшу ыйтнӑ. Вӗсенчен улттӑшӗ килте сипленет, пӗрине инфекци уйрӑмне вырттарнӑ.
РФ Следстви комитечӗн Чӑваш Енри следстви органӗсем ку тӗслӗх тӗлӗшпе следстви умӗнхи тӗрӗслев ирттереҫҫӗ.
Кӑрлач йӑхӗн 31-мӗшӗнче Чӑваш тӗррин музейӗнче Анастасия Андреева тӗрӗҫе асра тытса «Вышивка длиною в жизнь» (чӑв. Ӗмӗре пына тӗрӗ) курав уҫӑлӗ.
Анастасия Андреева «Паха тӗрӗ» фирмӑра ӗҫлесе ӗмӗрленӗ. 2021 ҫулта вӑл Шупашкар районӗн тӗрленӗ карттине хатӗрлеме хутшӑннӑ, тепӗр ҫулхине — Раҫҫейӗн тӗрленӗ карттине.
«Пӗлтӗр эпир Анастасия Васильевнӑпа унӑн 65 ҫулхине халалланӑ курава уҫассине сӳтсе явма тытӑннӑччӗ. Анчах вӑл пурнӑҫран пӗлтӗрхи раштав уйӑхӗн 15-мӗшӗнче уйрӑлса кайрӗ», – каласа кӑтартнӑ Чӑваш тӗррин музейӗн заведующийӗ Надежда Сельверстрова.
Кӳкеҫпе Явӑш хушшинчи М-7 ҫулӑн сыпӑкне 2025 ҫулта реконструкци тума пуҫласси пирки ЧР Транспорт министерстви пӗлтӗр пӗлтернӗччӗ. Унта развязка тата 4 полоса пулмалла.
«Контактра» халӑх тетелӗнчи Росавтодорӑн ушкӑнӗнче пост айӗнче кун пирки ыйту пулнӑ. Ҫапларах хуравланӑ: М-7 ҫулӑн 642-659 ҫухрӑмӗсене 2029-2033 ҫулсенче реконструкцилеме пӑхса хӑварнӑ.
Сӑмах май, ҫак ҫул сыпӑкӗн реконструкци проектне 2019 ҫулта саккас панӑ, ӑна ырласа ҫирӗплетнӗ.
Кӳкеҫри сусӑр ачасен интернат шкулӗнче ике педагог ачана пусахласах сулахай алӑран сылтӑм алӑпа ҫырма вӗрентнӗ. Ку видеокамера ҫине лекнӗ.
Педагог ачана пӑвнӑ, аллине ҫатӑрласа тытса вӑйпах парта ҫумне пӑчӑртанӑ. Хӑш-пӗр ҫӗре тепӗр вӗрентекен те хутшӑннӑ.
ЧР Вӗренӳ министерстви ку тӗслех тӗлӗшпе комментари панӑ. Икӗ педагога та ӗҫрен кӑларнӑ. Вӗсене явап тыттарасшӑн.
Палӑртмалла: ку пӑтӑрмах пуличчен шкулта вӗрентекенсемпе «профессире ҫунса кайни» пирки калаҫу пулнӑ.
Ӗнер, раштав уйӑхӗн 22-мӗшӗнче, Чӑваш Ене Раҫҫейӗн транспорт министрӗ Роман Старовойт килнӗ. Республика Элтеперӗпе Олег Николаевпа вӑл республикӑра транспорт тытӑмне лайӑхлатас ыйтӑва сӳтсе явнӑ.
Республика ертӳҫи Телеграмри хӑйӗн каналӗнче пӗлтернӗ тӑрӑх, «М-7» ҫулӑн Явӑшран пуҫласа Кӳкеҫ патне ҫитичченхи участокне юсаса ҫӗнетес ыйту тӗп темӑсенчен пӗри пулнӑ. Проектпа смета документацине Раҫҫейӗн Тӗп патшалӑх экспертизи ырланӑ. Олег Николаев проекта 2030 ҫулчченхи ултӑ ҫулчченхи плана кӗртессе шанать.
Федераци министрӗпе «Шупашкар – Сурски» ҫула сарас ыйӑва та сӳтсе явнӑ.
Тепӗр ыйту «М-12» ҫула тунӑ чухне усӑ курна ҫулсене юсаса ҫӗнетесси пулнӑ.
Чӑваш Республикин культурӑн тава тивӗҫлӗ ӗҫченӗ Анастасия Андреева куҫне ӗмӗрлӗхе хупнӑ. Вӑл «Паха тӗре» фабрикӑра тӗп художник пулнӑ.
Халӑх ӳнер промыслисен ӑсти хӑйӗн пурнӑҫне 41 ҫул ытла ӳнер ӗҫне тата чӑваш халӑхӗн культура еткерлӗхне упраса хӑварассине халалланӑ. Вал 1977 ҫулта Алкешри «Паха тӗрӗ» фабрикӑра ӗҫлеме тытӑннӑ, унта алшӑллисенчен пуҫласа наци костюмӗсем таранах илемлетсе наци сӑнӗ кӗртнӗ.
Анастасия Васильевнӑпа ыран, раштав уйӑхӗн 17-мӗшӗнче, 10 сехетре Кӳкеҫри чиркӳре сывпуллашӗҫ.
Паян, раштав уйӑхӗн 4-мӗшӗнче, Кӳкеҫри культура ҫуртӗнче К.В. Иванов ячӗллӗ Чӑваш патшалӑх академи драма театрӗ «Чунӑм, Лиза-Акулина» спектакль кӑтартнӑ.
Аса илтерер: асӑннӑ ӗҫе Александр Пушкинӑн «Барышня-крестьянка» пьеси тӑрӑх хатӗрленӗ. Романтикӑлла камите лартассипе Светлана Зверева художник, Чӑваш Енӗн ӳнер тава тивӗҫлӗ ӗҫченӗ Андрей Галкин композитор, Чӑваш Республикин культура тава тивӗҫлӗ ӗҫченӗ Зоя Александрова хореограф ӗҫленӗ. Спектаклӗн режиссёрӗ — Наталия Сергеева. Спектакль валли Пушкин хайлавне Лидия Филиппова чӑвашла куҫарнӑ.
Кӳкеҫри ача-пӑча интернат шкулӗнче ӑс пухакан Владислав Разводов вӗтӗ шӑрҫапа чӑваш ялавне тӗрленӗ. Вӑл ку ӗҫпе темиҫе ҫул ӗнтӗ аппаланать.
Владислав куравсемпе конкурссене хутшӑнать, ытти ӑстапа опытпа пайланать. «Ку ӗҫ интереслӗ кӑна мар, ун валли тимлӗх, чӑтӑмлӑх нумай кирлӗ. Мана хамӑн алӑпа мӗнле те пулин хӑйне евӗр япала тума, чӑваш тӗррин историпе йӑли-йӗркине пуҫӗпех путма килӗшет», – тенӗ ӑста арҫын ача.
Шупашкар округӗнчи Кӳкеҫре пурӑнакан Валериан Лаврентьевичпа Римма Михайловна Лаврентьевсем ылтӑн туя, паллӑ тунӑ. Вӗсем пӗрлешнӗренпе 50 ҫул ҫитнӗ.
Мӑшӑр ачасем ҫуратса ӳстернӗ, халӗ мӑнукӗсемпе савӑрса пурӑнаҫҫӗ, вӗсене пӑхма пулӑшаҫҫӗ.
-10.7 °C