Шупашкар районӗнчи Вӑрманкасси ялӗнче пурӑнакан Селедкинсем пирки Пӗрремӗш каналпа каласа кӑтартнӑ.
Ҫак ҫемье кашни ҫулах Ҫӗнӗ ҫул умӗн хӑйсен кил-ҫуртне тӗлӗнсе каймалла илемлӗ капӑрлатать иккен. Тата тӗрӗсрех каласан, 12 ҫул ҫапла тӑвать-мӗн. Тӗрле кӳлепе ӑсталама та юратать ҫемье.
Раштав уйӑхӗн 29-мӗшӗнче ку ҫемье ҫинчен Пӗрремӗш канал сюжет кӑтартнӑ.
Кил хуҫи, электрик пулса ӗҫлекен Александр, кашни ҫулах ҫак вӑхӑтра виҫӗ эрнелӗх отпуск илет. Мӑшӑрӗпе пӗр шухӑшлӑ пулса вӗсем кил-ҫурта капӑрлатаҫҫӗ. Кӑҫал 600 метр гирлянда кирлӗ пулнӑ.
| ЧӲК | 24 |
Чӳкӗн 28-мӗшӗнче Чӑваш патшалӑх гуманитари ӑслӑлӑхӗсен институтӗнче «Хальхи информаци обществинчи чӑваш чӗлхи тата пуплев культури» ятпа регионсем хушшинчи ӑслӑлӑхпа ӗҫлӗх конференцийӗ иртӗ. Мероприятие Петӗр Яккусен чӑваш чӗлхи тӗпчевҫи, сӑвӑҫ тата тӑлмач ҫуралнӑранпа 75 ҫул ҫитнӗ тӗле йӗркеленӗ.
Конференцийӗн тепӗр пайне пирӗн «Чӑваш халӑх сайчӗ» кӑҫал 20 ҫул тултарнине халалланӑ. Аса илтеретпӗр, унӑн ҫуралнӑ кунӗ 2005 ҫулхи авӑнӑн 7-мӗшӗ шутланать. Унтанпа ҫирӗм ҫул иртрӗ. Хальхи вӑхӑтра сайт чӑвашла тата ытти чӗлхесемпе тухакан массӑллӑ информаци хатӗрӗ пек ӗҫлет. Унсӑр пуҫне «Чӑваш халӑх сайтӗнчен» уйрӑлса тухса Чӑваш чӗлхи лабораторийӗ аталанать, вӑл чӑваш чӗлхипе хальхи вӑхӑтра усӑ курассине ҫӑмӑллатма тӑрӑшать.
Конференцие кӳршӗллӗ республикӑри ҫынсем килме палӑртнӑ, вӗсем хӑйсен опычӗпе паллаштарӗҫ. «Медиауҫлӑхри чӑваш чӗлхи» пайра цифра тапхӑрӗнче чӗлхепе ҫыхӑннӑ ыйтусене сӳтсе явӗҫ.
Чӑваш наци телерадиокомпанийӗ валли тинех директор тупнӑ. Ку должноҫе Татьяна Молокова йышӑннӑ. Хушӑва паян республика премьерӗ Сергей Артамонов алӑ пуснӑ.
Татьяна Кирилловна – 51 ҫулта. Вӑл И.Н.Ульянов ячӗллӗ ЧПУн филологи факультетне пӗтернӗ. Журналист карьерине 1996 ҫулта «Чувашское агентство сообщений» ЗАОра пуҫланӑ. Кайран «Вырӑнти телевиденире», «Канал 5 плюсра», «Советская Чувашия» хаҫатра ӗҫленӗ. Чӑваш наци телерадиокомпанийӗнче 2012 ҫултанпа ӗҫлет.
Сӑмах май, НТРКн ҫулталӑк ҫурӑ ӗнтӗ директор пулман. Унччен ку должноҫре Алексей Гурьянов ӗҫленӗ. Халӗ вӑл – цифра аталанӑвӗн министрӗн ҫумӗ.
ЧР Экономика аталанӑвӗн министерстви «Советская Чувашия» хаҫат валли тӗп редактор шырама конкурс ирттерессине пӗлтернӗ. Документсене ӗнертен пуҫласа чӳк уйӑхӗн 14-мӗшӗччен йышӑнаҫҫӗ.
Кандидатсен аслӑ пӗлӳ, ертӳҫӗ должноҫӗнче е МИХсенче 5 ҫултан кая мар ӗҫленӗ опыт пулмалла. Вӗсен комисси пайташӗсене акционерлӑ обществӑн аталану программипе паллаштармалла.
Хаҫата 2013 ҫултанпа Владимир Васильев ертсе пынӑ.
«Пуринчен малтан» телеграм-канал пӗлтернӗ тӑрӑх,Ҫӗмӗрле округӗн «Вперед» хаҫачӗн тӗп редакторне сумлӑ ятпа чысланӑ. Анна Аношина Чӑваш Республикин культурӑн тава тивӗҫлӗ ӗҫченӗн ятне тивӗҫнӗ. Хушӑва Чӑваш Республикин Элтеперӗ Олег Николаев алӑ пуснӑ.
Анна Аношкина район хаҫатне 2017 ҫултанпа ертсе пырать. Издательство ӗҫӗнче вӑл 2006 ҫултанпа вӑй хума тытӑннӑ. Хӑйне пултаруллӑ йӗркелӳҫӗ пек кӑтартса Анна Аношкина ертӳҫӗ должноҫӗ таран ҫитнӗ. Сӑмах май, вӑл пӗлтӗр Мускавра Владимир Путин президентӑн пресс-конференцине хутшӑннӑ.
Канашра ҫуралса ӳснӗ Светлана Елисеевӑн сӑнӳкерчӗкӗсем Мускаври хаҫат хуплашки ҫине лекнӗ. Вӑл ҫӗршывӑн тӗп хулинче пурӑнать.
Светлана Мускаври хими ӗнӗпе аслӑ шкул пӗтернӗ хыҫҫӑн хӑйӗн профессийӗпе ӗҫленӗ. Декретра ларнӑ чухне вара сӑнӳкерчӗксемпе кӑсӑкланма пуҫланӑ. Хӗрне, тусӗсене ӳкернӗ, кайран урамри самантсене сӑн тунӑ. Халӗ вӑл Мускав ҫыннисен пурнӑҫӗнчи самантсене сӑн ӳкерет.
Унӑн сӑнӳкерчӗкӗсем Мускаври пӗр хаҫат ӗҫченӗсене питӗ килӗшнӗ, редакци вӗсене пичетлесе кӑларнӑ, ҫав шутра – хуплашка ҫинче те.
Светлана тӑван тӑрӑхне килсех ҫӳрет. Вӑл чӑваш наци туйне сӑн ӳкерме ӗмӗтленет.
Чӑвашсем христос турра ӗненме пуҫлани ҫинчен фильм ӳкересшӗн.
Пирӗн тӑрӑхра пурӑнакансем христос тӗнне йышӑнни пирки фильм ӳкерес ыйтӑва РФ Патшалӑх Думин депутачӗ Анатолий Аксаков «Спас» телеканал ертӳҫипе Борис Корчевниковпа тӗл пулсан сӳтсе явнӑ.
Кино урлӑ чӑвашсем тӗнпе ҫыхӑннӑ йӑла-йӗркене ламран лама парса пынине, ҫавна май тӗн культурӑн пӗр пайӗ пулса тӑнине кӑтартса парасшӑн.
Депутатпа журналист православипе ҫыхӑннӑ пуҫарусене пулӑшассине те сӳтсе явнӑ.
«Раҫҫей 1» телеканалпа пыракан «Привет, Андрей!» кӑларӑмра Сӗнтӗрвӑрри округӗнчи Надежда Пиолипинкӑна кӑтартнӑ. Вӑл Давид Тухмановӑн «Белый танец» юррине шӑрантарнӑ.
Кун хыҫҫӑн Надежда округри «Наше слово» хаҫата иртервью панӑ, кӑларӑмра ӳкерӗнни мӗнле иртни пирки каласа кӑтратнӑ. Сцена валли 5 минут уйӑрса панӑ. Надежда каланӑ тӑрӑх, вӗсене ӑҫта тӑмалли, кадртра хӑйсене мӗнле тытмалли, мӗн каламалли пирки ӑнлантарса панӑ.
Надежда пултарулӑх ушкӑнне юрлама ҫӳрет. Шӑпах ку ӑна камера умӗнче хӑйне лӑпкӑ тытма пулӑшнӑ та.
Пӗрремӗш каналпа кӑтартакан «Непутёвые заметки с Дмитрием Крыловым» телекӑларӑмра хальхинче Чӑваш Енпе паллаштарнӑ. Каларкама ӳкерекенсем Етӗрне, Канаш тӑрӑхӗсенче, Сӗнтӗвӑрринче, «Ясна» этнокомплексра тата ытти хӑш-пӗр вырӑнта пулнӑ.
Кӑларӑма тимлӗ итленисем хӑш-пӗр факт йӑнӑшӗсене асӑрханӑ-ха. Ҫак йӗркесен авторӗ, сӑмах май каласан, туй хыҫҫӑн тӑватӑ кунта ҫӗнӗ мӑшӑр валли чӑвашсем нимелле пӳрт лартса параҫҫӗ тенине илте юлчӗӗ. Хальхи вӑхӑтра ниме, шел пулин те, манӑҫа тухса пырать.
Апла-и, капла-и, федераци телеканалӗпе республикӑмӑр тата чӑваш йӑли-йӗрки ҫинчен каласа кӑтартни паха.
Чӑваш Енри мӗнпур МИХа пер медиахолдинга пӗрлештерӗҫ. Кун пирки паян республикӑн Цифра аталанӑвӗн министерстви влаҫ органӗсен официалла порталӗнче хыпарланӑ.
Республикӑри тата округри МИХсен тӗп редакторӗсене цифра аталанӑвӗн министрӗпе Михаил Степановпа тата Чӑваш Ен Элтеперӗн Администрацийӗн Ертӳҫин ҫумӗпе — Пресс-служба тата протокол управленийӗн пуҫлӑхӗпе Юляи Стрйоковӑпа тӗл пулӑва чӗннӗ.
Унта сӳтсе явнӑ ыйтусенчен пӗри — медиахолдинг туса хурасси. Округри хаҫатсем «Хыпар» издательство ҫурчӗн йышне кӗме пуҫланӑ ӗнтӗ. 2025 ҫулта ку ӗҫ малалла тӑсӑлӗ.
Тӳре-шара шухӑшланӑ тӑрӑх, «бизнес-процессене тата вёртскӑна централизацилени вырӑнсенче паха контент хатӗрлессипе ҫине тӑма» май парӗ. Штата чакармӗҫ.
+25.3 °C