Юпа уйӑхӗн 18-мӗшӗнче Республикӑн кардиологи диспансерӗнче Уҫа алӑксен кунӗ иртнӗ. Ун вӑхӑтӗнче хальхинче 36 ҫынна йышӑннӑ, ҫӑв шутран тӑххӑрӑшӗ республикӑн тӗрлӗ районӗнчен килсе ҫитнӗ.
Уҫа алӑксен кунӗнче кардиологсем 23 пациента йышӑннӑ, ангиохирург — 7 пациента, 18 ҫынна эклектрокардиографи тата ытти комплекслӑ тӗпчев ирттерсех тӗрӗсленӗ.
Йышӑнӑва пынисенчен хӑшӗсен чӗри начар тапнӑ, теприсем чӗрен ревматизмӗпе аптӑранӑ, ытти кӑлтӑка та тупса палӑртнӑ.
Республикӑри «Манӑн ФАП – чи лайӑххи» конкурса пӗтӗмлетнӗ. Чи лайӑх виҫӗ фельдшерпа акушер пунктне палӑртнӑ.
Ку йыша Муркаш округӗнчи Хорнуй ялӗнчи ФАП, Красноармейски округӗнчи Именкассинчи ФАП тата Патӑрьел округӗнчи Ҫӗнӗ Катек ялӗнчи ФАП лекнӗ.
Ҫӗнӗ Катекри ФАП тӗслӗхлӗ пулнине те палӑртнӑ. Унти опытне республикӑри 21 фельдшерпа акушер пункчӗ тӗслӗх вырӑнне хурса ӗҫлеҫҫӗ.
Сӗнтӗрвӑрри районӗнчи ҫул-йӗр хӑрушсӑрлӑхӗн инспекторӗсем япӑх пулса кайнӑ кинемее алӑ ҫинче йӑтса килне ҫитернӗ.
87-ри хӗрарӑм уҫӑлма тесе урама тухнӑ. Кӗҫех каҫ сӗмӗ те ҫапнӑ, вӑл таврӑнман. Амӑшне хӗрӗ шыраса ҫӳренӗ-ха, анчах тупайман, вара вӑл вӑрах тӑхтаса тӑмасӑр йӗрке хуралҫисем патне пулӑшу ыйтса шӑнкӑравланӑ.
Пакунлисем ватӑ ҫынна ҫырмара тупнӑ. Аптӑраса ӳкнӗ кинемей пулӑшу ыйтса чӗнме те хал ҫитереймен.
«Валя кинемей, мӗнле ӗҫсем?» — аякранах сӑмахланнӑ пакунлисем. «Вилетӗп», — тенӗ халсӑрланнӑ ватӑ. «Вилмелле мар. Эпир халӗ сана тупрӑмӑр», — тесе ӑна йӑтса илнӗ те килне илсе кайнӑ. Унтан ватта пульницӑна сипленме ӑсатнӑ.
Туркменистан хӗрӗ Чӑваш Енре аслӑ пӗлӳ илнӗ те кунтах кардиологра ӗҫлеме юлнӑ. Вӑл Ширин Мухаммедова ятлӑ. Хӗр чӑваш чӗлхине те вӗренме тытӑннӑ.
Ширин амӑшӗн ҫулне суйланӑ, пурнӑҫне медицинӑпа ҫыхӑнтарнӑ. Вӑл И. Н. Ульянов ячӗллӗ Чӑваш патшалӑх университетӗнче аслӑ пӗлӳ илнӗ. Ун хыҫҫӑн Республикӑри кардиодиспансера ӗҫе вырнаҫнӑ.
Чӑваш Ен уншӑн иккӗмӗш кил пулса тӑнӑ. «Чи ҫывӑх тусӑм – чӑваш. Ҫапла эпӗ те чӑваш чӗлхине ӑнкарма тытӑнтӑм. Чылайӑшӗ эпӗ туркмен пулнине пӗлмест, чӑваш тесе шухӑшлать», — ҫапла пӗлтернӗ Ширин.
Шупашкар районӗнче, «Шупашкар-Сурски» ҫул ҫинче, виҫӗ автомашина ҫапӑннӑ. Инкекре икӗ ача суранланнӑ, тепӗр иккӗшне сывлӑхне тӗрӗслеме пулницӑна илсе кайнӑ.
«Опель» автомобиль водителӗ хирӗҫ килекен ҫул ҫине тухса кайнӑ та КамАЗпа ҫапӑннӑ. Унтан ҫӑмӑл машина «Форд» ҫине пырса кӗнӗ.
«Опель» машинӑра ларса пынӑ 13-ри хӗрачапа 8-ти арҫын ачана пульницӑна илсе кайнӑ. «Фордри» 3-ри тата ҫулталӑкри ачана та сывлӑх сиплев учрежденине ӑсатнӑ.
Водительсем пурте урах пулнӑ.
Елчӗк тӑрӑхӗнчи Патреккелте пурӑнакан пенсионера санитари авиацийӗпе Шупашкара илсе ҫитернӗ. Ку унӑн пурнӑҫне ҫӑлма пулӑшнӑ.
78 ҫулти арҫын аритмипе аптӑранӑ. Район больницинчи тухтӑрсем ӑна Шупашкара Республикӑри кардиологи диспансерне илсе кайма йышӑну тунӑ.
Пациента вертолетпа Шупашкара пӗр сехетрех илсе ҫитернӗ. Тухтӑрсем каланӑ тӑрӑх, пациента машинӑпа илсе ҫитерме вӑхӑт ытларах кирлӗ пулӗччӗ.
«М-12» ҫулпа пынӑ чухне патшалӑхӑн ҫул-йӗр инспекторӗсем ватӑ ҫынна асӑрханӑ. Ун тӗлӗнче чарӑннӑ та калаҫу пуҫарнӑ. Ватӑ арҫын хӑй ӑҫта кайма тухнине те, ӑҫта пурӑннине те калайман.
Вӗсем хӑйсен базине тишкернӗ те ҫухалса ҫӳрекен арҫын Йӗпреҫре пурӑнакан 78 ҫулти мучи пулнине палӑртнӑ. Вӑл унччен те килӗнчен тухса кайкаланӑ иккен.
Йӗрке хуралҫисем ватӑ ҫынна килне леҫсе хӑварнӑ, ҫывӑх ҫыннисем уншӑн питӗ савӑннӑ.
Ксения Георгиева – икӗ ача амӑшӗ, клиника фармакологӗ, И.Н.Ульянов ячӗллӗ ЧПУ преподавателӗ. Ҫав вӑхӑтрах вӑл ЧР Сывлӑх сыхлавӗн министерстви пулӑшнипе йӗркеленӗ «Георгиева тухтӑрпа сывӑ пул» анлӑ сарӑлнӑ рубрикӑна ертсе пырать.
Хӑйӗн блогӗнче Ксения медицина пирки ансат чӗлхепе ӑнлантарать, медицинӑра сарӑлнӑ халапсене уҫӑмлатать.
Ксения Георгиевӑн проекчӗ Раҫҫейри чи лайӑх 30 медицина блогӗ йышне кӗнӗ. Вӑл Пӗтӗм Раҫҫейри «ШУМ» ҫамрӑксен премийӗн финалисчӗ пулса тӑнӑ. Халӗ сасӑлав пырать – ҫапла чи лайӑххине суйлӗҫ. Ксенийӑна ҫӗнтерме пулӑшӑр! Сасӑлав юпан 18-мӗшӗччен пулӗ.
«Атте тӑнне ҫухатрӗ, хӑрӑлтатма пуҫларӗ!» – юпан 1-мӗшӗнче Шупашкарта васкавлӑ медпулӑшӑва ҫавӑн пек шӑнкӑрав ҫитнӗ. Анестезиологипе реанимаци бригади вырӑна темиҫе минутранах ҫитнӗ.
Ҫав вӑхӑталла пациентӑн клиника вилӗмӗ пулнӑ. Тухтӑрсем унӑн пурнӑҫӗшӗн кӗрешме тытӑннӑ. 20 минутран унӑн чӗрине ӗҫлеттерсе янӑ.
Ӑна пульницӑна илсе кайнӑ чухне те тухтӑрсем лайӑх сӑнаса пынӑ. Унта вӗсене тухтӑрсем кӗтсе тӑнӑ. Ҫапла пациента вилӗм аллинчен туртса илнӗ вӗсем.
Ӗнер, юпа уйӑхӗн 7-мӗшӗнче, хӑй вӑхӑтӗнче Шупашкарти электроаппаратура завочӗн гендиректорӗнче ӗҫленӗ Алексей Ильбеков вилнӗ. Вӑл хӗрӗх ҫулта ҫеҫ пулнӑ.
Мускаври автотранспорт институтӗнче вӗреннӗ. Хӑйӗн карьерине Шупашкарти агргат заводӗнче токарьтен пуҫланӑ. 10 ҫул хушшинче вӑл производство пуҫлӑхне ҫитнӗ. Кайран «Трактор заводчӗсем» концернта, «Сарэкс», «Четра – Промышленные машины» заводсенче ӗҫленӗ. 2021-2023 ҫулсенче вӑл электроаппаратура завочӗн гендиректорӗ пулнӑ. Ытти вырӑнта та пысӑк должноҫсенче тӑрӑшнӑ. Юлашки вӑхӑтра «ВНИИР-Прогресс» обществӑн гендиректорӗн ҫумӗ пулнӑ.
+1.3 °C