Ыран Ҫӗнтерӳ кунне уявланӑ май Шупашкарти «Модӑсен ҫурчӗ», «Наци конгресӗ» тата «Дзержинский» урамӗ чарӑнусем патӗнчен иртсе ҫӳрекен общество транспорчӗ 23 сехет те 59 минутчен ӗҫлӗ. Ҫавӑн пекех муниципалитетчен хушшинчи 101с тата 331 маршрутсем часах ҫӳреме пӑрахмӗҫ.
Ҫавӑн пекех 1, 4 тата 8-мӗш маршрутсем ҫинче троллейбуссем ытарах ҫӳрӗҫ. Уяв мероприятийӗсем вӗҫленнӗ май 61 тата 62-мӗш троллейбуссен пӗр пайӗ маршрутсене улӑштарӗҫ.
Шупашкарта кӑҫал Ҫӗнтерӳ кунне анлӑн паллӑ тӑвӗҫ. Ҫу уйӑхӗн 9-мӗшӗнче ирттерме палӑртнӑ мероприятисен планӗпе паллаштаратпӑр.
10.00–11.20 сехетсенче «Ҫӗнтерӳ» мемориал паркӗнчи Нихӑҫан сӳнмен ҫулӑм патне чечексем хурӗҫ.
11.30–12.00 сехетсенче «Ҫӗнтерӳ эстафети» иртӗ («Ҫӗнтерӳ» мемориал паркӗнчен пуҫласа Хӗрлӗ тӳрем таран).
12:00–13:30 сехетсенче Ленин проспектӗнчен пуҫласа Республика тӳремӗ таран парад пулӗ.
12:30–14:30 сехетсенче «Вилӗмсӗр полк» акци иртӗ (Наци библиотекинчен пуҫласа Хӗрлӗ тӳрем таран).
12:00–14:00 сехетсенче «Ҫӗнтерӳ эстафети» пулӗ: Хӗрлӗ тӳремри сцена ҫине спорт федерацийӗсем тухӗҫ.
14:00–20:00 сехетсенче Хӗрлӗ тӳремре «Ҫӗнтерӳ летопиҫӗ» концерт иртӗ.
16:00–19:30 сехетсенче «Ҫӗнтерӳ майӗ» ретроспектива иртӗ. Ӑна Ленин проспектӗнче, Карл Маркс урамӗнче, Республика тӳремӗнчӗ курма пулать).
20:00–22:00 сехетсенче Хӗрлӗ тӳремре «Эпир астӑватпӑр, эпир мӑнаҫланатпӑр» концерт иртӗ.
Уяв 22:00 сехетре фейерверкпа вӗҫленӗ.
Шупашкарта ҫу уйӑхӗн 9-мӗшӗнче, Ҫӗнтерӳ кунӗнче, Шупашкарта хӑрушсӑрлӑх мерисемпе тивӗҫтерес тесе мобильлӗ ҫыхӑну чӑрмавлӑрах ӗҫлеме пултарӗ. Ҫавӑн пекех хӑш-пӗр ҫӗрте транспорта ҫӳреттермӗҫ.
Аса илтерер: кӑҫал Шупашкарта ҫар техникин парачӗ, «Вилӗмсӗр полк», «Ҫӗнтерӳ ҫуртисем» акцисем иртӗҫ, каҫхине салют пулӗ. Ҫавӑн пекех вӑрҫӑ вӑхӑтӗнчи тумтирӗн «Ҫӗнтерӳ моди» ретро-фестиваль йӗркелӗҫ.
Шупашкарта пурӑнакан 86 ҫулти Людмила Никифорова Мускаври Ҫӗнтерӳ парадне хутшӑнма Мускава кайнӑ.
Людмила Васильевна Ленинград хулинче ҫуралнӑ. Ачан ашшӗ, вӑрҫӑн малтанхи кунӗсенчех фронтра ҫапӑҫнӑскер, 1944 ҫулта вилнӗ, ҫемьене тӑлӑха хӑварнӑ. Людмила амӑшӗ ача садӗнче воспитательте ӗҫленӗ.
1943 ҫулта Ленинградра пурӑнакансене эвакуацилеме тытӑнсан Людмила Васильевнӑна амӑшӗпе пӗрле Чӑваш Енри Шӑмӑршӑна ӑсатнӑ. Ҫемье кунтах юлнӑ.
Людмила Васильевна икӗ ача — ывӑлпа хӗр — пӑхса ӳстернӗ, халӗ унӑн виҫӗ мӑнук пур.
Паян Шупашкар аэропортӗнче ӑна «Победа» авиакомпани Людмила Васильевнӑна ҫывхарса килекен Ҫӗнтерӳ кунӗпе саламланӑ май чечек ҫыххи парнеленӗ.
Аслӑ Ҫӗнтерӳ пулнӑранпа 80 ҫул ҫитнӗ май Чӑваш Енре пурӑнакансемпе кунта килнӗ хӑнасем тӳлевсӗр экскурсие хутшӑнма пултараҫҫӗ.
Ҫу уйӑхӗн 8 тата 9-мӗшӗсенче Шупашкарти тӗп урамсенче тата историре юлнӑ вырӑнсенче ҫуран ҫӳремелли экскурси ирттерӗҫ. Маршрут Шупашкар Арбачӗ, Хӗрлӗ тӳрем, ҫуран каҫмалли ҫутӑ кӗперӗ, «Анне» монумент, Ҫеҫпӗл урамӗ, К .В .Иванов скверӗ тата Мускав ҫыран хӗрри патӗнчен иртӗ. Пӗрремӗш кунхине экскурси 12:00, 18:00 сехетсенче пуҫланӗ. Иккӗмӗш кунхине 12:00 тата 15:00 сехетсенче пухӑнӗҫ. Ушкӑнра 20 ҫын таран пулӗ .
Экскурсие маларах ҫырӑнмалла: заявкӑсене ҫу уйӑхӗн 6-7-мӗшӗсенче йышӑнаҫҫӗ. Ҫак номерсемпе — 8(8352) 23-20-31, 8(8352) 23-20-34 — шӑнкӑравласа тӗплӗнрех ыйтса пӗлме пулать.
Ҫак кунсенче пирӗн ҫӗршыв Аслӑ Ҫӗнтерӗве тунӑранпа 80 ҫул ҫитнине кӗтсе илме хатӗрленет. Шупашкарта та тӗрле шайри тӳре-шара ветерансем патне ҫитсе вӗсене уявпа саламлать, парнепе хавхалантарать.
Хӗрлӗ Чутай районӗнчи Хыркасси ялӗнче 1926 ҫулхи пуш уйӑхӗнче ҫуралнӑ, халӗ Шупашкрата пурӑнакан Иван Петрова та саламланӑ. Ун патне хулари халӑхӑн социаллӑ ыйтӑвӗсене тивӗҫтерекен комплекслӑ центр ӗҫченӗсем пырса ҫитнӗ.
Сӑмах май каласан, унччен Иван Афанасьевич, ытти ветеран евӗрех, Ҫӗнтерӗве халалласа республикӑра пӗр хутчен паракан 20 пин тенкӗ укҫана тивӗҫнӗ тата федераци шайӗнчи 80 пин тенке.
Элӗк, Красноармейски тата Пӑрачкав округӗсенче пӗлтӗр пушар чаҫӗсен виҫӗ ҫӗнӗ постне йӗркеленӗ. Кӑҫал Ҫӗрпӳ округӗнчи Чурачӑк салинче пушар чаҫӗн тата тепӗр уйрӑм посчӗ ӗҫлеме пуҫланӑ. Кун пирки Чӑваш Ен Элтеперӗ Олег Николаев пушар хуралӗн ӗҫченӗсене професси уявӗпе саламлана май палӑртса хӑварнӑ.
«Эпир ҫакӑнпа кӑна чарӑнса тӑма шутламастпӑр, ҫитес виҫӗ ҫулта пушарпа кӗрешекен службӑн тата 8 подразделенине, 42 ирӗклӗ пушар командине йӗркелеме, ҫавӑн пекех республикӑри муниципалитетсенче 7 ҫӗнӗ пушар деповӗ тума палӑртатпӑр», — хыпарланӑ Элтепер.
Чӑваш чӗлхи кунне Калининград облаҫӗнче те уявланӑ. Кун пирки «Пуринчен малтан» телеграм-канал пӗлтерет.
Уяв Полесье районӗнчи Ҫӗнӗ Ялта иртнӗ. Унта хӑнасем тӗрлӗ тӑрӑхран пухӑннӑ. Хӑнасене
вырӑнти тата Мускаври ансамбльсем юрӑ-ташӑпа савӑнтарнӑ. Чӑвашсене Калининград облаҫӗнчи ингушсен, якутсен, бурятсен, тутарсемпе пушкӑртсен тата ытти халӑхсен наци культура автономийӗн представителӗсем уявпа саламланӑ.
Юлашкинчен уявра «Катюша» юрра вырӑсла тата чӑвашла юрланӑ.
Аслӑ Ҫӗнтерӳ пулнӑранпа 80 ҫул ҫитнӗ май Шупашкарта, Сӗнтӗрвӑрринче ҫӗнӗ муралсем ӳкереҫҫӗ.
Сӗнтӗрвӑрринчи Николаев урамӗнчи 87-мӗш «а» ҫурт стени ҫине Ирӗке кӑларнӑ салтак палӑкне ӳкереҫҫӗ. Унӑн оригиналӗ Берлинта вырнаҫнӑ.
Шупашкарта ака уйӑхӗн пуҫламӑшӗнче «Ҫӗр Аннемӗр чӗнет!» палӑка ӳкерме пуҫланӑ. Вӑл Воробьев композиторсен урамӗнчи 5-мӗш ҫурт стени ҫинче пулӗ.
Элӗкри литературӑпа таврапӗлӳлӗх музейӗнче Иван Яковлев ҫуралнӑ куна халалласа «Янра, чӑваш чӗлхи!» мероприяти ирттернӗ.
Мероприятие Элӗкри ИЯ. Яковлев ячӗлӗ вӑтам шкулта вӗренекенсем, Элӗкри ача-пӑча ӳнер шкулӗн баянисчӗ Владимир Терентьев тата вырӑнти тӗрӗҫӗсем хутшӑннӑ.
Пухӑннисене музей директорӗ Ольга Алексеева саламланӑ, Иван Яковлевӑн пуян эткерлӗхне тата чӗлхине пысӑка хурса хакламаллине палӑртса хӑварнӑ. Музей специалисчӗ Светлана Железнова чӑваш тӗррипе паллаштарнӑ. Ачасем музейра ӗслекен «Чӑваш тӗрри – чи илемли» куравпа паллашма пултарнӑ.
Унтан ачасем чӑвашсен тӗрлӗ вӑййине вылянӑ тата «Линька- линька» ташланӑ.
Кораккассинчи Людмила Андреева ӑста хӑйӗн сӑввине вуласа панӑ.
+26.3 °C