Лайӑх хыпар: Чӑваш Енри виҫӗ аслӑ шкул Атӑлҫи федераци округӗнчи чи лайӑх аслӑ шкулсен йышне кӗнӗ. Унта И.Н.Ульянов ячӗллӗ Чӑваш патшалӑх университечӗ, И.Я.Яковлев ячӗллӗ Чӑваш патшалӑх педагогика университечӗ, Чӑваш патшалӑх аграри университечӗ лекнӗ.
«РАЭКС-Аналитика» агентство ТОП-100 рейтинг хатӗрленӗ. Унта Раҫҫейри 100 чи лайӑх вӗренӳ заведенийӗ кӗнӗ. Вӗсен ӗҫӗ-хӗлне хакланӑ чухне пӗлтӗрхи кӑтартусене шута илнӗ. Ҫакна палӑртмалла: ку ТОПра ытларах – Мускаври аслӑ шкулсем. Атӑлҫи федераци округӗнчен 15 аслӑ шкул ку списока лекнӗ. Вӗсен йышӗнче Тутарстанри – тӑватӑ, Чулхулари — икӗ аслӑ шкул. Шел те, Чӑваш Енрен ҫук.
Анчах пирӗн аслӑ шкулсем локаллӑ рейтинга лекнӗ. Унта – 52 аслӑ шкул. ЧПУ – 1-мӗш, ЧППУ – 33-мӗш, Чӑваш аграри университечӗ 46-мӗш вырӑнта пулнӑ.
Чӑваш Ен Элтеперӗн Олег Николаевӑн малашне ҫӗнӗ пулӑшуҫӑ пулӗ. Кун пирки Олег Алексеевич халӑх тетелӗсенчи хӑйӗн страницисенче пӗлтернӗ.
Ку тивӗҫе Элтепер Наталия Воскресенскаяна шаннӑ. Наталия Валерьевна республикӑра «Кадрсем» наци проектне мӗнле пурнӑҫланине тӗрӗслесе тӑраканни пулӗ.
Палӑртса хӑварар: Наталия Воскресенская 2002 ҫулта И.Н. Ульянов ячӗллӗ Чӑваш патшалӑх университечӗн экономика факультетӗнчен вӗренсе тухнӑ. Хальччен вӑл ЧПУра хушма пӗлӳ паракан центр пуҫлӑхӗнче ӗҫленӗ. Вӑл – экономика ӑслӑлӑхсен кандидачӗ тата РФ Вӗренӳ министерствин Социоцентрӗн опытлӑ эксперчӗ.
И.Н.Ульянов ячӗллӗ Чӑваш патшалӑх университечӗн чӑваш тата вырӑс филологийӗпе журналистика факультечӗн студенчӗсем экзамена чӑваш наци тумӗпе килеҫҫӗ. Ку йӑлана вӗсем пилӗкмӗш ҫул ӗнтӗ тытса пыраҫҫӗ.
Студентсем вӗренме килсенех пӗлеҫҫӗ: семестр вӗҫӗнче вӗсен экзамена наци тумӗпе пымалла. Пурте ку шухӑша хапӑлласа йышӑнаҫҫӗ.
Студентсем хӑйсем ҫуралса ӳснӗ вырӑнти чӑваш наци тумне тӑхӑнма тӑрӑшаҫҫӗ. Кунсӑр пуҫне вӗҫем экзамен тӗлне хӑйсен ялӗнчи фольклора пухаҫҫӗ, унтан хатӗрленӗ материала хӳтӗлеҫҫӗ.
И.Н.Ульнов ячӗллӗ Чӑваш патшалӑх университетӗнче «Ҫӗр сывлани» курав ӗҫлеме пуҫланӑ. Кунашкал курав йӗркелес шухӑш ҫак университетра 6-мӗш курсра вӗренекен Касем Хулуд Али Алванӑн пулнӑ.
Хӗр космоса юратни унӑн ӗҫӗсенче те курӑнать. Касем Хулуд — пулас тухтӑр. Вӑл хӑйӗн ҫӗршывӗнче, Иракра, пурӑннӑ чухне Иван Айвазовскин пултарулӑхӗпе кӑсӑкланнӑ. Паллӑ ӳнерҫӗ ҫуралнӑ ҫӗршывра пулса курас тесех вӑл Раҫҫее вӗренме килнӗ.
Палӑртма кӑмӑллӑ: ЧПУра ют ҫӗршыв студенчӗн куравӗ пӗрремӗш хут йӗркеленнӗ.
Чӑваш Енри аслӑ шкулсенче, колледжсенче, шкулсенче 58 ют ҫӗршывран килнӗ 4 пине яхӑн ҫамрӑкпа ача-пӑча вӗренет. Кун пирки республикӑн вӗренӳ министрӗн ҫумӗ Максим Гришин Нацисемпе конфессисем хушшинчи канашӑн ларӑвӗнче пӗлтернӗ.
Студентсене илсен пирӗн патӑмӑра ытларах Индинчен, Туркменистанран, Ирантан, Мароккаран, Египетран тата ытти хӑш-пӗр ҫӗршывран килеҫҫӗ. 2700 ытла ҫамрӑк Чӑваш патшалӑх университетӗнче вӗренет.
Чӑваш наци телерадиокомпанийӗ валли тинех директор тупнӑ. Ку должноҫе Татьяна Молокова йышӑннӑ. Хушӑва паян республика премьерӗ Сергей Артамонов алӑ пуснӑ.
Татьяна Кирилловна – 51 ҫулта. Вӑл И.Н.Ульянов ячӗллӗ ЧПУн филологи факультетне пӗтернӗ. Журналист карьерине 1996 ҫулта «Чувашское агентство сообщений» ЗАОра пуҫланӑ. Кайран «Вырӑнти телевиденире», «Канал 5 плюсра», «Советская Чувашия» хаҫатра ӗҫленӗ. Чӑваш наци телерадиокомпанийӗнче 2012 ҫултанпа ӗҫлет.
Сӑмах май, НТРКн ҫулталӑк ҫурӑ ӗнтӗ директор пулман. Унччен ку должноҫре Алексей Гурьянов ӗҫленӗ. Халӗ вӑл – цифра аталанӑвӗн министрӗн ҫумӗ.
Чӑваш Ен спортсменки Анна Борисова Словакире иртнӗ Европа чемпионатӗнче икӗ медаль ҫӗнсе илнӗ.
Пирӗн ентеш мас-рестлинг енӗпе иртнӗ ӑмӑртура 75 килограмм тайман спортсменсемпе вӑй виҫнӗ, «кӗмӗле» тивӗҫнӗ. Унтан вӑл тӗрлӗ виҫе категорийӗнчи спортсменсемпе тупӑшса пӑхӑр медаль ҫӗнсе илнӗ.
Палӑртмалла: Анна И.Н. Ульянов ячӗллӗ Чӑваш патшалӑх университечӗн медицина факультетӗнче вӗренет.
Туркменистан хӗрӗ Чӑваш Енре аслӑ пӗлӳ илнӗ те кунтах кардиологра ӗҫлеме юлнӑ. Вӑл Ширин Мухаммедова ятлӑ. Хӗр чӑваш чӗлхине те вӗренме тытӑннӑ.
Ширин амӑшӗн ҫулне суйланӑ, пурнӑҫне медицинӑпа ҫыхӑнтарнӑ. Вӑл И. Н. Ульянов ячӗллӗ Чӑваш патшалӑх университетӗнче аслӑ пӗлӳ илнӗ. Ун хыҫҫӑн Республикӑри кардиодиспансера ӗҫе вырнаҫнӑ.
Чӑваш Ен уншӑн иккӗмӗш кил пулса тӑнӑ. «Чи ҫывӑх тусӑм – чӑваш. Ҫапла эпӗ те чӑваш чӗлхине ӑнкарма тытӑнтӑм. Чылайӑшӗ эпӗ туркмен пулнине пӗлмест, чӑваш тесе шухӑшлать», — ҫапла пӗлтернӗ Ширин.
Ҫӗмӗрлесен — кӑмӑллӑ хыпар. Хулари медицина центрне ҫамрӑк специалистсем ӗҫлеме килнӗ.
Вӗсем — Татьяна Фондеркина терапевт тата Татьяна Ушкова медсестра. Ҫамрӑк тухтӑрсем 13-мӗш терапи участокӗнче ӗҫлеме пуҫланӑ.
Татьяна Фондеркина — Хӗрлӗ Чутай районӗнчен. Кӑҫал вӑл И.Н.Ульянов ячӗллӗ Чӑваш патшалӑх университечӗн медицина факультетӗнчен вӗренсе тухнӑ.
Татьяна Ушкова вара — Ҫӗмӗрлеренех. Вӑл Шупашкарти медицина колледжӗнче тӗллевлӗ ӑс пухнӑ. Татьяна кӑҫал диплом илнӗ, кун хыҫҫӑнах Ҫӗмӗрлене ӗҫлеме таврӑннӑ.
Чӑваш Енри ӑсчахсем хирургире усӑ курмалли ҫӗнӗ инструмент шухӑшласа кӑларнӑ. Вӑл – щит евӗрлӗ пара операци тумалли монополярлӑ электрод.
Ӑна И.Н. Ульянов ячӗллӗ Чӑваш патшалӑх университечӗн вӗретекенӗсем Владимир Осипов тата Гузель Айзетуллова шухӑшласа кӑларнӑ. Электрод операцие нервсене сиенлетмесӗр тума май парать, ҫавӑн пекех ӳте пӗҫертсе ярас хӑрушлӑх та пӗчӗк.
Электрод валли патент илнӗ.
+1.3 °C