Федерацин налук службин республикӑри управленийӗ пирӗн тӑрӑхри икӗ савута панкрута кӑларасшӑн. Тавӑҫсене налукҫӑсем Чӑваш Енӗн Арбитраж судне ҫитернӗ ӗнтӗ. Вӗсене судра раштав уйӑхӗн 18-мӗшӗнче регистрациленӗ.
Шупашкарта вырнаҫнӑ Тимӗр-тӑмӑр тирпейлекен савут налукҫӑсен умӗнче 652,9 пин тенкӗ парӑм пухса тултарнӑ. Шупашкар районӗнчи Ишлей станцийӗнче вырнаҫнӑ «Техполимер» полимер композицийӗсен савучӗн парӑмӗ — 410,2 пин тенкӗ.
Маларах налукҫӑсем Ҫӗнӗ Шупашкарти строительство материалӗсен савутне панкрута кӑларасшӑн пулнӑ, анчах Арбитраж сучӗ апла тума килӗшмен.
Шупашкар хула администрацийӗ туалетсене тытса тӑма ҫитес ҫул хыснаран 6 миллион тенкӗ ытла уйӑрӗ. Ку ӗҫе пурнӑҫлакана палӑртмалли аукционра «Корал Клин» тулли мар яваплӑ общество ҫӗнтернӗ. Вӑл хулари стацинар тата куҫарса ҫӳремелли туалетсене тытса тӑма 6 миллион та 150 пин тенкӗлле килӗшнӗ. Хула администрацийӗ конкурс документацийӗнче 6,73 миллион тенкӗ сӗннӗ.
«Корал Клин» организацин яваплӑхӗнче стационарлӑ виҫӗ туалет. Вӗсем Президент бульварӗнче 1/15-мӗш ҫурта, К. Маркс урамӗнчи 24-мӗш ҫуртра, К. Иванов урамӗнчи 11-мӗш ҫуртра вырнаҫнӑ. Малтан асӑннӑ иккӗшӗ кашни кунах 10 сехетрен пуҫласа 20 сехетчен (ҫу-авӑн уйӑхсенче — 10-ран 22 сехетчен). Юлашкинчен асӑнни юпа уйӑхӗн 1-мӗшӗнчен пуҫласа ака уйӑхн 30-мӗшӗччен хупӑнать. Туалетсене талӑкра виҫӗ хутран кая мар ҫуса тасатмалла.
Автономлӑ модуллӗ туалетсем Чапаев скверӗнче, Тӗп пляжра, Кадет скверӗнче, Дорисс-паркра тата «Ҫӗнтерӳ» мемориал комплексӗнче пур. Кунсӑр пуҫне хула балансӗ ҫинче мобильлӗ туалет кабинисем — 154.
Германин тӗп хулинче, Берлинта, Шупашкарти кӑвакалсене кӑтартнӑ. Кун пирки Виктор Чугаров Фейсбукра пӗлтернӗ.
Чӑваш Енри фотограф сӑнланӑ кайӑксене Берлинта кӑна мар, Мюнхен хулинче те кӑтартнӑ.
Асӑннӑ ҫӗршыври ҫав хвласенчи метросенче «Foto des Tages» (Пӗр кунти сӑнӳкерчӗк) ярӑмпа тӗрлӗ илемпе паллаштараҫҫӗ. Шупашкар кӳлмекӗнчи кӑвакалсене нимӗҫсем ӗнер, раштавӑн 20-мӗшӗнче, пӑхса киленме пултарнӑ.
Аса илтерер: Виктор Чугаров режиссер-документалист тӗрлӗ ҫӗршывра, ҫав шутра Германире те, пулса «Чӑваш чӗлхи» фильм ӳкернӗччӗ.
Шупашкар хула администрацийӗнче ҫӗнӗ ҫын ӗҫе кӳлӗннӗ. Ҫакӑн пирки Алексей Ладыков сити-менеджер Фейсбукра пӗлтернӗ.
Алексей Ладыков хӑйӗн ҫумӗ тата аппапат ертӳҫи пулма Андрей Петрова шаннӑ.
Андрей Петров 10 ҫул ытла Шупашкар хулин Мускав район администрацийӗн пуҫлӑхӗнче ӗҫленӗ. Алексей Ладыков пӗлтернӗ тӑрӑх, ҫӗнӗ ҫум хӑйӗн ӗҫӗнче чӑн-чӑн профессионал, вӑл командӑра ӗҫлеме пӗлет, хулан аталанӑвне самай тӳпе хывма пултарӗ.
РФ Патшалӑх Думин депутачӗ Валентин Шурчанов раштав уйӑхӗн 18-мӗшӗнче кӑшӑлвируса пула вилни пирки сайтра хыпарланӑччӗ. Депутатпа хӑҫан тата ӑҫта сывпуллашассине пӗлтернӗ.
Валентин Шурчановпа ыран, раштавӑн 21-мӗшӗнче, Шупашкарти Яков Ухсай ячӗллӗ культура керменӗнче 10-12 сехетсенче сывпуллашӗҫ. КПРФӑн регионти уйрӑмӗн сайтӗнче пӗлтернӗ тӑрӑх, унта пурне те кӗртеҫҫӗ, анчах санитари нормисене пӑхӑнмалла. Депутата пытарасси патшалӑх шайӗнче иртӗ.
Аса илтерер: Валентин Шурчанов 73 ҫулта пулнӑ, вӑл Канаш районӗнчи Кивӗ Шелттем ялӗнче ҫуралнӑ.
Шупашкарти Трактор тӑвакансен проспектӗнчи лавккасенчен пӗринчен кофе тата вӑлча вӑрланӑ. Кукӑр алӑллине палӑртма видеокамера ӳкерсе илни пулӑшнӑ.
Паллӑ мар ҫын 14 банка вӑлча тата икӗ банка кофе йӑтса тухса кайнӑ. Вӑрӑ ӗҫӗпе вӑл раштав уйӑхӗн 11-мӗшӗпе 13-мӗшӗсенче аппаланнӑ. Пурӗ 10 пин тенкӗ ытлалӑх ҫаратнӑ вӑл.
Лавккари пурлӑха куҫ хывни — унччен те судпа айӑпланнӑ 30 ҫулти этем. Арҫынна тепӗр лавккара тавар вӑрлама хӑтланнӑ чуннех тытса чарнӑ. Ун тӗлӗшпе пуҫиле ӗҫ пуҫарнӑ. Вӑл ытти ҫӗрте те ҫавӑн пек пуҫтахланманнине тӗрӗслеҫҫӗ.
Чӑваш Республикин Вӗренӳ институтӗнче «Тӑван (чӑваш) чӗлхепе литературӑна вӗретмелли методика» программӑпа професси енӗпе тепӗр пӗлӳ илекенсен стажировки иртнӗ.
Стажировкӑна этнокультура вӗренӗвӗ кафедрин доценчӗ Анна Егорова ертсе пынипе ZOOM хушӑм урлӑ йӗркеленӗ.
Мероприятие вӗренӳ пособийӗсен авторӗсем хастар хутшӑннӑ. Шупашкар районӗн Кӑшавӑш шкулӗн вӗрентекенӗ Евгений Майков тата Йӗпреҫ поселокӗн 2-мӗш шкулӗн вӗрентекенӗ Алена Ядрицова чӑваш сӑмахлӑхне шкулта вӗрентес вӑрттӑнлӑхсемпе паллаштарнӑ.
Вӗренӳ институтӗнче пӗлтернӗ тӑрӑх, ҫавӑн пекех Хӗрлӗ Чутай районӗн Мишеркасси шкулӗн вӗрентекенӗ Светлана Храмова, Шупашкар хулин хавшак сывлӑхлӑ ачасен 2-мӗш шкулӗнче вӑй хуракан Ирина Матьянова, Шупашкар хулин 33-мӗш шкулӗн вӗрентекенӗ Ирина Диарова, Патӑрьел районӗн Сӑкӑт тата Туҫи шкулӗсенче чӑваш чӗлхипе литератури вӗрентекен Валентина Яковлевӑпа Надежда Кудряшова,
Елчӗк районӗн Аслӑ Елчӗк шкулӗн вӗрентекенӗ Любовь Адюкова, Элӗк районӗн Чӑваш Сурӑм шкулӗнче вӑй хуракан Алина Петрова хӑйсен ӗҫ опычӗпе паллаштарнӑ.
Шупашкарта пурӑнакан 54 ҫулти арҫын юрҫӳрен туянас тесе укҫасӑр тӑрса юлнӑ. Ултавҫӑсем унран 300 пин тенкӗ сӑптӑрса илнӗ.
Ҫак арҫын тӗнче тетелӗнче юрҫӳрен шыранӑ. Унӑн куҫӗ умне пӗр пӗлтерӳ тӗл пулнӑ: юрҫӳрен питӗ йӳнӗ тӑрать. Хайхискер сутуҫӑпа телефонпа калаҫнӑ. Лешсем илсе ҫитерсе пама шантарнӑ та ку укҫа – 300 пин тенкӗ — куҫарса панӑ. Транспорт компанийӗпе ярса парасси пирки хут килнӗ. Анчах вӗсем суя пулнӑ, сутуҫӑ телефонне те сӳнтерсе лартнӑ.
Раштавӑн 15-мӗшӗнче арҫын полицие пырса каласа кӑтартнӑ. Кун тӗлӗшпе пуҫиле ӗҫ пуҫарнӑ.
РФ Следстви комитечӗн председателӗ Александр Бастрыкин Шупашкарта пурӑннӑ 35 ҫулти арҫынна «Доблесть и отвага» медальпе чысланӑ. Шел те, паттӑр ҫын хӑй ку тӗнчере ҫук, вӑл палламан хӗрсене хурахран хӳтӗлесе вилнӗ.
Ку кӑҫал ака уйӑхӗнче Шупашкарти Октябрь: 50 ҫул урамра пулнӑ. Ӳсӗр арҫын хӗрсем ҫумне ҫулӑхма тытӑннӑ. Лешсем унпа калаҫасшӑн пулман. Арҫын вӗсене кӗленчепе пеме тытӑннӑ. Унтан ҫӗҫӗпе хӑмсарнӑ.
Хӗрсем тарма хӑтланнӑ, пулӑшу ыйтса кӑшкӑрнӑ. Ӳсерскер пӗрин хыҫҫӑн чупнӑ. Ҫакна иртсе каякан 35-ри арҫын курнӑ. Вӑл хӗрсене хӳтӗлеме пуҫланӑ. Ӳсӗрскер унпа вӑҫрҫӑнса кайнӑ. Вӑл ӑна ҫӗҫӗпе 6 хутран кая мар чикнӗ. 35-ри арҫыннӑн тусне те чикме тӑнӑ, анчах лешӗ ӑна ҫӗр ҫине ӳкерсе полици киличчен тытса тӑнӑ.
Ӗнер Шупашкартан «АККОНД» кондитер хапрӑкӗн пылакапат-ҫимӗҫне тиенӗ пуйӑс Китая тухса кайнӑ. 44 контейнера 1100 тонна ытла канихвет тата вафли тултарнӑ.
Таварӗ пуйӑсӗ малтан Забайкальскри пограничниксен станцине ҫитӗ, унтан — Китайри Шаньдун станцийӗнчи Цзинань хулана.
Шупашкартан ҫакӑн пек тулли составлӑ пуйӑс Китая ӑсанни халиччен пулман.
2021 ҫулта таварлӑ контейнерсене Шупашкартан тӑтӑш турттарма тытӑнасшӑн. Уйӑхне — 1 хутчен.
+17.3 °C