Чӑваш Енре тин ҫуралнӑ ачасене чӑваш тӗрриллӗ парне пама тытӑннӑ. Кӑҫал парнесене туянма резерв хыснинчен 19 миллион та 268,4 пин тенкӗ уйӑрнӑ. Ку хушӑва ЧР Элтеперӗ Олег Николаев алӑ пуснӑ.
Аса илтерер: унччен республика 11,9 миллион тенкӗпе 5167 парне туяннӑ. Ҫулталӑкра вара республикӑра 10 пине яхӑн ача кун ҫути курать.
Аса илтерер: тин ҫуралнӑ ачана чӑваш тӗрриллӗ вырӑн таврашӗ, ал шӑлли тата «Чӑваш Енри халӑхсен юмахӗсем» кӗнеке параҫҫӗ.
Патӑрьелте ача-пӑча лапамӗнче 9 ҫулти ача шар курнӑ. Унӑн пӳрни хӗсӗнсе ларнӑ. Шел те, пӗр пайӗ татӑлса ӳкнӗ.
Ку ӗнер Киров урамӗнчи 33-мӗш ҫурт ҫывӑхӗнче пулнӑ. Ача тӑвайккинчен ярӑннӑ. Ҫавӑн чухне пӳрни хушӑка хӗсеннӗ. Палӑртмалла: тӑвайкки ҫӗнӗ. Ҫынсем халӑх тетелӗнче каланӑ тӑрӑх, вӑл вырнаҫтарсанах авӑннӑ, хушӑк курӑнма пуҫланӑ.
Шупашкарта паян ачасен Акатуйӗ иртессине Чӑваш халӑх сайчӗ пӗлтернӗччӗ-ха. Шупашкар хулин тӗп клуб тытӑмӗнче пӗлтернӗ тӑрӑх, А.Г. Николаев паркӗнчи уяв кӑсӑклӑ иртнӗ. Ачасем валли этноквест та йӗркеленӗ. Ӑна чӑваш халӑхӗн историне, йӑли-йӗркине, культурине халалланӑ. Ачасем валли тӗрлӗ 8 лапам ӗҫленӗ.
Вера Иванова мультфильм хатӗрлессипе, Светлана Гордеева прикладной ӳнер енӗпе ӑсталӑх лаҫҫисем йӗркелени те ачасене питех те килӗшнӗ. Шупашкарти 39-мӗш вӑтам шкулта ӗҫлекен Татьяна Ильина этнокроссворд хатӗрленӗ.
Вӑйӑ картине ушкӑнпа тӑни те ачасен асӗнче юлӗ.
Запорожье облаҫӗнчи Бердянск тӑрӑхӗнчи ачасем пултаруллӑ ачасемпе ҫамрӑксен «Эткер» центрӗнче пулнӑ.
Асӑннӑ тӑрӑхри ачасем валли «Чи хастар ҫулҫӳревҫӗ» проекта пурнӑҫа кӗртеҫҫӗ. Унпа килӗшӳллӗн ҫамрӑк хӑнасем «Бригантина» сывлӑхпа вӗрентӳ лагерӗнче канаҫҫӗ, Чӑваш Енпе, пирӗн регионӑн культурипе тата историйӗпе паллашаҫҫӗ.
«Эткер» центрта ачасем унти тӗрлӗ лабораторипе (хими, биологи, мобильлӗ тата промышленность робот техникин), унти хальхи вӑхӑтри оборудованипе паллашнӑ, центрта ӗҫлекен ӑсталӑх лаҫҫисем ҫинчен пӗлнӗ.
Ачасем астрономи тата космос тытӑмӗсен, гидропоника пӳлӗмӗпе уйрӑмах кӑсӑкланса паллашнӑ.
Ҫӗртмен 7-мӗшӗнче Шупашкарти ҫурҫӗр-хӗвеланӑҫ районӗнчи паркра 3 ҫулти ача ҫухалса кайнӑ. Вӗсене шырас ӗҫе ахаль ҫынсем те хутшӑннӑ.
Александра Дамиан тата Серафима Иванова ун чухне йытӑпа уҫӑлса ҫӳренӗ. Вӗсем те ачана шыранӑ, паркра шаппӑн утса сас-чӗве итлесе пынӑ. Кӗҫех вӗсем ача макӑрнине илтнӗ. Ҫырма тӗпӗнчен илтӗнет иккен. Вӗсем унта ансан ачана тупнӑ. Пӗчӗкскер пушмакне ҫухатнӑ, йӗпенсе шӑнса хытнӑ. Питне вӑрӑм туна ҫыртса пӗтернӗ. Ача паркра 2,5 сехет ҫухалса ҫӳренӗ.
Александрӑпа Серафимӑна ШӖМ тав туса парнесем панӑ.
Паян та республикӑри ҫул ҫинче авари пулнӑ. Унта та ҫын пурнӑҫӗ татӑлнӑ.
Авари Шупашкар районӗнчи Ишлей патӗнче 9 сехет те 20 минутра пулнӑ. Малтанлӑха пӗлтернӗ тӑрӑх "Лада Гранта водителӗ сулахай еннелле ҫаврӑннӑ чухне "Фольксвагена" ҫул паман.
Аварире "Гранта" водителӗ, 63 ҫулти арҫын, вилнӗ. "Фольксваген" водителӗ тата икӗ пассажир аманнӑ. Пӗр пассажирӗ 12 ҫулта кӑна.
Паян ирхине Шупашкарти Эльмен урамӗнчи 12-мӗш ҫуртра 2-мӗш хутри хваттер ҫуннӑ. Ҫӑлавҫӑсене ҫав ҫуртрах пурӑнакан 45 ҫулти Алексей Кудашев чӗннӗ.
Арҫын хваттерте ҫынсем пулма пултарнине шута илсе алӑкран кӗме хӑтланнӑ, анчах май килмен. Урама тухсан вӑл тӗпелти чӳречерен ачасем пӑхнине курнӑ. Хваттерте вара ҫулӑм алхаснӑ. Алексей газ пӑрӑхӗ тӑрӑх хӑпарса чӳрече ҫӗмӗрнӗ те ачасене унтан кӑларнӑ. Пӗчӗкскерсем 2015 тата 2017 ҫулсенче ҫуралнӑскерсем. Сӗрӗмпе наркӑмӑшланнӑскерсене пульницӑна илсе кайнӑ.
Паян Куславкка районӗнче, Тутарстан чиккинчен инҫех мар, авари пулнӑ.
Ирхи 7 сехет те 15 минутра "Лада Калина" водителӗ автозаправкӑран тухса йывӑр тиевлӗ "Скания" машинӑран иртсе кайма тӑнӑ. Унран иртсе кайсан хирӗҫ ҫул ҫине тухса кайса йывӑр тиевлӗ тепӗр машинӑпа ҫапӑннӑ. Ҫапӑнсан хыҫалти "Скания" ҫине вирхӗнсе кайнӑ. Кайран хирӗҫ килнӗ йывӑр тиевлӗ машина минивэнпа ҫапӑннӑ.
Шел те, аварире "Калина" водителӗ тата 13 ҫулти пассажир вилнӗ.
Кӑҫал кӑрлач-ака уйахӗсенче Чӑваш Енре 3066 ача ҫуралнӑ. Пӗлтӗрхи ҫак тапхӑрпа танлаштарсан, 4 процент сахалрах: ун чухне 3193 ача кун ҫути курнӑ. Ҫапла пӗлтерет Росстат.
Кӑҫал ҫак тапхӑрта 4897 ҫын вилнӗ. Ку, пӗлтӗрхи кӑрлач-ака уйӑхӗсенчипе танлаштарсан, 15,3 процент сахалрах. Ун чухне 5779 ҫын пурнӑҫран уйрӑлнӑ.
Палӑртмалла: 2022 ҫулта республикӑра 10 пин ачаран сахалрах ҫуралнӑ. Кун пекки ҫӗнӗ ӗмӗрте пулман.
Паян 12 сехет те 55 минутра Канаш районӗнчи Карӑклӑ ялӗ ҫывӑхӗнче хӑрушӑ авари пулнӑ. Унта 63-ри арҫыннӑн, 63 ҫулти хӗрарӑмӑн тата 12-ри ачан пурнӑҫӗ татӑлнӑ.
Малтанлӑха пӗлтернӗ тӑрӑх, "Лада Веста" хирӗҫ ҫул ҫине тухса кайса "Киа Рио" машинӑна хирсе кайса бензовозпа ҫапӑннӑ. Юрать, пысӑк машинӑра бензин пулман.
Аварире вилнӗ 3 ҫын "Вестӑра" пулнӑ. Унти тепӗр 56-ри пассажира тата 6-ри ачана пульницӑна илсе ҫитернӗ. Вӗсем йывӑр суранланнӑ.
+6.3 °C