Шупашкарта пурӑнакан Вера Ятманова паян 102 ҫул тултарнӑ. Кинемее ҫав ятпа Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрӑн ӗҫченӗсем саламланӑ. Юлашки вӑхӑтра кинемее асӑннӑ учрежденин социаллӑ ӗҫченӗ киле пырса пулӑшса тӑрать.
Вера Ятманова Етӗрне районӗнче ҫуралнӑ. Вӑл вӑхӑтри нумай ҫын пек вӑрҫӑ вӑхӑтӗнчи тата ун хыҫҫӑнхи ҫулсенчи терте те курнӑ. Кайран, Ял хуҫалӑх институтӗнчен вӗренсе тухсан, зоотехникра ӗҫленӗ. Кайран вӗсем упӑшкипе Шупашкар куҫса килнӗ, кунта Электроаппаратура заводне ӗҫе вырнаҫнӑ.
Мӑшӑр икӗ хӗр ҫуратса ӳстернӗ. Паян ватӑ ҫынна мӑнукӗ тата мӑнукӗн икӗ ачи пӑхать, социаллӑ ӗҫчен вара пулӑшса тӑрать.
Халӗ ватӑ ҫын урама тухса ҫуреймест-ха, анчах хваттерте утса ҫӳрет. вӑй ҫитернӗ ӗҫе хӑех пурнӑҫлать.
«Хӗрӗхри юрату. Вӑл тата хӗрӳрех», — тесе юрлатчӗ пӗр юрӑҫ хӑй вӑхӑтӗнче. Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрти стационар уйрӑмӗнче пурӑнакан Мильковсем хӑйсен телейне 70 ҫул урлӑ каҫсан тупнӑ.
Паян та 74 ҫулти Галина Александровнӑпа 75-ри Сергей Степанович пӗрне пӗри юратса та хисеплесе, пӗр-пӗрин ҫине ӑш пиллӗн те юратуллӑн пӑхса пурӑнаҫҫӗ.
Паян республикӑра суйлав пуҫланчӗ те, суйлава та вӗсем пӗрле кайнӑ. Таҫта аякка мар-ха. Ватӑсене хӗрхенсе центр суйлав комиссийӗн членӗсене социаллӑ учреждение йыхравланӑ. Центрта унта-кунта тухса ҫуреймен ватӑсем те пурӑнаҫҫӗ-ҫке.
Шупашкарта пурӑнакан Екатерина Емелина паян, авӑн уйӑхӗн 11-мӗшӗнче, 100 ҫул тултарнӑ.
Екатерина Захаровна Улатӑрта ҫуралнӑ. Унти ял хуҫалӑх техникумӗнче, кайран Шупашкарти коопераци техникумӗнче вӗреннӗ. Потребкоопераци тытӑмӗнче ӗҫленӗ. Потребкооперацин тава тивӗҫлӗ ӗҫченӗ ята тивӗҫнӗ.
Халӗ вӑл Шупашкарта пурӑнать. Ӑна кӗрӳшӗпе мӑнукӗ пӑхаҫҫӗ. Ватӑ ҫын хӑй те ӑспа-тӑнпа пурӑнать, утса ҫӳрет. Мӑнукӗ каланӑ тӑрӑх, нумай хваттерлӗ ҫуртри хваттер виҫҫӗмӗш хутра вырнаҫнӑ та ватӑ ҫынна тухса ҫӳреме йывӑртарах.
Ватӑ ҫынна Шупашкарти тӳре-шара саламланӑ, Владимир Путинӑн открыткине те илсе ҫитернӗ. Ҫӗршыв Президенчӗ саламлани ватта пушшех те савӑнтарнӑ.
Авӑн уйӑхӗн 7-мӗшӗнче Шупашкарта пурӑнакан Валентина Андреева хӑйӗн черетлӗ ҫуралнӑ кунне уявланӑ. Юлашки вӑхӑтра ӑна хулари халӑхӑн социаллӑ ыйтӑвӗсене тивӗҫтерекен комплекслӑ центрӑн социаллӑ ӗҫченӗ Наталия Николаева пулӑшса пынӑ май хваттере тирпейлесе тӑрать.
Валентина Андреева паллӑ чӑваш ҫыравҫин, Аркадий Ӗҫхӗлӗн, хӗрӗ. Вӑл космос отраслӗнче 22 ҫул программистра ӗҫленӗ. Унӑн упӑшки, шкулта пӗрле вӗреннӗ каччӑ, лётчика вӗренсе тухнӑ. Ҫамрӑк арӑм унран юлас темен — пӗрле тухса кайнӑ. 22 ҫултан вӗсем тӑван тӑрӑха, Шупашкара, таврӑннӑ.
Мӑшӑр пӗр хӗр ҫуратса ӳстернӗ, анчах вӑл сарӑмсӑр вилнӗ. Кинемее паян юратнӑ мӑнукӗ Максим чунтан юратса пӑхать.
Шупашкарти ватӑсем хула кунӗ умӗн чӑваш эрешӗллӗ тӗрлӗ япала ӑсталама пуҫтарӑннӑ. Хитре япаласем тума вӗсене Светлана Кириллова ӗҫ инструкторӗ вӗрентнӗ.
Ӑсталӑх лаҫҫине пухӑннисем — «Манӑн социаллӑ центр» клуба ҫӳрекенсем ватӑсем.
Светлана Леонидовна каланӑ тӑрӑх, ку ӑсталӑх лаҫҫисенче икӗ тӗллеве пурнӑҫа кӗртеҫҫӗ. Пӗрремӗшӗнчен, тӑван халӑхӑн йӑли-йӗркипе паллаштарасси, тепӗр енчен, пӳрнесемпе ӗҫлени сывлӑхшӑн усӑллӑ.
Ҫӗмӗрле районӗнче пурӑнакан Ирина Антонова ватӑсем патне электроскутерпа каять.
Анат Кӑмаша ялӗнче пурӑнакан хӗрарӑм социаллӑ ӗҫчен пулса тӑрӑшать. Ҫак ӗҫе вӑл нумаях пулмасть ҫеҫ кӳлӗннӗ-ха, иккӗмӗш уйӑх ҫеҫ ӗҫлет. Ҫуран утас вырӑнне хӗрарӑм электроскутер чӗртет.
Ку транспорта зарядкӑра 4–8 сехет тытнӑ хыҫҫӑн 65 километр таран каяйрать. Пӗр сехетре вӑл 40 ҫухрӑм таран кайма пултарать.
Йӗпреҫ районӗнчи Алшик ялӗнче пурӑнакан 99 ҫулти ватта операци тума хатӗрленеҫҫӗ. Василий Иванов вӑрҫӑ ветеранӗн икӗ куҫӗ те япӑхнӑ. Унӑн катаракта пулнине палӑртна.
Республикӑри офтальмологи больницинчи тухтӑрсем катарактӑна тасатса ятарлӑ линза лартса янӑ хыҫҫӑн мучи унчченхинчен лайӑхрах курма пуҫланӑ. Унӑн куҫ чире тата пулнине кура ҫамрӑк чухнехи пек витӗр курма пуҫламан-ха, анчах унччен 8 процент ҫеҫ курна пулсан, хале 20 процент курать. Ҫавна май ватӑ ҫын тепӗр куҫне те операци тутарасшӑн. Тухтӑрсем вара хирӗҫ мар.
Шупашкарти халӑхӑн социаллӑ ыйтӑвӗсене тивӗҫтерекен комплекслӑ центрти стационар уйрӑмӗнче пурӑнакансен ҫӳҫне кастарма яланах специалистсене чӗнеҫҫӗ. Социаллӑ центр «Аспект» вӗренӳпе меслетлӗх центрӗпе туслӑ ҫыхӑну тытнӑ май унта парикмахера вӗренекенсене йыхравлать.
Социаллӑ центр ӗҫченӗ Олеся Рубцова пӗлтернӗ тӑрӑх, стажерсем ватӑсене каять тесе ӗҫлемеҫҫӗ, чунтан тӑрӑшаҫҫӗ. Вӗсен ӗҫне производство вӗрентӗвӗн ӑсти Анастасия Якимчева та тӗрӗслесе тӑрать.
«Эпӗ ҫӳҫе карелле кастарма хӑнӑхнӑ. Паян та ҫавӑн пекех касса ячӗҫ. Парикмахерские ҫитсе килме йывӑр. Питӗ пысӑк тав», - тенӗ социаллӑ учрежденире пурӑнакан 88 ҫулти Галина Демьянова.
Шупашкарта пурӑнакан Фроловсем ҫемье ҫавӑрнӑранпа 50 ҫул ҫитнине уявланӑ. Мероприяти хулари Калинин районӗнчи ЗАГС пайӗнче иртнӗ.
Екатерины Сильвестровна тата Николай Николаевич тахҫанах тивӗҫлӗ канура пулин те лара-тӑра пӗлмеҫҫӗ. Кил хуҫи «Нарспи» тата «Калинушка» ансамбльсенче юрлать, Екатерина Сильвестровна ал ӗҫӗпе аппаланать. Вал хулари халӑхӑн социаллӑ ыйтӑвӗсене тивӗҫтерекен комплекслӑ центра ҫӳрет, унта ал ӗҫӗпе аппаланать, физкультура занятийӗсене хутшӑнать.
Телейлӗ мӑшӑра саламлама хӑйсем унччен ӗҫленӗ Трактор заводӗнчен, хулари Клуб тытӑмӗнчен, Комплекслӑ центртан пырса ҫитнӗ. Унсӑр пуҫне тӑванӗсемпе тусӗсем пуҫтарӑннӑ.
Шупашкарти таксист кинемее ултавҫӑсенчен ҫӑлса хӑварнӑ.
Утӑ уйӑхӗн пуҫламӑшӗнче унӑн Шупашкартан Хусана япаласем илсе кайса пама заказ тупӑннӑ. Клиент каланӑ тӑрӑх, вӑл командировкӑна кайна, анчах кирлӗ хӑш-пӗр Шупашкарта асламӑшӗ патӗнче тӑрса юлнӑ.
Таксист япала патне пырса ҫитсен кинемей илсе тухнӑ япаларан тӗлӗнсех кайна. Вата ҫын керен рюкзак тата минтер парса янӑ.
Водителе ҫакӑ сисчӗвлентернӗ, Хусана вӗҫтерес вырӑнне вӑл полицие васканӑ. Йӗрке хуралҫисем япаласене пӑхма пуҫланӑ та минтерте 2,2 миллион тенкӗ укҫа тупнӑ.
Кинемей патне маларах ултавҫӑсем шӑнкӑравланӑ иккен, ӑна вӗсем укҫана Хусана илсе кайса декларацилемелле, тепӗр талӑкран укҫана тавӑрса парасси пирки ӗнентернӗ.
Хусанта заказа 15 тата 16 ҫулти икӗ яш илсе юлмалла пулнӑ.
-0.7 °C