Нарӑс уйӑхӗн 28-мӗшӗнче 18 сехетре Чӑваш Енӗн Наци вулавӑшӗнчи «Варкӑш» клубра «Хуҫасӑр ҫуртри сехет сасси» кӗнекене хӑтлӗҫ. Унӑн авторӗ — Дмитрий Моисеев журналист тата ҫыравҫӑ.
Ҫӗнӗ кӑларӑм Чӑваш кӗнеке издательствинче кун ҫути курнине эпир унччен пӗлтернӗччӗ-ха. Ӑна аслӑ классенчи шкул ачисем валли тесе кӑларнӑ.
Дмитрий Моисеевӑн пӗрремӗш кӗнеки 2022 ҫулта «Ют пахчари хӑмла ҫырли» ятпа пичетленсе тухнӑ. Унта авторӑн калавӗсем кӗнӗ.
Чӑваш кӗнеке издательстви «Чӑваш романӗ» литература конкурсне кӑҫал та ирттерет.
Конкурса тӑратнӑ ӗҫсем чӑвашла пулмалла, урӑх чӗлхерен чӑвашла куҫарнӑ хайлавсене пӑхса тухмӗҫ. Конкурса халиччен пичетленмен хайлавпа хутшӑнмалла.
Конкурса тӑратакан хайлавсен тематики ирӗклӗ, калӑпӑшӗ – А4 форматпа 700 страницӑран ытла мар.
Конкурс ӗҫӗсене кӑҫалхи юпа уйӑхӗн 1-мӗшӗччен (авӑн уйӑхӗн 30-мӗшӗнче юлашки кун йышӑнаҫҫӗ) fed_ol@mail.ru электрон адреспа е почтӑпа ҫак адреспа ярса памалла: 428019, Шупашкар хули, Иван Яковлев проспекчӗ, 13-мӗш ҫурт, Чӑваш кӗнеке издательстви, «Чӑваш романӗ» конкурса».
Чӑваш кӗнеке издательствинче «Асамлӑ ачалӑх» кӑларӑм пичетленсе тухнӑ. Кӑларӑмра XXI ӗмӗр пуҫламӑшӗнчи чӑваш литературинче ырми-канми тӑрӑшакан ҫыравҫӑсем ачалӑхне, асра юлнӑ вӗрентекенӗсене, пӗрремӗш хайлав ҫырнине, вӑл хӑҫан кун ҫути курнине аса илнине пичетленӗ иккен.
Кӗнекене пурӗ 37 автор кӗнӗ. Кун пирки Чӑваш кӗнеке издательствин сайтӗнче пӗлтернӗ.
«Ҫыравҫӑсене ҫуралнӑ ҫулӗсене кура вырнаҫтарса тухнӑ. Темиҫе автор пӗр ҫултах ҫуралнӑ пулсан – уйӑхне кура. Ҫапла майпа вӗсем ӳснӗ вӑхӑт уҫҫӑн курӑнать. Чылайӑшӗн пирвайхи хайлавне илсе панӑ. Вӗсене е автор аса илсе ҫырнӑ, е хаҫат-журналта пичетленнине тӗпе хунӑ. Пичетленнӗ хайлавсене улӑштармасӑрах кӗртнӗ, ҫавӑнпа та аслӑ ҫулти ҫыравҫӑсен сӑвви-калавне вӑл вӑхӑтри пекех хӑварнӑ.
Кӗнекере ҫыравҫӑсен биографийӗсем пур. Кӑларӑма Чӑваш, Тутар, Пушкӑрт республикисенчи, Чӗмпӗрпе Самар облаҫӗсенчи чӑваш ҫыравҫисен асаилӗвӗсене кӗртнӗ», – пӗлтернӗ умсӑмахра кӗнеке издательствин тӗп редакторӑн ҫумӗ Ольга Федорова.
Чӑваш чӗлхи вӗренме тинтерех тытӑннисем валли сире 1-мӗш класс валли хатӗрленӗ интерактивлӑ хӑнӑхтарусен пуххи вырӑнлӑ пулмалла. Ӑна А.Блинов (Алпарух) тата унӑн ушкӑнӗ ҫырнӑ вӗренӳ пособийӗ тӑрӑх йӗркеленӗ. Хӑнӑхтарусене Шупашкар хулинчи 40-мӗш вӑтам шкулти чӑваш чӗлхипе литературине вӗрентекен Римма Гаврилова тунӑ. Ку хыпара Александр Степанов чӑваш чӗлхи вӗрентекенӗ халӑх тетелӗнчи хӑйӗн страницинче пӗлтернӗ.
«1-мӗш класс валли эпӗ пурӗ 34 вӑйӑ йӗркелерӗм. Ачасен ҫул тата пӗлӳ шайне шута илсе вӗсене ансатрах тума тӑрӑшрӑм. Вӗсем пӗрремӗш класра вӗренекенсем валли кӑсӑклӑ пулччӑр терӗм. Ку вӑйӑсемпе урокӑн кирек хӑш тапхӑрӗнче те усӑ курма пулать. Вӗсем ачасене урокра мӗн вӗреннине килте ҫирӗплетме те меллӗ», — пӗлтернӗ вӑл.
Николай Максимов писателӗн кӗнекине мӑкшӑсем кун ҫути кӑтартӗҫ.
«Пӗчӗкшерӗн мӑкшӑ ҫыравҫи пулса тӑратӑп. Мӑкшӑ Республикинчи кӗнеке издательстви манӑн «Сокровища юродивого» черетлӗ (виҫҫӗмӗш) романа пичетлесе кӑларма палӑртса хунӑ. Вӑл кӑҫалхи ҫур ҫулта пичетленсе тухмалла. Жанрӗ — мистикӑлла-приключенилле», — пӗлтернӗ автор халӑх тетелӗнчи хӑйӗн страницинче.
Мӑкшӑ Республикинчи кӗнеке издательствин кӗнекисем ҫӗршывӗпех сарӑлаҫҫӗ-мӗн.
Кӑрлач уйӑхӗн 28-мӗшӗнче ЧР Наци вулавӑшӗ ҫумӗнче йӗркеленнӗ «Варкӑш» литература клубӗнче ҫамрӑк ҫыравҫӑн, журналистӑн Дмитрий Моисеевӑн «Хуҫасӑр ҫуртри сехет сасси» кӗнекине сӳтсе явӗҫ.
Кӗнекене 12 хайлав кӗнӗ: «Хӗл чӗппи», «Наркоз витӗмӗнчи тӗлӗк», «Ӗне вӑррисем», «Хуҫасӑр ҫуртри сехет сасси», «Питбайкер йыхравӗ», «Телефонри ҫыру», «Илемпи, кӗт мана», «Шанма пурте пӑрахсан та…», «Митя», «Инкек кӳнӗ тӗлӗк», «Сивӗ сӑмах», «Урасӑр салтак». Кашнинчех паянхи ҫамрӑксен пурнӑҫне, ҫивӗч ыйтӑвӗсене хускатнӑ.
Мероприяти 18 сехетре пуҫланӗ.
Чӑваш кӗнеке издательствинче «В Стране Светлого дня» кӗнеке пичетленсе тухнӑ. Унта чӑваш юмахӗсем кӗнӗ.
Ҫӗнӗ кӑларӑма тӗрлӗ ҫулта Семен Шуртаков (1918–2014), Семен Григорьев-Эсрел (1907–1996), Ольга Васильевоа, Надежда Ильина чӑвашлран вырӑсла куҫарнӑ юмахсем кӗнӗ.
Юмахсене Виктор Бритвин (1955–2023) художник илемлетнӗ, кӗнеке хуплашкине — Ирина Калентьева.
(Владислав Пастухов-Анаткас сӑввисене вуласан)
Владислав Григорьевич Пастухов-Анаткас (1954 ҫ.ҫ.) — Муркаш тӑрӑхӗн каччи, журналист, адвокат, следователь, педагог, ҫичӗ тачка кӗнеке авторӗ. Раҫҫей писателӗсен союзӗн членӗ. Ӑна Чӑваш академийӗн ретне илнӗ. Журналистсен союзӗн пайташӗ. Лара-тӑра пӗлмен ӳрӗк те ӗҫлӗ чӑваш. Умма лартнӑ тӗллевсене пӑрӑнми пурнӑҫлакан ҫын вӑл. Хӑй тӗрӗс текен шухӑшран пӑрӑнма хӑнӑхман. Ку вара пуҫлӑхсене пит тарӑхтарать. Тӳрӗлӗхе пула Владислав Григорьевич ӗҫре пӑшӑхланса курчӗ. Урӑх специальноҫа вӗренме тиврӗ унӑн, ӗҫ вырӑнне улӑштармалла пулса тухрӗ. Парӑнса хуҫӑлмарӗ. Анаткас ачи ягель шыракан пӑлансемпе пӗрле Ҫӗпӗр тайгин юрне ашса курчӗ. Якутра, Магаданра, Колымара ылтӑн приискӗсемпе шахтӑсен тусанне ҫӑтрӗ. Нушара та ырри пур, теҫҫӗ. Ҫав манӑҫми вырӑнсем ӑнӑҫлӑ сӑвӑсен ярӑмӗсене кӗрсе юлчӗҫ.
Сӑвӑҫӑн «Раҫҫей-аннемӗре пуҫ тайса: сӑвӑсемпе поэма» ятлӑ чӑвашла-вырӑсла пысӑк кӗнекене (Ш., «Ҫӗнӗ вӑхӑт», 2024, 564 с.) вуласа тахҫанах хам шухӑша ҫырнӑччӗ. Ҫеҫпӗл Мишшипе Андриян Николаев юбилейӗсене халалланӑ пухчӑна, вӗсен ячӗпе ятарласа пайсем уйӑрнӑ.
Чӑваш кӗнеке издательствинче Лариса Петровӑн кӗнеки кун ҫути курнӑ. «Кун ячӗсем. Дни недели» ят панӑ ӑна.
Ҫамрӑк ҫыравҫӑ «Хыпар» издательство ҫуртӗнче ӗслет.
Кӗнеке издательствинче пӗлтернӗ тӑрӑх, кӑларӑма сӑвӑлла виҫӗ юмах кӗнӗ: «Кунсем выляҫҫӗ», «Кунсем ӗҫлеҫҫӗ» тата «Кунсем – хӑнара». Кӗнекепе пӗрле кун ячӗсемпе паллаштаракан карточка пуххи те пур-мӗн. Вӗсем чӑвашсен кун ячӗсем мӗне пӗлтернине каласа параҫҫӗ.
Ҫӗнӗ кӑларӑм редакторӗ – Ольга Федорова, ӳнерҫи – Юлия Лутошкина.
«Пуринчен малтан» телеграм-канал пӗлтернӗ тӑрӑх, Раҫҫейри ӑслӑлӑхсен академийӗн Ҫӗпӗрти уйрӑмӗн филологи институчӗн наука ӗҫченӗ, журналист тата фольклорҫӑ Алексей (Элтияр) Александров кӗнеке кӑларма хатӗрленет. Элтияр вӑл мӗн пири пулнине пӗлтернӗ: вулакансене чӑваш мифологийӗпе паллаштарасшӑн.
Кӗнеке 7 пин экземплярпа ьухӗ. Вӑл Мускаври «МИФ» издательствӑра кун пичетленӗ.
+6.3 °C