Ҫак кунсенче Ҫеҫпӗл Мишши фончӗ вулакана тата тепӗр паха кӗнеке парнелерӗ. Ку вӑл — Чӑваш АССРӗн К.В.Иванов ячӗллӗ Патшалӑх премийӗн лауреачӗн Куҫма Турханӑн (1915–1988 ҫҫ.) «Сӗве Атӑла юхса кӗрет» трилоги-романне тишкернӗ хайлавсен «Икӗ вут хушшинче» ятлӑ пуххи.
Вӗсен авторӗсем виҫҫӗшӗ те Халӑхсем хушшинчи Ҫеҫпӗл Мишши ячӗллӗ преми лауреачӗсем — Чӑваш Республикин искусствисен тава тивӗҫлӗ деятелӗ Аристарх Дмитриев, Чӑваш халӑх поэчӗ Валери Туркай тата Тутарстан халӑх поэчӗ Ренат Харис.
Асӑннӑ авторсем виҫҫӗшӗ те К.С.Турханӑн вилӗмсӗр романне питӗ пысӑка хурса хаклаҫҫӗ, ку хайлав чӑваш, тутар, вырӑс тата ҫармӑс халӑхӗсен авалхи историне лайӑхрах пӗлме, Раҫҫейри халӑхсен туслӑхне ҫирӗплетме пулӑшнине палӑртаҫҫӗ.
Ҫеҫпӗл Мишши фончӗ ҫитес вӑхӑтра «Икӗ вут хушшинче» кӗнекене Шупашкарти филолог-студентсене тата чӑваш литературине чунтан юратакан шкул ачисене парнелеме палӑртать.
Чӑваш кӗнеке издательствинче «Тилӗ юмахӗсем. Сказки про лису» кӗнеке пичетленсе тухнӑ. Ку кӑларӑма та, ытти чылай кӗнеке евӗрех, 1000 экземпляр тиражпа кун ҫути кӑтартнӑ.
Ҫӗнӗ кӑларӑма тӑван халӑхӑмӑрӑн тилӗ ҫинчен калакан вун виҫӗ юмахӗ кӗнӗ. Вӗсене издательство ӗҫченӗ Ольга Иванова пухса йӗркеленӗ, редакторӗ те вӑлах.
Кӗнекене Юлия Лутошкинӑн ӳкерчӗкӗсемпе капӑрлатнӑ.
Чӑваш Енӗн Наци вулавӑшӗнчи «Варкӑш» клубӑн ҫак уйӑхри ларӑвӗнче Нина Артемьеван «Ӗмӗрхи кӗвӗ» кӗнекине тишкерӗҫ. Мероприяти раштав уйӑхӗн 23-мӗшӗнче 18 сехетре пуҫланӗ.
«Ӗмӗрхи кӗвӗ» кӗнеке 1 пин тиражпа Чӑваш кӗнеке издательствинче кӑҫал пичетленсе тухнӑ. Асӑннӑ кӑларӑм авторӗ, Нина Артемьева (Нина Мокина), Тутарстанри Аксу районӗнчи Ҫӗмӗртлӗ ялӗнче ҫуралнӑ. Емелькинӑри тулли мар вӑтам шкултан вӗренсе тухсан Шупашкара куҫса килнӗ, пир-авӑр комбинатӗнче ӗҫленӗ, каҫхи вӑтам шкулта вӗреннӗ.
Чӑваш кӗнеке издательствинче пӗлтернӗ тӑрӑх, 1977 ҫулта И.Н. Ульянов ячӗллӗ Чӑваш патшалӑх университетӗнчен вӗренсе тухнӑ хыҫҫӑн 1977–2003 ҫулсенче «Хатӗр пул» (каярахпа – «Ҫилҫунат», «Самант») журнал редакцийӗнче ӗҫленӗ. Нина Артемьева сӑввисем «Ялав», «Тӑван Атӑл» журналсенче, «Хусан», «Поэзия» альманахсенче, «Ҫӗнӗ кӗвӗ» коллективлӑ сборникра, «Чӑваш литературин антологийӗнче» (Поэзи) тата ытти кӑларӑмра пичетленнӗ.
Нина Артемьева – Раҫҫейӗн Журналистсен союзӗн, Раҫҫей Писателӗсен союзӗн пайташӗ, Марфа Трубина ячӗллӗ преми лауреачӗ.
Чӑваш патшалӑх гуманитари ӑслӑлӑхӗсен институтӗнче «Этнокультурные процессы и межэтнические отношения в Чувашской Республике: историко-социологическое исследование» коллективлӑ монографи кун ҫути курнӑ.
Социаллӑ гуманитари енӗпе тӗпчев ирттернӗ авторсем: истори наукисен докторӗ Иван Бойко, истори наукисен кандидачӗ Валентина Харитонова, филологи наукисен кандидачӗ Артем Гаврилов. Вӗсем пурте гуманитари институтӗнче ӗҫлеҫҫӗ.
Раштавӑн 7-мӗшӗнче Шупашкарти Ленин проспектӗнчи 38-мӗш ҫуртра вырнаҫнӑ «Читай-город» кӗнеке лавккинче Алексей Александровӑн (Элтияр) «Чувашские мифы от озера Аль и праздника Срухури до бога зла Шуйттана и хана волков» ятлӑ кӗнекин хӑтлавӗ иртӗ.
Автор ҫак халапсемпе мӗншӗн вулакансене паллаштарма шухӑшлани пирки каласа кӑтартӗ. Хӑтлав хыҫҫӑн унпа хӑйӗнпе калаҫма, автографлӑ кӗнекине туянма май пулӗ.
Хӑтлав 14 сехетре пуҫланать.
Чӑваш кӗнеке издательствинче «Юрататӑп аттене» кӑларӑм пичетленсе тухнӑ.
Издательство ӗҫченӗ Ольга Иванова пӗлтернӗ тӑрӑх, «унта кукаҫи-асаттене, аттене, шӑллӑм-пиччене халалланӑ калавсемпе сӑвӑсем кӗнӗ. Кӗҫӗн классенче вӗренекенсем валли тесе палӑртнӑскер аслӑраххисемшӗн те интереслӗ, усӑллӑ пулӗ».
Кӗнекене пухса хатӗрлекенӗ тата редакторӗ – Ольга Иванова. Ӳнерҫи – Татьяна Бурдина.
Ҫӗнӗ кӑларӑма 1000 экземпляр тиражпа пичетлесе кӑларнӑ.
Раштав уйӑхӗн 3-мӗшӗнче Чӑваш Енӗн наци вулавӑшӗнче Виталий Станьялпа тӗлпулу иртӗ. Вӑл — филолог, педагог, публицист, литература критикӗ, поэт та.
Виталий Петрович «На пороге памяти» кӗнекепе паллаштарӗ. Унта дневник ҫырӑвӗсем, рецензисем, статьясем кӗнӗ. Ку кӑларӑм — автор икӗ ҫул каялла кун ҫути кӑтартнӑ «Дневник прощальный» эпистоляр хроникин тӑсӑмӗ.
Кӗнеке презентацине учёнӑйсем, писательсем, краеведсем, вулавӑш, архив, музей ӗҫченӗсем, Виталий Станьял пултарулӑхне сума сӑвакансем пуҫтарӑнӗҫ.
Раштав уйӑхӗн 5-мӗшӗнче чӑваш поэзийӗн «Золотой салют колосьев…» антологине хаклама пуҫтарӑнӗҫ. Ку кӗнекене классиксен тата хальхи вӑхӑтри авторсен сӑввисем кӗнӗ. Кӗнеке хӑтлавне Халӑхсен туслӑхӗн ҫуртне (вӑл Хусанкай урамӗнчи 20-мӗш ҫуртра вырнаҫнӑ) 15 сехете чӗнеҫҫӗ.
Кӗнекене Симферополь хулинчи И. Гаспринский ячӗллӗ медиацентр кун ҫути кӑтартнӑ. Ҫӗнӗ кӑларӑма хатӗрлессие чӑваш халӑх поэчӗсем Юрий Сементер тата Светлана Асамат, Чӑваш Республикин культурӑн тава тивӗҫлӗ ӗҫченӗ Светлана Гордеева ӗҫленӗ.
Кӗнекене Константин Ивановӑн, Ухсай Яккӑвӗн, Ҫеҫпӗл Мишшин тата Петер Хусанкайӑн хайлавӗсем кӗнӗ. Унсӑр пуҫне Геннадий Айхин, Порфирий Афанасьевӑн, Алексей Воробьевӑн, Георгий Ефимовӑн, Митта Ваҫлейӗн, Стихван Шавлин, Николай Шелепин пултарулӑхӗпе паллашма пулать.
Хальхи вӑхӑтри поэтсенчен Юрий Сементерӑн, Светлана Асаматӑн, Валери Туркайӑн, Раиса Сарпин, Лидия Филиппован, Светлана Гордееван, Марина Карягинан, Валентина Белован, Лариса Петрован, Людмила Исаеван, Лидия Кубашинан, Владимир Мишшанӑн тата ыттисен сӑввисене те пичетленӗ.
Чӑваш Енӗн Наци вулавӑшӗнче чӑваш халӑх поэчӗн Ухсай Яккӑвӗн «Ҫырнисен пуххи = Собрание сочинений. Т. 8: Тӗрлӗрен» тата «Чӑваш дивизийӗ ҫинчен каласа паракан поэма = Поэма о чувашской дивизии» кӗнекисене хаклассине эпир унччен пӗлтернӗччӗ-ха.
Мероприятие писательсем, журналистсем, преподавательсем, литературоведсем, общество хастарӗсем тата студентсем хутшӑннӑ.
Ашшӗ ҫинчен ӑшшӑн аса илсе хӗрӗ, Ольга Яковлевна, хумханса каласа кӑтартнӑ. Унсар пуҫне вӑл маларах асӑннӑ икӗ кӑларӑма мӗншӗн кун ҫути кӑтартни ҫинчен ӑнлантарса панӑ.
Чӳк уйӑхӗн 18-мӗшӗнче Самар облаҫӗнчи Сызрань хулинчи чӑвашсен «Атӑл» наципе культура обществи 10 ҫулхине уявланӑ. Унта Чӑваш Енри хастарсем те хутшӑннӑ. Асӑннӑ йышра Наукӑпа искусство чӑваш наци академийӗн пайташӗсем Валентина Телей, Эльза Тарасова, Елизавета Долгова тата Щар Владимыч фотограф пулнӑ.
Чӑвашсен «Атӑл» обществине аппӑшӗпе йӑмӑкӗ ертсе пыраҫҫӗ. Председателӗ — Александра Казакова, унӑн ҫумӗ — Надежда Назарова.
Обществӑн юбилейне халалланӑ уяв Сызрань хулинчи тӗп вулавӑшра иртнӗ. Алевтина Долгова вулавӑша хӑйӗн темиҫе кӗнекине парнеленӗ: «Байдеряков род», «Сказка о волчонке Айваре», «Воробушек Чик-чирик», «Летописец», «Зов предков».
-9.7 °C