Нумах пулмасть Ладыковӑн ывӑлне Олег Ладыкова тытса чарни пирки хыпарланӑччӗ. Аса илтерер: хирӗҫсе кайнӑ ҫамрӑксен ушкӑнӗ патне полицейскисем ҫитнӗ, Ладыков-кӗҫӗннине тытса чарнӑ чухне вӑл йӗрке хуралҫине тапӑннӑ, пӗрне полици уйрӑмӗнче питрен ҫапнӑ.

Паян Шупашкар хулин сити-менеджерӗ Инстаграмри страницинче кун пирки комментари ҫырнӑ. «Ман ывӑлпа пулса иртнӗ пӑтӑрмах пирки, мӗн калаятӑп. Ман ывӑл – 18 ҫул тултарнӑ ҫын, хӑй тӗллӗнлӗхе хӑнӑхнӑ. Эпӗ пӗлнӗ тӑрӑх, вӑл айӑпне йышӑннӑ, саккунпа килӗшӳллӗн явап тытма хатӗр. Манӑн тивӗҫ ҫакӑ тесе шутлатӑп: тепӗр хутчен шар курнӑ ҫынсенчен каҫару ыйтатӑп», - ҫапла ҫырнӑ сити-менеджер.

2017 ҫулхи авӑн уйӑхӗнче Красноармейски районӗнчи Янкас ялӗнче пурӑнакан 48 ҫулти арҫынна участковӑй хӗненӗ. Ҫакӑншӑн полицейски тӗлӗшпе пуҫиле ӗҫ пуҫарнӑ, ӑна должноҫӗпе ытлашши усӑ курнӑшӑн айӑпласшӑн. Пуҫиле ӗҫе следовательсем тишкерсе пӗтернӗ, суда ярса панӑ.

Преступлени тунӑ вӑхӑтра ҫак полицейски Красноармейски районӗнчи полици уйрӑмӗн участковӑйӗ пулнӑ. Авӑн уйӑхӗнче хайхискер Янкас ҫыннине общество вырӑнӗнче ӳсӗр пулнӑшӑн тытса чарнӑ та участока илсе ҫитернӗ. Анчах лешӗ ӑна унта хӗнесрен сехӗрленсе ӳкнӗ. Нумай шухӑшласа тӑман – вӑрманалла тарнӑ вӑл. Участковӑй те парӑнман – ӳсӗр ҫынна хӑваласа ҫитнӗ те патакпа хӗненӗ.

Ку пӑтӑрмах хыҫҫӑн следстви органӗсем ҫак пӑтӑрмаха пӗтерме мерӑсем йышӑнмашкӑн представлени ҫырнӑ. Анчах участковӑя ӗҫрен кӑларман, ӑна РФ ШӖМӗн «Ҫӗрпӳ» уйрӑмне куҫарнӑ.

20-23 ҫулсенчи каччӑсем электронлӑ хатӗрпе усӑ курса машина сигнализацийӗсене сӳнтернӗ. Ҫапла майпа вӗсем «тимӗр урхамахсене» ҫаратнӑ. Кунашкал хатӗрсемпе вара Раҫҫейре пачах усӑ курма юрамасть. Каччӑсем ӑна тӗнче тетелӗ урлӑ саккас панӑ.

Ҫамрӑксем машинӑсен салонӗнчен магнитолӑсем, видеорегистраторсем, телефон лартмалли хатӗрсем йӑкӑртнӑ. Вӑрӑсем питӗ шӑппӑн ӗҫленӗ, хӑш-пӗр водитель машинӑна ҫаратнине полицейскисенчен кӑна пӗлнӗ. Юрать, ҫамрӑксене тытса чарнӑ. Пӗр водителе ҫак ҫамрӑксем иккӗлентернӗ, ҫавӑнпа вӑл кун пирки йӗрке хуралҫисене пӗлтернӗ. Полицейскисем вӗсен машинине тупнӑ, ҫамрӑксене тытса чарнӑ.

Виҫӗ каччӑна ҫичӗ эпизодпа айӑпласшӑн. Вӑрланӑ япаласен пӗр пайне ухтарнӑ чухне тупнӑ.

Канашра пурӑнакан арҫын тӗреклӗ пулас тесе мышцӑсене ӳстерекен эмелсем саккас панӑ. Анчах ҫакӑ ӑна суд сакки ҫине илсе ҫитернӗ.

Арҫын ют ҫӗршыв сайтӗнче 80 эмел тӳми тата 10 ампула саккас панӑ. Эмел йышӗнче вара пирӗн ҫӗршывра усӑ курма юраман япаласем пулнӑ.

Кӗҫех Раҫҫей почти тавар килнӗ тесе уведомлени панӑ. Арҫын саккаса илме кайнӑ. Анчах унтан тухнӑ ҫӗре ӑна полицейскисем кӗтсе тӑнӑ. Хими тӗпчевӗ палӑртнӑ тӑрӑх, эмел йышӗнче метандиенон, станозолол, тестостерон пулнӑ. Вӗсем – организма вӑйлӑ витӗм кӳрекен препаратсем, кунашкаллисемпе Раҫҫейре усӑ курма юрамасть.

Арҫын тӗлӗшпе «Вӑйлӑ витӗм кӳрекен япаласене контрабанда туни» статьяпа пуҫиле ӗҫ пуҫарнӑ.

Икӗ эрне каялла Шупашкарти 2-мӗш полици уйрӑмне 87 ҫулти арҫын пулӑшу ыйтма килнӗ. Хайхискер «ырӑ ҫын» аллине лексе шар курнӑ.

Ватӑскер каласа кӑтартнӑ тӑрӑх, пульницӑра сипленнӗ чухне вӑл ӑна тата тӑванне пӑхма килӗшнӗ арҫынпа паллашнӑ. Ҫак «ырӑ ҫын» вӗсен хваттерне темиҫе хутчен килнӗ, ҫакӑнпа усӑ курса хайхискер ваттисен укҫа хунӑ вырӑнне куҫ хывнӑ.

«Ырӑ чунлӑ» арҫын килсе ҫӳренӗ хыҫҫӑн тивӗҫлӗ канури ҫынсем 45 пин тенкӗ ҫухалнине асӑрханӑ. Леш арҫын вара шӑнкӑравласан телефона тытман, хваттере килме пӑрахнӑ.

Ваттисен укҫине вӑрлама пултарнӑ ҫынна полицейскисем часах тупса палӑртнӑ. Вӑл – Красноармейски районӗнче пурӑнакан 41 ҫулти арҫын. Унччен вӑл судпа пӗрре мар айӑпланнӑ. Халӗ ӑна тытса чарнӑ.

Паян ҫӗрле, Кӑшарнинче, Христос тӗнне ӗненекенсем вакка чӑмнӑ. Республикӑра каҫ пӑтӑрмахсӑр иртнӗ. Пакунлисен ҫапах сыхӑ пулма тивнӗ.

Вакра шыва кӗнӗ вырӑнсенче шалти ӗҫсен органӗсен 700 ытла ӗҫченӗ йӗркене пӑхса танӑ. ШӖМ пӗлтернӗ тӑрӑх, ҫӗрле йӗркене пӑснӑ 4 тӗслӗхе тупса палӑртнӑ. Вакра чӳхенме килнӗ ҫынсене тӗрӗсленӗ чухне иккӗшӗнне касакан-чикен япала тупнӑ, пӗрин ҫумра газ баллонӗ пулнӑ, тепри хунар-шокер илсе пынӑ. Ҫавӑн пекех пакунлисем 18 литр алкоголь тата спиртлӑ шӗвек туртса илнӗ.

Палӑртмалла: кӗҫӗр республикӑри 127 ялта Кӑшарни кӗлли пулнӑ, мероприятие 25 пине яхӑн ҫын хутшӑннӑ.

Кӑрлач уйӑхӗн 14-мӗшӗнче Шӑмӑршӑ районӗнчи Карапай Шӑмӑршӑ ялӗнче такамсем хурам чӳречине ҫӗмӗрсе кӗнӗ те шалта тирпейсӗрлетсе пӗтернӗ. Ҫитменнине, храмра хӗрессем, ҫӗрӗсем, ырӑ чунлӑ ҫынсем хурса хӑварнӑ укҫа тата кагор ҫухалнӑ. Полицейскисен шухӑшӗпе, ҫак ӗҫе темиҫе ҫын тунӑ. Вӗсем ҫавӑнтах 1 кӗленче кагор ӗҫсе янӑ, тепӗр кӗленчи инҫех мар йӑванса выртнӑ. Пӗтӗмпе 5 кӗленче хӗрлӗ эрех вӑрланӑ.

Пакунлисем храма ҫаратнисен йышӗнче ҫак ялтах пурӑнакан, унччен те судпа айӑпланнӑ арҫын пулма пултарассине палӑртнӑ. Шӑп ҫав вӑхӑталла Шупашкарта ҫул-йӗр патруль службин ӗҫченӗсем ӳсӗр арҫынна чарнӑ. Унӑн ҫумӗнче вӑчӑрасем, хӗрессем, ҫӗрӗсем тултарнӑ хутаҫ пулнӑ. Ӳсӗрскер тӳрре тухнӑ: вӑл священник-мӗн.

28 ҫулти арҫынна тытса чарнӑ, ун тӗлӗшпе пуҫиле ӗҫ пуҫарнӑ.

Кӑрлач уйӑхӗн 1-мӗшӗнче Шупашкарти «Садовый» микрорайонта 7 ҫулти арҫын ача ҫухалнӑ. Ашшӗ-амӑшӗ тӳрех пӑшӑрханса ӳкнӗ, полицие пӗлтернӗ. Телее, ача чӗрӗ-сывах тупӑннӑ.

Кӑнтӑрла хыҫҫӑн арҫын ача урама тухнӑ, ытти чухне вӑл картишрех выляса ҫӳренӗ, инҫе кайман. Ашшӗ-амӑшӗ вӑл картишре курӑнма пӑрахнине асӑрханӑ, шӑнкӑравлас – ача телефонне илмен.

19 сехетре 1-мӗш полици участокӗн ӗҫченӗсене ура ҫине тӑратнӑ. Ача ҫухални пирки халӑх тетелӗсенче те хыпар ҫиҫӗмле хӑвӑртлӑхпа сарӑлнӑ. Полицейскисемпе пӗрле нимеҫӗсем, ытти ҫынсем картишре, подъездсенче ачана шыранӑ.

Ҫул ҫитмен ачасемпе ӗҫлекен инспекторсем Елена Янорова тата Ольга Катякова хваттерсем тӑрӑх кайнӑ. Шӑпах ҫавӑн чухне тупнӑ та ачана. Хайхискер уҫӑлса ҫӳренӗ хыҫҫӑн ашшӗ-амӑшӗн пӗлӗшӗсем патне хӑнана кӗме шутланӑ, хуҫисене ҫывӑх ҫыннисене кун пирки пӗлтернине каланӑ. Арҫын ача хӑнара ҫывӑрса кайнӑ.

Паян, раштав уйӑхӗн 29-мӗшӗнче, 11 сехетре Ҫӗнӗ Шупашкарта Совет урамӗнчи 65-мӗш ҫурт патӗне полицейски ватӑ ҫынна ҫапса кайнӑ. Пакунли авари вӑхӑтӗнче хӑйӗн машинипе пулнӑ.

Ҫапса кайнӑ ватӑ ҫын – 72 ҫулта. ЧР ШӖМӗн официаллӑ сайтӗнче пӗлтернӗ тӑрӑх, ку авари тӗлӗшпе служба тӗрӗслевӗ ирттерӗҫ.

Юрать, пӑтӑрмахра кинемей чӗрех юлнӑ. Суранланнӑскере пульницӑна илсе ҫитернӗ. Халӗ ӗҫ-пуҫа уҫӑмлатаҫҫӗ.

Сӑмах май, нумаях пулмасть Шупашкарта Б.Хмельницкий урамӗнче ача ҫул урлӑ каҫнӑ чухне ун ҫине полицейски пырса кӗнӗ тесе сас-хура сарӑлнӑччӗ. Чӑннипе вара арҫын ача ҫул ҫинче шуса ӳкнӗ, пакунли ӑна пулӑшма тухнӑ.

ШӖМ тунӑ сӑн

Шупашкар районӗнче дачӑсене ҫаратнӑ 69 ҫулти арҫынна тытса чарнӑ. Ӑна тытма Мухтар ятлӑ йытӑ пулӑшнӑ.

ШӖМ пӗлтернӗ тӑрӑх, Кӳкеҫ ҫывӑхӗнчи дачӑра вӑрлани пирки пӗлтерсен кинолог служба йыттипе ҫула тухнӑ, оперативлӑ ушкӑн та пӗрлех пулнӑ. Вырӑна ҫитсен овчарка вӑрӑн йӗрне тупнӑ, пакунлисене ҫырма еннелле ертсе кайнӑ. Унта вара вӑрланӑ япаласене пытарнӑ-мӗн.

Ҫав вырӑнтах 69 ҫулти арҫынна тытса чарнӑ. Шӑп ҫав вӑхӑтра вӑл тата вӑрланӑ япаласене пытарма хӑтланнӑ. Полици уйрӑмне илсе ҫитерсен тивӗҫлӗ канурискер йӑлтах каласа кӑтартнӑ, айӑпне йышӑннӑ.

Халӗ полицейскисем ҫак ҫын ытти ҫакнашкал преступление тунипе туманнине тӗрӗслеҫҫӗ.