Ҫурла уйӑхӗн 11-мӗшӗнче РФ Президенчӗ Владимир Путин Олимп вӑййисенче Чӑваш Ен тата Мускав чысне хӳтӗленӗ Анжелика Сидоровӑна «Тӑван ҫӗршыв умӗнчи тава тивӗҫлӗ ӗҫсемшӗн» орденпа чысласси пирки хушу алӑ пуснӑ.
Олимп вӑййисенче шӑчӑпа сиксе кӗмӗл медаль илнӗшӗн спортсменкӑна орденӑн пӗрремӗш степенӗпе чыслама йышӑннӑ. Токиора иртнӗ ӑмӑртусенче ҫӑмӑл атлетикӑра унӑн медалӗ пӗрремӗш пулнӑ.
Ҫавӑн пекех Анжелика кӗмӗл медальшӗн 1,2 миллион тенкӗ преми илӗ, унӑн тренерӗ – 600 пин тенкӗ.
Елчӗк районӗнчи Чӑваш Тӑрӑмӗ ялӗнче пурӑнакан Илья Степанович Волков 100 ҫул тултарнӑ. Вӑл юбилейне Илле кунӗнче, ҫурла уйӑхӗн 2-мӗшӗнче, паллӑ тунӑ.
Илья Степанович – Тӑван ҫӗршывӑн Аслӑ вӑрҫин ветеранӗ. Юбилей ячӗпе ун патне РФ Президентӗнчен Владимир Путинтан саламлӑ ҫыру килнӗ. Ҫавӑн пекех ӑна парнесемпе хавхалантарнӑ.
Пӗр ӗмӗре хыҫа хӑварнӑ Илья Волков пурне те сывлӑх, 100 ҫула пурӑнса ҫитме суннӑ.
Кӑҫал та, пӗлтӗрхи пекех, РФ Президенчӗ Владимир Путин шкул ачисене 10-шар пин тенкӗ пама йышӑннӑ. Ку укҫапа ашшӗ-амӑшӗ вӗсене тумлантарӗ, шкул хатӗрӗсем илсе парӗ.
Малтан 10 пин тенке ҫурлан 15-мӗшӗнче пама тытӑнасси пирки пӗлтернӗ. Анчах Президент ку ӗҫе хӑвӑртлатма ыйтнӑ – ашшӗ-амӑшӗ кирлӗ хатӗр-хӗтӗре, тумтире хыпаланса ан туянтӑр.
Утӑ уйӑхӗн 29-мӗшӗнче Владимир Путин ӗҫлев министрӗпе Антон Котяковпа тӗл пулсан шӑпах кун пирки калаҫнӑ. Владимир Владимирович тӳлеве маларах куҫармашкӑн сӗннӗ. Министр укҫана ҫурлан 2-мӗшӗнчен куҫармашкӑн пуҫлама хатӗр пулнине пӗлтернӗ.
Сӑмах май, Чӑваш Енре ку тӳлеве 158 пин ача тивӗҫӗ.
Паян Раҫҫей Президенчӗ йӑлана кӗнӗ тӳрӗ лини ирттерчӗ. Ӑна харӑсах темиҫе МИХ эфирӗнче курма тата итлеме май килчӗ. Владимир Путин хуравланине «Пӗрремӗш», «Раҫҫей 1», «Раҫҫей 24», НТВ, ОТР, «Мир» телеканалсем, «Маяк», «Вести FM» тата «Раҫҫей радиовӗ» радиостанцисем тӳрӗ эфира кӑларчӗҫ.
4 сехете яхӑн тӑсӑлнӑ тӳрӗ линие кӗске ыйтусемпе хуравсем вӗҫлерӗҫ.
«Владимир Владимирович, телейлӗ пулма мӗн кирлӗ?», — тесе ыйтрӗ, сӑмахран, телеертӳҫӗсенчен пӗри, Екатерина Березовская. «Хӑв кирлине туйни тата хӑвна ӗҫе кӗртме пултарни», — терӗ ҫӗршыв ертӳҫи.
Наиля Аскер-заде телеертӳҫӗ вара Президент отставкӑна кайсан ӑҫта ӗҫлессипе кӑсӑкланчӗ. «Отставка хыҫҫӑн мӗн тума ӗҫлемелле? Кӑмака ҫинче ларӑп», — пулчӗ Путинӑн хуравӗ.
«Диетӑна эсир епле йышӑнатӑр?» — пӗлесшӗн пулчӗ Екатерина Березовская. Владимир Путин пурне те виҫеллӗ ҫимелле тесе шухӑшланине пӗлтерчӗ.
Ыран РФ президенчӗ Владимир Путин ҫынсен ыйтӑвӗсене хуравлӗ. Тӳрӗ лини кӑнтӑрла 12 сехетре пулӗ.
Ӑна Пӗрремӗш каналпа, «Россия 1», «Россия 24», НТВ, ОРТ, «Мир» каналсемпе курма май пулӗ. Ҫавӑн пекех радиопа итлеме пулать.
Паянхи ир валли президент патне 660 пин ытла ыйту ҫитнӗ. Чи хастаррисем – Краснодар, Новосибирск, Дагестан ҫыннисем.
Сӑмах май, пӗлтӗр пандемие пула тӳрӗ эфир иртмен. Кӑҫал вӑл 18-мӗш хут пулӗ. Ыйтусене тӳрӗ лини вӗҫленичченех йышӑнӗҫ.
Ҫитес ҫул Ҫӗнӗ ҫулта мӗнле канӑпӑр? Паллах, ҫулла кун пирки нумайӑшӗ шутламасть. Ҫапах халь пӗлни те пӑсмасть.
ТАСС пӗлтернӗ тӑрӑх, Ҫӗнӗ ҫул уявӗнче вунӑ кун кантарӗҫ. Раштавӑн 31-мӗшӗ шӑматкуна лекнӗрен канӑпӑр. Ӗҫе кӑрлач уйӑхӗн 9-мӗшӗнче тухмалла. Ҫапла 10 кун канӑпӑр.
Ҫу уйӑхӗнче, 1-9-мӗшӗсенче, уявсенче тӑватшар кун кантарӗҫ. Сӑмах май, кӑҫал РФ Президенчӗ Владимир Путин 10 кун канма ирӗк панӑччӗ.
РФ Президенчӗ Владимир Путин РФ Федераци Канашне янӑ ҫурара шкула каякан ачасене 10-шар пин тенкӗ парасси пирки пӗлтернӗччӗ, ку йыша 1-мӗш класа ҫӳреме хатӗрленекенсем те, 7-рисем, кӗнине каланӑччӗ.
Анчах Владимир Владимирович хушу проектне улшӑнусем кӗртнӗ. Ара, хӑш-пӗр ача 6 ҫултах шкула каять. Апла вӗсем те 10 пин тенке илме тивӗҫ.
«Хушу проектне улӑштарма тивет-и? Юрать. Питӗ аван. Ку пулӑшӑва 6 ҫулта шкула каякан ачасем те (норма бази ҫакна тума чармасть) тивӗҫӗҫ», - тенӗ Президент.
Сӑмах май, 10 пин тенке вӗренӳ ҫулӗ пуҫланиччен, ҫурла уйӑхӗнче, парӗҫ.
РФ Президенчӗ Владимир Путин ачаллӑ ҫемьесене тата ача кӗтекен хӗрарӑмсене укҫан пулӑшасси ҫинчен хушу алӑ пуснӑ. Кун пирки ТАСС пӗлтерет.
Аса илтерер: Владимир Путин ку категорие кӗрекен ҫынсене укҫа парасси пирки Федераци Канашне янӑ ҫырура каланӑччӗ. Хушупа килӗшӳллӗн, утӑ уйӑхӗнчен пуҫласа тулли мар ҫемьере ҫитӗнекен 8-17 ҫулсенчи ачасемшӗн уйӑхсерен пособи парӗҫ. Ку ачана уйӑхра пурӑнма кирлӗ чухлӗ виҫен ҫуррипе танлашать. Раҫҫейре вӑтамран – 5600 тенкӗ.
Пепке кӗтекен хӗрарӑмсене, шута 12 эрнеччен тӑракансене, уйӑхсерен пурӑнма кирлӗ виҫен ҫуррине тӳлеме тытӑнӗҫ. Авӑнӑн 1-мӗшӗнчен 7 ҫул тултарман ачапа больничнӑй илнӗшӗн ӗҫ укҫине 100 проценчӗпех тӳлӗҫ.
Раҫҫей Федерацийӗн Президенчӗн Владимир Путинӑн ҫу уйӑхӗн 18-мӗшӗнчи 293-мӗш Хушӑвӗпе килӗшӳллӗн Раҫҫейри мӑсӑльмансен тӗн управленийӗн, Мускаври мӑсӑльмансен тӗн управленийӗн тӗп, Чӑваш Енри организацийӗсен муфтийӗ Альбир Рифкатович Крганов «Тӑван ҫӗршыв умӗнчи тава тивӗҫлӗ ӗҫсемшӗн» II степеньлӗ орден медальне тивӗҫнӗ.
Кун пек майпа ӑна халӑхсем хушшинчи йӑла тата культура йӑли-йӗркине, халӑхсем хушшинчи туслӑха ҫирӗплетметӳпе хывнӑшӑн хаклас тенӗ.
РФ Президенчӗ Владимир Путин Чӑваш Енри икӗ ҫемьене «Ашшӗ-амӑшӗн мухтавӗ» орденпа чысланӑ. Сумлӑ наградӑна Сӗнтӗрвӑрри районӗнчи Степановсем тата Шупашкарти Терентьевсем тивӗҫнӗ.
Степановсем 27 ҫул пӗрле пурӑнаҫҫӗ. Вӗсем 7 ачана воспитани параҫҫӗ, вӗсенчен иккӗшӗ 18 ҫултан иртнӗ. Ҫемье пуҫӗ Эдаурд – харпӑр усламҫӑ, строительство тытӑмӗнче ӗҫлет. Мӑшӑрӗ Наталья та усламра тӑрӑшать, массаж тӑвать.
Терентьевсем 24 ҫул пӗрле. Вӗсен 11 ача, виҫҫӗшӗ – 18 ҫул тултарнӑ. Упӑшки Владимир ачасене пӑхать, арӑмӗ ача садӗнче кӗҫӗн воспитательте тӑрӑшать.
+10.3 °C