Паян, раштав уйӑхӗн 3-мӗшӗнче, Пӗтӗм тӗнчери инвалидсен кунӗ. Ҫавна май Шупашкарти Трактор тӑвакансен культура керменӗнче пысӑк мероприяти пулса иртнӗ. Унта тӗрлӗ пултарулӑх лаҫҫисем ӗҫленӗ кӑна мар, сусӑрсене еплерех пулӑшма май пурри ҫинчен каласа кӑтартакан кӗтессем йӗркеленӗ.
Мероприятие тӗрлӗ шайри тӳре-шара, ҫав шутра республикӑн ӗҫ министрӗ Алена Елизарова, культура министрӗ Светлана Каликова, Николай Владимиров сенатор тата ыттисем хутшӑннӑ.
Сусӑр пулсан та тӗлӗнсе каймалла тӗрлӗ енӗпе ӑста ачасемпе аслисен пултарулӑхӗпе те паллашма май килнӗ.
Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрта ӗнер, Чӑваш тӗррин кунӗнче, вата ҫынсен ал ӗҫӗсен куравӗ уҫӑлнӑ.
Стрелоксен 324-мӗш дивизийӗ урамра вырнаҫнӑ «Манӑн социаллӑ центр» клубри курава пенсионерсем хӑйсен ӗҫӗсене ҫеҫ мар, амӑшӗсенчен юлнӑ пуянлӑха та илсе пынӑ.
«Аннен тӗрленӗ ӗҫӗсемпе кунти куравра ҫынсене паллаштарма май пурри мана питех те савӑнтарать», — тенӗ Галина Деомидова.
Николай Фролов мӑшӑрӗн Екатерина Сильвестровнӑн ӗҫӗсем пирки темччен каласа кӑтартма пултарать. Вӗсен килӗнче те ал ӗҫӗсем, чӑвашла тумлантарнӑ пуканесенчен пуҫласа минтер пичӗсем таранах, пур.
Чӑваш Енре ҫуралнӑ Антон Макаров — пултаруллӑ художник. Ку сӑнукерчӗкре унӑн «Молодая Чувашка» (чӑв. Ҫамрӑк чӑваш хӗрӗ) ӗҫӗпе паллашма пулать.
Антон Владимирович Шупашкарти ӳнер училищинчен тата Питӗрти И.Е. Репин ячӗллӗ живопись, скульптура тата архитектура академи институтӗнчен вӗренсе тухнӑ. Темиҫе ҫул Питӗрти А.Л. Штиглиц ячӗллӗ патшалӑх ӳнерпе промышленность академийӗнче пӗтӗмӗшле живопись кафедринче аслӑ преподаватель пулса тӑрӑшнӑ.
Питӗрте пурӑнакан Владимир Живов чӑваш халӑх тетелӗнчи хӑйӗн страницинчен пӗлтернӗ тӑрӑх, художник регион, ҫӗршыв тата тӗнче шайӗнчи куравсене темиҫе хут та хутшӑннӑ. 2010 ҫулта ӑна Раҫҫӗйӗн художниксен союзӗн ылтӑн медалӗпе чысланӑ.
Шупашкарти Уруков урамӗнче вырнаҫнӑ Патшалӑх истори архивӗнче «Минуты счастья в четыре руки» курав уҫӑлнӑ.
Унӑн авторӗсем — пултаруллӑ та ҫамрӑк Мария Евишева тата ӑна пулӑшса пыракан художникӗ-живописҫи, педагогӗ, Ҫӗнӗ Шупашкарти Ӳнер музейӗн ӑслӑлӑх ӗҫченӗ Наталия Нагорнова.
Куравра Машӑн тӗрлӗ техникӑпа тата стильпе пурнӑҫланӑ ӗҫӗсен коллекцийӗпе паллашма пулать.
Архив директорӗ Галина Ертмакова хӗрачана пулӑшса пынӑшӑн Наталия Юрьевнӑпа Владимир Порфирьевич Нагорновсене тав тунӑ.
Сусӑр ачасене пулӑшса пыракансене ырласа ыттисем те сӑмах каланӑ.
Кӑҫал республикӑри колхоз театрӗсене пуҫарса янӑранпа 90 ҫул ҫитнине эпир унччен пӗлтернӗччӗ-ха. Аса илтерер: ҫавна Шупашкар районӗнче тӗрлӗ мероприяти ирттерчӗҫ те ӗнтӗ. Чӳк уйӑхӗн 23-мӗшӗнче вара Патӑрьелте республикӑри халӑх театрӗсен анлӑ фестивалӗ иртӗ.
Шупашкар муниципаллӑ округӗнчи Апашри халӑх театрӗн артисчӗ Владислав Кириллов халӑх тетелӗнчи хӑйӗн страницинче пӗлтернӗ тӑрӑх, СССР халӑх артисчӗ Борис Алексеев ячӗллӗ Апаш халӑх театрӗ уява хатӗрленсе Н. Угарин пьесипе лартнӑ «Юнланнӑ пӗркенчӗк» спектаклӗн пӗр сыпӑкне сцена ҫине тепӗр хут кӑларас тесе ӗҫлеме тытӑннӑ та.
Чӑваш юрӑҫи Алёна Сергеева Дивноморскра юрлать.
Алёна халӑх тетелӗнчи хӑйӗн страницинче пӗлтернӗ тӑрӑх, вӑл яланах юрлама юратнӑ.
Кирек ӑҫта пурӑнсан та чунӗ юрласшӑн,ю пулнӑ. Сыктывкарта ӗҫлесе пурӑннӑ чух аслӑ шкул преподавателӗсемпе хора ҫӳренӗ, коми юррисене шӑрантарнӑ. «Студентсем ман ҫине тӗлӗнсе пӑхатчӗҫ. Халӗ Геленджик-Дивноморскра пурӑннӑ чух вырӑс халӑх тата Кубань юррисене юрлатӑп», — пӗлтернӗ Алёна. Вӑл «Дивноморские подружки» халӑх ансамблӗнче юрлать.
Чӑваш патшалӑх юрӑпа ташӑ ансамблӗ Димитровграда концертпа кайӗ.
100 ҫулхи коллектив Самар облаҫӗнчи ҫав хулара чӳк уйӑхӗн 15-мӗшӗнче пулӗ.
Концерт программине вырӑс, чӑваш, тутар, мари, мӑкшӑ тата пушкӑрт халӑхӗсен культурипе пуянлатӗ. Паллӑ наци композиторӗсен хайлавӗсем, илемлетнӗ халӑх юррисем, хальхи вӑхӑтри композицисемте пулӗҫ. Программӑна «Пӗрлехи ҫемьере» сюита вӗҫлӗ.
Чӑваш кӗнеке издательстви ирттернӗ «Чӑваш романӗ» иккӗмӗш литература конкурсӗн ҫӗнтерӳҫи паллӑ. Кун пирки кӗнеке издательствинче пӗлтернӗ.
Пултарулӑх ӑмӑртӑвӗ ҫулталӑка яхӑн пына. Ӗҫсене 2023 ҫулхи раштав уйӑхӗн 25-мӗшӗнчен пуҫласа 2024 ҫулхи авӑн уйӑхӗн 30-мӗшӗччен йышӑннӑ.
Ххальхи чӑваш литературине тата пысӑк калӑпӑшлӑ хайлавсене аталантарас тӗллевпе ирттерекен конкурсра Ангелина Павловская паллӑ ҫыравҫӑн «Ҫутӑ ӗмӗт ҫунатлӑ» ал ҫырӑвӗ мала тухнӑ. Апла пулсан вӑл Чӑваш кӗнеке издательствинче уйрӑм кӗнекен пичетленсе тухӗ.
Шупашкар хулинчи халӑхӑн социаллӑ ыйтӑвӗсене тивӗҫтерекен комплексла центра ҫӳрекен 87 ҫулти Зинаида Васенева Мода театрӗ валли сумкӑсем ҫӗлесе илемлетет. Ал ӑстине ҫак енӗпе тӑрӑшма центрти ӗс инструкторӗ Светлана Кириллова кӑсӑклантарса янӑ Вӑл ӑна кинемейсемпе шӑрҫаран сумка хатӗрленине кӑтартнӑ.
«Пӑхрӑм та, ун пек сумка валли мӗн чухлӗ шӑрҫа кирлине курсан тӗлӗнсе кайрӑм. Эпӗ чеерех пулма тӗв турӑм, ӗҫе кӑшт ансатлатса шӑрҫа вырӑнне пусмапа та усӑ курас терӗм», - каласа кӑтартнӑ кинемей центрӑн пресс-службине.
Центра ҫӳрекен ватӑсем ӑсталакан сумкӑсене, шӗлепкесене кинемейсем Мода театрӗнче кӑтартаҫҫӗ, хӑйсен пӗлӗш-тусне те парнелеҫҫӗ.
Ыран, юпа уйӑхӗн 24-мӗшӗнче, Чӑваш Енӗн Наци вулавӑшӗнче Людмила Сачкова прозаикӑн, публицистӑн, драматургӑн, Чӑваш Республикин культура тава тивӗҫлӗ ӗҫченӗн пултарулӑхне хаклакансем пуҫтарӑнӗҫ. Автор хӑйӗн икӗ кӗнекепе кун ҫути курнӑ «Сиксе юхать Хула ҫырми» тата «Иртнӗ кунсен куҫҫулӗ» романӗпе паллаштарӗ.
Романӑн пӗрремӗш кӗнекинчи пулӑмсем XI–XIII, XVI тата XIX ӗмӗрсенче чӑваш ялӗнче пулса иртеҫҫӗ. Иккӗмӗшӗнче — Граждан вӑрҫин тапхӑрӗнче.
Мероприяти акт залӗнче 14 сехетре пуҫланӗ.
+3.3 °C