Чӑваш Енре ҫак эрнере, тата тӗрӗсрех каласан, авӑн уйӑхӗн 9-мӗшӗнче, санитари авиацийӗ ӗҫлеме тытӑнчӗ. Вертолетпа паян Ҫӗмӗрлери медицина центрӗнчен геморраги инсульчӗллӗ ҫынна Шупашкара илсе килнӗ. Йывӑр чирлӗ ҫынна Республикӑн клиника пульницине ҫитернӗ. Унта ӑна нейрохируги операци тума тивнӗ.

«Пациента илсе килме ҫул ҫинче 30 минута яхӑн иртрӗ. Васкавлӑ пулӑшу машинин каллӗ-маллӗ ҫӳресе 5 сехете яхӑн вӑхӑт иртнӗ пулӗччӗ. Васкавлӑ операци тумалла чухне вӑхӑт питех те хаклӑ», — тенӗ Чӑваш Ен Сывлӑх сыхлав министерствин телемедицина технологийӗсемпе усӑ курса пулӑшакан штатра тӑман специалисчӗ, Республикӑн клиника пульницин нейрохирургӗ Владимир Тележкин.

Ӗнер Патӑрьел районӗнчи пациента Шупашкара вертолетпа илсе килнӗ.

Чӑваш Енре пурӑнакансене грипран привика тума пуҫланӑ. Паянхи кун тӗлне 19 пине яхӑн ачана тата 360 ытла йывӑр хӗрарӑма вакцинациленӗ.

Кӑҫал хамӑр ҫӗршывра кӑларнӑ «Совигрипп» вакцинӑпа усӑ кураҫҫӗ. Ӑна ачасемпе йывӑр ҫынсем валли ятарласа туса кӑларнӑ. Чӑваш Ен Сывлӑх сыхлав министерствинче препаратра консервант тата чӗрӗ вирус ҫук, ҫавӑнпа ун хыҫҫӑн чирлеместӗн тесе ӗнентереҫҫӗ.

Прививка усси 2-3 эрнерен палӑрӗ, унӑ витӗмӗ 12 уйӑх таран пырӗ.

Вакцинӑна пульницӑсене валеҫсе панӑ. Унӑн иккӗмӗш партийӗ ҫак уйӑхӑн иккӗмӗш вунӑкунлӑхӗнче килсе ҫитмелле.

Шупашкарта вырнаҫнӑ Республикӑн каридологи диспансерӗнче Свердловск облаҫӗнчи 23 ҫулти хӗре операци тунӑ. Чӗре чирне пула вӑл кӗтмен ҫӗртен кирек хӑш вӑхӑтра вилме пултарать. Сипленсен вӑл амӑшӗ пулма ӗмӗтленет.

Шупашкарти тухтӑрсем ҫамрӑк пациентӑн ӳчӗ айне ятарлӑ монитор вырнаҫтарнӑ. Пӗчӗк флеш-карта пысӑкӑш регистратор электрокардиограмма ҫырса илӗ. Ун пек монитора 1-3 ҫуллӑха вырнаҫтараҫҫӗ.

Маларах хӗр тӗрлӗ клиникӑри никама пӑхӑнман 8 кардиохирург патне ҫитнӗ. Вӗсенчен чылайӑшӗ ятарлӑ прибор лартмаллине каланӑ-ха, анчах вырнаҫтарма килӗшмен. Пирӗн патри кардиохирургсем хӗре тӗрӗсленӗ хыҫҫӑн монитора вырнаҫтарнӑ.

Кӑшӑлвируспа чирлесе юсаннисенчен хӑшӗсен сывлӑхӗ самай хавшанӑ. Чӗре, юн тымарӗсен, сывлӑш ҫулӗсен чирӗсемпе тата ытти ҫавӑн пек амакпа нушаланакансен сывлӑхне вирус уйрӑмах халсӑрлатса хӑварнӑ.

Кӑшӑлвируспа чирленисене ҫирӗпленсе ҫитме ҫӗршыв шайӗнче ковид хыҫҫӑнхи программа йышӑннӑччӗ. Халӗ пирӗн тӑрӑхри 45 ҫын ку программӑпа усӑ курнӑ та. Тепӗр 52 ҫын малалла сипленет, 77-ӗн хӑйӗн черечӗ ҫитессе кӗтет.

Ковид хыҫҫӑнхи программӑна Хулари 1-мӗш клиника тата П.Н. Осипов ячӗллӗ Шупашкарти пӗрремӗш хула пульницисенче, ҫавӑн пекех «Надежда» тата «Чувашиякурорт»а санаторисенче ӗҫлеттерсе янӑ. Сиплев курсӗ 10 куна пырать. Стационарсенче сипленнишӗн медицина страхованийӗн шучӗпе саплаштараҫҫӗ. Санаторие каякансен тӑкакӗн 70 процентне республика хысни хӑй ҫине илнӗ. Пациентсемшӗн ҫӑмӑллӑхлӑ путевка хакӗ 10-11 пин тенке ларать.

Шупашкарти Прещидентӑн пепкеллӗх центрӗнче чӗре чирӗллӗ хӗрача ҫуралнӑ. Врачсем ӑна тӗплӗн тӗрӗсленӗ хыҫҫӑн ҫине тӑрса сиплеме тытӑннӑ. Телемедицина меслечӗпе кардиохирурги клиникисенчи специалистсемпе канашланӑ. Ҫавӑн хыҫҫӑн пепкене Раҫҫейӗн Сывлӑх сыхлав министерствин Пенза хулинче вырнаҫнӑ Федерацин чӗрепе юн тымарӗсен хирургийӗн центрне илсе кайма йышӑннӑ.

Шупашкарти пепкелӗх центрӗнче кирлӗ реанимаци оборудованийӗ, ҫав шутра реанимобильсем те, пур. Вӗсене туянма укҫана пӗлтӗр республика хыснинчен уйӑрнӑ.

Ачапа инҫе ҫула реанимаци уйрӑмӗн пуҫлӑхӗн тивӗҫне пурнӑҫлакан Наталия Скворцова анестезиолог-реаниматолог, Алина Романова медицина сестри-анестезисчӗ тата Анатолий Васильевпа Сергей Андреев водительсем ҫула тухнӑ. Федераци центрӗнче пепкене операци тунӑ. Халӗ ача хӑйне аван туять. Хӗрача ҫемьери пӗрремӗш тата кӗтнӗ ача иккен.

Республикӑн ача-пӑча клиника пульницинче Чечен Республикинчи хӗрачана операци тунӑ. Пӗчӗкскерӗн сайра тӗл пулакан чир пулнӑ. Ачан кӑкӑр клеткин форми ҫуралнӑ чухнех улшӑннӑ.

Торакопластика текен операцие ача-пӑча клиника пульницин тӗп тухтӑрӗ Анатолий Павлов (вӑл — ача-пӑча хирургӗ), Дмитрий Лукоянов анестезиолог-реаниматолог тата ача-пӑчан хирруги уйрӑмӗн заведующийӗ Иван Глазырин ирттернӗ.

Кун пек кӑткӑс операцие пульницӑра унччен те ирттернӗ. Анатолий Павлов тӗп врач кӑкӑр клеткине тытакан ятарлӑ пластина шухӑшласа кӑларма хутшӑннӑ. Унӑн патентне те илме пултарнӑ. Халӗ ҫав хатӗрпе тухтӑрсем усӑ кураҫҫӗ.

Ӗнер, ҫурла уйӑхӗн 23-мӗшӗнче, Вӑрмар районӗнчи «Аниш-Чупай» ҫул ҫинче «Лада-Приора» автомашина инкеке лекнӗ. Водитель трасса ҫинчен пӑрӑнса кайса ҫул айккине чӑмнӑ. Унта машина ҫаврӑнса ӳкнӗ.

Машинӑра пулнӑ хӗрпе каччӑна пульницӑна илсе кайнӑ. Сиплев учрежденийӗнче каччӑ тӑна кӗреймен, вилнӗ.

Шалти ӗҫсен министерствин пресс-служби пӗлтернӗ тӑрӑх, руль умӗнче 22 ҫулти каччӑ пулма пултарнӑ. Анчах вӑл ҫавна тунать иккен. Каччӑн юнӗнче эрех тупса палӑртнӑ. Унӑн водитель прави те пулман.

Пӑтӑрмах сӑлтавне пакунлисем палӑртӗҫ.

Шупашкарта вырнаҫнӑ Федерацин травматологи, ортопеди тата эндопротезировани центрӗн тухтӑрӗсем вӗҫӗмех тӗрлӗ семинара ҫӳреҫҫӗ. Хамӑр ҫӗршыври форумсене хутшӑнаҫҫе ҫеҫ мар, чикӗ леш енне те каяҫҫӗ. Хӑйсем вӗреннипе пӗрлех ыттисене те ӑсталӑха хӑнӑхтараҫҫӗ.

Ҫурла уйӑхӗн 21-22-мӗшӗсенче Хусанта «Артромастер» ассоциаци халӑхсем хушшинчи вӗрентӳ шкулне тӑваттӑмӗш хутчен йӗркеленӗ. Унта Шупашкарти Родион Драндров тухтӑр хутшӑннӑ. Тӗрлӗ регионти ӗҫтешӗсене вӑл хулпуҫҫи шӑммине ыратнине ирттернӗ чух ультрасасӑ тӗрӗслевӗпе тӗрӗс усӑ курма ирттерме вӗрентнӗ.

Шупашкарта Саранскри, Питӗрти тата ытти хӑш-пӗр хулари пек пульница пулӗ. Тӗрӗсрех каласан, унтисен проектне тӗпе хурса тӑвӗҫ.

Шупашкарта тума палӑртнӑ нумай профильлӗ 1000 вырӑнлӑх поликлиника проектне ытти регион тӗслӗхне шута илсе хатӗрлеме йышӑннӑ.

Республикӑн Сывлӑх сыхлав министерствин ӗҫченӗсем Хусанти, Саранскри, Питӗрти тата Курскри ҫавӑн пек пульницӑсемпе маларах паллашнӑ.

Ҫӗнӗ пульница хальхи вӑхӑт ыйтнисене шута илсе ҫӗкленӗ. Паллах, оборудовани те унта хальхи йышши пулӗ.

Хатӗр проект ӗҫе хӑвӑртрах кӳленме май парӗ. Шупашкарта ҫӗнӗ пульница кирлине республика Элтеперӗн тивӗҫӗсене вӑхӑтлӑх пурнӑҫлакан Олег Николаев кӑҫалхи пуш уйӑхӗнче Мускавра пулнӑ чух Раҫҫей ял хуҫалӑх министрӗн ҫумӗпе Наталья Хороваяпа сӳтсе явнӑ.

Республикӑри кардиологи диспансерӗ (вӑл Шупашкарти Гладов урамӗнче вырнаҫнӑ) Уҫӑ алӑксен кунне ирттерет. Вӑл ҫурла уйӑхӗн 15-мӗшӗнче пулӗ.

Кардиологсен, чӗрепе юн тымарӗсен хирургӗсен пулӑшӑвӗ кирлисене тухтӑрсем 8 сехетрен пуҫласа 13 сехетчен йышӑнӗҫ.

Уҫӑ алӑксен кунне кардиологи диспансерӗн регистратурине 8 (8352) 70-95-90 телефонпа шӑнкӑравласа ҫырӑнмалла.

Пациентсен паспорт, СНИЛС тата медицина полисӗ пӗрле пулмалла. Тухтӑрсене консультаци валли кирлӗ ытти документсене те (медицина картти, анализсем) илни те ытлашши пулас ҫук. Тухтӑрсем консультаци ирттернипе пӗрлех кирлӗ пулсан чӗрен электрокардиографи тӗрӗслевне ярӗҫ.