Чӑваш Енре халӑх пурнӑҫ шайне лайӑхлатасси ҫинчен хушу кӑларма хатӗрленеҫҫӗ. Ҫакӑн пирки паян Чӑваш Ен Элтеперӗ Михаил Игнатьев ӗҫ тӑвакан влаҫ органӗсен тата муниципалитетсен ертӳҫисемпе ирттернӗ канашлура пӗлтернӗ.
Ҫӗнӗрен йышӑнма палӑртнӑ документ сывлӑх сыхлавне, вӗрентӗве, культурӑна, спорта, общество инфраструктурине пырса тивӗ.
2020 ҫулта сывлӑх сыхлавне хушма укҫа 1 млрд тенкӗ яма палӑртаҫҫӗ. Вӑл тухтӑр ҫурчӗсен пурлӑхпа техника никӗсне ҫӗнетме кайӗ.
Республикӑри шкулсене ҫитес пилӗк ҫулта тӗпрен юсасшӑн. Отрасле 2020 ҫулта 1,2 миллиард тенкӗ хушма укҫа кайӗ.
Муниципалитетсен архивӗсем, вулавӑшсем, культурӑпа кану учрежденийӗсем валли 500 миллион тенкӗ уйӑрасшӑн. Спорт лапамӗсене тума тата юсаса ҫӗнетме те палӑртнӑ. Ун валли килес ҫул 500 миллион тенкӗ пӑхса хӑварасшӑн.
Ял ҫыннисене паха шывпа тивӗҫтерме килес ҫул 200 миллион тенкӗ уйӑрасшӑн.
Чӑваш Ен тӗп хулинче ҫуралнӑ Евгения Леванова тӗнче чемпионки ята пиллӗкмӗш хут тивӗҫнӗ.
Художество гимнастики енӗпе тӗнче чемпионачӗ Азербайджанри Баку хулинче иртнӗ. Унта Раҫҫей спортсменӗсем 10 ылтӑн медальтен саккӑрӑшне ҫӗнсе илнӗ. Кунсӑр пуҫне вӗсен — икӗ кӗмӗл тата виҫӗ бронза медаль. 5 мечӗкпе тунӑ хӑнӑхтарупа Раҫҫей спортсменкисем 30,00 балл пухнӑ. Ку вӑл — тӗнче чемпионачӗшӗн те, художество гимнастики енӗпе командӑсен ӑмӑртӑвӗшӗн те рекорд.
Ҫӑлтӑрлӑ ушкӑнти Шупашкар хӗрӗ — Раҫҫей тава тивӗҫлӗ спорт мастерӗ. Пултарулӑхне тӑватӑ ҫултанпа художество гимнастики енӗпе туптать вӑл. Маларах Чӑваш Енӗн художество гимнастикин республикӑри командин тӗп тренерӗ Ирина Штайнер патӗнче ӑсталӑха илнӗ. 12 ҫулта Чулхулари олимп резервӗн училищине, художество гимнастикин уйрӑмне, вӗренме кӗнӗ. Раҫҫейӗн пӗрлештернӗ командине ӑна 2017 ҫулта йышӑннӑ.
Ку шӑматкун республикӑра массӑллӑ мероприяти – «Наци кросӗ» - иртнӗ. Ӑна ҫулсеренех йӗркелеҫҫӗ.
Ҫӗнӗ Шупашкарта старта 5 пин ытла ҫын тухнӑ. Спорта юратакансене улшӑнса тӑракан ҫанталӑк та хӑратман. Чылайӑшӗ «Наци кросне» ҫемйипех хутшӑннӑ.
Ҫӗнӗ Шупашкарта старта тухнӑ чи аслӑ ҫын 78 ҫулта пулнӑ. 1941 ҫулта ҫуралнӑ хӗрарӑм тухтӑрсенчен справка илсех килнӗ. Кинемей ыттисемпе пӗрле чупнӑ.
«Наци кросне» ирттересси йӑлана кӗнине Чӑваш халӑх сайчӗ пӗлтернӗччӗ. Кӑҫал вӑл паян, авӑн уйӑхӗн 21-мӗшӗнче, пулчӗ. Мероприятие републикӑри районсемпе хуласенче пухӑннипе пӗрлех Шупашкарта та пуҫтарӑннӑ.
Пӗтӗм Раҫҫейӗпе иртекен чупӑвӑн Шупашкарти тӗп стартне Атӑл кӳлмекӗ хӗрринчи Юрӑ уйӗнче йӗркеленӗ. Ӑмӑртӑва уҫма Лана Прусакова фристайлистка хутшӑннӑ. Чӑваш Ен Элтеперӗ Михаил Игнатьев тата ыттисем те пулнӑ.
«Наци кросне» тухнисем ҫулне кура тӗрлӗ инҫӗшне ҫӗннӗ: 1, 3, 4, 6, 8, 12 километра. Чӑваш Ен Правительствинче ӗҫлекенсем те яланхиллех старта тӑнӑ. Светлана Енилина премьер-министр финишра палӑртнӑ тӑрӑх, тӳре-шара мала тухма тӗллев лартман, халӑхпа пӗрле пулас тенӗ.
Чӑваш Ен спортсменки Татьяна Александрова Русский (чӑв. «Вырӑс») ҫурмаутрав тавра иртнӗ «Русская кругосветка» ишеве хутшӑннӑ. Спортсменсем пӗр талӑк ишнӗ.
Кашни спортсмен шывра ҫур сехет ишнӗ, унтан катер ҫине хӑпарса каннӑ. Тӗнче класлӑ спорт мастерӗ Павел Комаров, хӗллехи ишев енӗпе чемпион ятне илнӗ Евгений Зозуля, Оксана Белецкая тата Руслан Зуев пӗршер сехет ишнӗ.
Старт авӑнӑн 14-мӗшӗнче ирхи 9 сехетре пулнӑ. Спортсменсем тепӗр кун ирхи 8 сехетре финиша ҫитнӗ. Пӗтӗмпе вӗсем 50 ҫухрӑм ытла парӑнтарнӑ.
Палӑртмалла: ӑмӑртӑва 21 спортсмен хутшӑннӑ. Вӗсенчен 12-шӗ ултӑ ҫул каялла Беринг пырӗ урлӑ ишнӗ. Ҫав йышра пирӗн Татьяна Александрова та пулнӑ.
«Наци кросне» ирттересси йӑлана кӗнӗ ӗнтӗ. Кӑҫал вӑл авӑн уйӑхӗн 21-мӗшӗнче иртӗ. Мероприяти републикӑри районсемпе хуласенче иртӗ. Чи пысӑк старт Шупашкарта пулӗ.
Кӑҫал та, ытти ҫулсенчи пекех, мероприяти кӳлмекре, Юрламалли уйра, иртӗ. Кроса хутшӑнакансене 8 сехет ҫурӑран пуҫласа 11-ччен регистрацилӗҫ. 11 сехет те 45 минутра мероприятие савӑнӑҫлӑ лару-тӑрура уҫӗҫ.
Чи малтан 3 ҫухрӑм чупакансем старта тухӗҫ. Вӑл 12 сехетре пуҫланӗ. Кун хыҫҫӑн тӗрлӗ ӳсӗмрисем тӗрлӗ дистанцие чупӗҫ. Юлашкинчен ҫӗнтерӳҫӗсемпе призерсене чыслӗҫ.
«Коммерсант» хаҫат пӗлтернӗ тӑрӑх, Чӑваш Енри икӗ спортсмен Пензӑри марафона хутшӑнса 500-шер пин тенке тивӗҫнӗ. Сӑмах май, ку марафон виҫҫӗмӗш хут иртнӗ.
Авӑн уйӑхӗн 8-мӗшӗнче Перьмре иртнӗ пӗтӗм тӗнчери марафона Шупашкарти Александр Новиков хутшӑнса абсолютлӑ чемпион ятне тивӗҫнӗ. Вӑл 42 ҫухрӑма 2 сехет те 20 минут та 17 ҫеккунтра парӑнтарнӑ.
Хӗрарамсен йышӗнче те Шупашкар спортсменки ҫӗнтернӗ. Вӑрмар районӗн хӗрӗ, Олимп вӑййисен призерӗ Татьяна Архипова ҫак дистанцие 2 сехет те 30 минут та 4 ҫеккунтра парӑнтарнӑ. Вӑл хӗрарӑмсен йышӗнче сезонри чи лайӑх кӑтартупа палӑрнӑ.
Авӑн уйӑхӗнче Андриян Николаев космонавта халалласа «Спица ҫинчи хӗвел» велочупу ирттересси йӑлана кӗнӗ. Кӑҫал вӑл авӑнӑн 7-мӗшӗнче пулӗ. Шӑпах ҫак кун Индири «Чандраян-2» космос аппарачӗ Уйӑх ҫине анса ларӗ. Чӑваш Енри велосипедҫӑсем ҫак ҫӗршыври «Jammu Cyclists» велосообществӑпа ҫыхӑннӑ, ҫак пулӑма «Чандраян» ятлӑ велочупупа паллӑ тума сӗннӗ.
Ҫапла майпа кӑҫал старт икӗ хулара пулӗ: Ҫӗнӗ Шупашкарта тата Индири Джамму хулинче. Икӗ хулари велосипедҫӑсем пӗр вӑхӑтра тапранса кайӗҫ, пӗрешкел ҫухрӑмсене парӑнтарӗҫ. Пирӗн патрисем Ҫӗнӗ Шупашкарти «Химик» культура ҫурчӗ умӗнче 11 сехетре старт илӗҫ. Вӗсем Сӗнтӗрвӑрри районӗнчи Шуршӑл ялне, Андриян Николаевӑн тӑван тӑрӑхне, ҫитӗҫ.
Палӑртма кӑмӑллӑ: Индири велочупӑва «Спица ҫинчи хӗвел» велоюхӑм председателӗ Вячеслав Платонов хутшӑнӗ. Вӑл ҫав ҫӗршывра ӗҫлӗ командировкӑра халӗ.
Ҫурла уйӑхӗн 26-мӗшӗнче чӑвашсен паллӑ журналисчӗ, СССР журналисчӗсен пайташӗ, спорт комментаторӗ Юрий Диомидович Плотников пурнӑҫран уйрӑлнӑ.
Юрий Диомидович республикӑра тухса тӑракан хаҫатсенче ӗҫленӗ: «Ҫамрӑк коммунист», «Советская Чувашия», «Чӑваш Ен». Шупашкарти телекурав студийӗнче те вӑй хунӑ, Чӑвашрадиора 20 ытла ҫул спорт кун кӗнекине ертсе пынӑ. Вӑл «Хыпар», «Почтовый экспресс» хаҫатсемпе, «Спортивная панорама Чувашии» журналпа, Ҫӗрпӳ районӗн «Цивильский вестник» хаҫачӗпе ҫыхӑну тытнӑ.
Юрий Плотников ҫичӗ кӗнеке кӑларнӑ, 1 пин ытла сӑвӑ ҫырнӑ. Хӑй вӑл Ҫӗрпӳ районӗнче ҫуралса ӳснӗ, унтах педагогика училищине пӗтернӗ, каярахпа И.Н.Ульянов ячӗллӗ ЧПУра ӑс пухнӑ. Кӑҫал авӑн уйӑхӗн 17-мӗшӗнче Юрий Плотников 85 ҫул тултармаллаччӗ.
Паллӑ журналистпа, спорт комментаторӗпе паян сывпуллашнӑ.
Ҫак канмалли кунсенче Францире сӗтелҫи теннисӗ енӗпе Европа чемпионачӗ вӗҫленнӗ. Унта Шупашкар пики хутшӑннӑ. Хутшӑннӑ кӑна мар, ӑмӑртуран маттур хӗрача ылтӑн медальпе таврӑннӑ.
Ӑмӑрту Страсбург хулинче иртнӗ. Ҫамрӑк спортсменсем хӑйсен пултарулӑхне виҫӗ кун хушши тӗрӗсленӗ. Унта Европӑри мӗнпур ҫӗршывран тенӗ пек хутшӑннӑ. Пурӗ 356 спортсмен ӑмӑртнӑ. Японири яш-кӗрӗмпе хӗр-упраҫ та пулнӑ.
Чӑваш Енӗн Спорт министерствин пресс-службинче пӗлтернӗ тӑрӑх, Шупашкарти Анастасия Иванова (унӑн тренерӗ — Артем Уточкин) Японири Рин Менде спорстменкӑна 3:0 шутпа выляса илнӗ. Бронза медале Румынири Мэй Россу тивӗҫнӗ.
Пӗлтӗрхи ҫавӑн пек ӑмӑртӑва та хутшӑннӑ вӑл. Ун чух бронза медале ҫӗнсе илнӗ. Раҫҫейӗн пӗрлештернӗ командинче пӗлтӗр ҫавӑн пекех Шупашкарти Юлия Пуговкина та пулнӑ.
+26.3 °C