Патӑрьел районӗнчи нумай ачаллӑ ҫемьене ҫурт туса панӑ. Ҫакӑн пек телее Иванпа Тамара Чунчурскийсем тивӗҫнӗ. Вӗсем Патӑрьел районӗнчи Сӑкӑт ялӗнче пурӑнаҫҫӗ.
Патӑрьел район администрацийӗнче пӗлтернӗ тӑрӑх, Сӑкӑт тӑрӑхӗнче Чунчурскийсемччен те нумай ачаллисене патшалӑх шучӗпе ҫурт-йӗр хӑпартса панӑ тӗслӗхсем пулнӑ. Асӑннӑ ял тӑрӑхӗнче ун пек ҫемьесен йышӗ тӑваттӑпа танлашнӑ.
Чунчурскийсем 6 ача ӳстереҫҫӗ. Иван Николаевич «Красная Знамя» ял хуҫалӑх производство кооперативӗнче ӗҫлесе тивӗҫлӗ канӑва тухнӑ. Халӗ вӑл — тивӗҫлӗ канура. Тамара Васильевна — кил хуҫи хӗрарӑмӗ, ҫул ҫитмен ачасене ӳстерет.
Ҫемьене пӳрт хӑпартса пама федераци хыснинчен 4 миллион ытларах тенкӗ уйӑрнӑ. Ҫурт лаптӑкӗ 144 тӑваткал метр ытла.
Чӑваш Енӗн Арбитраж сучӗн ертӳҫи валли 2,5 миллион тенкӗ парса машина туянӗҫ.
Автомобиль туянасси ҫинчен калакан пӗлтерӗве туянасси ҫинчен калакан сайтра пӗлтернӗ. ЧР Арбитраж сучӗ машинӑна 2,5 миллион тенкӗпе илме кӑмӑл пуррине пӗлтернӗ. Тата тӗрӗсрех каласан, унтан ытла хаклӑ марпа.
Машинӑна Раҫҫейӗн пурлӑх комитечӗн фондне парӗҫ. Автомобиле туянма укҫана федераци хыснинчен уйӑрӗҫ.
Машина комплектацийӗнче мӗн пулмаллине те палӑртса хӑварнӑ. Двигатель хӑвачӗ, сӑмахран, 195 лаша хӑватӗнчен пӗчӗк пулмалла мар. Тулли приводлине туянасшӑн. Передача курупки автомат, чӳрече тарласран ятарлӑ тытӑм тата динамиклӑ аудиотытӑм пулмалла.
Чӑваш Енӗн Арбитраж сучӗ ӗнентернӗ тӑрӑх, машинӑна туянма унчченех палӑртнӑ.
Юлашки вӑхӑтра ҫынсем лавккара ҫӑкӑр, шӑрпӑк тавраш туяннӑ чух та банк карттипе тӳлеҫҫӗ. Ҫапла пӗтӗмлетнӗ Раҫҫей Перекет банкӗн Атӑл-Вятка банкӗн пресс-центрӗнче.
Банк карттипе татаӑлакансен йышӗ пирӗн ҫӗршывра кӑҫалхи виҫҫӗмӗш кварталта пӗлтӗрхи ҫав вӑхӑтринчен 5 процент йышланнӑ. Ҫав вӑхӑтрах чекӑн вӑтам хакӗ чакса пырать. Ҫакӑ ҫынсем карттӑпа пур ҫӗрте те усӑ курма ӑнтӑлнипе ҫыхӑннӑ. Ҫӑкӑр лавккинче те, пахча ҫимӗҫ сутакансем патӗнче те карттӑпа тӳлеме май пур.
Кашни 20-мӗш ҫын аллӑн укҫа тыттарас вырӑнне карттӑ туртса кӑларать. Ҫипуҫ туянакансенчен маларах 5 проценчӗ карттӑпа усӑ курнӑ, халӗ — 66 проценчӗ.
Хӑна ҫурчӗсенче вара карттӑпа тӳлесси 1 процент чакнӑ. Анчах ҫакӑ вӑхӑтлӑх тесе шухӑшлаҫҫӗ.
Чӳкӗн 22-мӗшӗнче медтӗрӗслеве ҫӗнӗ саккунпа килӗшӳллӗн тухмалла пулӗ. Тепӗр икӗ анализ хушӑнать: наркотик тата алкоголизм ҫине. Ку кӑна мар, справка хакӗ самай ӳсӗ, 5-8 пин тенкӗ таранах.
Сӑмах май, ку таранччен водительсем справка илмешкӗн 1000-1500 тенкӗ тӑкакланӑ. Ырантан хак самай ӳснӗрен Шупашкарти тата Ҫӗнӗ Шупашкарти наркологисенче черет пысӑкланнӑ. Пурте справкӑна йӳнӗрех хакпа илсе юласшӑн.
ЧР Сывлӑх сыхлавӗн министерствин психиатри служби пӗлтернӗ тӑрӑх, психиатра медосмотр тухма хак пысӑкланмасть.
Чӑваш Енри строительство организацийӗсенчен пӗри, тулли мар яваплӑ «АЛЗА» общество, панкрута тухнӑ. Вӑл Шупашкарти «Соляное» микрорайона тунӑ.
Строительство организацине Чӑваш Енӗн Арбитраж сучӗ панкурта кӑларма чӳк уйӑхӗн 5-мӗшӗнче йышӑннӑ. Общества пуҫлӑхне Сергей Лаврентьева ӗҫрен хӑтарнӑ. Халӗ тӗп пуҫлӑх килти арестра ларать. Конкурс производствине 2020 сӳлхи чӳк уйӑхӗн 5-мӗшччен йышӑннӑ. Стройфирма парӑмӗ 40 миллион тенкӗрен иртнӗ. Конкурс управляющийӗ пулма Василий Зорова шаннӑ. Ҫырусене сак адреспа йышӑнать: 155800, Иваново облаҫӗ, Кинешма хули, Щорс урамӗ, 64-мӗш ҫурт, 99-мӗш хваттер.
«АЛЗА» «Соляное микрорайонта 108 пайҫӑна хваттерсӗр хӑварнӑ. Вӗсен укҫана конкурс управляющийӗнчен ыйтмалла. Кредиторсен реестрне ыйтса ҫырмалли вӑхӑт — 2020 ҫулхи нарӑс уйӑхӗн 16-мӗшӗччен.
Ҫул-йӗр инспекторӗнче ӗҫленӗ арҫынна ӗҫ кӑтартӑвне лайӑхлатма хӑтланнӑшӑн айӑпласшӑн. Ун тӗлӗшпе маларах РФ Пуҫиле кодексӑн икӗ статйипе пуҫиле ӗҫсем пуҫарнӑ. Ӗҫ вырӑнӗпе усӑ курнӑ тесе шухӑшлакан инспекторпа ҫыхӑннӑ ӗҫе Ҫӗмӗрле район судне ярса панӑ ӗнтӗ.
Тӗпчевҫӗсем шухӑшланӑ тӑрӑх, Ҫӗмӗрле районӗнче ҫул-йӗр инспекторӗнче ӗҫленӗ ҫын кӑҫалхи пуш, ҫу, ҫӗртме уйӑхӗсенче водительсене урӑх статьяпа явап тыттарнӑ. Лешсем ҫул-йӗр правилине пӑснӑ: хӑрушсӑрлӑх пиҫиххине ҫыхӑнман, чарӑнма юраман ҫӗрте чарӑннӑ, страхламан машинӑпа ҫула тухнӑ. Вӑл вара вӗсене ҫуран ҫӳрекен ҫын ҫул-йӗр правилине пӑснӑ евӗр ҫырса панӑ. Ҫавӑншӑн лешсене 500-шер тенкӗ штраф ҫырса панӑ.
Шанчӑкран тухнӑ хыҫҫӑн инспектора ӗҫрен кӑларнӑ.
РФ Следстви комитечӗн Чӑваш Енри тӗпчевҫисем «Чӑвашавтотранс» шӑпишӗн яваплисене шыраҫҫӗ. Тӗрӗслев материалӗсене Чӑваш Ен прокуратури тӑратнӑ. Ҫавна тӗпе хурса тӗпчевҫӗсем пуҫиле ӗҫ пуҫарнӑ.
Тӗпчевҫӗсем шухӑшланӑ тӑрӑх, 2014 ҫулхи кӑрлач уйӑхӗнчен пуҫласа 2018 ҫулхи авӑн уйӑхӗччен Чӑваш Енӗн Юстици тата пурлӑх хутшӑнӑвӗсен министерстви, ЧР Финанс министерстви, ЧР Транспорт тата ҫул-йӗр хуҫалӑхӗн министерстви предприятин укҫи-тенкипе тата пурлӑхӗпе (предприятин республикӑн унитарлӑ предприятийӗ пулнӑ-ҫке) кирлӗ пек хуҫаланман. Кирлӗ чухлӗ субсиди уйӑрманнине те асӑннӑ. Тӑкаклӑ тарифсем йӗркелесе предприятие тупӑшсӑр хӑварнӑ тесе шухӑшлаҫҫӗ тӗрӗслевҫӗсем.
Яваплисем кирлӗ пек тимлеменнине пула предприяти ӗҫлеме чарӑнса ларнӑ, ҫынсене вӑхӑтра шалу тӳлеймен. «Чӑвашавтотранс» ПУПра конкурс управляющийӗ ӗҫе пуҫӑннӑ вӑхӑта шалу виҫин парӑмӗ 40 миллион тенкӗрен иртнӗ. Налуксен парӑмӗ 50 миллион тенкӗрен каҫнӑ. Предприятин кредиторсен умӗнчи парӑмӗ 200 миллион тенкӗрен иртнӗ.
Пуҫиле ӗҫе РФ Пуҫиле кодексӗн 286-мӗш статйин 3-мӗш пайӗ «в» пункчӗпе килӗшӳллӗн пуҫарнӑ.
Шупашкарта пурӑнакан 56 ҫулти хӗрарӑм финанс пирамидине укҫа хывнӑ, унтан палламан ҫынна ӗненсе ӑна укҫа панӑ.
Хӗрарӑм патне палламан арҫын шӑнкӑравланӑ та микрофинанс компанийӗн ӗҫченӗ тесе паллаштарнӑ. Организаци 2018 ҫулта хупӑннӑ, хӗрарӑм вара шӑпах ӑна 180 пин тенкӗ панӑ.
Арҫын куншӑн компенсаци пулассине пӗлтернӗ. Ку кӑна мар, процентсем те тавӑрӗҫ-мӗн – 700 пин тенкӗ ытла. Анчах куншӑн укҫа куҫармалла имӗш – урӑх вкладчиксем валли.
Хӗрарӑм ҫакна ӗненсе 451 пин тенкӗ кредит илнӗ. Кун хыҫҫӑн арҫын пач ҫухалнӑ. Чӳк уйӑхӗн 17-мӗшӗнче хӗрарӑм полицие кун пирки пӗлтернӗ.
Васкакан вакка сикет теҫҫӗ те, Ҫӗмӗрле хула администрацийӗн пуҫлӑхӗ те васкас темен, те хуравламасан та юрӗ тенӗ-ши...
Хула администрацийӗн пуҫлӑхӗ хуравламанни пирки прокуратурӑна пӗр ҫын евитленӗ. Надзор органӗ ҫыру йӗрӗпе тӗрӗслев пуҫарнӑ. Чӑн та, суймасть. Вырӑнти пӗр ҫын хула администрацийӗн пуҫлӑхӗ патӗнче 2018 ҫулхи раштав уйӑхӗн 12-мӗшӗнчех пулнӑ. Унпа вӑл хулана хӑтлӑх кӗртес тата ытти ыйтӑва хускатнӑ.
Ҫавӑнтанпа ҫурхи шыв та юхса иртнӗ, тепӗр хӗл те ҫывхарнӑ. Пуҫлӑх патӗнче хайхи этем пулнӑранпа уйӑх мар (саккунпа килӗшӳллӗн ҫавӑн пек вӑхӑтра хуравламалла), ҫулталӑк ҫите пуҫланӑ.
Васкаман пуҫлӑх тӗлӗшпе вырӑнти прокуратура административлӑ ӗҫ пуҫарнӑ. Ҫавна май хула администрацийӗн пуҫлӑхне 5 пин тенкӗлӗх штрафлама йышӑннӑ.
«»
Укҫа хӑй хакне ҫухатнӑ хыҫҫӑн банкри укҫа сая кайнине вӑтам тата аслӑрах ӑрурисем аван астӑваҫҫӗ. Шупашкарти Мускав проспектӗнче тӗп офисӗ вырнаҫнӑ «Чӑвашкредитпромбанка» Раҫсей Тӗп банкӗ лицензисӗр хӑварнӑ хыҫҫӑн ҫынсем канӑҫсӑрланма пуҫларӗҫ.
Коммуналлӑ е ытти пулӑшушӑн ҫав банк урлӑ тӳленисене те меллех мар халӗ. Анчах вӗсенчен те ытла хумханаканнисем — асӑннӑ банкра укҫа тытнӑ ҫынсем. Турра шӗкӗр, асӑннӑ банк патшалӑх уйрӑм ҫынсен вклачӗсене страхлакан программӑпа усӑ курнӑ-ха. Апла пулсан, 1 миллион та 400 пин тенкӗ вкладсене страхланӑ-ха.
«Чӑвашкредитпромбанк» ыйтӑвӗпе паян Чӑваш Енӗн премьер-министрӗ Иван Моторин канашлу ирттернӗ. Ыран, нарӑс уйӑхӗн 16-мӗшӗнче, 11 сехетре Шупашкарти Яков Ухсай ячӗллӗ Культура керменӗнче вкладчиксемпе РФ Патшалӑх Думин депутачӗсем Анатолий Аксаков тата Олег Николаев тӗл пулӗҫ.
-9.7 °C