Кӳкеҫре пурӑнакан 39 ҫулти арҫын патне «инвестици консультанчӗ» шӑнкӑравланӑ. Вӑл ӑна ӗненнӗ. Ултавҫӑ пулнине кайран тин ӑнланнӑ.
Хайхи палламан ҫын Кӳкеҫ арҫыннине укҫа хывма сӗннӗ. Вӑл электрон суту-илӳ лапамӗнче хушӑнса тӑрӗ-мӗн.
Арҫын ӑна ӗненсе хӑйӗн пухӑннӑ 243 пин тенкине куҫарса панӑ. Кун хыҫҫӑн «инвестици консультанчӗ» телефона тытма пӑрахнӑ.
Арҫын хӑйне улталанине ӑнлансан полицие кайнӑ. Леш «консультант» вара укҫана каялла тавӑрма сӗнсе те шӑнкӑравланӑ. Анчах куншӑн каллех укҫа куҫармалла-мӗн. Халӗ ҫав ҫын кам пулнине палӑртаҫҫӗ.
Шупашкарти 76 ҫулти хӗрарӑм чутах ултавҫӑсене 2 пин доллар куҫарса паман. Юрать, ырӑ ҫын тӗлне лекнӗ вӑл.
Хӗрарӑмпа хӑйӗнпе Тӗп банк ӗҫченӗ тесе паллаштарнӑ ҫын калаҫнӑ. Хайхискер ӗненмелле пултӑр тесе удостоверенине те ӳкерсе ярса панӑ.
Хӗрарӑма 2 пин доллар куҫарма ӳкӗте кӗртнӗ. Ун валли илсе ҫитерекен служба ӗҫченне те чӗнсе панӑ, «банк ӗҫченӗ» ӑна кинемее укҫа куҫарса памашкӑн пулӑшма ыйтнӑ. Олег Михайлов хӗрарамӑн аллинчи укҫа пачкисене, хут ҫине ҫырнӑ счет номерне курсан тӳрех ӑнланнӑ: кинемее такамсем улталасшӑн. Вӑл полици чӗннӗ.
ЧР шалти ӗҫсен министрӗ Виктор Шметков Олег Михайлова кинемее утавҫӑсенчен хӑтарнӑшӑн тав тунӑ.
Юлашки вӑхӑтра ултавҫӑсем суд приставӗсем тесе ҫынсенчен укҫа сӑптӑрма тытӑннӑ. Вӗсем электрон рассылкӑсем яраҫҫӗ. Унта ҫыннӑн ҪҪХПИ, патшалӑх пошлини, кредит, ЖКХ штрафӗсем пурри пирки пӗлтереҫҫӗ. Ӑна часрах тӳлесе татмалла-мӗн. Унсӑрӑн счетсене е пурлӑха арестлессипе хӑратаҫҫӗ.
Штрафа тӳлемелли каҫӑ та яраҫҫӗ. Ун ҫине пуссан банк карттин реквизичӗсене ҫырмалла. Укҫа вара штраф тӳлеме мар, ултавҫӑсем патне каять.
Ҫакна астӑвӑр: суд приставӗсем электронлӑ почта, мессенджерсем урлӑ штраф тӳлемелли пирки нимӗн те ямаҫҫӗ.
Элӗк тӑрӑхӗнчи 40 ҫулти арҫын патне мессенджерта видеоҫыхӑну урлӑ «ФСБ капитанӗ» шӑнкӑравланӑ. Вӑл чаплӑ кастюм тӑхӑннӑ пулнӑ, хыҫалта РФ Президенчӗн сӑнӳкерчӗкӗ ҫакӑнса тӑнӑ. Хайхискер каланӑ тӑрӑх, унӑн счечӗпе ют ҫӗршыв ҫынни хуҫаланасшӑн. Ҫавӑнпа «ФСБ капитанӗ» «банк ӗҫченӗн» шӑнкӑравне йышӑнма хушнӑ.
Лешӗ чӑнах та шӑнкӑравланӑ. Вӑл Элӗк арҫыннине укҫана «хӑрушсӑр счет» ҫине куҫарма ыйтнӑ. Укҫа каялла таврӑнӗ-мӗн.
Арҫын банкран 4 млн тенкине илнӗ. Ку ӑна комбайн туянма кирлӗ тесе суйнӑ. Укҫана куҫарса панӑ. Ултавҫӑсен аллине лекни пирки кайран тин пӗлнӗ вӑл.
Лавккасенче ӗҫлекенсене пӗри улталаса ҫӳренӗ. Вӑл Канаш тата Ҫӗрпӳ муниципаллӑ округӗсенче улталама ӗлкӗрнӗ.
Ҫамрӑк мар арҫын суту-илӳ точкисене кӗрсе хаклӑ мар япала туяннӑ. Уншӑн вӑл 5 пин тенкӗлӗх укҫапа татӑлнӑ. Кайран тавара тӗрлӗ сӑлтав тупса каялла пырса панӑ, ҫав вӑхӑтра банкнотӑсенчен пӗр пайне вӑрласа юлнӑ. Суту-илӳ точкисене вӑл 8 пин тенкӗлӗх шар кӑтартнӑ.
Сӑнпа пӑхсан арҫын 50-55 ҫулсенче, 175-180 сантиметр ҫӳллӗш.
Арҫынна паллакансене йӗрке хуралҫисене 8 937 959 79 99 е 102 телефонпа шӑнкӑравласа пӗтерме ыйтаҫҫӗ.
Шупашкарта пурӑнакан 52 ҫулти хӗрарӑм чӳк уйӑхӗн 11-мӗшӗнче ирхине банк карточки ҫинчи 50 пин ытла тенки ҫухалнине асӑрханӑ та тӳрех полицие кайнӑ. Кӑштахран йӑлтах уҫӑмланнӑ: 9 ҫулти мӑнукӗ телефонра вӑйӑ вылянӑ иккен.
Ача вӑйӑ валютине тата суперпӑшал илес тесе палламан ҫын мӗн ҫырнине йӑлтах пурнӑҫланӑ. Ҫапла вӑл 52-ри хӗрарӑмӑн банк карттин реквизичӗсене пӗлтернӗ. Счет ҫинчи укҫа ҫийӗнчех ҫухалнӑ.
Ачан амӑшӗ кун пирки пӗлсен телефонри вӑййа тасатнӑ.
Шупашкар муниципалллӑ округӗнче пурӑнакан учитель ултавҫӑсене укҫа куҫарса парас тесе такси тытса хулана тухса кайнӑ.
Чӳк уйӑхӗн 8-мӗшӗнче 51 ҫулти хӗрарӑм патне такамсем шӑнкӑравланӑ. Вӗсем ӑна каланӑ тӑрӑх, вӑл кредит илме банка заявка панӑ, заявкӑна ҫирӗплетсе памалла. Хӗрарӑм кредит илме палӑртман тесе хуравланӑ. Ҫавӑн хыҫҫӑн ӑна вӑл ултавҫӑсен аллине лекнӗ тесе ӗнентернӗ.
Кӗҫех «Федерацин хӑрушсӑрлӑх службин ӗҫченӗ» шӑнкӑравланӑ. Вӑл ултавҫӑсене тытса чарас тесен кредит илсе парӑма тӳлемелле тенӗ. Анчах кун пирки никама та пӗлтерме хушман.
Телефонпа калаҫаканни такси чӗнсе панӑ. Хӗрарӑм унта 250 пин тенкӗ кредит илнӗ, ӑна ултавҫӑсене куҫарса панӑ. Кайран тепӗр банка кайса хӗрарӑм 450 пин тенкӗ кредит илнӗ. Ӑна та темле счёт ҫине куҫарса яма тӑнӑ та, анчах банкомат операцие чарса лартнӑ.
Ултавҫӑсем шӑнман пӑрпа такама та лартса яма пултараҫҫӗ. Вӗсен капкӑнне вӗреннисем те, вӗренменнисем те ҫакланаҫҫӗ.
Шупашкарти аслӑ пӗлӳ паракан учрежденисенчен пӗринче ӗҫлекен доцента: «Санӑн укҫу Украинӑна каять», — тесе хӑратнӑ. 64 ҫулти хӗрарӑм патне шӑнкӑравлаканни хӑйӗнпе Федерации хӑрушсӑрлӑх службин ӗҫченӗ тесе паллаштарнӑ.
Хӗрарӑма ҫав этем укҫана хӑрушсӑр счет ҫине куҫарса яма ӳкӗте кӗртнӗ. Ученӑй степеньлӗ хӗрарӑм ултавҫӑна ӗненнӗ — 2 миллион тенкӗ ытла укҫана такамсене куҫарса панӑ. Асӑннӑ суммӑн самай пайне вӑл банкран кивҫен илнӗ.
Ултавҫӑсем пирки темӗн чухлӗ асӑрхаттарсан та вӗсен капкӑнне ҫакланакансем тупӑнсах тӑраҫҫӗ. Чӳк уйӑхӗн 1-мӗшӗнче 74 ҫулти кинемей пакунлисенчен пулӑшу ыйтнӑ.
Ватӑ ҫын патне пӗри банк ӗҫченӗ тесе шӑнкӑравланӑ, эсир карттӑпа ҫыхӑнтарнӑ телефон номерне ылмаштарма заявка паман-и тесе кӑсӑкланнӑ. Кинемей ҫук тесе хуравласан, телефонпа шӑнкӑравлаканни ватӑ ҫыннӑн укҫи хӑрушлӑхра, ӑна шанчӑклӑ счёт ҫине куҫарса хумалла тесе ӗнентернӗ.
Пенсионер ҫапла майпа 1 миллион тенкӗ ытла укҫине такамсене куҫарса панӑ хыҫҫӑн шӑнкӑравлаканни: «Сирӗнпе ӗҫ вӗҫленчӗ. Сирӗн укҫӑр ют ҫӗршыва куҫса кайрӗ», — тесе сӗмсӗррӗн пӗлтернӗ.
Сӑмах май каласан, кинемей кӑҫалхи ҫӗртме уйӑхӗнче пӗрре улталаннӑ. Ун чухне вӑл 10 пине яхӑн тенке такамсене куҫарса панӑ.
Ултавҫӑсем тем те пӗр шухӑшласа кӑлараҫҫӗ. Вӗсем халӗ республикӑри икӗ министр ячӗпе суя ҫырусем яма пуҫласа кайнӑ. Ун пек ҫырусене хальлӗхе Чӑваш Енӗн ӗҫ тата социаллӑ хӳтлӗх министрӗн Алёна Елизарован тата вӗренӳ тата ҫамрӑксен политикин министрӗн Дмитрий Захаров ячӗпе янӑ.
Министрсен суя аккаунтӗнчен вӗсем йӗрке хуралҫисен тӗрӗслевӗ пирки систереҫҫӗ.
Министрсем ҫынсене ун пек ҫырусене ӗненмелле мар тесе асӑрхаттараҫҫӗ.
+28.3 °C